Modi ki nu pode kontinua lial óras ki nos fé podu na próva?

1-2. Kuzê ki kontise kantu Jizus staba ta inxina na Kafarnaun?

“KES palavra li ta ofende algen. Ken ki pode obi kel-li?” (Juan 6:60) É di kel manera li ki txeu disiplu di Jizus reaji kantu es obi kuzê ki Jizus fla kantu el staba ta inxina-s na Kafarnaun. Jizus fla-s: “Si nhos ka kume karni di Fidju di Ómi i bebe se sangi, nhos ka ta ganha vida. Ken ki ta kume nha karni i bebe nha sangi ten vida pa tudu ténpu. I N ta ben resusita-l na últimu dia.” — Juan 6:53, 54.

² Txeu di kes disiplu di Jizus ki obi kel-li fika ofendidu i es para di sigi-l. Kel-li é pamodi es ka tinha ninhun fé na Jizus? Na verdadi, antis di kel-li kontise, alguns algen i kel-li ta inklui alguns disiplu di Jizus, fika tantu dimiradu ku kuzê ki el faze ki es fla: “Kel-li é própi kel proféta ki staba pa ben mundu.” (Juan 6:14) Nton, kel-li ta mostra ma kes disiplu tinha fé na Jizus. Má kantu ses fé podu na próva, es ka kontinua lial pa el.

3. Modi ki kes apóstlu reaji ku kes kuza ki Jizus fla i pamodi? (Odja imajen.)

³ Má kes apóstlu reaji di manera diferenti. Kantu Jizus pergunta-s si es krê dexaba el, Pedru responde: “Sinhor, pa kenha ki nu ta bai? Bus palavra ta da vida pa tudu ténpu. Nu ta kridita i nu sabe ma bo é Santu di Deus.” (Juan 6:68, 69) Repara ma Pedru ka fla ma el i kes otu apóstlu intende dretu kuzê ki Jizus krê flaba kantu el fla ma es meste kumeba se karni i bebeba se sangi. Talvês, na kel momentu, es ka intende kuzê ki Jizus fla. Má es skodje kontinua lial pa Jizus. Pamodi? Pamodi es tinha serteza ma Jizus éra “Kristu di Deus.” — Luk. 9:20, 35.

4. Kuzê ki pode poi nos lialdadi pa Jeová na próva?

⁴ Nos lialdadi pa Jeová pode podu na próva di txeu manera. Pur izénplu, modi ki nu ta reaji óras ki fazedu mudansa na manera ki nu ta intende un versiklu di Bíblia ô na manera ki nu ta faze trabadju di pregason? Ô modi ki nu ta reaji óras ki nu ta atxa difísil intende pamodi ki Jeová ta dexa kuzas mariadu kontise ku nos? Tanbê, nos fé pode podu na próva si un amigu di nos magua-nu ô si un algen ki nu ta ruspeta trata-nu di manera injustu.

5. Pamodi ki nu meste bira nos fé más fórti? Da un izénplu. (Kolosensis 1:23)

⁵ Pa nu kontinua lial pa Jeová na situasons difísil, nu meste ten un fé fórti na el. Pur izénplu, pa un konstruson mante firmi óras ki kontise un tremor di téra, el meste ten un alisérsi fórti. Di mésmu manera, nu meste ten un fé fórti pa nu mante lial pa Jeová óras ki nu ta pasa pa situasons difísil sima kes ki nu odja na kel otu parágrafu. Pur isu, nu debe kontinua ta bira nos fé más fórti pa nu pode kontinua ta sirbi Jeová, ka ta inporta kuzê ki kontise. — 1 Kor. 15:58; lé Kolosensis 1:23.

6. Kuzê ki djuda kes apóstlu kontinua lial pa Jizus?

⁶ Kuzê ki djuda kes apóstlu kontinua lial pa Jizus kantu txeu disiplu bandona-l? Kes apóstlu staba konvensidu ma es debe adoraba Jeová pamodi é el ki faze tudu kuza. Tanbê es tinha serteza ma Jizus é Fidju di Deus i ma si es obiba ku Jizus, es pode tinha “vida pa tudu ténpu”. Tanbê es sabia ma Jeová staba kontenti ku kuzê ki Jizus staba ta faze. Gósi, envês di pâpia di txeu manera ki nos fé pode podu na próva, nu ben pâpia di três verdadi ki pode djuda-nu mante firmi, ka ta inporta kuzê ki pode poi nos fé na próva: (1) Jeová é Kriador di tudu kuza. (2) Jeová é Autor di Bíblia. (3) Jeová sta ta uza se povu oji. Si nu ten tudu serteza ma kes kuza li é verdadi, nu pode kontinua lial pa Jeová na tudu situason.

