Mostra ma bu ta da valor pa resgati

1-2. Kuzê ki sakrifisiu di resgati di Jizus ta pô-nu ta faze i pamodi? (2 Koríntius 5:14, 15) (Odja imajen.)

SI UN algen resgataba bo di un prédiu ki kai, bu ka ta xintiba ma bu fika ta debe kel algen ki salva bu vida? Sikrê otus algen salvadu tanbê, di serteza bu ta krê mostraba kel algen ma bo é gratu i ma nunka bu ka ta skese kuzê ki el faze pa bo.

² Sima nu odja na studu ki pasa, nu meste di un algen pa liberta-nu di pekadu i di mórti. Sakrifisiu di Jizus ta resgata-nu pamodi nu ta pode ten (1) perdon di nos pekadu, (2) speransa di ten un vida perfeitu, i (3) un amizadi ku Deus. Pamodi kel-li, nu ten speransa di vive pa tudu ténpu na mundu novu. Jizus ama-nu mutu antis di el ben pa téra. I Jizus mostra se grandi amor pa nos kantu el da se vida pa nos. (Pro. 8:30, 31) Apóstlu Paulu skrebe ma “amor di Kristu ta obriga-nu”. (Lé 2 Koríntius 5:14, 15.) Kel-li krê fla ma amor di Kristu ta pô-nu ta mostra-l ma nos é gratu i ma nunka nu ka ta skese kuzê ki el faze pa nos.

3. Pamodi ki kada algen pode mostra se gratidon pa resgati di manera diferenti?

³ Kuzê ki bu ta ben faze pa mostra bu gratidon pa prezenti di resgati? Bu respósta pode ser diferenti di respósta di otu algen. Pa intende kel-li, imajina três algen ki sta ba viaja pa mésmu lugar, má kada un di es ta kumesa ses viajen na un sidadi diferenti. Es ta bai na kaminhu diferenti. Di mésmu manera, kel “kaminhu” ki bu ta faze pa bu txiga na bu méta, ki é mostra bu gratidon pa resgati, ta dipende di undi ki bu amizadi ku Jeová sta gósi. Pamodi kel-li, na es studu nu ta ben pâpia di três grupu di algen: (1) studantis di Bíblia, (2) kes algen ki é batizadu i (3) kes ovelha ki afasta di kongregason.

STUDANTIS DI BÍBLIA

4. Kuzê ki Jeová ta repara na studantis di Bíblia?

⁴ Si bo é un studanti di Bíblia, pensa na kel-li: dja ki bu krê prende sobri Jeová i sobri Bíblia, kel-li ta mostra ma Jeová krê pa bu ser se amigu i el ta djuda-u faze kel-li. (Juan 6:44; Atus 13:48) ‘É Jeová ki ta izamina korason.’ Kel-li krê fla ma el ta repara sforsu ki bu ta faze pa bu prende sobri el i el ta fika filís óras ki el ta odja-u ta faze mudansas na bu vida pa bu pode agrada-l. (Pro. 17:3; 27:11) É sô pamodi resgati ki bu ta pode ten un amizadi fórti ku Jeová. (Rom. 5:10, 11) Nunka ka bu skese di kel-li.

5. Modi ki studantis di Bíblia pode aplika kel konsedju ki sta na Filipensis 3:16?

⁵ Si bo é un studanti di Bíblia, modi ki bu pode mostra ma bo é gratu pa resgati? Un di kes manera é sigi kel konsedju ki apóstlu Paulu da pa kes kriston na Filipus: “Ka ta inporta kal ki é prugrésu ki dja nu faze, nu kontinua ta anda na mésmu kaminhu.” (Flp. 3:16) Un otu traduson di Bíblia ta traduzi es versiklu di kel manera li: “Nu ba pa frenti, na mésmu direson ki nu sta ta bai ti gósi.” Di akordu ku kel konsedju li, ka bu dexa nada, nen ningen, pô-u ta para di anda na kel strada pa vida. — Mat. 7:14; Luk. 9:62.

6. Kuzê ki studantis di Bíblia pode faze si es ta atxa difísil faze mudansas na vida? (Deuteronómiu 30:11-14) (Odja imajen.)

