Kontinua ta bira más amigu di bu maridu ô mudjer

1. Pamodi ki bons amigu é un prezenti di Jeová?

BONS amigu é un prezenti di Jeová. (Tia. 1:17) Es ta ama Jeová i es ta ama-nu tanbê. Es krê pa nu ser filís, es ta konsola-nu óras ki nu sta tristi i es ta da-nu bons konsedju óras ki nu meste. Sénpri es ta djuda-nu i nu pode kunfia na es. Di serteza amigus sima kes-li ta “poi korason kontenti”! — Pro. 27:9.

2. Pamodi ki é inportanti pa maridu ku mudjer kontinua ta bira ses amizadi más fórti? (Mateus 19:6)

² É inportanti pa maridu ku mudjer ser kes midjór amigu di kunpanheru. Es debe lenbra ma es meste sforsa pa bira ses amizadi kada bês más fórti. Si es ka faze kuzas ki ta djuda-s bira más amigu di kunpanheru, es pode kumesa ta xinti es sô, tristi ô ti mésmu xatiadu. Má si es kontinua ta sforsa pa ser más amigu di kunpanheru, es pode ten kel amizadi más fórti ki dôs algen pode ten. (Lé Mateus 19:6.) Na kel studu li, nu ta ben odja modi ki maridu ku mudjer pode bira ses amizadi más fórti. Má primeru, nu ben odja modi ki irmons ku irmans solteru pode skodje dretu kel algen ki ta ben bira ses midjór amigu pa vida interu.

MODI KI BU TA SKODJE BU MIDJÓR AMIGU PA VIDA INTERU?

3-4. Kuzê ki ta djuda un algen atxa un bon maridu ô un bon mudjer? (Provérbius 18:22)

³ Antis di nu toma un disizon inportanti, nu debe pensa na kes kuza bon i na kes kuza mariadu ki pode kontise si nu toma kel disizon. Kel disizon ki nu toma pode afeta nos vida interu. Pur isu, é inportanti nu pensa dretu antis di nu toma un disizon.

⁴ Skodje un algen pa nu kaza ku el, é un di kes disizon más inportanti ki nu ta toma. Kel-li é pamodi nu sta ta skodje un algen ki ta ben ser nos midjór amigu pa vida interu. Dja ki é Jeová ki kria kazamentu, nu debe sigi se orientason óras ki nu ta skodje un algen pa nu kaza ku el. El krê pa un ómi atxa un bon mudjer i pa un mudjer atxa un bon maridu. Jeová sénpri sabe kuzê ki é midjór pa nos. (Lé Provérbius 18:22; Iza. 48:17, 18) Kes prinsípiu ki nu ta atxa na Palavra di Deus pode djuda un sérvu di Jeová atxa un bon maridu ô un bon mudjer.

5. Pamodi ki é inportanti bu skodje un algen batizadu pa bu kaza ku el?

⁵ Óras ki nu ta batiza, nu ta bira amigu di Deus. (Sal. 25:14) Nton, si bu ta gostaba di kaza, bu debe skodje un algen ki é amigu di Jeová. (1 Kor. 7:39) Si bu faze kel-li, bu ta mostra ma bu ta da valor pa kes lei di Jeová i bu ta odja bu maridu ô bu mudjer sima un prezenti di Jeová. (Pro. 19:14) Si bu faze si, bu ta ivita kes prubléma ki ta kontise si bu kaza ku un algen ki ka ta ama Jeová. (2 Kor. 6:14) Ka bu kai na éru di kaza ku un algen ki ka ta sirbi Jeová sô pamodi bu ka sta atxa un algen ki é Tistimunha di Jeová pa bu kaza ku el. Tanbê, ta sérba un éru bu namora ku kel algen ku speransa ma el ta ben bira un Tistimunha di Jeová.

6-7. Ki perguntas bu meste pensa na el duránti namoru?

⁶ É klaru ki é ka kalker algen batizadu ki ta ser un bon maridu ô un bon mudjer pa bo. Si bu sta interesadu na un algen, é bon bu pensa na alguns pergunta. Pur izénplu: ‘Modi ki el ta trata se família? El ta mostra bondadi i ruspetu? Ken ki é ses amigu? Modi ki el ta lida ku dizentendimentu? Sénpri el krê pa kuzas fazedu di se manera, ô el sta prontu pa seta opinions di otus algen désdi ki ses opinion ka ta ba kóntra kel ki sta na Bíblia? Modi ki el ta inkara dinheru?’

