Pamodi ki nu meste di resgati?

1-2. Di kuzê ki nu meste ser resgatadu, i pamodi? (Romanus 7:22-24) (Odja imajen.)

IMAJINA kel situason li. Un prédiu kai i un ómi staba déntu di el. El ta fika prézu na meiu di kes monti kuza di kel prédiu ki sta tudu distruídu. El sta bibu, má el ka ta pode sai di kel situason el sô. Tudu kel ki el ta konsigi faze é grita pa algen djuda-l i spera pa es tra-l di la.

² Kada un di nos sta na un situason sima kel-li. Di ki manera? Kantu Adon rabela kóntra se Kriador, el bira pekador. Dipôs, el pasa pekadu pa tudu ses fidju. Pekadu poi tudu algen ta fika prézu, sima kel ómi ki fika prézu na meiu di kel prédiu ki ronba. I sima el, nu meste di un algen pa liberta-nu. Apóstlu Paulu pâpia sobri pekadu ki nu erda, na kel karta ki el skrebe pa romanus. (Lé Romanus 7:22-24.) El inplora pa el libradu di “kel korpu ki ta poba el ta móre.” Paulu staba prézu pa pekadu ki el erda di Adon ki ta poba el ta móre. (Rom. 6:23) Nu sta na mésmu situason. Nu meste pa algen resgata-nu!

3. Di ki maneras resgati ta libra-nu?

³ Filismenti, dipôs ki Paulu pâpia di kel situason difísil ki el staba na el, tanbê el da-nu un speransa. Dipôs ki el pergunta: “Ken ki ta libra-m di es korpu ki sta ta pô-m ta móre?”, el fla:” N ta agradese Deus através di Jizus Kristu, nos Sinhor!” (Rom. 7:25) Paulu staba ta pâpia di sakrifisiu di Jizus.a Pamodi resgati (1) Jeová pode púrdua nos pekadu, (2) nu ten speransa di bira perfeitu, i (3) nu pode bira amigu di Jeová. Sima nu ta ba ta studa kes pontu li, nos amor pa Jeová, ki é “kel Deus ki ta da speransa”, ta bira más fórti. (Rom. 15:13) Tanbê nu ta pasa ta da Jizus más valor inda, pamodi “nu libertadu através di resgati i nu purduadu nos pekadu.” — Kol. 1:14.

PAMODI RESGATI, JEOVÁ PODE PÚRDUA NOS PEKADU

4-5. Pamodi ki nos tudu meste di resgati? (Eclesiastes 7:20)

⁴ Nu meste di resgati, asi pa Jeová pode púrdua nos pekadu. Nos tudu nu ta peka na kuzas ki nu fla i ki nu ta faze. (Lé Eclesiastes 7:20.) Alguns pekadu é más gravi di ki otus. Pur izénplu, di akordu ku lei di Muizés, es tinha ki mataba un algen ki fazeba adultériu ô ki mataba otu algen. (Lev. 20:10; Nun. 35:30, 31) É klaru ki txeu pekadu é ka gravi sima kes-li, má simé es é pekadu. Pur izénplu, salmista Davidi fla: ‘N ta ben guarda nha kaminhu pa N ka peka ku nha língua.’ (Sal. 39:1) Kel-li ta mostra ma nu pode peka ti na kuzas ki nu ta fla. — Tia. 3:2.

⁵ Pensa na kuzas ki bu fla i bu faze na pasadu. Algun bês bu fla otus algen kuzas ki bu ka devia flaba? Dja bu faze algun kuza ki dipôs bu rapende? Di serteza ki sin! Bíblia ta fla: “Si nu fla: ‘Nu ka ten pekadu’, nu sta ta ingana nos kabésa i verdadi ka sta na nos.” — 1 Juan 1:8.

6-7. Kuzê ki da Jeová razon pa púrdua nos pekadu? (Odja imajen.)

