Иеговэ сызэрыхуэлэжьа гъащІэ гъэщІэгъуэныщэр

СИ АДЭ-АНЭМ Я ГЪУСЭУ СЫЗЭРЫПСЭУАР

Си адэ-анэр Швейцарием къикІри, Канадэм и провинцие Онта́рио щыІэ Ти́мминс къалэм Іэпхъуащ. А къалэр цІэрыІуэт бгым хъугъуэфІыгъуэ куэд къызэрыщІахымкІэ. 1934 гъэм сэ абы сыкъыщалъхуащ. 1939 гъэм си анэр «ХъумакІуэ чэщанэм» еджэу, зэІущІэхэми кІуэуэ щІидзащ. Абы сыт щыгъуи сабийхэр зэІущІэм дыздишэт икІи куэд дэмыкІыу си анэм псым зыщІигъэуащ.

Си анэр Иеговэ и Щыхьэт зэрыхъуар си адэм и фІэфІ хъуатэкъым. Ауэ си анэм пэжыр фІыуэ илъагъути, Алыхьым хуэпэжу къэнэныр абы и дежкІэ псом нэхърэ нэхъапэт. 1940 гъэхэм Иеговэ и Щыхьэтхэр Канадэм щызэхуащІам абы адэкІи теубыдагъэ игъэлъэгъуащ. Си адэм дапхуэдизрэ си анэм псалъэ жагъуэхэр жримыІами, ар абы сыт щыгъуи пщІэ хэлъу, гуапэу хущытт. Си анэм щапхъэфІ игъэлъэгъуар дэ зэкъуэш-зэшыпхъухэм къыддэІэпыкъуащ Иеговэ и гъуэгур къыхэтхыну. Ди насыпти, ди адэм зихъуэжри, нэхъ щабэу къытхущыту хъуащ.

ПОЛНОВРЕМЕННЭ ЛЭЖЬЫГЪЭР ЩІЫЗОДЗЭ

1950 гъэм гъэмахуэм Нью-Йорк щекІуэкІа «Рост теократии» зи цІэ конгрессым сыщыІат. Абы сэ къэрал куэдым къикІа къуэш, шыпхъухэм сащыдэуэршэрат икІи Галаад Школыр къэзыухахэми я интервью гъэщІэгъуэнхэр щызэхэсхат. А псом си гур мафІэу къызэщІагъэнащ икІи абы сыхуигъэушащ пионеру сылэжьэну. Унэм сыкъэкІуэжа иужь сэ занщІэу заявленэ стхат. Ауэ Канадэм щыІэ филиалым сыхуигъэушащ япэщІыкІэ псым зыщІэзгъэуэну. Сэ апхуэдэуи сщІащ, 1950 гъэм октябрым и 1 псым зыщІэзгъэуащ. Мазэ дэкІри, общэ пионер сыхъуа иужь къуэшхэр къызэлъэІуащ Капуске́йсинг къалэм сыІэпхъуэну. А къалэ цІыкІур си унэм километр щэ бжыгъэкІэ пэжыжьэт.

Гъатхэм 1951 гъэм филиалым французыбзэкІэ псэлъэф къуэш, шыпхъухэр хуигъэушащ Квебек Іэпхъуэфынрэ мыІэпхъуэфынрэ егупсысыну, сыт щхьэкІэ жыпІэмэ ахэр дэІэпыкъуэгъу хуэныкъуэт. Сэ сызэрыцІыкІурэ французыбзи английскэбзи фІыуэ сщІэти, дэІэпыкъуэгъу сызэрыхъуфынур абыхэм яжесІащ. Арати, ипэкІэ зи гугъу сщІа Руэн къалэм сагъэкІуащ. Абы сэ зыри щысцІыхутэкъым икІи сыздэкІуэн хуей адрес закъуэрат сиІэр, ауэ и кІэм си Іуэхур псори фІы дыдэу зэтеуващ. Марселрэ сэрэ зэныбжьэгъуфІ дызэхуэхъуащ. КъыкІэлъыкІуэ илъэсиплІым сэ Квебек сыщылэжьащ, икІэм-икІэжым специальнэ пионер сащІащ.

