Izaías
19 Kel-li é un mensajen kóntra Ijitu:
Nhos odja! Jeová sta ben rápidu montadu na un núven i el sta ta entra na Ijitu.
Kes deus di Ijitu ki ka bale nada ta ben treme se dianti,
I korason di kes algen di Ijitu ta ben perde koraji.*
2 “N ta ben poi gentis di Ijitu kóntra kunpanheru,
I es ta ben luta kóntra kunpanheru,
Kada un kóntra se irmon i kóntra se vizinhu,
Sidadi kóntra sidadi, reinu kóntra reinu.
3 Spritu di kes algen di Ijitu ta ben fika dizorientadu déntu di es,
I N ta ben konfundi ses planu.
Es ta ba djobe otus deus ki ka bale nada,
Kes fitiseru, kes algen ki ta invoka spritu i kes algen ki ta dibinha.
4 N ta ben intrega Ijitu na mô di un dónu runhu,
I un rei duru ta ben governa-s”, é kel Sinhor verdaderu, Jeová di izérsitu, ki fla.
5 Agu di mar ta ben seka,
I riu ta ben fika séku.
6 Kes riu ta ben fika ta txera mal,
I kes kanal di Nilu di Ijitu ta ben fika razu i séku.
Kes kana* i kes otu planta ta ben seka.
7 Kes planta na bera di riu Nilu, undi riu ta tirmina,
I tudu téra ki ta simiadu na bera di Nilu ta ben seka.
I béntu ta ben leba tudu es, i es ka ta ben izisti más.
8 Kes piskador ta ben fika di lutu,
Kes algen ki ta bota anzol na Nilu ta ben lamenta,
I kes ki ta bota ses redi na agu ta ben bira poku.
9 Kes ki ta faze ropa di linhu
I kes ki ta faze panu branku ta ben fika na vergónha.
10 Kes algen di Ijitu ki ta faze ropa ta ben fika dizanimadu,
Tudu kes trabadjador kontratadu ta ben fika tristi.*
11 Kes prínsipi di Zoan é tolu.
Kes konsedjeru ki ten más sabedoria ta da Faraó mau konsedju.
Modi ki nhos ta pode fla Faraó:
“Ami é disendenti di kes algen ki ten sabedoria,
Disendenti di kes rei antigu”?
12 Nton, undi ki kes ómi ki ten sabedoria sta?
Si es sabe, nton pa es fla-u kuzê ki Jeová di izérsitu disidi sobri Ijitu.
13 Kes prínsipi di Zoan aji ku tolisi,
Kes prínsipi di Nofe* inganadu,
Kes xéfi di ses tribu disvia Ijitu di kaminhu.
14 Jeová baza riba di Ijitu un spritu di konfuzon,
I ses líder sta disvia Ijitu na tudu kuza ki el ta faze,
Pur isu, Ijitu sta sima un algen moku ki ta skorega déntu di se vómitu.
15 I ka ta ben ten nada ki Ijitu pode faze,
Nen kabésa nen rabu, nen rabénta nen planta.*
16 Na kel ténpu, kes algen di Ijitu ta ben bira sima mudjer, ta treme i xeiu di medu pamodi mô* di Jeová di izérsitu ta ben labanta kóntra es. 17 I kes algen di Ijitu ta ben fika ku txeu medu di Judá.* Óras ki es ben obi ta papiadu di el, kes algen di Ijitu ta ben fika ku txeu medu pamodi kuzê ki Jeová di izérsitu disidi kóntra es.
18 Na kel ténpu, ta ben ten sinku sidadi na téra di Ijitu ki ta pâpia língua di Kanan i es ta ben jura ma es ta ser lial pa Jeová di izérsitu. Un di kes sidadi ta ben txomadu Sidadi di Distruison.
19 Na kel ténpu, ta ben ten un altar pa Jeová na meiu di téra di Ijitu i un kuluna pa Jeová na limiti di se tiritóriu. 20 El ta ben sirbi di sinal di tistimunhu sobri Jeová di izérsitu na téra di Ijitu, pamodi es ta ben pidi Jeová ajuda pamodi kes algen ki ta maltrata-s, i el ta ben manda-s un grandi salvador, ki ta ben salva-s. 21 I Jeová ta ben mostra kes algen di Ijitu ken ki el é, i kes algen di Ijitu ta ben konxe Jeová na kel dia i es ta ben oferese sakrifisiu i prezentis. Es ta ben faze un votu pa Jeová i es ta ben kunpri-l. 22 Jeová ta ben kastiga Ijitu, el ta ben kastiga-l i el ta kura-l. Kes algen di Ijitu ta ben volta pa Jeová, i el ta obi ses pididu di ajuda i el ta kura-s.
23 Na kel ténpu, ta ben ten un strada ki ta ben sai di Ijitu pa Asíria. Nton, kes algen di Asíria ta bai ti Ijitu, i kes algen di Ijitu ta bai ti Asíria, i kes algen di Ijitu ta ben sirbi Deus djuntu ku kes algen di Asíria. 24 Na kel ténpu, Israel ta ben ser kel tirseru djuntu ku Ijitu i djuntu ku Asíria, un benson na meiu di téra, 25 pamodi Jeová di izérsitu ta ben abensua-s i el ta fla: “Pa Ijitu, ki é nha povu, Asíria, ki é trabadju di nha mô, i Israel ki é nha eransa, abensuadu.”