Profesias di Bíblia sobri prublémas na pulítika i na sosiadadi sta ta kunpri

Pesoas oji sta kada bês más divididu pamodi pulítika. Es ten ideias diferenti sobri kes lei ki ta afeta ses vida i es ta pâpia sobri es ku raiba. Alén di kel-li, kes algen ki ta faze lei i kes otu autoridadi, ten opinions diferenti i txeu bês es ka ta krê seta opinion di otus algen. Tudu kes kuza li, ta traze prubléma na pulítika i govérnus ka ta konsigi faze ses trabadju sima es debe fazeba.

Mérka ku Inglatéra tanbê sta ta pasa pa tudu kes prubléma li na pulítika. Na verdadi kel situason li sta ta kunpri un profesia di Bíblia. Modi? Bíblia dja flaba ma óras ki kel dôs país li pasaba pa kes prubléma li, Deus ta ben ajiba. El ta ben poba un govérnu na séu i rezolve tudu prubléma di mundu.

Prublémas na pulítika “na fin di ténpu”

Na Bíblia, na livru di Daniel, nu ta atxa un profesia ki ta dexa algen dimiradu. Na kel profesia li, Deus fla ‘kuzê ki ta ben kontise na fin di ténpu’. Kantu Daniel skrebe kes palavra li, el staba ta pâpia di un ténpu na futuru, undi mudansas inportanti ta ben kontiseba na mundu. — Daniel 2:28.

Deus mostra kel profesia li pa rei di Babilónia na un sonhu. Na kel sonhu, kel rei odja un státua grandi ki fazedu di metal diferenti. Dipôs, proféta Daniel splika ma kada párti di korpu di kel státua ta reprizentaba govérnus na mundu ki ta ben ganhaba puder i dipôs es ta ben perdeba puder sima ténpu ta ba ta pasa.a Dipôs, un pédra ta da na el i el ta kaba ku el. Kel pédra ta reprizenta un Reinu ô un govérnu, ki Deus skodje. — Daniel 2:36-45.

Di akordu ku kel profesia, Reinu di Deus ta ben fika na lugar di tudu govérnu di ómi. É di kel Reinu li ki Jizus staba ta pâpia kantu el inxina ses sigidor ora. El fla: “Pa bu Reinu ben.” — Mateus 6:10.

Má na ki párti di kel profesia di Bíblia li ki ta flaba ma ta tinha prublémas na pulítika? Repara ma pé di kel státua éra ‘un párti di féru i un párti di arjila.’ (Daniel 2:33) Kel mistura di material li éra diferenti di kes otu párti di kel státua, ki fazedu kada un di un tipu di material. Kel mistura li ta mostra ma ta ben tinha un govérnu na mundu ki ta ben sérba diferenti di tudu kes otu. Modi? Profesia di Daniel ta splika:

Di akordu ku kel profesia li, kel govérnu ki ta ben mandaba na mundu, ki kel pé di státua ta reprizenta, ta ben tinha prublémas na pulítika. Kel-li krê fla ma kes algen ki ta ben viveba na undi ki kel govérnu li ta mandaba, ta ben fazeba kuzas ki ta biraba kel govérnu li fraku.

Kel profesia di Daniel sta ta kunpri oji

Kes pé di kel státua ta reprizenta kel govérnu ki ta manda na mundu oji, ki é Mérka ku Inglatéra djuntadu. Modi ki kes kuza ki sta ta kontise na nos ténpu ta prova kel-li?

Kes pé di kel státua é ‘un párti di féru i un párti di arjila’. Kel mistura di material li ta poi kel pé ta fika fraku. (Daniel 2:42) Oji, puder di Mérka ku Inglatéra sta ta bira fraku pamodi ses povu sta divididu. Pur izénplu, na kes dôs país ten grupus di pesoas ki sta kóntra kunpanheru. Pur isu, es ta faze manifestason ku violénsia pa iziji ser direitu. Kes governanti ki pesoas ta skodje, txeu bês ka ta konkorda ku kunpanheru na txeu asuntu. Dja ki pesoas sta divididu, Mérka ku Inglatéra txeu bês ka ta konsigi faze kuzê ki es disidi.

Odja alguns kuza ki kel profesia di Daniel ta pâpia di el i modi ki es sta ta kunpri oji:

Profesia: ‘Reinu ta ben sta divididu. Má, ta ben ten un párti riju na el, ki é di féru’. — Daniel 2:41.

Kuzê ki kel-li krê fla? Enbóra pesoa na Mérka ku Inglatéra sta divididu déntu di ses própi govérnu na txeu asuntus di pulítika, tudu es ten trópas i armas di géra poderozu. Pamodi kel-li, es ta pode faze kuzas ki ta afeta mundu interu. É pur isu ki es é fórti sima féru.

Modi ki kel profesia li sta ta kunpri?

Na un lista di kantu dinheru ki kada país gasta ku kuzas di géra na 2023, nu ta odja ma Mérka ku Reinu Unidu djuntu gasta más dinheru di ki kes 12 país djuntadu ki sta na kel lista dipôs di es. — Instituto Internacional de Estudos para a Paz de Estocolmo.

