«Си деж къэвгъэзэж»

1. Сыт Иеговэ зыхищІэр и лэжьакІуэм къыщигъэзэжым деж?

МЫ СТАТЬЯМ ипэ дджа статьям зэритамкІэ дэтхэнэ и зы мэл цІыкІуми хуэсакъыу кІэлъыплъ мэлыхъуэм Иеговэ зырегъэщхь. Абыхэм ящыщ зы гъуащэу щытмэ, абы ар къилъыхъуэжынущ. Иеговэ пэІэщІэ хъуа израил лъэпкъым яжриІащ: «Си деж къэвгъэзэжи, сэри фи деж нэзгъэзэжынущ». Дэ дощІэ Иеговэ и лэжьакІуэхэм зэрахущытым зэрызимыхъуэжар, сыт щхьэкІэ жыпІэмэ абы мыпхуэдэу жеІэр: «Сэ зысхъуэжкъым» (Мал. 3:6, 7). Хьисэ и псалъэхэм къызэрыхэщымкІэ Иеговэ и мелыІычхэр и гъусэу мэгуфІэ абы и лэжьакІуэхэм щыщ зым къыщигъэзэжым деж (Лк. 15:10, 32).

2. Сыт мы статьям щызэпкърытхынур?

² Хьисэ и ущие хъыбархэм щыщу щыр зэпкърытхынщ. Дэ ахэр къыддэІэпыкъунущ Иеговэ пэІэщІэ хъуахэм дазэрыдэІэпыкъунур къыдгурыІуэну. Дэ къэтщІэнущ Иеговэ и мэл цІыкІу гъуэщахэм абы и деж къагъэзэжыну дадэІэпыкъун щхьэкІэ сыт хуэдэ хьэл-щэнхэр тхэлъын хуейми. Абы нэмыщІ къэтлъэгъунущ Алыхьым пэжыжьэ хуэхъуа къуэш, шыпхъухэм дадэІэпыкъуну къару зэретхьэлІэм фІыгъуэ куэд къызэрытхуихьынур.

ДРАХМЭ КІУЭДАР КЪЭГЪУЭТЫЖЫН

3, 4. Лука 15:8—10 зи гугъу ищІ цІыхубзым драхмэ фІэкІуэдар сытыт апхуэдизу къыщІилъыхъуэжыр?

³ Иеговэ и деж къэзыгъэзэжыну хуейхэр къэтлъыхъуэжын щхьэкІэ дэ тхузэфІэкІ къэдгъэнэн хуейкъым. Лука итхыжа ХъыбарыфІым итщ жьгъей къэзылъыхъуэж цІыхубзым теухуа ущие хъыбар. Абы къилъыхъуэж жьгъейр драхмэт. Мы ущие хъыбарым дэ гу лъыдегъатэ цІыхубзым драхмэр къигъуэтыжын щхьэкІэ къару ирихьэлІэм. (Къеджэ Лука 15:8—10.)

⁴ Хьисэ топсэлъыхь драхмэ кІуэдар къэзыгъуэтыжа цІыхубзым и гурыщІэхэм. А жьгъейр абы и дежкІэ лъапІэт. Хьисэ щыпсэуа зэманым Израилым языныкъуэ анэхэм я пхъур щыдэкІуэм деж драхмэу пщІы иратт. ЦІыхубзым фІэкІуэда жьгъейр апхуэдэу кърата драхмэхэм ящыщ зыуэ къыщІэкІынт. ЦІыхубзым а жьгъейр лъэгум ехуэхауэ хуегъэфащэ. Абы уэздыгъэр щІегъанэри и хъуреягъыр къеплъыхь, ауэ зыри игъуэткъым. Абы и уэздыгъэм и нэхур мащІэу къыщІэкІынщ дыжьын жьгъейр къилъэгъун щхьэкІэ. Абы къыхэкІкІэ а цІыхубзым егугъуу унэ лъэгур къепхъэнкІ. ИкІэм-икІэжым сабэм къыхэцІуукІыу абы драхмэр къелъагъу. Сыту гуфІэгъуэшхуэ! Абы и ныбжьэгъухэмрэ и гъунэгъухэмрэ къреджэ и гуфІэгъуэмкІэ дэгуэшэн щхьэкІэ.

