24 TI 30 DI AGOSTU DI 2026
KÁNTIKU 65 Nu kontinua ta sforsa!
Modi ki faze párti di un grupu pa pregason ta djuda-nu?
“N ta ben lova Jeová di tudu nha korason na meiu di un grupu di algen justu”. — SALMU 111:1.
ASUNTU PRINSIPAL
Nu ta ben odja modi ki faze párti di un grupu pa pregason ta djuda-nu.
1-2. Modi ki txeu algen ta xinti pamodi es ta faze párti di un grupu pa pregason?
BU TA lenbra di kel dia ki bu aprovadu pa ser un publikador di notísias sábi? Kel-li foi un dia filís pa bo, pamodi bu kumesa ta faze párti di un grupu grandi di pesoas ki ta lova nómi di Jeová. (Sal. 148:1, 2, 12, 13) Má tanbê na kel dia, talvês bu kumesa ta faze párti di un grupu más pikinoti, ki é grupu pa pregason formadu pa irmons ku irmans di bu kongregason. Grupu pa pregason é inportanti pamodi el ta djuda-nu kunpri kel órdi ki Jizus da-nu di prega kes notísia sábi di Reinu “na mundu interu”. — Mat. 24:14.
2 Modi ki bu ta xinti pamodi bu ta faze párti di un grupu pa pregason? Un irman ki txoma Wendya fla: “Nha grupu pa pregason sta ta djuda-m di txeu manera. Pur izénplu, N midjora nha manera di prega i inxina, el djuda-m poi métas i sforsa pa alkansa-s i N faze txeu amigu.” Un irmon ki txoma Rich fla: “Pa mi ser un enkaregadu di grupu pa pregason é un grandi priviléjiu. Un publikador pode djuda un algen faze prugrésu pa el batiza, má un enkaregadu di grupu pa pregason ten oportunidadi di djuda kel algen bira más amigu di Jeová i bira un sérvu di Jeová midjór, mésmu dipôs di txeu ténpu batizadu.” Un irman ki txoma Dina fla: “Faze párti di un grupu pa pregason é sábi dimás! Pa mi nha grupu é sima nha família.”
3. Kuzê ki nu ta ben odja na kel studu li?
3 Na kel studu li, primeru nu ta ben odja kal ki é responsabilidadi di enkaregadu di grupu pa pregason i di se ajudanti, i modi ki es pode djuda irmons ku irmans di ses grupu. Sugundu, nu ta ben odja modi ki kada un di nos pode djuda nos grupu pa pregason. Tirseru, nu ta ben odja modi ki faze párti di un grupu pa pregason é bon pa nos.
ENKAREGADU DI GRUPU PA PREGASON I SE AJUDANTI
4. (a) Kuzê ki un enkaregadu di grupu pa pregason ta faze? (b) Modi ki un enkaregadu di grupu pa pregason ta kuida di se grupu? (Odja kuadru “Sujistons pa enkaregadu di grupu pa pregason”.)
4 Un enkaregadu di grupu pa pregason é un ansionb ki grupu di ansion dizigina pa djuda un grupu di publikador bira más amigu di Jeová i midjora ses manera di prega i inxina. Modi ki el ta faze kel-li? Primeru, el ta mostra ma el ta preokupa ku kada algen di se grupu. (Pro. 27:23) Dja ki el ta sta sienti i el ta preokupa ku kes irmon, sénpri el ta pâpia ku es pa el sabe modi ki es sta. Óras ki el ta faze kel-li, el pode djuda-s kontinua amigu di Jeová, el ta mostra-s amor óras ki es sta ku ansiadadi ô deprimidu i el ta pode djuda-s di otus manera. (Pro. 12:25; Iza. 32:2; Tia. 2:15-17) Sugundu, el ta djuda kada publikador faze se midjór na pregason. El ta sforsa pa prega ku se grupu tudu simana. Tanbê, el ta sforsa pa prega ku kada algen di se grupu pa inkoraja-s i pa djuda-s midjora ses manera di prega i inxina. Si alvês el ka konsigi sta ku se grupu pa pregason, el pode pidi se ajudanti ô otu publikador kualifikadu pa kuida di grupu. Tirseru, el ta trena kes irmon batizadu pa es kualifika pa resebe más responsabilidadi na kongregason. (1 Tim. 3:1) El ta da-s ilojiu sinseru, konsedju ku bazi na Bíblia i sénpri el ta trena irmons pa es pode bira ajudanti di kongregason i ansion. Dja ki trabadju di enkaregadu di grupu pa pregason é inportanti, grupu di ansion ta skodje kes ansion ki sta más kualifikadu pa kuida di un grupu.