“Kel amizadi entri Reinu Unidu ku Mérka é kel amizadi más fórti di mundu. [...] Pa difende nos país, nu ten tekinolojia más novu ki ten. [...] Nu ta trabadja djuntu, nu ta fika djuntu, nu ta luta djuntu.” — Comando Estratégico, Ministério da Defesa do Reino Unido, abril de 2024.

Profesia: “Sima kes dédu di pé éra un párti di féru i un párti di arjila, tanbê kel govérnu ta ben ser un párti fórti i un párti fraku.” — Daniel 2:42.

Kuzê ki kel-li krê fla? Enbóra Mérka ku Inglatéra ten trópas i armas fórti, es ka ta konsigi faze tudu kuza ki es krê pamodi manera ki ses govérnu ta funsiona. Si maioria di algen ka konkorda ku un ideia, ta fika difísil pa kes govérnu li faze kuzê ki es krê.

Modi ki kel profesia li sta ta kunpri?

“Di akordu ku alguns algen ki ta studa pulítika, Mérka ka ta konsigi faze kuzê ki el ta fla mundu ma el ta pode faze, sima na asuntus di suguransa i nogósiu. Kel-li ta kontise pamodi kes divizon ki ten déntu di se própi govérnu.” — “The Wall Street Journal”.

“Na Reinu Unidu ten más prubléma na pulítika di ki antis. Kes pulítiku sta más konsentradu na rezolve kes prubléma. Pur isu, própi kes funsionáriu di govérnu ka ta konsigi faze kes mudansa ki meste pa djuda povu.” — Institute for Government.

Profesia: “Es [kes govérnu] ta ben sta misturadu ku povu; má es ka ta fika koladu na kunpanheru, sima féru ka ta mistura ku arjila.” — Daniel 2:43.

Kuzê ki kel-li krê fla? Na kes govérnu ki ten demokrasia, povu ten algun kontrolu sobri kuzê ki ta kontise na govérnu. Má kes rezultadu ka ta agrada nen kes governanti i nen kes algen ki vota.

Modi ki kel profesia li sta ta kunpri?

“Oji maioria di kes algen di Mérka ten un ideia negativu sobri pulítika i kes pulítiku.” — Pew Research Center.

“Oji kes algen di Inglatéra ta kunfia ménus na ses govérnu i na kes pulítiku di ki na kes últimu 50 anu.” — Centro Nacional de Investigação Social.

Modi ki profesia di Daniel ta ben kunpri na futuru?

Di akordu ku kel profesia di Daniel, Mérka ku Inglatéra ta sta ta trabadja djuntu ta governa mundu, óras ki Reinu di Deus ben fika na lugar di tudu govérnu di ómi. — Daniel 2:44.

Na un profesia sobri kel mésmu ténpu ki sta na livru di Apokalipse, Bíblia ta mostra ma “kes rei di téra interu” ta ben djunta kóntra Jeováb Deus pa géra di Armajedon, ki é “kel géra di kel grandi dia di Deus, kel Tudu-Poderozu.” (Apokalipse 16:14, 16; 19:19-21) Na kel géra li, Jeová ta ben distrui tudu govérnu di ómi. I kuzê ki ta ben kontise ku kes govérnu ki manda na mundu, ki kel státua ki profesia di Daniel ta pâpia di el? Es ta ben dexa di izisti pa tudu ténpu.

Pa sabe más, odja artigu “Kuzê ki é géra di Armajedon?”

Pamodi ki é bon konxe kel profesia di Daniel sobri kes prubléma ki ta ben kontiseba na pulítika?

Bíblia dja flaba di manera izatu kes prubléma na pulítika ki ta tinha oji na Mérka ku Inglatéra. Prende sobri kel-li ta djuda-nu pensa di manera diferenti sobri kes kuza ki sta ta kontise gósi.

• Kel profesia li ta djuda-nu intende pamodi ki Jizus ka krê pa nu mete na asuntus di pulítika di kel mundu li. (Juan 17:16) Nu ta intende midjór pamodi ki Jizus, ki é kel governanti ki Deus skodje pa ser Rei di se Reinu, fla: “Nha Reinu ka ta faze párti di es mundu.” — Juan 18:36.

• Kel profesia li ta da-nu un speransa pa futuru. Nu sabe ma ka ta dura Reinu di Deus ta ben muda tudu kuza i el ta ben traze bensons pa tudu algen. — Apokalipse 21:3, 4.

• Kel profesia li ta djuda-nu odja pa futuru ku kunfiansa. Nu ka meste fika preokupadu más si kes prubléma entri nason ta ben distrui téra. — Salmo 37:11, 29.

Kel profesia di Daniel ta mostra ma Mérka ku Inglatéra djuntu, ki ta reprizenta kes pé di kel státua, ta ben ser kel últimu govérnu di ómi ki ta ben governa mundu. Dipôs di kel-li, un govérnu perfeitu na séu, ki é Reinu di Deus, ta ben governa téra.

Pa sabe más sobri kuzê ki Reinu di Deus ta ben faze pa umanus, odja vídiu Kuzê ki é Reinu di Deus?.