5. ХъыбарыфІыр зымыгъэІуж къуэш, шыпхъухэр къэбгъуэтыжыну щІэгугъур сыт?

⁵ Хьисэ и ущие хъыбарым къыдгурегъаІуэ пфІэкІуэдар къэбгъуэтыжын щхьэкІэ къару зэрепхьэлІэн хуейр. Апхуэдэу дэри хъыбарыфІыр зымыгъэІуж къуэш, шыпхъухэр къэдгъуэтыжын щхьэкІэ къару куэд етхьэлІэн хуеинкІэ хъунущ. Ахэр илъэс куэд хъуауэ зэхуэсым къэмыкІуэжу щытынкІэ хъунущ е здэІэпхъуа щІыпІэм щыпсэу къуэшхэм ахэр ямыцІыхункІэ хъунущ. Ауэ, шэч хэмылъу, иджыпсту абыхэм ящыщ гуэр хуабжьу хуейщ Иеговэ и деж къигъэзэжыну. Апхуэдэ цІыхухэр хуейщ къуэш, шыпхъухэм я гъусэу Алыхьым хуэлэжьэн щІадзэжыну, ауэ ахэр дэ ди дэІэпыкъуэгъум хуэныкъуэщ.

6. Зэхуэсым щыщхэм псоми хъыбарыфІыр зымыгъэІуж къуэш, шыпхъухэр дапхуэдэу къызэралъыхъуэфынур?

⁶ ХъыбарыфІыр зымыгъэІуж къуэш, шыпхъухэр хэт къэзылъыхъуэж хъунур? Дэ псоми — зэхуэсым и нэхъыжьхэми, пионерхэми, хъыбарыфІыр зымыгъэІужхэм я Іыхьлыхэми икІи нэгъуэщІ Алыхьым и лэжьакІуэхэми. Фи ныбжьэгъухэм е фи благъэхэм зэхуэсым пэІэщІэ хуэхъуахэр яхэту пІэрэ? ЦІыху куэд здэщыІэ щІыпІэм е унэ-унэкІэ хъыбарыфІыр вгъэІуу апхуэдэ цІыхум фыхуэзауэ пІэрэ? Апхуэдэу щытмэ, цІыхум къыгурыбгъаІуэ хъунущ, ар езыр хуеймэ, щыпсэумрэ и телефон номерымрэ зэхуэсым и нэхъыжьхэм зэрефтыфынур, абы зыкъыпащІэн щхьэкІэ.

7. Зэхуэсым и нэхъыжь Томас и щапхъэм сытым фыхуигъасэрэ?

⁷ Иеговэ и деж къэзыгъэзэжыну хуейхэр къэзыгъуэтыжыну зи къалэн нэхъыщхьэр зэхуэсым и нэхъыжьхэращ. Сыт абыхэм ящІэ хъунур? Испанием щыпсэу зэхуэсым и нэхъыжь Томасb и щапхъэр зэпкърытхынщ. Иеговэ и Щыхьэтхэм щыщу цІыху 40-м щІигъум зэхуэсым къагъэзэжыну ар ядэІэпыкъуащ. Томас жеІэж: «Сэ къуэш, шыпхъухэм соупщІ хъыбарыфІыр зымыгъэІужхэр щыпсэур ящІэрэ ямыщІэрэ. Е абыхэм зэхуэсым къэмыкІуэж гуэр ящІэжрэ ямыщІэжрэ сащІоупщІэ. Зэхуэсым щыщ куэдым хъыбарыфІыр зымыгъэІуж къуэш, шыпхъухэр жыджэру къалъыхъуэ. ИужькІэ сэ хъыбарыфІыр зымыгъэІужхэм я деж сыкІуа иужь я бынхэмрэ я Іыхьлыхэмрэ я Іуэхур зыІутымкІэ сащІоупщІэ. ХъыбарыфІыр зымыгъэІуж языныкъуэхэр япэм щыгъуэ я бынхэр я гъусэу зэІущІэхэм къакІуэу щытащ, икІи абыхэм я бынхэм хъыбарыфІыр ягъэІуу щытауэ къыщІэкІынущ. Абыхэми Иеговэ и деж къагъэзэжыфынущ, уадэІэпыкъуу щытмэ».