⁶ Pamodi se justisa perfeitu, Jeová tinha ki fazeba algun kuza pa el ten razon pa púrdua nos pekadu. É pamodi resgati ki Jeová ta pode púrdua nos pekadu. (Efé. 1:7) Má, kel-li ka krê fla ma kes kuza mariadu ki nu ta faze ka ta afeta Jeová. Jeová ta ôdia pekadu. (Isa. 59:2).

⁷ Lei di Muizés ta flaba ma israelitas tinha ki ofereseba un sakrifisiu di animal pa kubriba ses pekadu. (Lev. 4:27-31; 17:11) Kes sakrifisiu ta mostraba ma nu mesteba di un sakrifisiu más grandi, ki éra sakrifisiu di Jizus ki ta trazeba txeu benson i ki ta da Jeová razon pa púrdua nos pekadu. Kuzê ki Paulu skrebe pa kes kriston na Korintu ta mostra ma el ta daba valor pa sakrifisiu di Jizus. Dipôs ki el pâpia di kes kuza mariadu ki es faze na pasadu, el fla-s: “Nhos labadu, nhos biradu santu, nhos txomadu justu na nómi di Sinhor Jizus Kristu i ku spritu di nos Deus.” — 1 Kor. 6:9-11.

8. Kuzê ki bu pode pensa na el antis di bu sisti Komemorason di kel anu li?

⁸ Antis di bu sisti Komemorason kel anu li, tra ténpu pa bu pensa na kuzê ki perdon di Jeová ta siginifika pa bo. Pur izénplu, pamodi resgati bu ka meste xinti kulpadu pamodi pekadus ki bu faze na pasadu i ki dja bu rapende. Bu ta atxa difísil seta ma Jeová dja purdua-u kes pekadu ki bu faze na pasadu? Talvês bu ta pensa: ‘N sabe ma Jeová ta purdua-m, má N ka ta pode púrdua nha kabésa.’ Si bu sta ta xinti asi, lenbra ma Jeová é Kel ki ta púrdua i el da se Fidju autoridadi di julga. Jeová ka da abo ô kalker otu algen responsabilidadi di disidi kenha ki merese ô ki ka merese se mizerikórdia. Bíblia ta fla: “Si nu sta ta anda na lus sima [Jeová] sta na lus, ... sangi di Jizus, se Fidju, ta linpa-nu di tudu pekadu.” (1 Juan 1:6, 7) Nu pode ten serteza ma kel-li é verdadi sima kalker otu kuza ki Bíblia ta inxina. Pamodi resgati, Jeová ten direitu di púrdua nos pekadu i Bíblia ta fla ma el ‘sta sénpri prontu pa púrdua’. — Sal. 86:5.

PAMODI RESGATI, NU TEN SPERANSA DI BIRA PERFEITU

9. Na Bíblia, kuzê ki palavra pekadu siginifika? (Salmo 51:5)

⁹ Na Bíblia, palavra “pekadu” krê fla ka sô kes kuza mariadu ki nu ta faze má tanbê kel inperfeison ki nu nase ku el. (Lé Salmo 51:5.) Pamodi inperfeison ki nu erda, alvês nu ka ta sô pensa i faze kuzas mariadu, má tanbê nos korpu ka ta funsiona dretu sima Jeová faze-l pa el funsiona. I nu ta duense, nu ta bira bédju i nu ta móre. Kel-li ta splika pamodi ki un mininu, ki inda ka faze ninhun pekadu, ta duense i ti mésmu ta móre. Kel-li tanbê ta splika pamodi ki pesoas dretu i pesoas mau ta sufri i es ta móre. Pamodi pekadu di Adon, nos tudu nu sta na kel situason tristi li.

10. Modi ki Adon ku Eva xinti dipôs ki es peka?

¹⁰ Pensa na modi ki pekadu afeta kel primeru kazal. Pekadu pô-s ta ten sentimentu kasábi. Lógu dipôs ki Adon ku Eva peka, ses konsénsia kumesa ta akuza-s. (Rom. 2:15) Es pode xintiba ma algun kuza ka staba dretu. Es xinti ma es meste kubriba ses korpu i sukundi di ses Kriador. (Jén. 3:7, 8) Pa primeru bês, Adon ku Eva xinti dór, vergónha, preokupadu dimás, sen suguransa i kulpadu. Es tinha ki lidaba ku kes sentimentu li ti ki es moreba. — Jén. 3:16-19.

