Izaías

18 Ai di kel téra ki sta xeiu di barudju di aza di insétu,*

Kel téra ki sta pértu di kes riu di Itiópia!

 2 Kel téra ta manda mensajerus pa mar,

Na barkus di papiru, i es ta fla:

“Anhos mensajeru ki é rápidu,

Nhos bai, pa un nason di gentis altu i di péli lizu,*

Pa un povu ki ta ruspetadu na tudu lugar,

Pa un nason fórti i ki ta vense,*

I ki rius ta rasta-l se téra.”

 3 Tudu nhos ki ta mora na téra, anhos ki ta vive na el,

Kel ki nhos ta odja ta ben ser sima un sinal* ki labantadu riba di montanhas,

I nhos ta ben obi un barudju sima tóki di buzina.

“N ta ben fika trankuilu i N ta ben djobe pa* nha morada,*

N ta ben odja ku kalma, sima óras ki lus di sol ta kenta txon,

Sima núven di orbadju na ténpu kenti di kodjéta.

 5 Pamodi antis di kodjéta,

Óras ki pé di uva tirmina di da flor i kes uva sta ta bira maduru,

Kes raminhu ta ben kortadu ku foisi

I ses kórda* ta ben podadu i es ta tradu.

 6 Tudu es ta ben dexadu pa kes pasu grandi di montanha

I pa kes animal di téra.

Kes pasu grandi ta ben pasa veron ta kume-s,

I tudu kes animal di téra ta ben pasa ténpu di kodjéta ta kume-s.

 7 Na kel ténpu, un nason di gentis altu i di péli lizu,

Un povu ki ta ruspetadu na tudu lugar,

Un nason fórti i ki ta vense

I ki rius ta rasta-l se téra,

Ta ben traze un prezenti pa Jeová di izérsitu,

Na kel lugar ki ta leba nómi di Jeová di izérsitu, monti Sion.”