JEOVÁ É KRIADOR

7. Kuzê ki Apokalipse 4:11 ta fla-nu sobri Jeová, i modi ki kel-li ta djuda-nu óras ki nos fé podu na próva?

⁷ Lé Apokalipse 4:11. Kel testu li ta lenbra-nu ma Jeová kria tudu kuza. Kel-li é un di kes razon inportanti ki ta pô-nu ta adora Jeová. Óras ki nu pensa na modi ki el é poderozu, nu ta fika ku serteza ma el pode djuda-nu na kalker situason. Má Satanás dja intxi es mundu ku mintiras ki ta poi pesoas ta ten dúvida si Deus izisti. Ti mésmu alguns sientista ta fla ma ka izisti un Kriador. Si nu ka ten serteza ma Jeová é Kriador i ma el ta ama-nu, nu pode kumesa ta ten dúvida si el izisti i si el ta djuda-nu óras ki nu ta pasa pa kuzas ki ta poi nos fé na próva. — Ebr. 11:6.

8-9. Kuzê ki bu pode faze si bu kumesa ta ten dúvida ma Jeová é Kriador? (Odja imajen.)

⁸ Si bu kumesa ta ten dúvida ma Jeová é Kriador, aji lógu. Djobe na nos publikason pa bu atxa más informason sobri pamodi ki nu ta kridita ma Jeová kria tudu kuza. Bu pode atxa txeu informason ki pode bira bu fé más fórti na bruxura Será Que a Vida Teve Um Criador? i A Origem da Vida — Cinco Perguntas Que Merecem Resposta. Tanbê bu pode atxa otus matéria na kel grupu di vídiu “Tevi un algen ki faze-l?” i na párti “Opinions sobri modi ki vida kumesa”, na jw.org. Jésika, ki é un irman di Mérka fla: “Dipôs di lé bruxura Será Que a Vida Teve Um Criador?, N fika ku más serteza ma tevi un Algen intilijenti ki kria tudu kuza. Dja N sabia di kel-li, má dipôs ki N torna lé kel bruxura, el djuda-m ten más serteza inda.” Tanbê livru Vive filís pa tudu ténpu! na lison 6 i 7, i Nhos korda! nunbru 3 di 2021, ku téma “Bu debe kridita na un Kriador? Kuzas ki pode djuda-u disidi” dja djuda txeu algen. Pode ser ki dja bu lé kes publikason li algun bês. Bu ka ta gostaba di le-s otu bês?

⁹ Pur izénplu, bu pode faze planu di studa sobri kes próva ki ta da-u serteza ma Deus izisti. Kes informason ki bu ta ba atxa pode bira bu fé más fórti ma Jeová izisti i tanbê el pode djuda-u konxe-l midjór. (Rom. 1:20) Tanbê bu pode uza kuzê ki bu prende pa djuda otus algen ki talvês ten dúvida si Deus izisti. Nton, ta fika klaru ma Jeová dja da-nu txeu próva ki ta mostra ma el é nos Kriador.

Nebula: IAC/RGO/David Malin Images; pexi i karu: Mercedes-Benz USA; avion: Kristen Bartlett/University of Florida

JEOVÁ É AUTOR DI BÍBLIA

10. Pamodi ki Bíblia é inportanti pa nos? (2 Timótiu 3:16, 17)

¹⁰ Lé 2 Timótiu 3:16, 17. Bíblia é mensajen di Deus pa nos. El ta responde kes pergunta más inportanti di vida, el ta fla-nu kal ki é vontadi di Jeová i kuzê ki el krê pa nu faze. Nu ta kridita ma Jeová é autor di Bíblia, pur isu Bíblia é kel livru más inportanti na nos vida. Nu krê faze nos midjór pa nu intende se Palavra i aplika-l na nos vida.

11. Pamodi ki nu ten serteza ma Jeová é autor di Bíblia?

¹¹ Pamodi ki nu ta kridita ma Jeová é autor di Bíblia? Pamodi txeu razon. Pur izénplu, kuzê ki Bíblia ta fla ma kontise na pasadu é verdadi. (Luk. 3:1, 2) Tanbê el ta pâpia di kuzas di naturéza di manera izatu. (Jó 26:7) Bíblia é kel livru ki dja distribuidu más txeu na mundu interu, sikrê ku tudu sforsu ki Satanás dja faze pa kaba ku el. Tevi uns 40 ómi diferenti ki skrebe Bíblia duránti uns 1.600 anu, má simé se mensajen sta di akordu ku kunpanheru. Enbóra el skrebedu dja ten txeu ténpu, se konsedju sta ta djuda milhons di pesoas oji. (Pro. 13:20; 15:21; Mat. 7:12) I txeu profesia di Bíblia sta ta kunpri. Kel-li é un di kes razon ki ta pô-nu ta kunfia na Bíblia. (Juz. 23:14) Nu ten tudu serteza ma Bíblia ben di Deus!

