Izaías
58 “Grita ku tudu bu forsa!
Labanta bu vós sima un buzina.
Fla nha povu ses revólta,
Fla kaza di Jakó ses pekadu.
2 Es ta djobe-m dia ta sai dia ta entra,
I es ta fla ma es tene vontadi di konxe nhas kaminhu,
Sima si es é un nason ki faze kel ki é dretu
I ki ka bandona justisa di ses Deus.
Es ta pidi-m pa N julga ku justisa
Sima si es tene vontadi di txiga pértu di Deus:
3 ‘Pamodi ki bu ka ta odja óras ki nu ta faze jejun?
I pamodi ki bu ka ta odja óras ki nu* ta fika tristi pamodi nos pekadu?’
É pamodi na dia ki nhos ta faze jejun, nhos ta djobe nhos própi interesi,*
I nhos ta maltrata nhos trabadjador.
4 Nhos jejun ta tirmina na diskuson i briga,
I nhos ta sota kunpanheru ku violénsia.
Nhos ka pode faze jejun sima nhos ta faze oji i spera ma nhos vós ta obidu na séu.
5 Pur akazu, kel jejun ki ta agrada-m debe ser asi?
Sima un dia pa algen* fika tristi pamodi ses pekadu,
Pa inbaxa kabésa sima kana,*
I pa deta riba panu di saku i sinza?
É kel-li ki nhos ta txoma di jejun i di dia ki ta agrada Jeová?
6 Nau! Kel-li ki é jejun ki ta agrada-m:
Larga korenti di maldadi,
Dismara kes faixa di kanga,*
Liberta kes algen maltratadu,
I kebra na meiu tudu kanga.
7 I dividi bu pon ku kel algen ki tene fómi,
Resebe na bu kaza kes algen póbri i kes algen sen kaza,
Bisti kes algen ki bu odja ma sta nú,
I ka bu vira kósta pa bus irmon.*
8 Nton, bu lus ta ben brilha sima lus di palmanhan,
I bu kura ta ben faxi.
Bu justisa ta bai bu frenti,
I glória di Jeová ta bai bu tras pa proteje-u.
9 Nton, bu ta ben txoma i Jeová ta ben responde-u,
Bu ta ben grita ta pidi ajuda i el ta ben fla: ‘N sta li!’
Si bu tra kel kanga di bu meiu
I bu para di ponta dédu i fla kuzas ku maldadi,
10 Si bu da kel algen ki tene fómi kel ki bu* ta kreba
I bu farta kes algen ki ten nisisidadi,*
Nton, bu lus ta ben brilha ti mésmu na sukuru,
I bu sukuru ta ben ser sima meiu-dia.
11 Jeová sénpri ta ben gia-u
I el ta ben pô-u ta fika fartu ti mésmu na un téra séku.
El ta ben poi bus osu ta bira fórti,
I bu ta ben bira sima un jardin ben regadu,
Sima un fonti ki se agu nunka ka ta seka.
12 Pamodi bo, es ta torna faze kes kuza ki distruídu dja ten txeu ténpu,
I es ta ben konpo kes alisérsi di kes jerason ki dja pasa,
Bu ta ben txomadu di kel ki ta konpo muralhas,*
Kel ki ta konpo kes rua undi ki ten kaza.
13 Si bu guarda sábadu i bu para di djobe bus própi interesi na nha dia sagradu,
Si bu txoma sábadu dia di grandi alegria, dia sagradu di Jeová, un dia pa dadu glória,
I si bu glorifika-l envês di bu djobe bus própi interesi i pâpia atoa,
14 Nton, bu ta ben xinti grandi alegria na Jeová,
I N ta ben pô-u ta kontrola tudu kes lugar altu di téra.
N ta ben sustenta-u ku eransa di Jakó, bu família,
Pamodi é bóka di Jeová ki fla kel-li.”