Izaías
22 Kel-li é un mensajen kóntra vali di Vizon:*
Kuzê ki sta kontise ku bo dja ki tudu bu povu subi pa terasu?
2 Bu staba na meiu di barudju,
Abo éra un sidadi ajitadu, ku txeu orgulhu.
Bus algen ki móre ka matadu ku spada,
Nen es ka móre na géra.
3 Tudu bus governanti kruel fuji tudu djuntu.
Es prendedu sen meste uza un arku.
Tudu kes ki atxadu podu prézu,
Enbóra es fujiba pa lonji.
4 É pamodi kel-li ki N fla: “Nhos tra nhos odju di mi,
N ta ben txora txeu.
Ka nhos insisti na konsola-m
Pamodi distruison di fidju-fémia* di nha povu.
5 Kel Sinhor Más Grandi, Jeová di izérsitu,
Poi kel dia li ta ser un dia di konfuzon, di diróta i di txeu medu
Na vali di Vizon.
Kel muralha ta ben ronbadu
I un gritu ta obidu na montanha.
6 Elan ta panha saku di flexa
I el ta ben ku kes ómi na karu di géra i kabalu,*
I Kir ta pripara* skudu.
7 Bus midjór vali
Ta ben fika xeiu di karu di géra,
I bus kabalu* ta ben fika na ses puzison djuntu di porton,
8 I ta ben tradu proteson di Judá.
“Na kel ténpu, bu ta ben djobe pa kel lugar di guarda armas di Kaza di Florésta, 9 i nhos ta ben odja txeu braku na muralha di Sidadi di Davidi. I nhos ta ben panha agu na kel tanki dibaxu. 10 Nhos ta ben konta kes kaza na Jiruzalen i nhos ta ben ronba alguns di es pa konpo muralha. 11 I nhos ta ben faze un tanki na meiu di kes dôs muralha pa poi kel agu di kel tanki bédju, má nhos ka ta ben kunfia na kel Grandi Kriador ki faze kes kuza li i nhos ka ta ben pensa na Kel ki faze-s dja ten txeu ténpu.
12 I na kel ténpu, kel Sinhor Más Grandi, ki é Jeová di izérsitu,
Ta ben txoma povu pa txora i pa lamenta,
Pa rapa kabésa i pa bisti panu di saku.*
13 Má envês di kel-li, ta ben ten fésta i alegria,
Ta matadu boi i ovelha,
Ta kumedu karni i ta bebedu vinhu,
I nhos ta fla: ‘Nu kume i nu bebe pamodi manhan nu ta móre.’”
14 Nton, Jeová di izérsitu fla-m kel-li:* “‘Nhos ka ta purduadu kel pekadu li ti ki nhos móre’, é kel Sinhor Más Grandi, Jeová di izérsitu ki fla.”
15 É kel-li ki kel Sinhor Más Grandi, ki é Jeová di izérsitu, fla: “Nhos bai pa kel enkaregadu li, pa Sebna, ki sta ta toma kónta di kaza,* i nhos fla-l: 16 ‘Kuzê ki bu ten li i ki família ki bu tene li, pa bu ben koba un sipultura pa bo li?’ El sta ta koba se kóba na un lugar altu, i el sta ta faze un sipultura* pa el na un rótxa. 17 ‘Odja! Jeová ta ben bota-u pa baxu ku forsa i el ta ben prende-u ku forsa. 18 I di serteza el ta ben inrola-u pertadu i el ta ben bota-u sima un bóla na direson di un téra largu. Bu ta ba móre la i bus karu di luxu ta fika la. Kel-li ta ben ser un vergónha pa kaza di bu sinhor. 19 I N ta ben tra-u di bu postu i N ta ben tra-u di ser enkaregadu.
20 “‘Na kel ténpu, N ta ben txoma nha sérvu Eliakin, ki é fidju di Ilkias, 21 N ta ben bisti-l ku bu ropa i N ta ben mara-l pertadu ku kel faixa ki bu ta uza, i kel autoridadi ki bu ten N ta ben pô-l na se mô. El ta ben ser un pai pa kes ki ta mora na Jiruzalen i pa kaza di Judá. 22 I N ta ben poi kel xavi di kaza di Davidi na se onbru. Óras ki el abri ningen ka ta fitxa, i óras ki el fitxa ningen ka ta abri. 23 N ta ben pô-l na un lugar firmi sima un prégu i el ta ben bira sima un tronu di glória pa se família.* 24 I es ta ben prinda na el tudu glória* di se família, ses fidju i ses disendenti, tudu kes vazu pikinoti, kes tijéla i tudu kes jaru grandi.
25 “Jeová di izérsitu fla: ‘Na kel ténpu, kel prégu ki sta pregadu na un lugar firmi ta ben tradu, el ta ben kortadu i el ta kai, i kel karga ki el ta aguentaba ta ben kai i ta kebra tudu, pamodi é própi Jeová ki fla kel-li.’”