ГАЛААДЫМРЭ СЫЗЫПЭПЛЪЭР КІЫХЬЛІЫХЬ ЗЭРЫХЪУАМРЭ

Квебек сыщылажьэу Галаад Школым и 26 классым сыщеджэну сыкърагъэблэгъащ. Абы щыгъуэ сэ зыкІэ сыгуфІати! Дэ дыщеджащ Нью-Йорк штатым щыІэ Са́ут-Ла́нсинг къалэм. 1956 гъэм февралым и 12 Школыр къэдухащ икІи сэ Африкэм и къухьэпІэмкІэ щыІэ Га́нэb зи цІэ щІыпІэм сыкІуэн хуейуэ къызжаІат. Ауэ абы сыкІуэн ипэ «тхьэмахуэ зыбжанэкІэ» Канадэм сыкІуэжын хуейт, си документхэр хьэзыр хъухукІэ.

Тхьэмахуэ зыбжанэр мазибл хъуащ. А зэманым и кІуэцІкІэ сэ Торо́нто щыпсэу Криппс унагъуэм я деж сыщыІащ. Абыхэм япхъу Ше́йлэ сэ зэзгъэцІыхуащ. Дэ фІыщэу дызэрылъэгъуат икІи ар къэсшэну сызэрыхуейр жесІэну зыщызгъэхьэзырым си визэр хьэзыр хъуауэ къэкІуэжащ. Шейлэрэ сэрэ зэгъусэу Иеговэ тхьэлъэІукІэ зыхуэдгъазэри, унафэ тщІащ сэ Африкэм сыкІуэну. Дэ хьэгъуэлІыгъуэм теухуа гупсысэхэр едгъэтІылъэкІри, дызэгурыІуащ зэкІэ дызэхуэтхэну. Ар ди дежкІэ унафэ гугъут, ауэ къызэрыщІэкІамкІэ ар унафэ тэмэмт.

Африкэм сынэсын щхьэкІэ мазэ псокІэ мафІэгукІи, кхъухькІи, кхъухьлъатэкІи сыкІуащ. ИкІэм-икІэжым Ганэ щыІэ А́ккрэ зи цІэ къалэм сынэсащ. Сэ областной лэжьыгъэр къысхуагъэфэщат. Си территорием хыхьэт Ганэ псор, Берег Слоновой Кости жыхуаІэр (иджыпсту Кот-д’Ивуа́р), абы нэмыщІ Тоголе́нд къэралыр (иджыпсту То́го). И нэхъыбэм сэ филиалым къызита джипымкІэ гъуэгу сытетт. Ар зыкІэ сигу ирихьти!

Щэбэт махуэхэмрэ тхьэмахуэ махуэхэмрэ сэ районнэ конгрессхэм сыкІуэт. Конгрессхэр щрагъэкІуэкІ Унэ диІэтэкъыми, къуэшхэм зэман гуэркІэ щытыну бамбукым къыхэщІыкІа унащхьэ зэрагъэпэщри, пальмэм и тхьэмпэхэр абы тралъхьэжащ. Абы зыгуэрурэ дыгъэ къэракъэм дыщихъумэт. Дэ холодильник диІэтэкъыми, къуэшхэм шхын къызыхащІыкІыну псэущхьэхэр конгрессыр щекІуэкІым пэмыжыжьэу щаІыгът.

А конгрессхэм иныкъуэхэм деж дыхьэшхэн Іуэхугъуэхэр къыщыхъут. Зэгуэр миссионеру лажьэ ди къуэш Херб Дже́ннингсc псалъэ гъэхьэзыра жиІэу сценэм ипэм деж танэ къилъэдащ. Ди къуэшым абдеж псалъэр къигъэувыІащ, танэ щхьэрыуам аткІэ-мыткІэ къижыхьу щІидзащ. Ди насыпти, Іэчлъэчу щыт къуэшиплІым ар къаубыдыжри, псори Іэгу хуеуэурэ пщэфІапІэмкІэ яшэжащ.

