Un mensajen di Palavra di Deus — Speransa pa kes rafujiadu!

Tudu anu, milhons di algen ten ki fuji di ses kaza. Bu sta ta pasa pa kel situason difísil li? Si sin, bu pode ten serteza ma bu ka sta bo sô. Deus ta da-nu speransa di un vida midjór. Bu pode prende sobri kel speransa li na Bíblia.

Christos Stylianides ki ta trabadjaba na Union Europeiaa fla: “Kes algen rafujiadu i kes ki tevi ki sai di ses kazab ka ta meste sô di ajuda kel óra, má tanbê. . . es ta meste di un speransa pa futuru.” Ken ki ten speransa ta odja pa futuru ku un atitudi puzitivu. Má alén di ten speransa, kes algen rafujiadu meste di konsolu pa es pode lida ku ses sentimentu.

“Kantu N tevi ki fuji di nha país i dexa nha família pa tras, N xinti mi sô. N staba ku medu, ku sodadi i preokupadu dimás.” — Emmanuel, Aiti.

Bu sta ta xinti sima Emmanuel? Si bu tevi ki fuji di bu kaza, bu meste di konsolu i speransa. Modi ki Bíblia ki é Palavra di Deus, pode djuda-u?

Palavra di Deus ta konsola-nu

Bíblia ta fla: “Jeovác. . . ta ama kel stranjeru ki ta mora na nhos meiu”. — Deuteronómiu 10:17, 18.

Bíblia ta fla: ‘Jeová sta pértu di tudu kes ki ta invoka-l’. — Salmo 145:18.

Bíblia ta fla: ‘Deus verdaderu nunka ka ta fazeba kel ki é mau. Kel Tudu-Poderozu ka ta faze justisa mariadu.’ — Jó 34:10, 12.

Kel-li krê fla ma Deus é ka kulpadu pa bu sufrimentu. El ka ta kastiga-u i nen el ka ta pô-u ta ten un vida difísil pa el pô-u na próva.

Bíblia ta da-nu speransa

Bíblia ta splika kuzê ki Deus ta ben faze pa nos na futuru. Odja modi ki kel speransa li sta ta djuda kes algen ki tevi ki fuji di ses kaza.

Bíblia ta fla: “[Deus] ta ben linpa tudu lágua di ses odju, i ka ta ben ten más mórti, nen tristéza, nen txoru nen dór.” — Apokalipse 21:4.

Kel-li krê fla ma nu ka ta ben sufri más. Deus promete rezolve tudu kes prubléma ki pode pô-u ta xinti sen speransa.

“Ka ta dura Deus ta ben kaba ku kes injustisa i kuzas mariadu ki sta ta kontise na nos vólta. Kel speransa li ta djuda-m konsentra na kel dia ki tudu sufrimentu ta ben kaba.” — Karla, El Salvador.

Bíblia ta fla: ‘Kes kuza ki tinha antis ka ta ben lenbradu más, i nen es ka ta ben pasa pa korason.’ — Isaías 65:17.

Kel-li krê fla ma nu ka ta ben sufri más pamodi lenbransas kasábi. Deus ta ba garanti ma nunka más bu ka ta ben sufri pamodi lenbransas di kuzas kasábi ki bu pasa pa el.

“Bíblia ta promete ma nen nu ka ta ben lenbra di kel tristéza ki nu xinti kantu nu fuji di nos kaza i nu perde tudu kuza. Kel speransa li ta djuda-m lida ku es situason difísil pamodi N sabe ma ka ta dura tudu kuza ta ben muda.” — Natalia, Ukránia.

Bíblia ta fla: ‘Deus di séu ta ben traze un reinu ki ta ben disfaze i el ta ben kaba ku tudu kes reinu.’ — Daniel 2:44.

Kel-li krê fla ma un govérnu perfeitu na séu ta ben governa téra. Ka ta dura govérnu di Deus ta ben fika na lugar di tudu kes govérnu di ómi. Kel govérnu li ta ben traze pas di verdadi i suguransa, el ta ben trata tudu algen igual i ningen ka ta ben fika póbri. — Miqueias 4:3, 4.

“N ta xinti inkorajadu di sabe ma prublémas sima abuzu, diskriminason i rasismu ka ta ben dura txeu. Ka ta dura Reinu di Jeová ta ben kaba ku tudu kes prubléma li.” — Mustafa, Orienti Médiu.