⁶ I si bu sta atxa difísil seta un ensinu di Bíblia ki bu prende ka dura li? Faze piskiza sobri kel asuntu i ora ta pidi Jeová pa djuda-u intende-l midjór. (Sal. 86:11) Má si inda bu sta atxa difísil intende kel asuntu, ka bu fika txeu preokupadu ku el gósi, má kontinua ta studa Bíblia. Ku ténpu bu ta intende kel asuntu midjór. I si bu ta atxa difísil para di faze un kuza ki Jeová ka gosta? Lenbra ma Jeová nunka ka ta pidi-nu pa nu faze un kuza ki nu ka ta pode. Bu ta konsigi vive di un manera ki Jeová ta krê. (Lé Deuteronómiu 30:11-14.) I Jeová promete ma el ta djuda-u. (Isa. 41:10, 13; 1 Kor. 10:13) Nton, ka bu dizisti. Ka bu pensa txeu na kuzê ki é difísil pa bo, má pensa na tudu kes kuza bon ki Jeová dja faze pa bo i prinsipalmenti, na se Fidju ki el manda pa móre pa bo. Sima bu amor pa Jeová ta ba ta fika más fórti, bu ta odja ma “se mandamentus é ka pizadu.” — 1 Juan 5:3.a

7. Kuzê ki kes jóven ki sta ta kria na verdadi pode pensa na el?

⁷ Má i bo ki é jóven ki sta ta kria na verdadi? Bo tanbê, bo é un studanti di Bíblia. Na verdadi, bo é studanti di Bíblia más inportanti pa bu mai ku bu pai. Bíblia ta fla: “Nhos txiga pértu di Deus i el ta txiga pértu di nhos.” (Tia. 4:8; 1 Kró. 28:9) Óras ki bu ta faze kuzas pa bira más amigu di Jeová, el tanbê el ta faze kuzas pa bira más bu amigu. É ka sô pamodi bu kria na un família di Tistimunha di Jeová ki Jeová ta presta atenson na bo. El ta presta atenson na bo pamodi el krê pa bu ser se amigu. I kuzê ki Jeová dja faze pa bu pode ser se amigu? El da-u se fidju. Nunka ka bu skese di es prezenti spesial ki Jeová da-u. (Rom. 5:1, 2) Pur isu, antis di bu sisti Komemorason di kel anu li, pamodi ki bu ka ta pensa na kuzê ki Jeová i Jizus dja faze pa bo? Dipôs, pensa na modi ki bu krê vive i ki métas bu krê poi pa bu mostra bu gratidon pa Jeová.b

KES ALGEN KI É BATIZADU

8. Modi ki kes algen ki é batizadu dja mostra gratidon pa resgati?

⁸ Si bo é batizadu dja bu mostra di txeu manera ma bo é gratu pa resgati. Pur izénplu, bu muda bu vida pa bu agrada Jeová i bu bira se amigu. I bu ta obi ku órdi di Jizus di prega notísias sábi i di inxina otus algen sobri Jeová i Jizus. Bu da bu vida pa Jeová i bu batiza. Talvês otus algen faze-u opozison pamodi bu ta sirbi Jeová. (2 Tim. 3:12) Má bu aguenta firmi i bu kontinua ta ser lial pa Jeová, i kel-li ta mostra ma bu ta ama Jeová i ma bo é gratu pa resgati. — Ebr. 12:2, 3.

9. Ki prigu nu debe sta sienti na el si nos é batizadu?

⁹ Kes algen ki é batizadu meste sta sienti na un prigu. Ku ténpu, nu pode dexa di da valor pa resgati. Modi ki kel-li pode kontise? Pensa na kuzê ki kontise ku kes kriston na Éfezu. Jizus ilojia-s pamodi es staba ta aguenta firmi. Má el fla: “N ten un kuza kóntra bo, bu bandona kel amor ki bu tinha na komésu.” (Apo. 2:3, 4) Kuzê ki Jizus fla ta mostra klaru ma un algen batizadu pode kumesa ta faze kuzas pa Deus más pamodi el sta kustumadu ku faze-s, di ki pamodi amor. Kel algen li pode ora, sisti runion i bai pregason, má el ta faze kes kuza li sô pamodi dja el sta kustumadu. É ka amor ki sta ta motiva-l más. Kuzê ki bu pode faze si bu sta xinti ma bu amor pa Jeová ka sta fórti más sima antis?

