Izaías
26 Na kel ténpu, ta ben kantadu kel kántiku li na téra di Judá:
“Nu ten un sidadi ku paredis fórti.
El ta poi salvason sima un paredi i muralha pa sidadi.
2 Nhos abri kes porton pa kel nason ki é justu pode entra,
Un nason ki ta konporta di manera fiel.
3 Bu ta ben proteje kes ki ta kunfia na bo,*
Bu ta ben da-s pas ki ka ta kaba,
Pamodi é na bo ki es ta kunfia.
4 Nhos kunfia na Jeová pa tudu ténpu,
Pamodi Jeová,* Jeová é kel Rótxa ki ta dura pa tudu ténpu.
5 Pamodi el umilha kes ki ta moraba na kes lugar altu, na kel sidadi altu.
El rabaxa-l,
El rabaxa-l ti téra,
El bota-l na txon.
6 Kes algen póbri ta ben piza-l ku ses pé,
Kes algen koitadu ta ben piza-l ku ses pasu.”
7 Kaminhu di algen justu é rétu.*
Dja ki bo é rétu,
Bu ta ben poi kaminhu di algen justu ta bira planu.
Lenbra* di bo i di bu nómi é nos dizeju más grandi.
9 Di noti N ta djobe-u di tudu nha korason,*
Sin, nha spritu ta kontinua ta djobe-u.
Pamodi óras ki bu ta julga téra,
Pesoas ki ta mora na el ta prende kel ki é dretu.*
10 Mésmu ki algen mau mostradu mizerikórdia,
El ka ta ba prende kel ki é dretu.
Mésmu na téra di justisa el ta ba faze kel ki é mau,
I el ka ta ba odja glória di Jeová.
11 Ó Jeová, bu mô sta labantadu prontu pa aji, má kes mau ka ta odja-l.
Es ta ben odja kel amor fórti* ki bu ten pa bu povu i es ta ben fika na vergónha.
Sin, kel lumi ki sta guardadu pa bus inimigu ta ben kaba ku es.
12 Ó Jeová, bu ta ben da-nu pas,
Pamodi tudu kuza ki nu ta faze
É bo ki ta djuda-nu faze.
13 Ó Jeová nos Deus, otus sinhor alén di bo governa-nu,
Má nu ta lova sô bu nómi.
14 Es sta mortu, es ka ta ben vive más.
Es ka ten puder, es ka ta ben labanta.
Pamodi bu kastiga-s i bu distrui-s,
Asi pa ningen ka ben lenbra di es.
15 Ó Jeová, bu poi bu povu ta kria,
Sin, bu poi bu povu ta kria,
Bu glorifika bu kabésa.
Bu bira frontera di kel téra li más grandi pa tudu ladu.
16 Ó Jeová, na frónta es volta pa bo ta pidi-u ajuda,
Es ora ku vós baxu i ku zelu kantu bu koriji-s.
17 Sima un mudjer grávida ki ta xinti dór di ten fidju
I ta grita di dór óras ki el sta kuazi ta ten fidju,
É si ki nu sta pamodi bo, ó Jeová.
18 Nu fika grávida, nu xinti dór di ten fidju,
Má é sima si nu pari béntu.
Nu ka traze salvason pa kel téra li,
I ningen ka nase pa mora na el.
19 “Kes di bu povu ki móre ta ben vive.
Kes di nha povu ki móre ta ben labanta.
Nhos korda i nhos grita di alegria,
Nhos ki ta mora baxu txon!
Pamodi bu orbadju é sima orbadju di palmanhan,*
I téra ta ben dexa kes ki sta sen puder, detadu na sipultura, vive otu bês.
20 Nhos bai, nha povu, nhos entra na nhos kuartu,
I nhos fitxa pórta nhos tras.
Nhos sukundi pa poku ténpu
Ti ki kel raiba pasa.
21 Pamodi odja! Jeová sta ta sai di se lugar
Pa justa kónta ku kes algen ki ta mora na kel téra li pamodi ses éru,
I kel sangi ki bazadu na kel téra li ta ben mostradu
I el ka ta ben sukundi ses mortu más.”