“Bo Vandaka Kuzaba Kima Ve”

KUKONDA kutula dikebi na balukebisu lenda nata bampasi.

Na mvu 1974, bantu ya mbanza Darwin, na Australie, vandaka kudibongisa sambu na kuta bankinsi ntangu basirene kubulaka sambu na kukebisa nde mupepe mosi ya ngolo kufinamaka. Kansi na nsungi ya bamvula 30, ata mupepe mosi ve ya ngolo kubebisaka Darwin. Sambu na nki yo zolaka kusalama ntangu yai? Bantu mingi ya mbanza yina kumonaka ve nde yo vandaka kigonsa ya nene tii na ntangu mupepe ya ngolo yantikaka na kukatula baludi mpi kubwisa bibaka ya banzo kisika bantu kubumbanaka. Na suka ya kilumbu yina kulandaka, mbanza kubikalaka ya mpamba.

Na Novembri 1985, volkan mosi kupasukaka na Colombie. Mvula-mpembe ti glase ya kukumaka masa kubasisaka potopoto yina kuzikaka bantu kuluta 20 000 ya mbanza ya Armero. Keti bo pesaka ve lukebisu na ntwala? Ngumba kunikanaka bangonda mingi na ntwala. Kansi, bantu mingi na Armero kutulaka ve dikebi sambu bo yikanaka na kuzinga penepene ya volkan. Bo zabisaka bamfumu nde kubika fyoti ngumba tapasuka, kansi bamfumu kusalaka ve kikesa mingi sambu na kukebisa bantu. Bo pesaka baluzayisu na radio ti lukanu ya kusyamisa bantu na kukonda kutula susi. Bo sadilaka bisadilu ya kumatisa ndinga na banzo-Nzambi sambu na kusyamisa bantu na kubikala pima. Na nkokila, makelele ya ngolo kuwakanaka mbala zole. Keti nge zolaka kuyambula bima na nge mpi kutina? Bantu fyoti mpamba kusalaka kikesa ya mutindu yina tii ntangu mpila ya kusala yo kuvandaka dyaka ve.

Bantangu yankaka, bantu ya kelongukaka ntoto ketubaka ti sikisiki na ntwala kisika yina ntoto tanikana. Kansi, mbala mingi bo kekukaka ve kutuba ntangu ya sikisiki yina yo tasalama. Na mvu 1999, kunikana ya ntoto yina kusalamaka na inza ya mvimba kufwaka bantu kiteso ya 20 000. Bantu mingi yina kufwaka kuyindulaka nde yo lendaka ve kukumina bo ata fyoti.

Inki Nge Kesalaka Ntangu Nge Kewaka Balukebisu Yina Kekatukaka na Nzambi?

Tuka ntama, Biblia kutendulaka pwelele mambu yina tasalama na bilumbu ya nsuka. Na kuwakana ti ntendula yina, yo kesyamisa beto na kutadila “ntangu ya Noa.” “Na bilumbu yina, ntangu masa vandaka me fuluka mingi ntete ve,” bantu kudipesaka mingi na mambu ya luzingu ya konso kilumbu, ata bo vandaka mpi na susi sambu na nku yina vandaka kusalama bisika mingi. Kansi, na yina metala lukebisu yina Nzambi kupesaka na nzila ya nsadi na yandi Noa, “bo vandaka kuzaba kima ve tii kuna masa fulukaka mingi na ntoto yonso; masa yina nataka bo yonso na lufwa.” (Matayo 24:37-39) Keti nge zolaka kuzitisa lukebisu yina? Keti nge kesala yo ntangu yai?

Inki nge zolaka kusala kana nge zingaka na Sodome, penepene ya Dizanga ya Mungwa, na ntangu ya Loti, yina kuvandaka mwana-mpangi ya Abrahami? Kitini ya ntoto yina kuvandaka bonso paladisu. Mbanza yina kuvandaka ti bimvwama mingi. Bantu kuvandaka ve na susi ata fyoti. Na ntangu ya Loti, bo “vandaka kudia, kunwa, kusumba bima, kuteka bima, kukuna bilanga ti kutunga banzo.” Bantu yina Loti vandaka kuzinga ti bo kudipesaka mpenza na kusala mansoni. Keti nge zolaka kulanda lukebisu yina Loti kupesaka ntangu yandi monisaka pwelele bikalulu yina ya mbi? Keti nge zolaka kuwa kana yandi tubilaka nge nde Nzambi kele ti lukanu ya kufwa mbanza ya Sodome? To keti nge zolaka kumona yo bonso nsaka, mutindu bana-babakala yina zolaka kukwela bana na yandi kusalaka? Keti mbala yankaka nge zolaka kuyantika kutina ebuna nge tala dyaka na nima mutindu nkento ya Loti kusalaka? Ata bantu yankaka kumonaka lukebisu yina mpamba, kilumbu yina Loti katukaka na Sodome, “Nzambi nokisaka tiya ya ngolo bonso mvula; yo kwisaka kufwa bantu ya bwala yina yonso.”—Luka 17:28, 29.

Bantu mingi na ntangu na beto kezaba kima ve. Kansi bo mesonikaka bambandu yai na Ndinga ya Nzambi sambu na kukebisa beto mpi kusyamisa beto na KUKANGULA MESO!

[Lupangu/Kifwanisu ya kele na lutiti 22]

Keti Mvula ya Ngolo Kunokaka Mpenza na Ntoto ya Mvimba?

Bantu mingi ya ntembe ketubaka nde Ve. Kansi Biblia ketubaka nde Ee.

Yezu Kristu yandi mosi kutubilaka yo, mpi yandi vandaka na luzingu ntangu yo salamaka. Yandi vandaka kumona yo tuka na zulu.

[Lupangu/Kifwanisu ya kele na lutiti 23]

Keti ya Kyeleka Nzambi Kufwaka Sodome ti Gomore?

Arkeolozi kendimaka nde yo salamaka.

Siansi ya kelongukaka mambu yina melutaka ketubilaka yo.

Yezu Kristu kutubaka nde dyambu yango kele ya kyeleka, mpi mikanda 14 ya Biblia ketubilaka yo.