Izaías
27 Na kel ténpu, Jeová ta ben uza se spada moladu, grandi i fórti,
Pa kastiga kel Leviatan,* kel kóbra ki ta disliza,
Sin, Leviatan, kel kóbra ki ta rasta,
I el ta ben mata kel monstru ki sta na mar.
2 Na kel dia, nhos kanta pa el:*
“Un plantason di uva ki ta da vinhu!*
3 Ami, Jeová, N ta kuida di el.
N ta rega-l tudu óra.
N ta proteje-l dia ku noti,
Pa ningen ka faze-l mal.
4 N ka sta xatiadu más.
Ken ki ta ben infrenta-m ku pé di spinhu i ku padja na géra?
N ta ben piza-s i kema-s tudu djuntu.
5 Envês di kel-li, pa el djobe proteson na nha fortaléza.
Pa el faze pas ku mi,
Pa el sta na pas ku mi.”
6 Na kes dia ki sta pa ben Jakó ta ben kria raís,
Israel ta ben brota i da flor,
I es ta ben intxi téra di fruta.
7 Israel meste kastigadu di manera duru sima kel nason kastiga-l?
Ô el meste matadu ku mésmu violénsia ki es mata se povu?
8 Bu ta ben kastiga nason di Israel i manda-l se kaminhu ku un gritu ki ta spanta algen.
Na dia di béntu lésti el ta ben sopra ku forsa pa manda-l se kaminhu.
9 Di kel manera li, pekadu di Jakó ta ben purduadu,
I é kel-li ki ta ben ser rezultadu óras ki se pekadu tradu:
El ta ben poi tudu kes pédra di altar
Ta bira sima kes pédra di kal ki piladu,
Ka ta ben resta ninhun pósti sagradu* nen altar di insénsu.
10 Pamodi kel sidadi ki ten muralha fórti ta ben fika vaziu,
Kes lugar di pastora animal ta ben skesedu di es i es ta ben fika bandonadu sima un dizértu.
Bizeru ta ben kume i deta la
I el ta ben kume ramu di kes arvi.
11 Óras ki ses ramu pikinoti seka,
Mudjeris ta ben i es ta kebra-s,
I es ta faze lenha ku es.
Pamodi kel povu li ka ten intendimentu.
É pur isu ki Kel ki faze-s ka ta ben xinti péna di es,
I Kel ki kria-s ka ta ben djuda-s.
12 Ó povu di Israel, sima un algen ta sakudi un arvi pa el kodje kes fruta un pur un, é si ki Jeová ta ben faze na kel ténpu, el ta ben djunta nhos ki sta spadjadu désdi riu Eufratis* ti vali* di Ijitu. 13 Na kel ténpu, ta ben tokadu un grandi buzina, i kes ki sta ta mora na téra di Asíria i kes ki sta spadjadu na téra di Ijitu ta ben i es ta ben inbaxa dianti di Jeová na kel monti santu na Jiruzalen.