ИЕГОВЭ И КЪУЭХЭМРЭ ИПХЪУХЭМРЭ КЪАГЪЭЗЭЖЫНУ ФАДЭІЭПЫКЪУ

8. Лука 15:17—24 зэритымкІэ, адэр щІегъуэжа къуэм дапхуэдэу зэрыхущытар?

⁸ Иеговэ и деж къэзыгъэзэжыну хуейхэм дадэІэпыкъун щхьэкІэ сыт хуэдэ хьэл-щэнхэр тхэлъын хуей? И адэм и унэр къэзыгъэна къуэ щхьэзыфІэфІым теухуауэ Хьисэ жиІа ущие хъыбарым сытым дыхуигъасэми дегупсысынщ. (Къеджэ Лука 15:17—24.) Хьисэ зэрыжиІамкІэ икІэм-икІэжым къуэр зыщІогупсысыжри, унэм къигъэзэжыну мурад ещІ. Адэм и къуэр къилъэгъуа иужь, абы и деж мажэри гуапэу ІэплІэ хуещІ икІи ар фІыуэ зэрилъагъур абы иригъэлъэгъуну хуейщ. ЩІалэм ищІам щхьэкІэ и напэр къоныкъуэкъу. Абы къыщохъу и адэм ар и къуэу илъытэну хуэмыфащэу икІи йолъэІу и лэжьакІуэхэм щыщ зыуэ къищтэну. Адэр и къуэм и псалъэхэм гущІэгъу хэлъу йодаІуэ икІи абы къызэригъэзэжам щхьэкІэ зэрыгуфІэр ІуэхукІэ къегъэлъагъуэ. Ар абы и лэжьакІуэм хуэдэу хущыткъым, атІэ и унагъуэм щыщ фІыуэ илъагъу цІыхум хуэдэущ зэрыхущытыр. Адэм и къуэ щІегъуэжар фІыуэ зэрилъагъур къыгуригъэІуэн щхьэкІэ «гухэхъуэ Іэнэ» егъэув икІи щыгъын нэхъыфІ дыдэ къыхуахьыну унафэ ещІ.

9. ХъыбарыфІыр зымыгъэІужхэм Иеговэ и деж къагъэзэжыну дадэІэпыкъун щхьэкІэ сыт хуэдэ хьэл-щэнхэр тхэлъын хуей? («Къэзыгъэзэжыну хуейхэм дапхуэдэу дазэрыдэІэпыкъунур?» жыхуиІэ рамкэм феплъ.)

⁹ Мы ущие хъыбарыр зытепсэлъыхь адэм Иеговэ ещхьщ. Абы хъыбарыфІыр зымыгъэІуж къуэш, шыпхъухэр фІыуэ елъагъу икІи хуейщ и деж абыхэм къагъэзэжыну. Дэ Иеговэ щапхъэ тетхыу щытмэ, абыхэм къагъэзэжыну дадэІэпыкъуфынущ. Абы щхьэкІэ шыІэныгъэ, гущІэгъу икІи лъагъуныгъэ тхэлъын хуейщ. А хьэл-щэнхэм мыхьэнэшхуэ щІаІэр сыт икІи дапхуэдэу ахэр дэ зэрыдгъэлъэгъуэфынур?

10. Зыгуэрым Иеговэ и деж къигъэзэжыну дыщыдэІэпыкъукІэ сыт шыІэныгъэ зыхэдгъэлъын щІыхуейр?