11. Modi ki pekadu ta pô-nu ta xinti?

¹¹ Dja ki nos tudu é inperfeitu, alvês, nos tanbê, nu ta xinti vergónha, kulpadu i preokupadu dimás. Pamodi nos é inperfeitu, nu ta sufri i nu ta xinti dór. Pa más ki nu sforsa pa tenta midjora nos vida i ivita prublémas, sénpri ta ten prublémas ki nu ka ta konsigi rezolve. Pamodi? Pamodi Bíblia ta fla ma nu “podu ta ten un vida sen obijetivu”. (Rom. 8:20) Kel-li ka ta kontise sô ku nos, má ku tudu algen na mundu. Pur izénplu, pensa na sforsu ki ómi ta faze pa rezolve prublémas na naturéza, pa kaba ku krimi i pobréza i pa poi pas entri nasons. Má simé es ka konsigi kaba ku kes prubléma li. Modi ki resgati ta liberta-nu di pekadu?

12. Ki speransa nu ten pamodi resgati?

¹² Pamodi resgati, “própi kriason... ta ben libertadu di pekadu i di mórti”. (Rom. 8:21) Kel-li krê fla ma na Paraízu, óras ki nu bira perfeitu, nu ka ta ben fika duenti, nen nu ka ta ben ten depreson. Tanbê nu ka ta ben xinti dór, vergónha, kulpadu, preokupadu dimás i sen suguransa. Sforsu ki nu ta ben faze pa kuida di téra i pa vive na pas, ta ben ten bons rezultadu dibaxu di govérnu di kel ki resgata-nu, ki é Jizus Kristu, kel ‘Prínsipi di Pas.’ — Isa. 9:6, 7.

13. Na kuzê ki bu pode midita ku gratidon antis di bu sisti Komemorason di kel anu li?

¹³ Pensa na modi ki vida ta ben ser, óras ki pekadu ka izisti más. Imajina modi ki ta ben ser labanta kada palmanhan ta xinti sábi, sen preokupa si bo ô kes algen ki bu ta ama ta ba pasa fómi, fika duenti, ô móre. Mésmu gósi, bu pode xinti pas, si bu “pega riju na kel speransa... sima un ánkura pa alma, ki é suguru i firmi”. (Ebr. 6:18, 19) Sima un ánkura ta djuda un barku mante firmi, bu speransa ta djuda bu fé mante firmi i el ta djuda-u aguenta kalker prubléma ki bu pode pasa pa el gósi. Tanbê bu pode ten serteza ma Jeová “ta rekonpensa kes ki ta djobe-l asériu.” (Ebr. 11:6) É pamodi resgati ki bu ta xinti konsoladu gósi i bu ten un speransa pa futuru.

PAMODI RESGATI NU PODE SER AMIGU DI JEOVÁ

14. Modi ki pekadu afeta nos amizadi ku Deus, i pamodi?

¹⁴ Désdi ki Adon ku Eva peka, umanus fika afastadu di Deus i es ka ta podia más sérba se amigu. (Rom. 8:7, 8; Kol. 1:21) Pamodi? Pamodi Jeová é perfeitu i el ka ta pode aprova pekadu. Bíblia ta fla kel-li sobri Jeová: ‘Bus odju é puru dimás pa odja kel ki é mau; bu ka ta pode dexa maldadi kontise.’ (Hab. 1:13) Pekadu kria un barera entri Deus i ómi. Ninhun di nos ka ta pode ser amigu di Jeová si ka tradu kel barera ki ta inpidi-nu di ser se amigu. É resgati ki ta tra kel barera li i ki da-nu xansi di bira amigu di Jeová otu bês.