Sabedoria di Palavra di Deus

Sabedoria di Palavra di Deus pode djuda-u seta poku-poku kuzê ki bu sta ta pasa pa el. Tanbê el pode djuda-u lida ku bu novu situason i kel-li ta inklui kes kuza material ki bu perde. Odja modi ki kes prinsípiu di Bíblia li sta ta djuda alguns rafujiadu:

Bíblia ta fla: “Mésmu óras ki un algen ten txeu kuza, se vida ka ta ben di kes kuza ki el ten.” — Lukas 12:15.

Modi ki kel-li pode djuda-u: Talvês bu sta xinti dizorientadu ku kuzê ki kontise i tristi pamodi kes kuza ki bu tevi ki dexa pa tras. Má si bu para i bu pensa ma bu vida ten mutu más valor di ki kalker kuza ki bu dexa pa tras, kel-li pode djuda-u ka xinti txeu tristi pamodi kes kuza ki bu perde.

“Vida é más inportanti di ki kuzas material. Na alguns situason, kuzas material i dinheru ka ta pode djuda-u.” — Natalia, Ukránia.

Bíblia ta fla: ‘Ka bu fla: “Pamodi ki kes ténpu antigu éra midjór ki ténpu di gósi?”’ — Eclesiastes 7:10.

Modi ki kel-li pode djuda-u: Bu situason gósi pode ser txeu difísil, má tenta ka konpara kel situason ki bu sta na el gósi ku bu situason antis, pamodi kel-li pode pô-u ta xinti piór.

“Seta kel situason ki N sta na el gósi, ta djuda-m kontinua ta ten un atitudi puzitivu.” — Eli, Ruanda.

Bíblia ta fla: “Si nu tene kumida i ropa, nu ta fika kontenti ku kes kuza li.” — 1 Timótiu 6:8.

Modi ki kel-li pode djuda-u: Sforsa pa bu sta kontenti ku kes kuza ki bu meste pa bu vive. Si bu sta kontenti talvês bu ta xinti ménus stress i kel-li pode djuda-u ka fika preokupadu dimás.

“Bíblia sta ta djuda-m odja kuzas di manera diferenti, envês di konsentra na kes kuzas ki N perde. Mi ku nha mudjer nu sta kontenti pamodi nu sta bibu i nu sta na un lugar suguru.” — Ivan, Ukránia.

Bíblia ta fla: “Tudu kuza ki nhos krê pa otus algen faze nhos, nhos faze-s tanbê.” — Mateus 7:12.

Modi ki kel-li pode djuda-u: Talvês bu ta konsigi da midjór ku otus algen si bu sforsa pa mostra paxénxa i bondadi. Bu atitudi pode djuda pesoas di undi ki bu sta gósi seta-u envês di trata-u ku prekonseitu.

“Maioria di algen gosta óras ki pesoas ta trata-s ku ruspetu, bondadi i amor. Kes kualidadi li pode djuda-u da dretu ku pesoas di kel lugar undi ki bu sta gósi.” — Angelo, Sri Lanka.

Bíblia ta fla: ‘Sénpri nhos ora pa Deus i nhos inplora-l. Kel pas di Deus ta proteje nhos korason i nhos menti’. — Filipensis 4:6, 7.

Modi ki kel-li pode djuda-u: Ora pa Deus i konta-l sobri modi ki bu sta xinti, kuzê ki bu meste, bus medu i bus preokupason. Kes orason li pode djuda-u lida ku ansiadadi i ka fika preokupadu dimás ku bu situason.

“N ta ora pa Deus sénpri ki N ten un prubléma i el ta responde-m. Kuzê ki N prende na Bíblia ta da-m pas déntu mi.” — Yol, Sudon di Sul.

“Kes bons konsedju ki Bíblia ta da djuda-m ten kel pas déntu mi ki N mesteba pa N lidaba ku kel situason difísil li.” — Valentina, Ukrania.

“N ta xinti inkorajadu di sabe ma Jeová Deus promete un vida midjór.” — Emmanuel, Aiti

Bu ta gostaba di prende más sobri kel konsolu i kel speransa ki Bíblia ta promete? Pamodi ki bu pode kunfia na kuzê ki Bíblia ta fla? Pidi un Tistimunha di Jeová pa vizita-u. Bu ka meste paga nada i es ta fika kontenti di djuda-u.