¹⁰ Дэ шыІэныгъэ зыхэдгъэлъын хуейщ, сыт щхьэкІэ жыпІэмэ цІыхум Иеговэ и деж къигъэзэжын щхьэкІэ зэман хуейщ. Япэм хъыбарыфІыр зымыгъэІужу щыта Алыхьым и лэжьакІуэхэм зэрыжаІэжымкІэ, Иеговэ хуэлэжьэн щІадзэжын ипэ абыхэм я деж зэхуэсым и нэхъыжьхэмрэ адрей къуэш, шыпхъухэмрэ куэдрэ кІуэн хуей хъуащ. Азием щыпсэу ди шыпхъу На́нси етхыж: «Зэхуэсым сэ ныбжьэгъу сыщиІэт икІи ар дэІэпыкъуэгъушхуэ къысхуэхъуащ. Абы фІыуэ сыкъилъагъут икІи шыпхъу нэхъыщІэр нэхъыжьым зэрыхущытым хуэдэу къысхущытт. Япэм дэ куэдрэ дызэпсалъэу щытащ икІи абы а зэманыфІхэр сигу къигъэкІыжт. Сэ абы си гурыщІэхэмкІэ сыдэгуэшэну сыщыхуейм деж, ар шыІэныгъэ хэлъу къызэдаІуэт икІи и чэнджэщхэмкІэ къыздэІэпыкъут. А шыпхъур ныбжьэгъуфІу сиІэт икІи сыт хуэдэ зэманми къыздэІэпыкъуну хьэзырт».

11. Зи жагъуэ ящІам дыдэІэпыкъун щхьэкІэ гущІэгъу щІытхэлъын хуейр сыт?

¹¹ ГущІэгъур сэбэпынагъышхуэ зыпылъ хущхъуэм ебгъэщхь хъунущ, абы цІыхум и гур фІы ещІыж. Алыхьым и лэжьакІуэ языныкъуэхэм хъыбарыфІ гъэІунымрэ зэхуэсым кІуэнымрэ къагъэнащ. Сыт щхьэкІэ? Илъэс куэдкІэ узэІэбэкІыжмэ зэхуэсым щыщ гуэрым я жагъуэ къызэрищІам щхьэкІэ. ИкІи нобэр къыздэсым ар я гум къоуэ. Абыхэм Иеговэ и деж къагъэзэжыну а гурыщІэхэр зэран къахуохъу. Апхуэдэ къуэш, шыпхъухэм захуагъэ хэмылъу къахущытауэ къалъытэнкІэ хъунущ. Абы къыхэкІкІэ гулъытэ къахуэзыщІын икІи къызыгурыІуэн ныбжьэгъу ахэр хуэныкъуэу къыщІэкІынщ (Екъуб 1:19). Зэман гуэркІэ зэхуэсым мыкІуэу щыта Мария игу къегъэкІыж: «Сэ къызэдэІуэн, гупсэхугъуэ къызэзытын икІи дэІэпыкъуэгъу къысхуэхъун ныбжьэгъу сыхуэныкъуэт».

12. ХъыбарыфІыр зымыгъэІуж къуэш, шыпхъухэм зэхуэсым къагъэзэжыну Иеговэ и лъагъуныгъэр дапхуэдэу къазэрыдэІэпыкъур? Щапхъэ къэфхь.

¹² Иеговэ и лэжьакІуэхэм яхуиІэ лъагъуныгъэр укъезыгъэл кІапсэм ебгъэщхь хъунущ. Уи нэгу къыщІэгъэхьэт тенджызым ухэхуауэ. Псыр къэукъубеящ икІи уитхьэлэу щІедзэ. Абы хэту зызыкІэрыпщІэ хъун гуэр кхъуафэжьейм исым псым къыпхухедзэ. ДауикІ, уэ ар фІыщІэ пщІынущ, сыт щхьэкІэ жыпІэмэ апхуэдэу псым ущІэмытІысыкІыну нэхъ тыншщ. Ауэ укъелын щхьэкІэ нэхъыбэ ухуейщ. Псы щІыІэм укъыхэкІыу кхъуафэжьейм уимытІысхьэу щытмэ ухэкІуэдэнущ. Укъезыгъэлын кІапсэ къыпхуидзу псым укъыхэзылъэфыжын гуэр ухуейщ. Иеговэ пэжыжьэ хуэхъуа израил лъэпкъым мыпхуэдэу яжриІащ: «Сэ... ахэр фІылъагъуныгъэкІэ зэсшалІэт» (Ос. 11:4, Заокский перевод). Ноби апхуэдэу Алыхьым пэІэщІэ хуэхъуа икІи хы къэукъубеям хуэдэ гугъуехьхэм щІагъэна и лэжьакІуэхэр абы зрешалІэ. Иеговэ хуейщ ахэр фІыуэ зэрилъагъур икІи къагъэзэжыну зэрыхуейр абыхэм ящІэну. Ахэр фІыуэ зэрилъагъур къагуригъэІуэн щхьэкІэ Иеговэ фэ фыкъигъэсэбэпыфынущ.