Конгрессхэр щемыкІуэкІ махуэхэм къуажэ гъунэгъухэм сыкІуэурэ «Общество нового мира в действии» жыхуиІэ фильмыр цІыхухэм езгъэлъагъут. Абы щхьэкІэ жыгитІ зэхуакум е башитІ зэхуакум хъыдан хужь щысшэщІти, проекторыр щІэзгъанэт. Къуажэдэсхэм ар хуабжьу ягу ирихьт. Куэдым я гъащІэм къриубыдэу япэу фильм ялъагъуу арат. Ахэр ину Іэгу еуэт цІыхухэм псым зэрызыщІагъауэр экранымкІэ щалъагъум деж. А фильмыр куэдым ядэІэпыкъуащ Иеговэ и Щыхьэтхэр дуней псом тет организацэ зэкъуэту зэрыщытыр къагурыІуэну.

Апхуэдэурэ Африкэм илъэситІыр щызгъэкІуащ. 1958 гъэм Нью-Йорк щекІуэкІа международнэ конгрессым сыкІуащ. А конгрессым Шейли къэкІуат. Абы щыгъуэ ар специальнэ пионеру Квебек щылажьэт. Дызэрызэхуэзар сэ хуабжьу си гуапэт, сыт щхьэкІэ жыпІэмэ абы ипэкІэ дэ дызэхуэтхэ къудейуэ арат. Дызэрызэхуэзэу сэ абы занщІэу сеупщІащ къыздэкІуэну хуейрэ хуэмейрэ икІи ар къыздэкІуэну зэрыхуейр къызжиІащ. Сэ ди къуэш Норрd письмо хуэстхри, Шейлэ Галаадым щеджэу си гъусэу Африкэм щылажьэ хъунрэ мыхъунрэ сеупщІащ. Ар абы арэзы техъуащ. Шейлэ Ганэ къыщыкІуам щыгъуэ дэ дызэрышащ икІи ди хьэгъуэлІыгъуэр 1959 гъэм октябрым и 3 Аккрэ щекІуэкІащ. Ди гъащІэм япэ увыпІэр Иеговэ зэреттым дэ зыхыдигъащІэт абы и нэфІ къызэрытщыхуэр.

ЗЭГЪУСЭУ КАМЕРУН ДЫЩОЛАЖЬЭ

1961 гъэм дэ Камеру́н дагъэкІуащ икІи абы филиалыщІэ къыщызэІусхыну къалэн къысхуащІащ. Абы лэжьыгъэшхуэ щыІэт. Япэм сэ филиалым и лэжьакІуэу зэи сыщытатэкъыми куэдым зыхуезгъэсэн хуейт. 1965 гъэм Шейлэ уэндэгъу зэрыхъуар къэтщІащ. Пэжыр жыпІэмэ, ди дежкІэ тынштэкъым адэ-анэ дызэрыхъунур и кІэм нэс къыдгурыІуэну. Ауэ а зэхъуэкІыныгъэхэм дригуфІэу икІи Канадэм дгъэзэжыну зыдгъэхьэзыру щыщІэддзам дэ гуауэшхуэ дыпэщІэхуащ.

Шейлэ сабийр фІэкІуэдыжащ. Дохутырым къыджиІат дэ щІалэ цІыкІу диІэн зэрыхуеяр. А гуауэшхуэр къызэрыхъурэ илъэс 50 дэкІами, дэ ар зэи тщыгъупщакъым. Гуауэм ди гур ирикъутыхьа пэтми, апхуэдизу фІыуэ тлъэгъуа миссионер лэжьыгъэр къэдгъэнакъым.

Камерун щыІэ къуэшхэр политикэм зэрыхэмыІэбэм щхьэкІэ гугъу ирагъэхьт. Президентыр щыхахым деж Іуэхур псом хуэмыдэу нэхъ гуащІэ хъут. 1970 гъэм майм и 13 псом хуэмыдэу дызыщышына Іуэхугъуэр къэхъуащ — къэрал унафэщІхэм Иеговэ и Щыхьэтхэм я лэжьыгъэр зэхуащІащ. ЩІэуэ тщІа филиал дахащэм дызэрыІэпхъуэжрэ мазитху фІэкІа дэмыкІауэ ар ттрахащ. Миссионеру хъуам, Шейлэрэ сэрэ абыхэм дахэту, унафэ къытхуащІащ тхьэмахуэм и кІуэцІым къэралым дикІыну. Ди дежкІэ егъэлеяуэ гугъут къуэш, шыпхъухэр къэдгъэнэну, сыт щхьэкІэ жыпІэмэ дэ ахэр фІыщэу тлъэгъуат икІи абыхэм щхьэкІэ дыгузавэт.

