Izaías
38 Na kel ténpu, Ezekias fika duenti i el staba kuazi ta móre. Proféta Izaías, fidju di Amós, bai na el i el fla-l: “É kel-li ki Jeová fla: ‘Da kes algen di bu kaza instruson, pamodi bu sta ben móre. Bu ka ta ben midjora.’” 2 Kantu Ezekias obi kel-li, el vira róstu pa paredi i el kumesa ta ora pa Jeová: 3 “Ó Jeová, favor, N ta pidi-u pa bu lenbra ma N sirbi-u ku lialdadi i ku un korason konplétu i ma N faze kel ki bu ta atxa ma é dretu.” I Ezekias kumesa ta txora txeu.
4 Nton, Izaías resebe kel mensajen* li di Jeová: 5 “Volta i fla Ezekias: ‘É kel-li ki Jeová, Deus di Davidi, bu família, fla: “N obi bu orason. N odja bus lágua. Pur isu, N ta dexa-u vive más 15 anu, 6 i N ta salva-u abo i kel sidadi li di mô di rei di Asíria i N ta ben difende es sidadi. 7 É kel-li ki é sinal ki Jeová da pa mostra-u ma Jeová ta kunpri kuzê ki el fla: 8 N ta ben poi kel sónbra ki dja dixiba na skada* di Akás ta volta 10 digrau.”’” Nton, kel sónbra ki dja dixiba na skada volta pa tras 10 digrau.
9 É kel-li ki Ezekias, rei di Judá, skrebe kantu el midjora di se duénsa.
10 N fla: “Na metadi di nha vida
N ten ki bai pa Sipultura.*
Nha vida ten ki kaba gósi.”
11 N fla: “N ka ta ben odja Jeová,* sin, Jeová, na téra di kes algen bibu.
N ka ta ben odja más ningen
Óras ki N sta entri kes algen ki ta mora na kel lugar undi ki tudu ta kaba.
12 Nha morada é sima un ténda di un pastor
Ki dizarmadu i lebadu pa lonji di mi.
N rola nha vida sima un teselon ta rola un panu.
El korta-m sima un tisidu ta siparadu di tiar.*
Désdi palmanhan ti ki bira noti bu sta ta kaba ku mi.
13 Ti palmanhan N tenta fika kalmu.
Sima un lion, el ta kebra-m tudu nhas osu.
Désdi palmanhan ti ki bira noti bu sta ta kaba ku mi.
14 N sta pia, sima un pasu pikinoti,
N sta ronka sima un ponba.
Nhas odju sta kansadu di djobe pa riba:
‘Ó Jeová, N sta frontadu dimás,
Djuda-m!’*
15 Kuzê ki N pode fla?
El pâpia ku mi i el aji.
N ta ben anda ku umildadi pa réstu di nhas anu
Pamodi nha disgostu.*
Bu ta ben da-m nha saúdi otu bês i bu ta pô-m ta kontinua bibu.
Bu bota tudu nhas éru bu tras.*
18 Pamodi Sipultura ka ta pode da-u glória,
Mórti ka ta pode lova-u.
Kes ki ta dixi pa kóba ka ta pode poi speransa na bus óbra lial.
19 Kes algen bibu, sô kes algen bibu ki ta pode lova-u,
Sima N sta faze oji.
Un pai pode inxina ses fidju konxe bu lialdadi.
20 Ó Jeová, salva-m,
I nu ta ben toka nhas kántiku na kes instrumentu di kórda
Na kaza di Jeová, tudu dia di nos vida.’”
21 Nton, Izaías fla kes sérvu di rei Ezekias: “Nhos traze un masa di figu séku i nhos pô-l riba di kel frunku, asi pa el pode midjora.” 22 Ezekias pergunta: “Kal ki é sinal ma N ta subi pa kaza di Jeová?”