13. Алыхьым и лэжьакІуэхэм я лъагъуныгъэм къару зэриІэр къэзыгъэлъагъуэ щапхъэ къыжыфІэж.

¹³ ХъыбарыфІыр зымыгъэІуж къуэш, шыпхъухэм фІыуэ зэрытлъагъур зыхащІэн щхьэкІэ икІи ахэр Иеговэ фІыуэ зэрилъагъум шэч къытрамыхьэн щхьэкІэ дэ къару етхьэлІэн хуейщ. Мыбы ипэ дызэджа статьям зи гугъу тщІа Пабло илъэс 30-м щІигъукІэ хъыбарыфІыр имыгъэІужу щытащ. Абы игу къегъэкІыж: «Зы пщэдджыжь гуэрым унэм сыкъыщыщІэкІым зи ныбжьыр хэкІуэта ди зы шыпхъу гуапэ къызбгъэдыхьащ. Ар апхуэдизкІэ гуапэу къызэпсэлъати, сыкъыщиудри сабий цІыкІум хуэдэу сыгъащ. Сэ абы жесІащ Иеговэ ар къызигъэпсэлъэну къысхуигъэкІуам хуэдэу къызэрысщыхъуар. А дакъикъэм Иеговэ и деж згъэзэжыну мурад сщІащ».

ЛЪАГЪУНЫГЪЭ ХЭЛЪУ КЪАРУУНШЭ ХЪУАХЭМ ФАДЭІЭПЫКЪУ

14. Лука 15:4, 5 зэритымкІэ, мэлыхъуэм мэл цІыкІу кІуэдар къигъуэтыжа иужь сытыт ищІэр?

¹⁴ ХъыбарыфІ гъэІуныр къэзыгъэнахэм ящыщ къэдгъуэта иужь, абы адэкІи дыдэІэпыкъун хуейщ. Хьисэ и ущие хъыбарым хэта къэзыгъэзэжа къуэм хуэдэу, апхуэдэ цІыхум гукъеуэ иІэнкІэ хъунущ. Ар ШейтІаным и дунейм зэрыхэтам щхьэкІэ Иеговэ пэжыжьэ хуэхъуауэ къыщІэкІынщ. Дэ абы дыдэІэпыкъун хуейщ Иеговэ хуиІэ фІэщхъуныгъэр нэхъ быдэ ищІыну. Мэл цІыкІу гъуэщам теухуа Хьисэ и ущие хъыбарым щыжыІащ мэлыхъуэм ар и плІэм дилъхьэу, хъушэм зэрихьыжыр. Мэлыхъуэм ар къигъуэтыжын щхьэкІэ зэманрэ къару куэдрэ тригъэкІуэдащ. Ауэ абы къыгуроІуэ мэл цІыкІур хъушэм хьыжын зэрыхуейр, сыт щхьэкІэ жыпІэмэ езым апхуэдэ къару иІэкъым. (Къеджэ Лука 15:4, 5.)

15. Иеговэ и деж къэзыгъэзэжыну хуей къуэш, шыпхъухэм дапхуэдэу дадэІэпыкъу хъуну? («Уасэ зимыІэ дэІэпыкъуэгъу» жыхуиІэ рамкэм феплъ.)