КъыкІэлъыкІуэ илъэс ныкъуэр дэ Францием щыІэ филиалым щыдгъэкІуащ. Сэ Камерун щыІэ къуэшхэм зэрысхузэфІэкІкІэ садэІэпыкъут. А гъэ дыдэм декабрым дэ Нигерием щыІэ филиалым дагъэкІуащ. А филиалым и пщэ далъхьат Камерун щекІуэкІ лэжьыгъэм кІэлъыплъыну. Нигерием щыщ къуэш, шыпхъухэм дэ гуапэу дыкърагъэблэгъащ икІи абы илъэс зыбжанэкІэ дыщылэжьащ.

УНАФЭ ГУГЪУ

1973 гъэм дэ унафэ гугъу къэтщтэн хуей хъуащ, сыт щхьэкІэ жыпІэмэ Шейлэ и узыншагъэм пыщІауэ гугъуехь гуэрхэр иІэ хъуат. Дэ Нью-Йорк конгрессым дыщыІэу ар къэгъри, къызжиІащ: «АфІэкІа си узыншагъэр пэлъэщыжкъым, сыт щыгъуи си псэр пыхуу, сешауэ сыщытщ». А зэманым дэ Африкэм и къухьэпІэ лъэныкъуэмкІэ илъэс 14 хъуауэ дыщылажьэт. Сэ си щхьэгъусэр псэемыблэжу Иеговэ зэрыхуэлажьэм хуабжьу срипагэт. Ауэ зыгуэр тхъуэжыным и зэманыр къэсат. Дэ ди Іуэхум куууэ дегупсысщ, мызэ-мытІэуи тхьэлъэІу гуащІэкІэ Иеговэ зыхуэдгъазэри, унафэ тщІащ Канадэм дгъэзэжыну. Абы Шейлэ и узыншагъэм тэмэму дыщыкІэлъыплъыфынут. Африкэм дикІыну, полновременнэ лэжьыгъэри къэдгъэнэну дэ хуабжьу къыдэхьэлъэкІащ.

Канадэм дгъэзэжа иужь сэ куэд щІауэ си ныбжьэгъуу щыт гуэрым и деж лэжьапІэ сыуващ. Абы Торонто пэмыжыжьэу машинэхэр ищэт. Шейлэрэ сэрэ фэтэр къатщтэри, унэм щІэтын, къагъэсэбэпа хьэпшып гуэрхэри къэтщэхуащ. Апхуэдэу дэ щІыхуэм дыхэмыхьэу дыІэпхъуэфащ. Дэ диІэмкІэ арэзыуэ дыщытыну дыхущІэкъут, сыт щхьэкІэ жыпІэмэ хъуххэу щытмэ, полновременнэ лэжьыгъэм пытщэжыну дыхуейт. А Іуэхур дызэримыгугъауэ псынщІэу къэхъуащ.

А зэманым Онтарио провинцием, Но́рвал зи цІэ щІыпІэм конгрессхэр щекІуэкІ Унэ щаухуэт. Щэбэт махуэхэм сэ а ухуэныгъэм сыхэтт. ИужькІэ а Унэм сыкІэлъыплъыну къысхуагъэфэщащ. Шейлэ и узыншагъэр нэхъ зэтеувэжати, а лэжьыгъэр зэрытхузэфІэкІынур къыдгурыІуащ. Абы къыхэкІкІэ 1974 гъэм июным конгрессхэр щекІуэкІ Унэм дыІэпхъуащ. Полновременнэ лэжьыгъэм зэрыпытщэжам щхьэкІэ дэ зыкІэ дыгуфІэти!

Хъарзынэу Шейлэ и узыншагъэр нэхъыфІ хъуурэ кІуэт. ИлъэситІ дэкІри, дэ районнэ лэжьыгъэм щІэддзащ. Дэ ди районыр Канадэм и провинцие Манито́бэ щыІэт. А щІыпІэм щІымахуэхэр уает, ауэ абы щыпсэу къуэш, шыпхъухэм я лъагъуныгъэмрэ я хьэщІагъэмрэ дагъэхуабэт. Дэ къыдгурыІуащ мыхьэнэ зиІэр дыздэщыІэ щІыпІэракъым, атІэ дэнэ дыщымыІами, Иеговэ дызэрыхуэлажьэращ.