5. Ki dizafiu alguns enkaregadu di grupu pa pregason ta pasa pa el?
5 Un enkaregadu di grupu pa pregason pode pasa pa alguns dizafiu pa kuida di se grupu. Odja izénplu di Jorje, un enkaregadu di grupu pa pregason di Alimanha. Sima txeu otus ansion, el ten ki kuida di más di ki un diziginason na kongregason. El fla: “É ka fásil ser enkaregadu di un grupu pa pregason i omésmu ténpu kuida di otus diziginason na kongregason. Pamodi kel-li, é difísil N kunpri nha méta di pâpia ku kada algen di nha grupu.” Abel, ki é un ansion di Uganda i ki ten 70 anu, fla: “Na nos kongregason, nu ten poku ansion i ajudanti di kongregason. Pur isu, kes grupu pa pregason di nos kongregason é un bokadinhu grandi. Pamodi kel-li, N ta atxa difísil trabadja ku kada publikador i inkoraja-s sima N ta gostaba.” Un ansion di Suriname ki txoma Obed fla: “N gosta di trena otus algen. Má bu ta meste ténpu i forsa pa bu trena otus algen i txeu bês bu ka ta ten rezultadu lógu. Pamodi kel-li, txeu bês N ka ta trena otus algen pamodi N ta sta okupadu ta faze otus kuza.” Kuzê ki pode djuda ansions lida ku prublémas sima kes-li?
6. Modi ki faze grupus pikinoti pa pregason ta djuda enkaregadus di grupu pa pregason kuida di irmons di ses grupu?
6 Sénpri ki ta da, kes grupu pa pregason debe ser pikinoti, asi pa kes enkaregadu di grupu pa pregason pode konxe tudu algen di ses grupu i djuda-s kontinua ku un amizadi fórti ku Jeová. Má i si ten poku ansion na un kongregason? Si grupu di ansion faze grupus grandi pa pregason, ta ser difísil pa un enkaregadu di grupu pa pregason kuida di tudu algen di se grupu. Pur isu, grupu di ansion pode skodje un ajudanti di kongregason pa kuida di un grupu. Óras ki kes grupu é pikinoti, enkaregadus di grupu pa pregason ta pode kuida di kel trabadju más inportanti, ki é djuda irmons ku irmans di ses grupu kontinua fiel pa Jeová i aguenta prublémas.
7. Na kes kongregason ki ten poku ansion, kuzê ki kes enkaregadu di grupu pa pregason pode faze pa kuida dretu di tudu algen di ses grupu? (1 Pedru 5:2) (Odja imajen.)
7 Si bo é un enkaregadu di grupu pa pregason na un kongregason ki ten poku ansion, sforsa pa bu trena bu ajudanti pa el djuda-u kuida di irmons ku irmans di bu grupu. (Lé 1 Pedru 5:2.) Da bu ajudanti di grupu alguns responsabilidadi. Pur izénplu, alvês bu pode pidi-l pa el faze runion pa pregason i organiza trabadju di pregason di bu grupu pa kel dia. Tanbê é inportanti pâpia ku el sobri modi ki nhos pode djuda kada algen di grupu midjora ses manera di prega i inxina, i kontinua amigu di Jeová. Sénpri ki ta da, leba bu ajudanti pa ba faze vizita di pastoreiu i da-l alguns sujiston antis i dipôs di kada vizita. Ku ténpu bu ajudanti pode bira un enkaregadu di grupu pa pregason. (2 Tim. 2:2) Tanbê bu pode pidi otus irmon di bu grupu pa djuda-u trena publikadoris na pregason. Pionerus i otus irmon maduru pode trabadja djuntu ku kes irmon ki inda ten poku spiriénsia. Es pode djuda kes ki meste ajuda pa kumesa un konbérsu na pregason, faze revizitas ô faze studus di Bíblia. Gósi, nu ben odja três kuza ki nos tudu nu pode faze pa nu djuda nos grupu pa pregason.
Un ansion pode trena un ajudanti di kongregason di se grupu pa pregason, sima óras ki el ta pidi-l pa el faze runion pa pregason. (Odja parágrafu 7.)
