Izaías
8 Jeová fla-m: “Panha un tábua grandi i skrebe klaru* na el: ‘Maer-Salal-Ás-Bas.’* 2 N krê pa saserdóti Urias i Zakarias, fidju di Jeberekias, ki é dôs tistimunha fiel, skrebe pa konfirma kel-li.”*
3 Dipôs, N tevi relason ku nha mudjer, ki é profetiza, i el fika grávida i ku ténpu el tevi un fidju. Nton, Jeová fla-m: “Pô-l nómi di Maer-Salal-Ás-Bas, 4 pamodi antis di kel mininu prende fla: ‘Papá!’ i ‘Mamá!’, rei di Asíria ta leba kes rikéza di Damasku i kes kuza di valor di Samaria.”
5 Jeová pâpia ku mi otu bês i el fla-m:
6 “Dja ki kel povu li nega kes agu kalmu di Silué*
I es ta prifiri Rezin i fidju di Remalias,
7 Jeová ta ben manda rei di Asíria i tudu ses trópa
Kóntra kel povu li.
Kel-li ta ben ser sima óras ki kes agu di riu Eufratis* ki é txeu i fórti
Ta intxi tudu ses kanal
I ta subi téra.
8 I rei di Asíria ta ben invadi Judá.
El ta ben ser sima un txeia fórti i el ta pasa pa Judá, i el ta txiga ti se piskôs.
Ó Imanuel,*
Ku ses aza abértu el ta ben kubri tudu bu téra.”
9 Ó povus, nhos prujudika-s, má nhos ta ben pikadu padás-padás.
Nhos tudu di kes párti más lonji di téra, nhos obi!
Nhos pripara pa géra, má nhos ta ben pikadu padás-padás!
Nhos pripara pa géra, má nhos ta ben pikadu padás-padás!
10 Nhos pode faze planu, má el ka ta ben da sértu!
Nhos pode fla kel ki nhos krê, má ka ta ben kontise sima nhos fla.
Pamodi Deus sta ku nos!*
11 Kantu Jeová pâpia ku mi, se grandi puder ben riba di mi i el aviza-m pa N ka imita konportamentu di kel povu li. El fla-m:
12 “Ka nhos fla ma kel-li é un planu kóntra nos, sô pamodi kel povu li sta ta fla ma kel-li é un planu kóntra nos!
Ka nhos ten medu di kel ki es ten medu,
Ka nhos dexa kel-li poi nhos ta treme.
13 É Jeová di izérsitu ki nhos debe trata di manera santu,
É el ki nhos debe ruspeta,
I é el ki debe poi nhos ta treme.”
14 Pa kes dôs reinu di Israel,
El ta ben bira sima un santuáriu,
Má tanbê el ta ben bira sima un pédra ki ta poi pesoas ta tropesa
I sima un rótxa ki pesoas ta da na el.
I pa kes algen di Jiruzalen,
El ta ben bira sima un armadilha.
15 Txeu di es ta ben tropesa, es ta ben kai i es ta ben pikadu padás-padás.
Es ta ben kai na un armadilha i es ta pegadu.
16 Rola kel rolu ki kel konfirmason sta skrebedu na el,*
Poi sélu na kel lei* i intrega-s pa nhas disiplu!
17 N ta fika ta spera pa* Jeová, ki ta sukundi se róstu di família di Jakó, i na el N ta poi nha speransa.
18 Nhos odja! Na Israel, ami i kes fidju ki Jeová da-m, nos é sima sinal i sima milagris di Jeová di izérsitu, ki ta mora na monti Sion.
19 I si es fla nhos: “Nhos djobe kes ki ta txoma spritus ô ki ta dibinha, ki ta pâpia baxu, i ki ta murmura”, é ka pa se Deus ki un povu debe djobe? Algen debe djobe mortus pa ben djuda kes ki sta bibu? 20 Envês di kel-li, es debe djobe kuzê ki sta na lei i konfirma kel ki sta skrebedu!
Óras ki es ka ta pâpia di akordu ku kes palavra li, es ka ta ten ninhun lus. 21 I tudu es ta ben trabesa país frontadu i ku fómi, i pamodi es ta tene fómi i es ta sta xatiadu, es ta ben djobe pa riba i es ta maldísua ses rei i ses Deus. 22 Nton, es ta ben odja pa téra i es ta ben odja sô frónta i sukuru, sónbra i ténpus difísil, txeu sukuru i ninhun lus.