⁷ Tanbê bu pode pergunta: ‘Kel algen ki N sta interesadu na el ta ama Jeová? El sta ta sforsa pa mostra kes kualidadi di “kel manera di ser novu”? El ta ben djuda-m kontinua ta ser un sérvu di Jeová midjór inda? Nu ten kes mésmu méta na sirvisu pa Jeová? N ta imajina mi ku el ka sô bons amigu, má kes midjór amigu?’ (Kol. 3:9, 10) Si bo é un irman, bu pode pergunta: ‘Kel irmon ki N sta ta namora ku el ta ben ser un bon amigu i un bon xéfi di família?’ (1 Kor. 11:3) Si bo é un irmon, bu pode pergunta: ‘Kel irman ki N sta ta namora ku el ta ben seta nha autoridadi di ser xéfi di família, sikrê ku nhas inperfeison?’ Bu meste ténpu pa sabe respósta di kes pergunta li. Pur isu, uza bu namoru pa konxe dretu kel algen ki bu sta ta pensa na kaza ku el.

8-9. Kuzê ki pode djuda un algen ki sta ta namora toma un bon disizon? (Odja imajen.)

⁸ Duránti namoru, bu ta konsigi toma un disizon midjór si bu tenta sabe kenha ki kel algen é di verdadi. Tenta sabe kuzê ki otus algen ta pensa di el. Bu pode pergunta otus algen ki kualidadi kel algen ten i kal ki é se reputason. Pur izénplu, es ta atxa ma el é un algen umildi, ikilibradu i ki ta mostra bondadi? Sara, ki é un irman di Giana Franseza i ki kaza ku un irmon ki txoma Daniel, fla: “N pergunta sobri Daniel pa kel irmon ki es ta moraba djuntu i ki es éra pioneru djuntu, pa un ansion di se kongregason, pa nos amigus i pa irmans di se kongregason.” Tanbê ku jetu, bu pode pergunta kel algen ki bu sta ta namora ku el, si ten algen kuza na se pasadu ô si sta ta kontise algun kuza na se vida ki bu meste sabe. É inportanti sabe kel-li pamodi alguns kuza pode traze txeu prubléma na kazamentu.

⁹ Ka bu iginora dúvidas ki bu ten sobri kel algen ô kuzas negativu ki irmons maduru fla-u sobri el. Asi, bu ta konsigi disidi si bu ta kontinua kel namoru ô nau.a Gósi, nu ben odja kuzê ki kes algen ki dja sta kazadu pode faze pa es bira ses amizadi más fórti.

NHOS PASA TÉNPU DJUNTU ASI PA NHOS BIRA NHOS AMIZADI MÁS FÓRTI

10. Pamodi ki é bon pa maridu i mudjer pasa ténpu djuntu?

¹⁰ Maridu ku mudjer pode bira ses amizadi i ses kazamentu más fórti si es tra ténpu pa kunpanheru, sikrê es tene txeu kuza pa faze. Kel-li ta da-s oportunidadi di pâpia ku kunpanheru sobri kuzê ki kontise na ses dia, fla kunpanheru modi ki es sta ta xinti, kuzê ki es ta pensa, mostra amor pa kunpanheru i divirti djuntu.

11. Kuzê ki pode prujudika amizadi di maridu ku mudjer?

¹¹ Maridu ku mudjer ki é amigu di kunpanheru ta prifiri sta djuntu envês di sta lonji di kunpanheru. É klaru ki es ka ta pode sta tudu óra djuntu. Má pasa txeu ténpu lonji di kunpanheru pode ser prigozu. Pur izénplu, alguns ta seta un trabadju na un otu país i kel-li ta pô-s ta fika txeu ténpu lonji di ses família. Enbóra kel-li pode djuda-s ganha más dinheru, pasa txeu ténpu lonji di kunpanheru pode traze-s txeu prubléma na ses kazamentu.

12-13. (a) Kuzê ki alguns kazal ki ta sirbi Jeová ta faze pa es pode pasa ténpu djuntu? (Odja imajen.) (b) Ki lugar bu maridu ô bu mudjer ten na bu vida? (Odja kuadru “Ki lugar bu maridu ô bu mudjer ten na bu vida?”.)

¹² Odja kuzê ki alguns maridu ku mudjer sta ta faze pa sénpri es pode pasa ténpu djuntu. Lia, ki ta mora na Guan, fla: “Mi ku nha maridu, nu gosta di faze txeu kuza djuntu. É difísil nu faze kuzas nos sô ô nu sai pa ba divirti sen kunpanheru.” Roksane, ki ta mora na Mérka, fla: “Dja ki nu ten txeu kuza pa faze, nu ta faze planu antis pa nu pode pasa ténpu djuntu sô nos dôs, sima nu ta faze ku kes otu kuza inportanti.” (Konpara ku Amós 3:3.) Damien, ki ta mora na Fransa, fla kel-li: “Nu da kónta ma é inportanti prende gosta di kuzê ki kel otu gosta di faze i ku ténpu ti nu fika ta gosta di kes mésmu kuza.” (Mat. 7:12) I Kati, ki tanbê ta mora na Mérka, fla: “Na alguns momentu ti nu ta dexa nos telemóvel pa la, pa nu pode da kunpanheru tudu atenson.”

