Mostra intendimentu i bu “ta ten bon rezultadu”

1-2. Kuzê ki é intendimentu i modi ki el pode djuda-nu?

ALGUN bês dja bu xinti ma un algen ka mostra-u ruspetu? Algen dja julga-u mariadu ô dja faze algun kuza ki ofende-u? Ô dja bu pasa pa un situason ki bu xinti medu? Si kel-li dja kontise, talvês bu sabe ma é ka fásil fla ô faze kuza dretu na kes situason li. Kuzê ki pode djuda-nu na kes situason li? Bíblia ta fla ma nu meste mostra intendimentu.

² Intendimentu é kapasidadi di odja un situason alén di kel ki el ta parse. El ta djuda-nu intende pamodi ki un kuza kontise ô pamodi ki un algen aji di un sértu manera. Pamodi kel-li, intendimentu pode djuda-nu aji ku sabedoria i bon juís. Pur izénplu, el pode djuda-nu ‘kontrola nos língua’ i sabe ki óra ki nu debe “fika kaladu.” (Pro. 10:19; Sal. 4:4) El ta djuda-nu kontrola nos raiba i púrdua otus algen. Tanbê el pode djuda-nu seta konsedju i disiplina. (Pro. 19:20) Óras ki nu ta mostra intendimentu, nu ta agrada Jeová, nu ta djuda otus algen i nu ta ten un vida más midjór. I óras ki un situason difísil pô-nu ta fika iritadu, nu ka ta fika tantu xatiadu ki nu ta reaji di manera mariadu. Nu ben odja três stória di Bíblia ki ta mostra modi ki intendimentu pode djuda-nu kontinua umildi, kalmu i kunfia na Jeová.

SER UMILDI ENVÊS DI SER ORGULHOZU

3. Ken ki éra Naaman?

³ Pa nu faze kuzê ki é dretu nu meste ser umildi. (1 Ped. 5:5) Intendimentu pode djuda-nu faze kel-li. Modi? Odja izénplu di Naaman. El ta viveba na Síria, ki é un país ki ta fikaba pértu di Israel. Naaman éra un ómi inportanti i el éra xéfi di trópas di Síria. Má el tinha un duénsa di péli gravi ki txoma lépra. — 2 Reis 5:1.

4. Modi ki Naaman mostra ma el tinha algun intendimentu?

⁴ Mudjer di Naaman tinha un inpregada ki éra un minininha israelita. El fla se patroa ma na Israel tinha un proféta ki pode kuraba se maridu. (2 Reis 5:2, 3) Naaman pode pensaba: ‘Un minininha ki é un sinplis inpregada i ki é di un nason ki é nos inimigu pode fla algun kuza ki ta djuda-m?’ Má Naaman mostra ma el tinha algun intendimentu. Envês di el ser orgulhozu i iginora kuzê ki kel minininha fla-l, el foi umildi i el faze kuzê ki el fla-l. El pidi rei di Síria pa dexa-l bai pa Israel pa el pode sérba kuradu. — 2 Reis 5:4, 5.

5. Kuzê ki kontise ku Naaman kantu el txiga na Israel?

⁵ Naaman bai na Jeoron, ki éra rei di Israel, ku speransa ma el ta sérba kuradu. Má Jeoron pensa ma rei di Síria staba ta buska géra ku el. Kantu proféta Elizeu obi kel-li, el pidi Jeoron pa manda Naaman ba atxa-l. (2 Reis 5:6-9) Kuzas ka kontise sima Naaman staba ta spera. Elizeu nen ka sai di se kaza pa bai resebe Naaman ô pa pâpia ku el. Envês di kel-li, Elizeu manda un mensajeru pa fla Naaman kuzê ki el meste fazeba pa el sérba kuradu. — 2 Reis 5:10.

