Izaías
21 Kel-li é un mensajen kóntra dizértu di mar:*
Sima kes tenporal ki ta ben di sul, un disgrasa sta ta txiga,
Di dizértu, di un téra ki ta da txeu medu.
2 N mostradu un vizon duru:
Kel nason traisueru aji ku falsidadi,
I kel nason ki ta distrui sta ta distrui.
Ó Elon, subi! Ó Média, serka sidadi!
N ta ben kaba ku tudu sufrimentu ki el traze.
3 Pamodi kel vizon li, N sta txeu angustiadu.*
Dór dja toma kónta di mi,
Sima dór di un mudjer ki sta ta ten fidju.
N sta frontadu dimás pa N obi,
N sta perturbadu dimás pa N odja.
4 Nha korason sta bate fórti, N sta treme di medu.
N tinha gana pa noti txiga, má gósi ki dja el txiga N sta ta treme.
5 Nhos poi méza i nhos pripara kuza pa xinta!
Nhos kume i nhos bebe!
Ó prínsipis, nhos labanta, nhos poi óliu na* skudu!
6 Pamodi é kel-li ki Jeová fla-m:
“Bai, poi un guarda, asi pa el fla-m kuzê ki el sta odja.”
7 I el odja un karu di géra ta puxadu pa dôs kabalu,
Un karu di géra ta puxadu pa burus,
Un karu di géra ta puxadu pa kamelus.
El djobe ku kuidadu, ku txeu atenson.
8 Dipôs, el grita sima un lion ta ruji:
“Ó Jeová, N sta di pé dia interu na tori di vijia,
I N sta na nha postu di guarda tudu noti.
9 Nhos odja kuzê ki sta ta txiga:
Ómis na un karu di géra ki sta puxadu pa dôs kabalu!”
Nton, el fla:
“Dja el kai! Babilónia dja kai!
Tudu kes imajen di ses deus sta kebradu na txon!”
10 Ó nha povu, ki piladu sima serial,
Sin, sima serial* di nha lugar di digudja,*
N fla nhos kuzê ki N obi di Jeová di izérsitu, kel Deus di Israel.
11 Kel-li é un mensajen kóntra Dumá:*
Un algen grita-m désdi Seir:
“Guarda, kantu ténpu ki falta pa manxe?
Guarda, kantu ténpu ki falta pa manxe?”
12 Kel guarda fla:
“Palmanhan sta ta txiga, i noti tanbê.
Si nhos krê pergunta, nhos pergunta.
Nhos ben otu bês!”
13 Kel-li é un mensajen kóntra dizértu:
Nhos ta pasa noti na un florésta na dizértu,
Ó grupu di kes algen ki ben di* Dedan.
14 Ó nhos ki ta mora na téra di Tema,
Nhos leba agu pa kes algen ki tene sedi,
I nhos leba pon pa kes ki sta ta fuji.
15 Pamodi es fuji di spada, di kel spada ki sta prontu pa géra,
Di kel arku ki sta prontu pa da ku flexa, i di kel géra kruel.
16 Pamodi é kel-li ki Jeová fla-m: “Di li un anu, sima kes anu di un trabadjador kontratadu,* tudu glória di Kedar ta ben tirmina. 17 Ta ben resta poku arkeru di kes trópa di Kedar, pamodi é Jeová, kel Deus di Israel, ki fla.”