Masolo Ya Bansamuni Ya Kimfumu

Kusamuna na Nsungi ya Mpasi

NTUMWA Polo kutubaka na ntwala nde: “Na bilumbu ya nsuka bantangu ya mpasi tavanda.” (2 Timoteo 3:1, NW) Bangogo yai memonanaka ya masonga mpenza! Katuka ntama, bantu ya El Salvador na Amérique Centrale memonaka bukyeleka ya mambu yai ya ndudi. Kuluta kiteso ya nsungi ya bamvula kumi meluta, nsi yango kukotaka na gere sivile ya kunataka mpasi mpi lufwa na mafunda mingi ya bantu. Ntangu yai, mvita memanaka, kansi mpasi kele kaka. Kufwa ya bantu mekumaka mingi mpenza na nima ya mvita. Muntu mosi ya nsi yango ya kepesaka bansangu na televizio mekatuka kutuba nde: “Mubulu ti muyibi mekuma ntangu yai mambu ya beto kemona lumbu na lumbu.”

Mupepe yai ya kufwa bantu kebwilaka mpi Bambangi ya Yehowa. Miyibi mingi kukotaka na kingolongolo na kati ya Banzo ya Kimfumu mingi mpi bau kuyibaka bisadilu ya kuwila. Na baokazio mingi, bibuka ya baleke ya kevandaka ti minduki kukotisaka mubulu na Banzo ya Kimfumu ntangu balukutakanu ya Bukristu vandaka kusalama, bau kuyibaka mbongo, bamontele, ti bima ya nkaka ya mbalu ya bayina kuvandaka pana. Nkutu, miyibi kufwaka Bambangi mingi ntangu bau vandaka kesala bisalu na bau ya lumbu na lumbu.

Ata nkutu balukakilu yai kele, Bambangi ya Yehowa na El Salvador kefula na kusala ngolo sambu na kusamuna nsangu ya mbote. Bau kesala yau sambu na kulemfuka na ntuma ya Masonuku yina ketuba nde: “Na makanda yonso nsangu ya mbote fwete kusamunama ntete.” (Marko 13:10, NW) Na nsi yango, bantu ya kele na mpwisa ya kivuvu ya Kimfumu ya Biblia kepesa kele kaka mingi, mpi Bambangi kesala ngolo sambu na kukutana ti konso muntu na kati na bau. Kusamuna ya dibaku ya mbote kemonana nsadilu ya kusamuna mosi ya ngolo.

Ntangu yandi vandaka kubaka lusansu ya munganga na lupitalu mosi, Mbangi ya Yehowa mosi kusadilaka konso dibaku yina sambu na kusolula ti bambefo ya nkaka na yina metala balusilu ya Nzambi sambu na makwisa, mutindu yau kemonana na kati ya Biblia. Mbefo mosi ya vandaka kubela mingi mpenza kutubaka na mawa yonso nde: “Kubika fyoti mono kefwa!” Kansi kivuvu ya tombe ya mbefo yango kulembisaka ve Mbangi na kusamuna nsangu ya mbote ya Kimfumu. Na kisika ya kulemba, yandi tangilaka muntu yango na ndinga ya ngolo mambu na kati ya mukanda Nge lenda zinga mvula na mvula na ntoto yina takituka paladisu, ya mebasisamaka na Bambangi ya Yehowa. Na nima ya bilumbu, Mbangi yango kubasikaka na lupitalu, na kuyindulaka na mawa yonso nde muntu yango kuvandaka na mbeto na yandi ya lufwa.

Na nima ya bamvula iya, yau lombamaka nde Mbangi yango kwenda kubaka lusansu na lupitalu ya nkaka. Ntangu yandi vandaka kuna, mbefo mosi kupusanaka penepene ti yandi mpi yandi tubaka nde: “Keti nge keyibuka mono?” Kuvandaka muntu yina ya yandi kutanaka ti yandi bamvula iya na ntwala, muntu yina vandaka kumonana nde yandi kefwa! Inki kuyituka ya kyese ntangu muntu yango kusyamisaka yandi mpi kuyikaka nde: “Ntangu yai mono mpi kele Mbangi ya Yehowa!” Muntu yango kuyambaka kivuvu ya Biblia ya ketadila makwisa, yandi kulongukaka Biblia ti Bambangi ya Yehowa mpi yandi kupesaka luzingu na yandi na Yehowa. Yandi vandaka Mbangi ya Yehowa mpamba ve, kansi yandi vandaka mpi kusala kisalu ya kusamuna ntangu yonso bonso mupasudi nzila ya ngonda na ngonda kiteso ya bamvula zole melunga.

Na mbandu yai, bankeni ya kyeleka ya kukunamaka na mutindu ya dibaku ya mbote kukumaka na ntima mosi ya mbote. Dibaku yai ya kusadisa bantu na kubaka nzayilu ya kyeleka kepusa Bakristu ya kyeleka na kulanda kisalu ya kusamuna ata nkutu “bantangu ya mpasi” yai kele.