10. Modi ki bu pode “pensa” i “konsentra” na bu adorason pa Jeová? (1 Timótiu 4:13, 15)

¹⁰ Apóstlu Paulu fla Timótiu pa “pensa” i “konsentra” na se adorason pa Jeová. (Lé 1 Timótiu 4:13, 15.) Di akordu ku kel konsedju li, tenta pensa na modi ki bu pode kontinua ku zelu na bu adorason pa Jeová. (Rom. 12:11) Pur izénplu, pa bu pode presta más atenson na runion, talvês bu meste pripara midjór. Ô óras ki bu ta faze bu studu pesoal, talvês bu meste bai pa un lugar undi ki bu ta pode fika bo sô, asi é más fásil bu konsigi pensa na kuzê ki bu sta prende i bu ta konsigi tra más pruvetu di bu studu. Sima nu meste poi lenha na un lumi, asi pa el kontinua sendedu, tanbê nu meste kontinua ta faze kes kuza li pa nu kontinua gratu pa tudu kuza ki Jeová dja da-nu, i kel-li ta inklui resgati. Alén di kel-li, kuzê ki bu ta atxa di pruveta kel simana antis di Komemorason pa midita na kes benson ki bu ten pamodi bo é un Tistimunha di Jeová? Di serteza, si bu faze kel-li bu ta omenta bu gratidon pa resgati, ki é kel manera ki Jeová ranja pa bu pode ser se amigu.

11-12. Si dja ten un ténpu ki bu sta ta xinti ma bu ka tene kel mésmu zelu ki bu tinha antis, kel-li krê fla ma bu ka tene spritu di Jeová más? Splika. (Odja imajen.)

¹¹ Si dja bu ka sta ta sirbi Jeová ku kel mésmu zelu ki bu tinha antis, ka bu dizanima, nen ka bu atxa ma dja bu perde spritu santu di Deus. Lenbra kuzê ki apóstlu Paulu skrebe pa kes kriston na Korintu sobri se trabadju di pregason: “Sikrê N faze-l kóntra nha vontadi, simé el é un responsabilidadi ki N dadu.” (1 Kor. 9:17) Kuzê ki nu ta prende ku kel-li?

¹² Paulu alvês ka ta xintiba vontadi di prega. Má simé, el kontinua ta prega, ka ta inporta modi ki el staba ta xinti. Bo tanbê bu pode ten kel mésmu atitudi. Bu debe sta disididu na faze kuzê ki é dretu, sikrê bu ka tene vontadi. Pur isu, ora ta pidi “dizeju i forsa pa aji.” (Flp. 2:13) Kontinua ta faze kuzas ki ta djuda-u mante bu amizadi ku Jeová. Bu pode ten serteza ma ku ténpu, bu amor pa Jeová ta fika más fórti otu bês i bu ta torna ganha zelu.

13. Modi ki nu pode kontinua ta djobe si nu “sta na fé”?

¹³ Di vês en kuandu, é bon nu izamina nos kabésa di akordu ku kuzê ki Paulu fla na 2 Koríntius 13:5: “Nhos kontinua ta djobe si nhos sta na fé. Nhos kontinua ta prova ken ki nhos é.” Pur izénplu, nu pode pergunta: ‘N sta ta poi Reinu na primeru lugar na nha vida?’ (Mat. 6:33) ‘Kuzas ki N ta skodje pa divirti ku el, ta mostra ma N ta ôdia kel ki é mariadu?’ (Sal. 97:10) ‘N ta sforsa pa fla i faze kuzas ki ta djuda pa mante pas i union na kongregason?’ (Efé. 4:2, 3) Kes dia antis di Komemorason é un bon ténpu pa nu pensa na kes kuza li. Óras ki nu ta pensa na kuzê ki Jeová i Jizus dja faze pa nos, nu ta krê mostra nos gratidon pa Jeová i mostra ma nu ta vive pa Jizus, ka pa nos mê.

