Izaías
42 Nhos odja! Kel-li é nha sérvu ki N ta djuda!
Kel ki N skodje ki ta da-m* txeu alegria!
N poi nha spritu na el,
El ta ben traze justisa pa nasons.
2 El ka ta ben grita i nen el ka ta ben labanta se vós,
I el ka ta ben faze nada pa se vós obidu na rua.
3 El ka ta ben pila ninhun kana* ki sta kebradu,
I nen el ka ta ben paga un pabiu* ki inda sta bota fumu.
Di serteza el ta ben traze justisa.
4 Se lus ka ta ben frakise i el ka ta ben piladu ti ki el poi justisa na téra.
Kes ilha sta ta spera pa se lei.*
5 É si ki Jeová, kel Deus verdaderu, fla,
Kel ki faze séu i kel Grandiozu ki stende-l,
Kel ki forma téra i tudu kuza ki el ta da,
Kel ki ta da folgu pa kes algen ki ta mora na el
I spritu pa kes ki ta anda na el:
6 “Ami, Jeová, N txoma-u pa faze justisa,
N pega-u na mô.
N ta ben proteje-u i bu ta ben ser un kontratu entri mi i tudu povu
I sima lus pa tudu nason,
7 Pa abri odju di kes ségu,
Pa tra kes prézu di kadia
I kes ki sta xintadu na sukuru di kadia.
9 Nhos odja, kes primeru kuza dja kontise.
Gósi, N sta ben fla nhos kuzas novu.
Antis di es kontise N ta fla nhos es.”
10 Nhos kanta un kántiku novu pa Jeová,
Nhos kanta-l lovor désdi kes párti más lonji di téra,
Anhos ki ta navega na mar i na meiu di tudu ki ta izisti na el,
Anhos ilha i tudu kes algen ki ta mora na es.
11 Pa dizértu i ses sidadi labanta vós,
Tanbê kes vila undi ki Kedar ta mora.
Pa kes algen ki ta mora na rótxa grita di alegria.
Nhos grita di la di riba di montanhas.
12 Nhos da Jeová glória
I nhos pâpia di se lovor na kes ilha.
13 Jeová ta bai pa géra sima un ómi poderozu.
El ta ben ser sima un gereru ku vontadi di aji.
El ta ben grita, sin, el ta ben da un gritu di géra.
El ta ben mostra ma el é más poderozu ki ses inimigu.
14 “N fika kétu duránti txeu ténpu.
N fika kaladu i N kontrola, N fika kaladu i N kontrola nha kabésa.
N ta ben jeme, N ta ben respira ku difikuldadi i N ta ben perde folgu,
Sima mudjer ki sta ta ten fidju.
15 N ta ben kaba ku montanhas i montis
I N ta ben seka tudu ses planta.
16 N ta ben leba kes ki é ségu pa un kaminhu ki es ka konxe,
N ta ben pô-s ta anda na kaminhu ki ka konxedu.
N ta ben poi sukuru ta bira lus ses dianti
I kel txon ki sta xeiu di pédra, na un téra planu.
É kel-li ki N ta ben faze pa es i N ka ta bandona-s.”
17 Kes ki ta kunfia na imajen,
Ta ben vensedu i es ta ben podu na vergónha,
Kes ki ta fla kes státua di metal:* “Es é nos deus.”
18 Nhos ki é surdu, nhos obi,
Nhos ki é ségu, nhos djobe i nhos odja.
19 Ken ki é ségu fóra nha sérvu,
I surdu sima kel mensajeru ki N ta manda?
Ken ki é ségu sima kel ki N rekonpensa,
Ségu sima sérvu di Jeová?
20 Bu ta odja txeu kuza, má bu ka ta presta atenson.
Bus obidu sta abértu, má bu ka ta obi.
21 Pamodi se justisa,
Jeová fika kontenti di mostra ma se lei é bon i gloriozu.
22 Má kel-li é un povu ki tomadu ses kuza i es furtadu,
Tudu es sta prézu na kavérna i sukundidu na kadia.
Es tomadu ses kuza i ka tinha ningen pa salva-s,
Es furtadu i ka tinha ningen pa fla: “Nhos traze-s otu bês!”
23 Kenha na nhos meiu ki ta ben obi kel-li?
Kenha ki ta ben presta atenson i ta tra lisons pa futuru?
24 Kenha ki intrega Jakó na mô di ladrons
I Israel na mô di kes algen ki toma ses kuza?
É ka Jeová, Kel ki nu peka kóntra el?
Es nega anda na Ses kaminhu,
I es nega obi ku Ses lei.
25 El mostra ma el staba txeu xatiadu ku es,
I el dexa-s sufri na géra.
Kel géra éra sima un lumi ki ta kema tudu kuza na ses vólta, má es ka faze nada.
El kontinua ta kema, má es ka liga.