DJUDA BU GRUPU PA PREGASON
8. Modi ki nu pode djuda nos grupu pa pregason? (Romanus 1:12)
8 Prega ku bu grupu. Óras ki nu ta prega djuntu ku otus algen, nu ta “inkoraja kunpanheru”. (Lé Romanus 1:12.) Óras ki nu ta prega djuntu, nu ta xinti ménus nervozu na da tistimunhu i nu ta xinti suguru óras ki nu ta prega na alguns lugar. Si bu trabadju alvês ka ta dexa-u sisti runion ku bu grupu pa pregason, bu ta pode pidi bu patron pa muda bu oráriu di trabadju? Talvês bu ta fika dimiradu ku se respósta. (Nee. 2:4-6) Si pamodi idadi ô prublémas di saúdi, bu ka ta konsigi sisti runion ku bu grupu pa pregason, pâpia ku bu enkaregadu di grupu pa pregason. El pode faze aranju pa bu sisti runion pa pregason através di internet i pa bu skrebe karta ô pa bu da tistimunhu pa tilifóni djuntu ku otus algen di bu grupu. Bo é jóven i bu ten bon saúdi, má simé sta difísil pa bu sai na pregason tudu simana? Si kel-li sta ta kontise, faze planu pa bu prega ku un algen di bu grupu tudu simana. Alvês bu meste djobe kuzê ki é más inportanti na bu vida i modi ki bu pode uza bu ténpu más dretu. (Rom. 12:11; Kol. 4:5) Bale péna tudu sforsu ki bu ta faze. Ora pa Jeová. El pode da-u “dizeju i forsa pa aji.” — Flp. 2:13.
9. Modi ki nu pode djuda nos grupu pa pregason xinti sima un família? (Romanus 12:13)
9 Djuda bu grupu xinti sima un família. Nu pode djuda kes algen di nos grupu xinti amadu si nu “djobe manera di resebe otus algen dretu.” (Lé Romanus 12:13.) Talvês nu pode oferese nos kaza pa es faze runion di grupu pa pregason. Na alguns kongregason, kada simana un grupu pa pregason ta konvida kel algen ki faze diskursu pa públiku, ki é di otu kongregason, pa ba kume djuntu ku es. I sikrê kel algen ki ba faze diskursu ka ta pode, alguns grupu ta ba kume djuntu, asi pa es pode pasa ténpu djuntu dipôs di runion. Un pionera spesial ki txoma Sara fla: “N ta fika preokupadu óras ki N ta resebe otus algen na nha kaza, pur isu N ta tenta faze kuzas sinplis. N ta konsentra na konxe nhas irmon envês di preokupa dimás ku kumida.” Óras ki nu ta sforsa pa djuda nos grupu bira sima un família ki ta mostra amor, nu ta fika más amigu di Jeová i di kunpanheru. — Nee. 8:10; Atus 20:35.
10. Kuzê ki nu pode faze si nu krê midjora nos manera di prega i inxina? (Provérbius 1:5; 27:17) (Odja imajen.)
10 Sforsa pa bu midjora bu manera di prega i inxina. Kantu más nu midjora nos manera di prega i inxina, más nu ta gosta di prega djuntu ku nos grupu. Ten algun kuza ki bu ta krê midjoraba na bu manera di prega i inxina? Bu pode pidi un algen, talvês un pioneru ô un publikador ku spiriénsia di bu grupu pa djuda-u. (Lé Provérbius 1:5; 27:17.) Pâpia ku bu enkaregadu di grupu pa pregason sobri bu méta. El pode djuda-u alkansa bu méta. Tanbê bu pode pidi otus irmon pa djuda-u. Un irman faze kel-li, sikrê el é tímida. El fla: “N pidi un pionera pa djuda-m faze revizita. El mostra-m amor i bondadi, i sénpri el ta trabadjaba ku mi na pregason. Ti el djuda-m kumesa un studu di Bíblia ku un di nhas revizita. N fika kontenti di pidi-l ajuda pamodi gósi N ta xinti más alegria na pregason.” Kel-li ta mostra ma nu pode faze txeu kuza pa nu djuda nos grupu pa pregason.
Dja ki grupu pa pregason é pikinoti, é más fásil nu konxe irmons i nu sai ku es na pregason. (Odja parágrafu 10.)
MODI KI NOS GRUPU PA PREGASON TA DJUDA-NU?
11-12. Modi ki bu grupu pa pregason pode djuda-u kontinua amigu di Jeová i bira un sérvu di Jeová midjór? Da un izénplu.
11 Nu ta bira más amigu di Jeová. Grupu pa pregason pode djuda kada un di nos. Pur izénplu, Jeová ta uza kes enkaregadu di grupu pa pregason pa djuda kes irmon ki más meste di ajuda i ki el ta ama txeu, sima kes viúva, órfon i kes algen di idadi. (1 Tes. 2:8; Tia. 1:27) Sai na pregason ku irmons di nos grupu ta djuda-nu midjora nos manera di prega i inxina. Irmons batizadu pode trenadu pa kunpri alguns responsabilidadi na kongregason, asi pa djuda más algen. — 1 Tim. 3:10.