6. (a) Pamodi ki Naaman ka krê fazeba kuzê ki kel mensajeru fla-l pa el faze? (b) Modi ki kes sérvu di Naaman mostra intendimentu i kal ki foi rezultadu? (2 Reis 5:13, 14)

⁶ Na komésu, Naaman ka reaji dretu kantu kel mensajeru pâpia ku el. El “fika xatiadu” i “el disidi bai se kaminhu”. (2 Reis 5:11, 12) Pamodi? Talvês el xinti ma el ka dadu kel ónra ki el mereseba dja ki el éra xéfi di trópa di Síria. Alén di kel-li, talvês Naaman xinti ma kes orientason di Elizeu ta mostraba falta di ruspetu pa Síria. Pur isu, Naaman disidi bai se kaminhu sen ser kuradu. Má ses sérvu intende ma Elizeu krê djudaba el. Pur isu, es pidi Naaman pa el pensa na se disizon. Naaman dexa di ser orgulhozu i ku umildadi el faze kuzê ki Elizeu fla-l pa el faze. Pamodi kel-li el kuradu! — Lé 2 Reis 5:13, 14.

7. Kuzê ki nu pode prende ku izénplu di Naaman? (Provérbius 22:4) (Odja imajens.)

⁷ Kuzê ki nu ta prende ku izénplu di Naaman? Nu ta mostra intendimentu óras ki nu ta odja kuzas alén di kel ki ta parse. Tanbê nu ta mostra intendimentu óras ki nu ka ta dexa nos sentimentu kontrola-nu. Intendimentu pode djuda-nu bira umildi. Pur isu, nu ta rekonhese ma nu ka sabe tudu kuza. Alvês nu ta meste di ajuda di otus algen i prinsipalmenti di Jeová. Naaman ka ta sirbiba Jeová, má simé el mostra algun intendimentu pamodi ku umildadi el obi ku otus algen. El obi ku kel minininha ki éra inpregada di se mudjer, ses sérvu i prinsipalmenti Elizeu ki éra reprizentanti di Jeová. Naaman dexa di ser orgulhozu i el toma un disizon ki ta mostraba sabedoria, pur isu el kuradu. Nton, antis di nu fla ô di nu faze algun kuza, nu debe para i pensa. Pur izénplu, un algen pode da-nu un konsedju ku bazi na Bíblia ki nu ka konkorda ku el. Óras ki kel-li ta kontise, nu debe pensa ku kuidadu si manera ki nu ta ba reaji ta mostra si nos é orgulhozu ô si nos é umildi. — Lé Provérbius 22:4.

AJI KU KALMA ENVÊS DI AJI KU RAIBA

8. Na ki situason pode ser difísil mante kalmu?

⁸ Alvês ta kontise kuzas ki ta dexa-nu xatiadu. Má, si nu para i nu pensa antis di nu fla ô di nu faze algun kuza, kel-li ta djuda-nu mante kalmu. É klaru ki nen sénpri é ka fásil faze kel-li, prinsipalmenti óras ki algen ka ta mostra-nu bondadi ô ta trata-nu di manera injustu. (Efé. 4:26) Odja modi ki Davidi i Abigail mostra intendimentu duránti un situason difísil.

9. Modi ki Nabal trata Davidi?

⁹ Pensa na kuzê ki kontise kantu Davidi ku ses trópa staba ta fuji di Saul i es staba ta vive na dizértu di Paran. (1 Sam. 25:1) Timenti es staba la, es proteje kes pastor i kes ovelha di un ómi riku ki txomaba Nabal. (1 Sam. 25:15, 16) Kantu txiga ténpu di túskia ovelha, Davidi manda ses trópa pa pidi Nabal kumida. Nton, kes ómi ba pidi Nabal kumida ku ruspetu. (1 Sam. 25:6-8) Má Nabal ka mostra gratidon pa tudu kuza ki Davidi i ses trópa faze pa el. El fika xatiadu ku Davidi i ti el insulta Davidi ku ses trópa. — 1 Sam. 25:10, 11.

