Modi ki bu pode vense distrason?

1-2. Modi ki un kuza inportanti pode bira un distrason?

KAL ki foi últimu bês ki un kuza distrai-u? Talvês algun kuza tra-u atenson di kuzê ki bu staba ta faze i bu meste disidiba kuzê ki éra más inportanti. Pur izénplu, imajina ma bu sta ta konduzi i bu resebe un xamada. Kel xamada pode ser inportanti, má bu sabe ma na kel momentu kel-li é un kuza ki ta distrai-u. Konsentra na konduzi é más inportanti.

² Nos tudu nu ten txeu kuza inportanti pa faze. Nu sabe ma kes kuza más inportanti ki nu ten pa faze é kes kuza ki nu ta faze pa Jeová.a (Mat. 6:33) Sima un kondutor ki ta sta atentu i ka ta dexa nada distrai-l, povu di Jeová ta tenta odja kes kuza ki pode distrai-s i es ta konsentra na strada ki sta ses frenti. — Pro. 4:25; Mat. 6:22.

3. Modi ki kel studu li ta ben djuda-nu?

³ Ninhun di nos ka krê fika distraídu i dexa di poi Jeová na primeru lugar na nos vida. Má ten txeu kuza ki pode distrai-nu di kel ki é más inportanti. (Luk. 21:34-36) Nton pa djuda-nu konsentra na nos sirvisu pa Jeová nu ta ben odja (1) ki kuzas ki pode distrai-nu, (2) modi Jizus vense distrasons i (3) modi ki nu pode vense distrasons oji.

KUZÊ KI PODE DISTRAI-NU?

4-6. Ki kuzas ki pode distrai-nu faxi?

⁴ Nu ten txeu kuza inportanti na nos vida ki nu meste kuida di el. Pur izénplu, nu pode ten algun prubléma di saúdi ô nu pode ten alguns kuza ki nu meste faze pa nos ô pa nos família. É klaru ki kes kuza li é inportanti i nu meste tra ténpu pa kuida di es. Má kes kuza li pode distrai-nu? Kel-li pode kontise si nu fika sénpri ta pensa na es i nu gasta txeu ténpu ku es ki nu ta fika sen ténpu ô forsa pa faze más nada.

⁵ Tanbê txeu di nos ta vive na undi ki ten txeu violénsia, ki ten duénsas ki ta spadja faxi ô nu ten ki trabadja duru pa nu ganha dinheru pa nu vive. (2 Tim. 3:1) Óras ki nu ta pasa pa alguns di kes kuza li, nu pode fika ku txeu ansiadadi i nu ta fika tudu óra ta pensa na es.

⁶ Talvês nu konxe pesoas ki pasa pa alguns di kes kuza li ki muda ses vida. Pur isu, é normal es fika txeu dizanimadu pamodi kuzê ki es pasa. Jeová ka faze-nu pa nu sufri ô pa nu sta tudu óra stresadu. Alguns algen ta xinti ma es ka ta konsigi ten un vida normal más pamodi prublémas ki es pasa pa el. Pur isu, es ta pasa txeu ténpu ta divirti asi pa es pode skese ses prubléma. Kuzê ki nu pode faze si nu xinti alguns di kes kuza li? Nu ben odja kuzê ki nu pode prende ku Jizus ki ta djuda-nu luta kóntra kes kuza ki pode distrai-nu di nos adorason pa Jeová.

MODI KI JIZUS LUTA KÓNTRA DISTRASON?

7. Ki kuzas pode distraíba Jizus di kel ki éra más inportanti?

⁷ Tinha txeu kuza sima asuntus di sosiadadi i pulítika ki pode distraíba Jizus di kel ki éra más inportanti. Na se ténpu tinha txeu algen póbri i duenti. (Mat. 14:14; Mar. 14:7) Alén di kel-li, kes romanu i otus judeu ta maltrataba es. Kantu pesoas odja ma Jizus tinha puder i kapasidadi pa faze milagri es krê fazeba el ses rei. (Juan 6:14, 15) Tanbê Satanás tenta Jizus i el fla-l ma el ta biraba el governanti di mundu. Jizus pode kumesaba ta pensa ma ta sérba bon si el biraba governanti di mundu. (Mat. 4:8, 9) I apóstlu Pedru ki éra un di kes grandi amigu di Jizus fla-l pa el skodje un manera di vive más fásil, kantu el fla-l: “Ten péna di bu kabésa, Sinhor.” — Mat. 16:21, 22.