МЫХЬЭНЭШХУЭ ЗИІЭ ДЕРС

Илъэс зыбжанэкІэ дэ районнэ лэжьыгъэм дыхэта иужь, 1978 гъэм Канадэ щыІэ Вефилым дыщылэжьэну драгъэблэгъащ. Куэд дэмыкІыу хуабжьу сызыхущІегъуэжа Іуэхугъуэ къэхъуащ. ИужькІэ мыхьэнэшхуэ зиІэ дерс абы хэсхащ. Монреа́ль щекІуэкІа зэхуэс хэхам французыбзэкІэ сыхьэтрэ ныкъуэкІэ псалъэ жысІэну къысхуагъэфэщат. Си жагъуэ зэрыхъунщи, псалъэ жысІэм я акъылыр траухуэну къызэдаІуэхэр хуэзгъэушыфакъым. Псалъэр сыуха иужь служебнэ отделым щылажьэ зы къуэш къызбгъэдыхьэри сызэлэжь хъунум теухуауэ чэнджэщ къызитащ. Нобэ сэ къызгуроІуэ жьакІуэу сызэрыщымытыр. Ауэ абы щыгъуэ къуэшым къызита чэнджэщыр сигу ирихьакъым, сыт щхьэкІэ жыпІэмэ абы щытхъу псалъэ зыри къызжиІатэкъым икІи фІэгъэнапІэ лъыхъуэу къысщыхъуат. Апхуэдэу дэ дызэпэщІэуват. Сэ а чэнджэщым сыщІэдэІуакъым, сыт щхьэкІэ жыпІэмэ чэнджэщ къызэзытари къызэрызита щІыкІэри сигу ирихьатэкъым. Ар си дежкІэ щыуагъэшхуэт.

Махуэ зыбжанэ дэкІа иужь филиалым и комитетым щыщ къуэш къызэпсэлъат. Сэ къызгурыІуэжащ апхуэдэу зысщІын зэрыхуэмеяр икІи абы сыхущІегъуэжащ. ИужькІэ чэнджэщ къызэзыта къуэшым зыхуэзгъазэри, абырэ сэрэ гуапэу дызэпсэлъащ икІи абы къысхуигъэгъуащ. А Іуэхум сэ дерсыфІ хэсхащ икІи къызгурыІуащ Іэдэбагъ пхэлъыным мыхьэнэшхуэ зэриІэр (Прит. 16:18, Гъэсэпэтхыдэхэр). Абы теухуауэ Иеговэ лъэІукІэ куэдрэ зыхуэзгъазэри, мурад сщІащ дяпэкІэ сыт хуэдэ чэнджэщ къызамытами седэІуэну.

Канадэм щыІэ Вефилым сэ илъэс 45 щІигъуауэ сыщолажьэ, абы щыщу илъэс 40 хуэдизкІэ, 1985 гъэм щыщІэдзауэ филиалым и комитетым сыхэтщ. 2021 гъэм февралым фІыщэу слъагъу си щхьэгъусэ Шейлэ дунейм ехыжащ. Сэ ар хуабжьу сигу къоуэ икІи абы сыхуозэш. Си узыншагъэм кІэричами, Иеговэ адэкІи къалэн куэд къызет, сыкъызэрысэбэпри зыхызощІэ. Сэ сынасыпыфІэщІ икІи си «гъащІэр псынщІэу зэрыкІуэм» сегупсысыну зэман сиІэкъым (Эккл. 5:20). Пэжщ, си гъащІэм къриубыдэу гугъуехь гуэрхэр сиІащ, ауэ гуфІэгъуэр нэхъыбэт. Сэ зыкІи сыхущІегъуэжкъым си гъащІэм япэ увыпІэр Иеговэ зэрестам икІи илъэс 70 хъуауэ абы полновременнэу сызэрыхуэлажьэм. Сэ Иеговэ лъэІукІэ зыхузогъазэ къуэш, шыпхъу ныбжьыщІэхэм я гъащІэм япэ увыпІэр Алыхьым иратын щхьэкІэ. Мис абы щыгъуэщ абыхэм я гъащІэр дахэу, гъэщІэгъуэну, мыхьэнэ иІэу щрахьэкІыфынур!