Kingangu Ya Kusala Bima Kabu ya Mbote ya Mekatuka na Nzambi

YEHOWA keyangalalaka na bima ya yandi kugangaka. (Bankunga 104:31) Mudindu ya luyangalalu ya yandi kevandaka na yau sambu na bima ya yandi kugangaka memonisama na Kuyantika 1:31 (NW) nde: “Nzambi kutalaka bima yonso ya yandi kugangaka mpi, tala! yau kuvandaka mbote mpenza.”

Yehowa kulundaka ve kyese yina sambu na yandi mosi kaka. Yandi kupesaka Yezu dibaku ya kukuma nsadi, to kisadilu, yina na nzila na yandi bima yonso ya nkaka kugangamaka. (Yoane 1:3; Kolosai 1:​16, 17) Bonso “Ngudi ya Nsadi,” Yezu vandaka mpi “kusepela na ntwala ya [Yehowa] ntangu yonso.”​—⁠Bingana 8:​30, 31, NW.

Kansi kingangu ya kusala bima mesuka ve kaka na zulu. Na kati ya mukanda na yandi How Creative Are You?, Eugene Raudsepp kusonikaka nde: “Yau kele kingangu ya metulama na kati ya bantu.” Yau kele ve kufwanana ya mpamba, sambu muntu kusalamaka na kifwanisu ya Nzambi. (Kuyantika 1:26) Na yau, Yehowa kutulaka na kati ya bantu kingangu ya kusala bima.​—⁠Yakobo 1:⁠17.

Yau yina, kima ya ngituka kele ve, Biblia ketuba mambu ya mbote na yina metala nkunga, makinu, kutunga, kulamba, bisalu ya maboko mpi mambu ya nkaka. (Kubasika 35:​25, 26; 1 Samuele 8:13; 18:​6, 7; 2 Bansangu 2:​13, 14) Besalele, nsadi ya bisalu ya maboko, kusadilaka nsimu na yandi sambu na “kusala bangidika” ya kupesa lusadisu na bisalu ya lutungu ya nkela ya santu. (Kubasika 31:​3, 4) Yau lenda kuvanda nde Yabale, ngungudi ya mameme, kuvandaka muntu ya ntete na kusala nzo-tenta, nzo yina mekatuka na kingangu ya kusala bima mpi yina melunga na luzingu ya nzyetolo. (Kuyantika 4:20) Davidi kuvandaka kaka ve muyimbi mpi nsadi bankunga, kansi yandi kuvandaka mpi nsadi ya nsambi ya mpa ya kuyimbila. (2 Bansangu 7:6; Bankunga 7:17; Amosi 6:⁠5) Yau lenda kuvanda mpi nde Miriami kubasisaka makinu ya kyese yina kukembisaka luguluku na mutindu ya kimpa ya bantu ya Izraele na Nzadi ya Mbwaki.​—⁠Kubasika 15:⁠20.

Kingangu ya kusala bima kevandaka mbala mingi mfunu sambu na kuyedisa lusambu ya kyeleka. Na kingangu na yandi ya kusala bima, Yezu kusadilaka bingana ti malongi ya bima sambu na kusamuna nsangu na yandi. Kiteso mosi, balongoki na yandi mesyamisama na “kusala ngolo sambu na yina metala kutuba mpi kulonga.” (1 Timoteo 5:​17, NW) Ee, kisalu na bau ya kusamuna kele ve kisalu ya mutindu mosi kaka. Yau kele kisalu yina kelomba kuvanda na kingangu ya kuzaba mitindu ya kulonga ya mpila na mpila. (Kolosai 4:⁠6) Yau kele na mfunu mingi mpenza na ntangu muntu kelonga bana na yandi mosi.​—⁠Kulonga 6:​6, 7; Efezo 6:⁠4.

Yau yina, Yehowa kekabula kyese ya lugangu kepesa yandi kumosi ti bankaka. Kabu ya kitoko ya inki mutindu yai!