8. Modi ki Jizus luta kóntra kes kuza ki pode distraíba el?

⁸ Modi ki Jizus luta kóntra kuzas ki pode distraíba el di kel ki éra más inportanti? El faze kel-li di três manera. Primeru, el imita manera di pensa di Jeová. (Juan 8:28; 14:9) Sugundu, el mante okupadu na prega i na inxina. (Mat. 9:35) I tirseru, el ta intendeba dretu kuzê ki éra más inportanti. (Juan 4:34) Ku firméza el nega kel oférta di Satanás. Tanbê el sabia ma Pedru staba ta tenta djuda-l, má kel ki Pedru fla-l pa el faze ka éra kel ki Jeová kreba. (Mat. 4:10; 16:23) Jizus ka dexa kuzê ki pesoas ta pensaba, ta flaba ô ta fazeba, distrai-l di faze vontadi di Jeová. É verdadi ki kes kuza ki pode distrai-nu oji é diferenti di kes ki Jizus pasa pa el. Má si nu faze kes kuza ki Jizus faze nu pode luta kóntra kes kuza ki ta distrai-nu di kel ki é más inportanti.

MODI KI NU PODE LUTA KÓNTRA DISTRASON?

9. Kuzê ki krê fla “kontinua ta intende kal ki é vontadi di Jeová”? (Efézius 5:17)

⁹ Prende pensa sima Jeová. Faze kel-li pode djuda-u “kontinua ta intende kal ki é vontadi di Jeová.” (Lé Efézius 5:17.) Nu pode prende kuzê ki ta agrada Jeová óras ki nu ta lé se Palavra i nu ta midita na el. Nu pode faze kel-li mésmu si Bíblia ka ta fla nada sobri kel situason. Modi? Studa Bíblia pa bu sabe midjór modi ki Jeová ta pensa i sta dispostu na aplika kuzê ki bu prende.

10. Modi ki nu pode prende sobri manera di pensa di Jeová?

¹⁰ Nu pode prende sobri manera ki Jeová ta pensa óras ki nu ta studa Bíblia i nu ta odja modi ki el ta lida ku umanus. (Jer. 45:5) Óras ki nu ta lé kes stória, nu pode faze kes pergunta li: ‘Kuzê ki kel-li ta inxina-m sobri Jeová? Kuzê ki N pode faze pa N pensa sima Jeová?’ É klaru ki se manera di pensa é más altu ki di nos. (Iza. 55:9) Má nu pode pidi na orason pa el inxina-nu modi ki nu ta faze se vontadi. (Sal. 143:10) Tanbê nu pode pidi-l pa el djuda-nu pensa kada bês más sima el. — 1 Juan 5:14.

11. Kuzê ki Jeová krê pa nos?

¹¹ Sima nu ta ba ta prende pensa sima Jeová, nu ta intende ma el krê pa nu ivita kuzas ki ta distrai-nu asi pa nu pode prova ma nu sta priparadu pa óras ki fin ben. (Mat. 24:44) El ka krê pa nu fika preokupadu dimás ku kuzas di vida asi pa nu ka fika dizanimadu. (Mat. 6:31, 32) Pur isu, óras ki nu sta preokupadu ku nos saúdi, nos trabadju, nos kaza, nos família ô otus asuntu, Jeová ta djuda-nu. Si nu pidi-l sabedoria i forsa pa nu lida ku nos prubléma, el ta da-nu kel ki nu meste. — Sal. 55:22; Pro. 3:5-7.