10. Modi ki Davidi i Abigail mostra intendimentu? (1 Samuel 25:32, 33) (Odja imajen.)

¹⁰ Si bu staba na lugar di Davidi, modi ki bu ta xintiba? Nu ta konsigi imajina pamodi ki Davidi fika xatiadu. Na verdadi, el fika tantu xatiadu ki el krê mataba Nabal! (1 Sam. 25:13, 21, 22) Má Abigail, ki éra mudjer di Nabal i ki tinha sabedoria, ba pâpia ku Davidi i ses trópa kantu es staba ta ba mata Nabal. Modi ki Abigail mostra intendimentu? El intende pamodi ki Davidi staba xatiadu i el sabia ma el éra un bon ómi. Nton, el faze kuzê ki el ta podeba pa djudaba Davidi mante kalmu i pa ajiba ku sabedoria. El leba-l txeu prezenti i ku umildadi el da-l bons konsedju. (1 Sam. 25:18, 23-31) Davidi mostra intendimentu pamodi el obi Abigail ku atenson i el intende ma kuzê ki Abigail staba ta fla-l éra kuzê ki Jeová ta pensaba di kel situason. Pamodi kel-li, Davidi mante kalmu i el ivita faze un pekadu gravi. — Lé 1 Samuel 25:32, 33.

11. Modi ki nu pode mostra intendimentu óras ki un algen faze algun kuza ki pô-nu ta fika xatiadu? (Provérbius 19:11)

¹¹ Kuzê ki nu pode prende ku izénplu di Davidi i Abigail? Intendimentu pode djuda-nu aji ku kalma na un situason, sikrê nu ten razon pa fika xatiadu. Tanbê, el pode djuda-nu pensa na kes kuza mariadu ki pode kontise si nu aji ku raiba. (Lé Provérbius 19:11.) Kantu Abigail lenbra Davidi modi ki kuzê ki el ta ba fazeba ta poba Jeová ta xinti, el fika kalmu. Si algun kuza ô algun algen pô-u ta fika xatiadu, ka bu aji sen pensa. (Tia. 1:19) Tra ténpu pa bu ora pa Jeová i tenta intende kuzê ki Jeová ta pensa sobri kel asuntu. Kel-li talvês ta djuda-u mante kalmu.

12. Modi ki otus algen pode djuda-nu mante kalmu i toma bons disizon?

¹² Sima Jeová uza Abigail pa djuda Davidi mostra intendimentu, Jeová tanbê pode uza otus algen pa djuda-u intende kuzê ki el ta pensa sobri un asuntu. Nton, si kontise algun kuza ki dexa-u xatiadu, tenta pâpia ku algun irmon maduru ki pode djuda-u odja kuzas sima Jeová ta odja. (Pro. 12:15; 20:18) Ô si un amigu di bo sta xatiadu pamodi algun kuza, bu ta pode imita Abigail? Bu ta pode djuda bu amigu odja kuzas sima Jeová ta odja? Di serteza Jeová ta bensua-u bu sforsu di djuda otus algen mostra intendimentu i mante kalmu.

KUNFIA NA JEOVÁ ÓRAS KI BU XINTI MEDU

13. Modi ki intendimentu ta djuda-nu óras ki nu sta ku medu?

¹³ Alvês nu ta pasa pa situasons difísil ki ta pô-nu ta xinti medu. Má si nu lenbra ma Jeová é más poderozu di ki kalker kuza i kalker algen, kel-li pode djuda-nu kunfia na el, sikrê óras ki nu sta ku medu. (Sal. 27:1) Jeová pode djuda-nu na kalker situason, sikrê ta parse ma ka ten soluson pa nos prubléma. É kel-li ki kontise ku proféta Jonas. El ta amaba Jeová txeu, má el fika ku medu kantu Jeová da-l un diziginason difísil.

