Izaías
52 Ó Sion, korda! Korda! Ganha forsa!
Ó Jiruzalen, kel sidadi santu, bisti kes ropa bunitu ki bu ten!
Pamodi nunka más kes algen ki ka sirkunsidadu i ki é inpuru ka ta entra na bo.
2 Ó Jiruzalen, sakudi puera, labanta i xinta na un lugar di ónra.
Ó fidju-fémia di Sion ki sta prézu, tra kes korenti di piskôs.
3 Pamodi é kel-li ki Jeová fla:
“Nhos bendedu sen pagadu nada,
I nhos ta ben resgatadu sen dinheru.”
4 Pamodi é kel-li ki Jeová, kel Sinhor Más Grandi, fla:
“Primeru, nha povu dixi pa Ijitu pa ba mora la sima stranjeru.
Dipôs, Asíria maltrata-s sen ninhun motivu.”
5 É kel-li ki Jeová fla: “Nton, kuzê ki N ta faze gósi?”
I Jeová fla: “Pamodi es leba nha povu i es ka paga nada.
Kes ki sta manda na es, sta ta grita pamodi vitória,
I tudu dia, N sta odja ma nha nómi sta tratadu sen ruspetu.
6 Pamodi kel-li, nha povu ta ben konxe nha nómi.
Pamodi kel-li, na kel dia es ta ben sabe ma é mi ki sta ta pâpia.
Nhos odja, é mi!”
7 Fórti bunitu, riba di monti, é pé di kel algen ki ta traze notísias sábi,
Di kel ki ta pâpia di pas,
Di kel ki ta leba notísia sábi di un kuza midjór,
Di kel ki ta pâpia di salvason,
Di kel ki ta fla Sion: “Bu Deus dja bira Rei!”
8 Obi! Bus guarda sta ta labanta vós.
Es sta grita di alegria djuntu,
Pamodi óras ki Jeová torna traze Sion, es ta ben odja kel-li klaru.
9 Ó kes párti di Jiruzalen ki sta tudu distruídu, nhos fika animadu i nhos grita di alegria djuntu,
Pamodi Jeová dja konsola se povu, dja el resgata Jiruzalen.
10 Jeová dja poi tudu nason ta odja se puder* santu,
Tudu kes algen na téra ta ben odja kuzê ki nos Deus dja faze pa salva se povu.*
11 Nhos sai, nhos sai di la, ka nhos toka na nada inpuru!
Nhos sai di el i nhos mante puru,
Nhos ki ta karega kes material di kaza di Jeová.
12 Pamodi nhos ka ta ben sai dizorientadu,
Nen nhos ka ta ben meste fuji,
Pamodi Jeová ta bai na nhos frenti,
I kel Deus di Israel ta bai nhos tras.
13 Nhos odja! Nha sérvu ta ben aji ku intendimentu.
El ta ben dadu un puzison inportanti,
El ta ben labantadu, i el ta ben podu na un lugar altu dimás.
14 Sima txeu algen fika spantadu kantu es odja-l,
Pamodi se korpu disfigura más di ki kalker otu algen
I se aparénsia muda más di ki kalker fidju di ómi.
15 Di mésmu manera txeu nason ta ben fika spantadu pamodi el.
Kes rei ta ben fika kaladu* se dianti,
Pamodi es ta ben odja kel ki es ka papiadu di el
I es ta ben presta atenson na kes kuza ki es ka obiba.