12. Kuzê ki pode djuda-nu kontinua filís mésmu óras ki kuzas mariadu ta kontise? (Mateus 5:3)

¹² Mante okupadu na bu sirvisu pa Jeová. Nos tudu nu ta fika preokupadu ku kuzas mariadu ki sta ta kontise na mundu, má nu ka ta konsigi kontrola-s. Pur isu, pa nu ivita distrai ku kuzas ki nu ka ta konsigi kontrola, nu ta konsentra na nos sirvisu pa Jeová. Si nu kontinua ta faze tudu kel ki nu ta pode pa nu ten un amizadi fórti ku Jeová, nton nu ta ser filís pamodi é pa kel-li ki Jeová kria-nu. (Lé Mateus 5:3.) Nu ta faze kel-li óras ki nu ta studa Bíblia i nu ta faze tudu kel ki nu ta pode na nos sirvisu pa Jeová. Si nu faze kel-li, nu ta agrada Jeová pamodi nu sta ta uza nos ténpu di midjór manera. — Pro. 23:15.

13. Modi ki nu pode ‘uza nos ténpu di midjór manera’?

¹³ Nu sta disididu na ‘uza nos ténpu di midjór manera’. (Efé. 5:15, 16) Kel testu li, ka sta ta pâpia sô di manera ki nu ta uza nos ténpu pa faze kuzas di dia-a-dia, má tanbê el sta ta insentiva-nu pa nu toma kuidadu ku manera ki nu ta uza nos ténpu antis di Jeová traze fin di es mundu mau. Modi ki nu pode uza nos ténpu di midjór manera? Si nu gasta txeu ténpu ku notísias sobri kuzas mariadu ki sta ta kontise, kel-la pode dizanima-nu i tra-nu forsa ki nu pode uzaba pa sirbi Jeová. É midjór nu poi un limiti na kantu ténpu ki nu ta gasta ku notísias. Di kel manera li nu ta ten más ténpu i forsa pa nu faze kuzas pa Jeová. Tanbê é bon nu faze más na nos trabadju di pregason. Nu ta intende ma é inportanti nu uza tudu oportunidadi pa djuda pesoas “ser salvu i pa es ten konhisimentu izatu di verdadi.” — 1 Tim. 2:4.

14. Di ki manera mante okupadu na sirvisu pa Jeová ta djuda-nu? (Odja imajen.)

¹⁴ Óras ki nu ta mante okupadu ta sirbi Jeová, kel-li ta djuda-nu ka skese pamodi ki txeu kuza mariadu sta ta kontise na mundu. Óras ki nu ta sufri pamodi prublémas na pulítika, falta di dinheru i duénsa ki ta spadja, nu ka ta fika spantadu pamodi nu sabe ma Bíblia dja flaba ma tudu kes kuza li ta ben kontiseba. Envês di fika distraídu pamodi medu, nu ta ten serteza ma kes promésa di Jeová pa futuru ta ben kunpri. Nu pode kontinua kalmu timenti nu ta kontinua ta kunfia ma Jeová ta djuda-nu aguenta kes prubléma. — Sal. 16:8; 112:1, 6-8.

15. Ten “bon juís” ta djuda-nu faze kuzê? (1 Pedru 4:7)

¹⁵ Ka bu skese di kuzê ki é más inportanti. Txeu algen na mundu oji ta konsentra más na divirti di ki na fin di kel mundu li ki sta kuazi ta txiga. Enbóra é ka mariadu divirti, nu meste ten “bon juís” pa nu ka dexa manera di pensa di mundu influensia-nu. (Lé 1 Pedru 4:7.) Kuzê ki kel-li krê fla? Kel-li krê fla ma nu ka ta gasta txeu ténpu i forsa ta divirti i nu ta toma bons disizon. Di kel manera li, nu ta mostra ma nu ta pensa sima Jeová i ma nu ta konsentra na kuzê ki é más inportanti. — 2 Tim. 1:7.

16. Na kuzê ki Jizus konsentra na kes últimu momentu antis di el móre?

¹⁶ Jizus sénpri ta lenbraba di kuzê ki éra más inportanti. Na kes últimu momentu antis di el móre, el konsentra na mante lial pa Jeová i na faze se vontadi. Pur isu, el ora di korason. Má ses disiplu ka mante sienti. Envês di es faze orason, es durmi. Es staba “kansadu pamodi tristéza.” — Luk. 22:39-46; Juan 19:30.

