Izaías
43 Ó Jakó, é si ki Jeová, bu Kriador,
Sin, ó Israel, é si ki Kel ki faze-u fla:
“Ka bu xinti medu, pamodi N salva-u.
N txoma-u pa bu nómi.
Abo é di meu.
2 Óras ki bu ta pasa na meiu di agu, N ta ba sta ku bo,
I óras ki bu ta pasa na riu, el ka ta ba kubri-u.
Óras ki bu ta anda na meiu di lumi, bu ka ta ba fika txumuskadu,
Nen lumi ka ta ba kema-u.
3 Pamodi ami é Jeová, bu Deus,
Kel Santu di Israel, bu Salvador.
N da Ijitu pa ser bu resgati,
N da Itiópia i Sebá na bu lugar.
4 Pamodi bu pasa ta ten txeu valor pa mi,
N da-u ónra i N ta ama-u.
Pur isu, N ta ben da algen na bu lugar
I N ta ben da nasons na lugar di bu vida.*
5 Ka bu ten medu pamodi N sta ku bo.
N ta ben traze bu disendenti* di lésti
I N ta ben djunta-s di oésti.
6 N ta ben fla téra di nórti: ‘Da-m es!’
I téra di sul: ‘Ka bu fika ku es.
Traze nhas fidju matxu di lonji i nhas fidju-fémia di kes párti más lonji di téra,
7 Tudu kel ki ta txomadu pa nha nómi
Ki N kria pa nha glória,
Ki N forma i ki N faze.’
8 Poi ta sai un povu ki é ségu, enbóra es ten odju,
I kes surdu, enbóra es ten obidu.
9 Pa tudu nason djunta na un lugar sô,
I pa povus djuntadu tanbê.
Kenha na ses meiu ki ta pode fla kel-li?
Ô kenha ki ta pode fla-nu kes primeru kuza ki sta pa ben kontise?*
Pa el mostra ses tistimunha, pa prova ma el sta sértu,
Pa es obi i pa es fla: ‘Kel-li é verdadi!’”
10 Jeová fla: “Anhos é nhas tistimunha,
Sin, nha sérvu ki N skodje,
Pa nhos pode konxe-m i ten fé na mi.*
I pa nhos intende ma ami é kel mê.
Antis di mi ka fazedu ninhun Deus,
I dipôs di mi ka tevi ninhun.
11 Ami é Jeová i alén di mi ka ten ninhun salvador.”
12 Jeová fla: “Ami é kel ki aviza, ki salva i ki mostra kel-li
Kantu ka tinha ninhun deus stranjeru na nhos meiu.
Pur isu, anhos é nhas tistimunha i ami é Deus.
13 Tanbê, ami é sénpri kel mê,
I ningen ka ta pode rabata nada di nha mô.
Óras ki N ta faze algun kuza ken ki ta pode inpidi-m?”
14 É kel-li ki Jeová, nhos Resgatador, kel Santu di Israel, fla:
“Pamodi nhos, N ta ben manda trópas pa Babilónia i N ta ben poi tudu kes tranka di porton ta kai,
I kes kaldeu na ses barku ta ben grita pamodi frónta.
15 Ami é Jeová, nhos Santu, kel Kriador di Israel, nhos Rei.”
16 É kel-li ki Jeová fla,
Kel ki abri un kaminhu na mar
I ki abri un kaminhu na agu brabu,
17 Kel ki ta poi ta sai karu di géra i kabalu,
Kes trópa i kes gereru poderozu:
“Es ta ben kai i es ka ta labanta.
Es ta ben kabadu ku es, es ta pagadu sima lumi di un pabiu.”*
18 “Nhos skese di kes kuza ki pasa,
I ka nhos fika ta pensa na pasadu.
19 Nhos odja! N ta ben faze un kuza novu,
Dja el sta ta kontise.
Nhos ka repara kel-li?
N ta ben abri un kaminhu na dizértu
I N ta ben poi riu na dizértu.
20 Kes animal selvajen ta ben da-m ónra,
Sin, kes katxor brabu* i kes avestrus,
Pamodi N ta ben poi agu na dizértu,
Riu na dizértu,
Asi pa nha povu, kel ki N skodje, bebe,
21 Asi, kel povu ki N faze pa mi
Ta ben lova-m.
22 Má, ó Jakó, bu ka invoka-m,
Pamodi bu kansa ku mi, ó Israel.
23 Bu ka traze-m ovelhas pa kes oférta kemadu
I nen sakrifisius pa da-m glória.
N ka obriga-u pa bu traze-m prezentis,
I nen N ka kansa-u ta iziji insénsu branku.
24 Bu ka kunpra-m kálamu* ku bu dinheru,
Nen bu ka agrada-m ku gordura di bus sakrifisiu.
Envês di kel-li, bu intxi-m di bus pekadu
I bu kansa-m ku bus éru.
25 Ami é Kel ki ta ben paga bus fadja pamodi nha própi nómi,
I N ka ta ben lenbra di bus pekadu.
26 Nu aprizenta nos kazu un kóntra kel otu. Si N skese di algun kuza, favor lenbra-m,
Konta bu ladu pa prova ma bu sta sértu.
27 Bu primeru pai peka,
I bus pórta-vós* rabela kóntra mi.
28 Pur isu, N ta ben bira kes prínsipi di kes lugar santu inpuru,
I N ta ben dexa pesoas distrui Jakó
I dexa pesoas ofende Israel.