KES OVELHA KI AFASTA DI KONGREGASON

14. Kuzê ki poi alguns irmon ta afasta di kongregason?

¹⁴ Alguns irmon ku irmans para di sisti runion dipôs di alguns mês ô ti anus ta sirbi Jeová di manera fiel. Pamodi? Alguns xinti kansadu pamodi “preokupasons di vida”. (Luk. 21:34) Otus tropesa pamodi kuzê ki algun irmon ô irman fla ô faze. (Tia. 3:2) I otus faze pekadus gravi i es ka pidi ajuda. Ka ta inporta kal ki é razon, kuzê ki bu pode faze si bu afasta di kongregason? Kuzê ki resgati i amor ki Jeová i Jizus ten pa bo ta pô-u ta krê faze?

15. Modi ki Jeová ta mostra ma el ta kuida di kes ovelha ki afasta di kongregason? (Ezequiel 34:11, 12, 16)

¹⁵ Pensa na kuzê ki Jeová ta xinti pa kes algen ki afasta di kongregason. El ka sta xatiadu ku es i nen el ka skese di es. Envês di kel-li, el ta djobe kes ovelha ki sta perdedu. El ta da-s kumida i el ta djuda-s volta pa el. (Lé Ezequiel 34:11, 12, 16.) Jeová pode faze mésmu kuza pa bo? Sin! Dja ki bu sta ta lé es artigu, kel-li ta mostra ma inda bu krê agrada-l. Jeová odja bons kuza na bo kantu el djuda-u konxe-l i faze párti di se povu. I inda el ta odja bons kuza na bo i el krê pa bu volta pa kongregason.

16. Kuzê ki pode djuda un ovelha ki perde volta pa Jeová? (Odja imajen.)

¹⁶ Kel bruxura Volte para Jeová ten kes palavra li ki ta inkoraja-nu: “Bu pode ten serteza ma Jeová ta ba djuda-u, si bu volta pa el. El ta ba djuda-u lida ku preokupasons, ka fika ofendidu más pamodi kuzê ki algun algen na kongregason faze-u i el ta da-u pas déntu bo, pamodi bu ta ba ten un konsénsia linpu. Kel-li ta ba djuda-u sirbi Jeová otu bês djuntu ku bus irmon.” Tanbê, lenbra ma ansions tene vontadi di djuda-u. Es pode ser sima un lugar pa “sukundi di béntu, sima un lugar pa sukundi di tenporal.” (Isa. 32:2) Pa bu pode mostra gratidon pa resgati, faze kel pergunta li: ‘Kuzê ki N pode faze gósi pa N rezolve kuzas ku Jeová?’ (Isa. 1:18; 1 Ped. 2:25) Pur izénplu, bu pode sisti un runion na Salon di Reinu? Bu pode pâpia ku un ansion i dexa-l sabe ma bu krê ajuda pa bu volta pa Jeová? El pode ranja algun algen pa studa Bíblia ku bo duránti un ténpu. Bu pode ten serteza ma si bu ora i bu sforsa pa mostra gratidon pa resgati, Jeová ta abênsua-u.

KUZÊ KI BU TA BEN FAZE?

17-18. Modi ki nu pode uza nos ténpu dretu antis di Komemorason?

¹⁷ Jizus fla ma Jeová manda-l pa da se vida, “asi pa tudu kel ki mostra fé na el ka ser distruídu, má pa ten vida pa tudu ténpu.” (Juan 3:16) Pamodi Jizus móre pa nos, Jeová pode libra-nu di pekadu i mórti. Nunka nu ka debe dexa di ser gratu pa kel-li. (Rom. 3:23, 24; 2 Kor. 6:1) Kes dia antis di Komemorason ta da-nu oportunidadi di pensa na amor ki Jeová i Jizus mostra pa nos. I kel-li ta pô-nu ta mostra nos gratidon pa ses amor.

¹⁸ Modi ki bu ta ben mostra bu gratidon pa resgati? Bu respósta pa kel pergunta li pode ser diferenti di respósta di otu algen. Má bu pode ten serteza ma Jeová ta ben abênsua bu sforsu i sforsu di kes milhon di irmon ku irmans ki “ka kontinua ta vive pa ses kabésa, má pa kel ki móre pa es”. — 2 Kor. 5:15.