14. Pamodi ki talvês Jonas xinti medu di seta kel diziginason ki Jeová da-l?

¹⁴ Jeová pidi Jonas pa faze un kuza ki éra difísil. El tinha ki bai pa Nínivi i fla kes algen di la ma Jeová sta ba distruíba es. (Jonas 1:1, 2) Modi ki bu ta xintiba si bu resebeba un diziginason di kel-li? Jonas tinha ki fazeba un viajen difísil, di Israel ti Nínivi, ki éra un sidadi di Asíria i kel-li ta lebaba sérka di un mês. Kes algen di Asíria éra konxedu pa ser pesoas violéntu i Nínivi ti éra txomadu di ‘kel sidadi ki ta baza sangi’. (Naun 3:1, 7) Envês di seta kel diziginason, Jonas disidi fuji. — Jonas 1:3.

15. Kuzê ki djuda Jonas kunfia más txeu na Jeová? (Jonas 2:6-9)

¹⁵ Jonas staba ta fuji kantu Jeová lenbra-l di se puder. El faze un milagri i el salva-l di un manera spetakular. (Jonas 1:15, 17) Jonas prende un lison. El da kónta ma el ka meste xintiba medu di bai Nínivi pamodi Jeová pode protejeba el di kalker prigu. (Lé Jonas 2:6-9.) Kantu Jeová da-l un sugundu oportunidadi di seta kel diziginason, Jonas ka fuji. El bai pa Nínivi i kes algen di la obi ku kuzê ki el fla-s i Jeová ka distrui-s más. — Jonas 3:5.

16. Modi ki intendimentu pode djuda-nu óras ki nu xinti medu? (Provérbius 29:25) (Odja imajens.)

¹⁶ Kuzê ki nu pode prende ku izénplu di Jonas? Nunka nu ka krê dexa medu di kuzê ki otus algen pode faze-nu pô-nu ka ta obi ku Jeová. (Lé Provérbius 29:25.) Intendimentu djuda Jonas ka konsentra na kel dizafiu di se diziginason, má el konsentra na ajuda ki Jeová pode daba el. Di mésmu manera, nu ka krê konsentra sô na nos medu, má nu krê konsentra na modi ki Jeová dja djuda-nu i proteje-nu na pasadu. Tanbê nu pode pensa na modi ki Jeová dja djuda nos irmons ku irmans na situasons ki es xinti medu ô na diziginasons difísil pamodi es kunfia na el.a (Ebr. 13:6) Nu ta mostra intendimentu óras ki nu ta kunfia na Jeová i nu ta djuda otus faze mésmu kuza.

PENSA KADA BÊS MÁS SIMA JEOVÁ

17. Modi ki nu pode ganha más intendimentu?

¹⁷ Sima dja nu odja, intendimentu ta djuda-nu lida dretu ku situasons difísil. Kuzê ki pode djuda-nu ganha más intendimentu? Jeová é kel midjór algen pa djuda-nu. El ta da-nu Bíblia i se spritu santu. (Nee. 9:20; Sal. 32:8) El ta da-nu konsedjus ki pode djuda-nu toma bons disizon i kontrola nos sentimentu. (Sal. 119:97-101) Nu ta ganha intendimentu óras ki nu ta midita na kuzê ki Bíblia ta fla i nu ta pidi Jeová pa da-nu se spritu santu. Kel-li ta djuda-nu odja kuzas sima Jeová ta odja-s i faze kuzê ki Jeová krê pa nu faze. — Pro. 21:11.

18. Kuzê ki bu sta disididu na faze?

¹⁸ Nu krê kontinua ta pidi Jeová pa el da-nu intendimentu. (Sal. 14:2) Si nu faze kel-li, nunka nu ka ta disvia “di kaminhu di intendimentu”. (Pro. 21:16) I nu ta sta más disididu na mostra intendimentu tudu óra i na tudu situason. Si nu faze si, nu “ta ten bon rezultadu”.