12. Kuzê ki nu debe faze si nu kumesa ta ten dúvida ma Deus é autor di Bíblia?

¹² Kuzê ki nu debe faze si nu kumesa ta ten dúvida ma Deus é autor di Bíblia? Nu debe faze orason i fla Jeová modi ki nu sta xinti, pidi-l pa el djuda-nu i dipôs faze piskiza. Repara kuzê ki un irmon jóven ki txoma Jordan, ki kria na verdadi, fla: “N ka ta kridita na un kuza sô pamodi nha mai ô nha pai ô otus algen fla-m. N meste ten serteza ma kuzê ki N ta kridita na el é verdadi. Alvês inda N ta ten dúvida di alguns kuza ki N ta prende. I óras ki kel-li ta kontise, N ta faze piskiza na nos publikason pa N atxa respósta pa nhas pergunta i kaba ku nhas dúvida.” Si nu kontinua ta lenbra pamodi ki nu ta kridita ma Jeová é autor di Bíblia, nos fé ta bira más fórti. — 1 Kor. 3:12, 13.

JEOVÁ STA TA UZA SE POVU OJI

13. Kuzê ki nu debe faze si nu kumesa ta ten dúvida sobri kenha ki é povu di Deus oji?

¹³ Si nu kumesa ta ten dúvida si Tistimunhas di Jeová é kel povu ki Jeová sta ta uza oji, nu debe faze algun kuza pa kaba ku nos dúvida. Pur izénplu, nu pode pensa na respósta pa kes pergunta li: ‘Kenha ki sta ta faze ses midjór pa vive di akordu ku kel ki Bíblia ta fla? Ki organizason ki ses krénsa ten bazi na kel ki Bíblia ta fla?’ (2 Tim. 4:3, 4) ‘Kenha ki sta ta faze vontadi di Jeová oji?’ — Mat. 7:20, 21.

14. Modi ki Tistimunhas di Jeová sta ta uzadu pa kunpri kel profesia di Mateus 24:14?

¹⁴ Óras ki nu pensa na kenha ki sta ta faze vontadi di Deus oji, nu pode pergunta: ‘Kenha ki sta ta prega notísias sábi oji?’ (Mat. 24:14) Respósta é klaru. Deus sta ta uza se povu, ki é Tistimunhas di Jeová, pa faze trabadju di pregason. É sô Tistimunhas di Jeová ki sta ta prega notísias sábi sobri Reinu di Deus na más di 240 país. Nu sta ta faze es trabadju dja ten más di 100 anu. Nu ta kontinua konsentradu ta faze kel trabadju más inportanti, ki é prega i inxina. — Mat. 28:19, 20.

15. Modi ki Tistimunhas di Jeová ta da nómi di Deus ónra? (Mateus 6:9; Izaías 43:10)

¹⁵ Lé Mateus 6:9 i Izaías 43:10. Nos é konxedu pa nómi di Deus, Jeová, i é un ónra pa nos ser txomadu di Tistimunhas di Jeová. Maioria di pesoas oji na mundu ka konxe nómi di Deus ki é Jeová. Má dja nu trabadja duru pa nu produzi un Bíblia ki ten nómi di Deus na kes lugar ki el ta parseba na testu orijinal. Nómi di Deus ta parse más di 7 mil bês na Bíblia Traduson di Mundu Novu.

16. Pamodi ki nu pode fla ma Tistimunhas di Jeová sta ta obidese kel órdi ki sta na Juan 13:34, 35? (Odja imajen.)

¹⁶ Lé Juan 13:34, 35. Amor i union ki ten na povu di Jeová oji é un milagri na es mundu ki sta xeiu di ódiu i ki sta divididu. Nos é di txeu país diferenti i nos situason na vida é diferenti. Má simé, nu ta faze nos midjór pa nu ten pas i amor entri nos. Dja bu kustuma vizita otus kongregason óras ki bu ta viaja pa otus lugar? Nton, prósimu bês ki bu viaja, repara na amor i union ki ten entri irmons ku irmans, ka ta inporta di undi ki es é. Kel-li ta mostra klaru ma Jeová sta ta uza ses Tistimunha pa faze se vontadi oji. Lenbra di kel-li ta djuda-nu kontinua lial pa Jeová óras ki nu ta pasa pa kuzas ki ta poi nos fé na próva.

NUNKA KA BU BANDONA JEOVÁ

17-18. Ki situason difísil nu pode pasa pa el, má kuzê ki nu pode fla ku serteza?

¹⁷ Nu sta ta vive na un ténpu konplikadu i difísil di aguenta. É pur isu ki nos tudu ta pasa pa prubléma. (2 Tim. 3:1, 13) I talvês nu pode pasa pa otus situason difísil. Pur izénplu, organizason di Jeová pode toma disizons ki nu ka ta intende dretu. Ô un irmon ô irman pode faze algun kuza ki magua-nu. Nu pode ka sabe modi ki nu ta rezolve nos prubléma ô nu pode ka intende pamodi ki kel kuza sta kontise.

¹⁸ Enbóra nu pode xinti tristi i preokupadu pamodi kuzê ki sta ta kontise ku nos, sénpri nu pode ser lial pa Jeová. Pamodi? Pamodi nu sabe ma el é Kriador, el é autor di Bíblia i ma Tistimunhas di Jeová é se povu. Sima Pedru fla Jizus, nos tanbê nu pode fla Jeová: “Pa kenha ki nu ta bai? Bus palavra ta da vida pa tudu ténpu.” — Juan 6:68.