12 Odja modi ki grupu pa pregason djuda Wendy, ki dja nu papiaba di el antis. El fla: “Pamodi nha pai ta fazeba nos opozison, alvês nha mai ka ta konsigi saíba na pregason na fin di simana ku nos grupu pa pregason. Má el ta dexaba mi bai, pur isu N ta baba. Un irman di idadi ki éra pionera bira nha amiga i el ta trabadjaba txeu ku mi na pregason. El djuda-m prega midjór i el inxina-m modi ki N ta fazeba más na kongregason. N ta lenbra ma txeu bês enkaregadu di grupu pa pregason da-m konsedju ku bazi na Bíblia ki ta djuda-m ti oji.”
13. Modi ki nos grupu pa pregason pode djuda-nu ten amigus ki ta ama-nu i ki ta djuda-nu? (Odja imajen.)
13 Nu ta ten amigus ki ta ama-nu i ki ta djuda-nu. Nu ta bira bons amigu di kes algen di nos grupu si nu trabadja “djuntu” ku es na pregason. (Flp. 1:27) Dja ki grupu pa pregason é pikinoti, tanbê pode ser más fásil pa kes algen ki é tímidu ô ki ta xinti ansiadadi óras ki es sta na meiu di monti algen, faze amizadi ku otus algen. (2 Kor. 6:13) Kes algen di nos grupu ta djuda-nu óras ki nu sta duenti, óras ki nu sta tristi ô preokupadu, ô óras ki un algen ki nu ta ama móre. (1 Tes. 5:14) Nu ta ben meste di bons amigu más txeu inda duránti grandi tribulason. (Mat. 24:21) Pode ser ki nos prublémas ka kaba, má é más fásil lida ku es pamodi nu sabe ma nos irmons ku irmans ta ama-nu i es ta djuda-nu. — Pro. 17:17.
Dôs irman di mésmu grupu sta trabadja djuntu na pregason (Odja parágrafu 13.)
14. Modi ki nos grupu pa pregason ta djuda-nu óras ki kontise un dizastri ô un imerjénsia?
14 Nu ta resebe ajuda ki nu meste. Nu ta resebe ajuda ki nu meste di nos grupu pa pregason óras ki ta kontise un dizastri na naturéza, duénsas ki ta spadja, imerjénsia di saúdi, pirsigison i prublémas di ikonomia. Pur izénplu, na kada kongregason Kumison di Sirvisu di Kongregason, djuntu ku enkaregadus di grupu pa pregason, ta faze un planu pa djuda kes irmon ki más sta ta meste di ajuda. Tanbê, enkaregadus di grupu pa pregason ta pâpia ku kada família di ses grupu pa odja kuzê ki es meste, sima ramedi, kumida, agu, lugar pa es fika ô ropa. Nu pode ten serteza ma nos grupu pa pregason ta da-nu kel ajuda ki nu meste óras ki nu ta pasa pa situasons difísil.
15. Kuzê ki tudu adorador di Jeová sta ta faze?
15 Sima dja nu flaba antis, organizason di Jeová é grandi. Kel párti na séu é formadu pa senténas di milhon, ô talvês bilhon di anju fiel. Kel párti na téra ten más di 9 milhon di algen i el sta ta omenta tudu dia. (Zak. 8:23; Apo. 5:11) Tudu adorador di Jeová na séu i na téra sta unidu ta pâpia di kes notísia sábi sobri Reinu di Deus! (Apo. 14:6, 7) Nos tudu nu krê faze nos midjór pa nu djuda nos grupu pa pregason. Nos grupu pa pregason ta djuda-nu di txeu manera, prinsipalmenti el ta djuda-nu lova nos Deus, Jeová, di tudu nos korason. — Sal. 111:1.
KÁNTIKU 61 Nhos ten koraji, Tistimunhas!
a Mudadu alguns nómi.
b Si meste, ta diziginadu un ajudanti di kongregason ki sta kualifikadu pa kuida di un grupu pa pregason, ti ki parse un ansion pa kuida di kel responsabilidadi li. Un ajudanti di kongregason ki ta kuida di kel responsabilidadi li ta txomadu di ajudanti di grupu, dja ki el é ka un ansion. Ansions ta djuda-l kuida di se grupu i es ta da-l alguns orientason di modi ki el ta faze kel-li.