¹³ Más inportanti é pasa ténpu djuntu ta faze kuzas pa Jeová. Mirian, ki ta vive na Fransa, fla: “Nu ta kumesa nos dia ta lé Bíblia i nu ta pâpia ku kunpanheru sobri kuzê ki nu gosta i kuzê ki nu pode aplika na nos vida. N gosta txeu di kes momentu li. Tanbê, N gosta óras ki nu ta faze orason djuntu i na kes momentu ta da pa odja modi ki nha maridu ta ama Jeová.” Kati, ki dja nu papiaba di el antis, fla: “Kuzê ki más N gosta pa nu faze djuntu é bai pregason. Óras ki nu ta obi kunpanheru ta pâpia sobri Jeová, kel-li ta pô-nu más amigu di kunpanheru i nu ta kontinua ta prende kuzas novu ku kunpanheru.” — Pro. 27:17.

NHOS KONTINUA UNIDU ÓRAS KI PARSE PRUBLÉMA

14-15. Pamodi ki un kazal debe faze ses midjór pa es rezolve kes prubléma ki pode parse na ses kazamentu? Da un izénplu.

¹⁴ Pamodi inperfeison, maridu ku mudjer ta pasa pa prublémas na kazamentu. Bíblia ta fla ma kes ki kaza ta ten “prubléma na ses vida.” (1 Kor. 7:28) Nóta na Bíblia di studu, na kel versiklu li ta mostra ma kel-li “sta ta pâpia di kes prubléma ki normalmenti ta kontise na kazamentu.” Óras ki kes prubléma kontise, pamodi ki maridu ku mudjer debe faze ses midjór pa es kontinua unidu i rezolve kes prubléma?

¹⁵ Pensa na kel izénplu li. Si un konstruson famozu ô un óbra di arti straga, di serteza se dónu ta krê konpo-l. El pode gasta txeu ténpu ô dinheru ta tenta konpo-l i el ka ta dizisti di el, sikrê dura txeu anu. Pamodi? Pamodi kel konstruson ô kel óbra di arti ten txeu valor pa el. Di mésmu manera, tudu kazamentu ten txeu valor. I mésmu kes kazal ki é amigu di kunpanheru, pode ten prubléma na kazamentu. Má sima un konstruson ô un óbra di arti ki sta stragadu pode konpodu, un kazal pode rezolve prubléma na ses kazamentu. Faze kel-li pode leba txeu ténpu i sforsu. Má Jeová ta fika txeu kontenti óras ki el ta odja un kazal ta faze tudu kel ki es ta pode pa bira ses kazamentu más fórti i kontinua djuntu. (Mal. 2:16) Óras ki es ta faze si, es ta mostra amor i ruspetu, ka sô pa kunpanheru má tanbê pa Jeová, ki é Kel ki kria kazamentu.

16. Di akordu ku 1 Koríntius 13:4-8a, kuzê ki pode djuda un kazal ki sta ta pasa pa prublémas gravi na ses kazamentu? (Odja imajen i kuadru “Kuzas ki pode djuda nhos bira nhos amizadi más fórti ku kunpanheru”.)

¹⁶ Si parse prublémas na bu kazamentu, ka bu pensa lógu na sipara. (1 Kor. 7:10, 11) Envês di kel-li, faze kel pergunta li: ‘Kuzê ki N pode faze pa N bira más amigu di nha maridu ô nha mudjer?’ Studa kuzê ki Bíblia ta fla sobri mostra amor i pensa na modi ki bu pode midjora bu manera di mostra kes kualidadi ki sta na 1 Koríntius 13:4-8a. (Lé.) Envês di pensa na larga bu maridu ô bu mudjer, faze tudu kel ki bu ta pode pa nhos rekupera nhos amor pa kunpanheru. Ka bu pensa na kuzê ki bu maridu ô bu mudjer meste midjora, má na kuzê ki bu meste faze pa nhos ten un kazamentu filís otu bês. Pidi Jeová pa djuda-u. Faze piskiza na nos publikason i odja vídius ki pode djuda-u sabe kuzê ki bu ta faze. Tanbê bu pode pidi konsedju na ansions i otus irmon ku irmans maduru. Si bu kunfia na Jeová, ki é kel fiu más fórti i más inportanti di kel “kórda di três fiu”, bu kazamentu ta kontinua fórti. — Ecl. 4:12.

17. Modi ki kes ki sta ta pensa na kaza i kes ki dja sta kazadu pode ser filís?

¹⁷ Jeová krê pa tudu ses sérvu ser filís, kel-li ta inklui kes ki dja sta kazadu i kes ki sta pensa na kaza. Nton, si bo é solteru i bu ta gostaba di kaza, skodje dretu kel algen ki ta ben ser bu amigu pa vida interu. I si dja bu sta kazadu, kontinua ta bira amizadi ku bu maridu ô ku bu mudjer más fórti. Buska ajuda di Jeová i faze di tudu pa bu rezolve kes prubléma ki pode parse na bu kazamentu. Si bu faze si, bu ta ben “goza vida” djuntu ku kel algen ki bu ta ama! — Ekl. 9:9.