15. Modi ki sakrifisiu di Jizus da-nu xansi di ten un amizadi fórti ku Jeová otu bês?

¹⁵ Bíblia ta fla na 1 Juan 2:2 ma Jizus é “un sakrifisiu pa nu faze pas ku Deus.” Modi ki “sakrifisiu” di Jizus ta dexa-nu “faze pas” ku Jeová? Mórti di Jizus da nos Deus ki é perfeitu razon pa faze pas ku nos. (Rom. 3:23-26) El pode ti mésmu txomaba “justu” kes algen ki adora-l di manera fiel antis di Jizus móre. (Jén. 15:1, 6) Pamodi ki el faze kel-li? Pamodi Jeová tinha serteza ma se Fidju, Jizus, ta pagaba resgati. (Isa. 46:10) Resgati da-nu xansi di ten un amizadi fórti ku Jeová.

16. Kuzê más ki bu pode pensa na el antis di sisti Komemorason kel anu li? (Odja imajen.)

¹⁶ Pensa na modi ki bu vida é gósi pamodi bu ten un amizadi ku Jeová. Pur izénplu, talvês bu ta txoma Jeová di “Pai”, sima Jizus inxina-nu pa nu faze. (Mat. 6:9) Alvês, bu pode ti mésmu txoma Jeová di bu “amigu.” Óras ki nu ta txoma Jeová di “Pai” ô “amigu,” nu debe faze-l ku txeu ruspetu i umildadi. Pamodi? É pamodi nos é inperfeitu. Sikrê nu ta xinti txeu amigu di Jeová é ka pamodi nu merese. É sô pamodi resgati ki nu ta pode ten un amizadi ku Jeová. ‘Através di sangi di Jizus ki bazadu na staka di tortura, Deus faze pas ku tudu kes otu kuza’. (Kol. 1:19, 20) É pur isu ki nu ta pode ser amigu di Jeová mésmu gósi sikrê nos é inperfeitu.

RESGATI TA PROVA MA JEOVÁ TEN MIZERIKÓRDIA

17. Modi ki resgati ta mostra ma Jeová ten txeu mizerikórdia? (Efézius 2:4, 5)

¹⁷ Resgati ta mostra ma Jeová ten “txeu mizerikórdia.” El “da-nu vida... kantu nu staba mortu.” (Lé Efézius 2:4, 5.) Sima kel algen ki fika prézu na kel prédiu ki kai, kes algen ki ten “bon atitudi pa ganha vida pa tudu ténpu” ta rekonhese ma nu meste di ajuda i ma nu ka ta konsigi rezolve nos prubléma nos sô. (Atus 13:48) Jeová sta ta djuda kes algen através di mensajen di Reinu, asi pa es pode konxe-l i konxe se Fidju, Jizus i pa es intende ma é resgati ki ta libra-nu di pekadu. (Juan 17:3) Si Satanás pensa ma pamodi pekadu di Adon ku Eva el inpidi Deus di kunpri se vontadi, el staba txeu inganadu.

18. Timenti nu ta midita na resgati, di kuzê ki nu meste lenbra?

¹⁸ Timenti nu ta ba ta midita na modi ki resgati ta djuda-nu, nu meste lenbra di kel razon prinsipal ki poi Jeová ta da resgati. El da resgati ka sô pa salva-nu, má pa un kuza mutu más inportanti. Resgati é un manera ki Jeová ta responde kes akuzason ki Satanás faze kóntra el na jardin di Éden. (Jén. 3:1-5, 15) Através di resgati, Jeová prova ma kes kuza mariadu ki Satanás fla sobri el é ka verdadi. Tanbê el salva-nu di pekadu i di mórti, i kel-li ta mostra ma el é un Deus di amor. Pamodi se grandi bondadi, sikrê ku nos inperfeison, Jeová dexa-nu prova ma kes kuza ki Satanás fla sobri el é ka verdadi. (Pro. 27:11) Modi ki bu pode mostra ma bu ta da valor pa resgati? Nu ta ben responde kel pergunta li na kel otu studu.