¹⁵ ХъыбарыфІыр зымыгъэІужу хъуа цІыхум Иеговэ и деж къигъэзэжыну зэран къыхуэхъухэм пэлъэщыну дыдэІэпыкъун щхьэкІэ дэ зэмани къару куэди тедгъэкІуэдэн хуеинкІэ хъунущ. Ауэ Иеговэ и къару лъапІэм, Алыхьым и Псалъэм абы нэмыщІ ди тхыгъэхэм я фІыгъэкІэ дэ дадэІэпыкъуфынущ зэхуэсым пэІэщІэ хуэхъуахэм къару зрагъэгъуэтыжыну (Рим 15:1). Куэд щІауэ зэхуэсым и нэхъыжьу щыт ди зы къуэшым жеІэ: «Иеговэ и деж къэзыгъэзэжыну мурад зыщІа хъыбарыфІыр зымыгъэІуж и нэхъыбэ къуэш, шыпхъухэм я гъусэу Библиер джын хуейщc. Апхуэдэ цІыхур иригъэджэну къалэн зыхуащІа Алыхьым и лэжьакІуэр дзыхь зыхуэпщІ хъун ныбжьэгъу пэж абы хуэхъун хуейщ». Апхуэдэ цІыху ебгъэджэну къыбжаІэмэ-щэ? ДауикІ, уэ абы ущыгуфІыкІыну къыщІэкІынщ.

УАФЭМИ ЩІЫЛЪЭМИ ЩЫІЭ ГУФІЭГЪУЭШХУЭ

16. МелыІычхэм я дэІэпыкъуэгъум дыщыгугъ зэрыхъунур дэнэ дэ щытщІэр?

¹⁶ Иеговэ и деж къэзыгъэзэжыну хуей хъыбарыфІыр зымыгъэІуж къуэш, шыпхъухэр къэтлъыхъуэжыну мелыІычхэр къызэрыддэІэпыкъур къэхъуа Іуэхугъуэ куэдым къагъэлъагъуэ (Апок. 14:6). Зы щапхъэ деплъынщ. Эквадор щыпсэу ди къуэш Си́львио зэхуэсым къигъэзэжыну хуейти, Иеговэ лъэІу гуащІэкІэ зыхуигъэзат къыдэІэпыкъун гуэр къыхуигъэкІуэн щхьэкІэ. И лъэІур иухатэкъым абы и бжэм зыгуэр къыщытеуІуам. ЩыщІэкІам, зэхуэсым и нэхъыжьитІ бжэм деж щытт. Ахэр абы къыдэІэпыкъуну хьэзырт.

17. ХъыбарыфІыр зымыгъэІуж къуэш, шыпхъухэм дазэрыдэІэпыкъум сыт хуэдэ гурыщІэхэр къыдитрэ?

¹⁷ Алыхьым пэжыжьэ хуэхъуа къуэш, шыпхъухэм дазэрыдэІэпыкъум гуфІэгъуэ куэд къытхуихьыфынущ. Пионеру лажьэ ди къуэш Сальвадор хъыбарыфІыр зымыгъэІужхэм ядэІэпыкъун щхьэкІэ къаруушхуэ ирехьэлІэ. Абы жеІэ: «Иныкъуэхэм деж апхуэдизкІэ согуфІэри си нэпсхэр къысфІыщІож. Иеговэ и мэл цІыкІухэм щыщ зы ШейтІаным и дунейм къызэрыхишыжам икІи сэ абы щІыхь къысхуищІу сыкъызэригъэсэбэпам сыщегупсысым деж, си гум гуфІэгъуэр из мэхъу!» (Апост. 20:35).

18. ХъыбарыфІыр зымыгъэІуж къуэш, шыпхъухэм сытым шэч къытрамыхьэми хъуну?

¹⁸ Уэ хъыбарыфІ гъэІунымрэ зэхуэсым кІуэнымрэ къэбгъэнауэ щытмэ-щэ? Иеговэ япэм хуэдэу фІыуэ укъызэрилъагъум шэч къытумыхьэ. Ар хуейщ уэ абы и деж бгъэзэжыну. ДауикІ, абы щхьэкІэ уэ езым къару епхьэлІэн хуейщ. Хьисэ и ущие хъыбарым хэт адэм хуэдэу Иеговэ хуабжьу хуейщ уэ къэбгъэзэжыну икІи унэм укъызэрыкІуэжам ар щыгуфІыкІынущ!