17. Pamodi ki txeu algen ta uza internet oji, má modi ki kel-li pode distrai-s? (Odja imajen.)

¹⁷ Sima disiplus di Jizus, alvês nu pode xinti kansadu i tristi. Kuzas ki sta ta kontise na es ténpu di fin pode dexa-nu preokupadu. Txeu algen oji ta pasa txeu ténpu na internet pa tenta skese ses prubléma. Pur izénplu, es ta kustuma manda fotus pa amigus i família i es ta fla-s kuzê ki sta ta kontise na ses vida. Tanbê es ta kustuma odja txeu vídiu i es ta pasa txeu ténpu ta djuga na internet. Ten tantu kuza novu pa lé i pa odja ki pesoas ta gasta txeu ténpu i forsa na es tudu dia. Pa nu ivita faze mésmu kuza nu pode faze kel pergunta li: ‘Dipôs ki N uza redi sosial N ta xinti midjór ô el ta distrai-m di kuzê ki é más inportanti?’

18. Pamodi ki nu meste ten bon juís óras ki nu ta skodje diverson?

¹⁸ É bon tra algun ténpu pa divirti, má nu meste ten bon juís pa nu pode sabe skodje ki kuzas na tilivizon ô na internet nu ta divirti ku el i kantu ténpu ki nu ta gasta ku el. Pur izénplu, óras ki nu tirmina di odja un vídiu, lógu ta parse otu i nu pode xinti tentadu na odja vídiu un tras di kel otu. Alguns di kes vídiu ten violénsia i konportamentu seksual mariadu. É kel-li ki kontise ku un irmon na Ázia. Na komésu el ta uzaba un aplikativu pa el odja pártis di filmi. Sima ba ta parse otus párti el ba ta odja ti ki el kumesa ta odja sénas di konportamentu seksual mariadu. Ku ténpu el kumesa ta odja pornografia. Grasas-a ajuda di ansions i bons amigu el para di faze kel-li. Pur izénplu, el para di uza alguns aplikativu i el fika ta uza telemóvel más poku. Kel spiriénsia li ta inxina-nu ma nu meste ten bon juís óras ki nu ta skodje kuzas pa nu divirti ku el.

19. Kuzê ki pode kontise si nu pasa txeu ténpu ta diskansa ô ta viaja di féria?

¹⁹ Tanbê nu meste ten bon juís óras ki nu ta toma disizons sobri viaja di féria ô kuzas ki nu ta faze pa relaxa. Nos tudu nu ten txeu kuza pa faze i nu meste tra ténpu pa diskansa. É bon faze kel-li i el ta djuda-nu ten bon saúdi. Má si nu preokupa txeu ku kes kuza li, nu pode ka ten ténpu pa faze kes kuza más inportanti. (Flp. 1:10) Kada un di nos meste disidi kuzê ki nu ta faze i kantu ténpu ki nu ta gasta ta faze-l. Óras ki nu ta toma kes disizon li nu meste faze kes pergunta li: ‘Ténpu ki N ta pasa ta diskansa ô ta viaja di féria ta mostra ma N ten bon juís? N sta ta distrai di kuzê ki é más inportanti? N sta ta pripara pa fin di es mundu?’

20. Ki bons rezultadu nu ta ten óras ki nu ta luta kóntra kuzas ki pode distrai-nu?

²⁰ Nu ta ten bons rezultadu óras ki nu ta luta kóntra kes kuza ki pode distrai-nu di sirbi Jeová. (Iza. 48:17) Ku ajuda di Jeová nu ta konsigi aguenta prublémas. Nu ka ta fika spantadu ku kuzas ki sta ta kontise na mundu. I nu ta ivita pasa txeu ténpu ta divirti. Pur isu, nu kontinua disididu na pensa sima Jeová, mante okupadu na se sirvisu i ka skese di kuzê ki é más inportanti. Si nu faze kes kuza li, nu ta luta kóntra kes kuza ki pode distrai-nu di kel ki é más inportanti i nu ta “pega riju na kel vida di verdadi.” — 1 Tim. 6:19.