«Дэнэ алыхьыр здэщыІар?»
«МЫ УПЩІЭМ СЕУКІ: „ДЭНЭ АЛЫХЬЫР ЗДЭЩЫІАР?“» Освенцим (Польшэ) дэта концлагерым Папа Римский Бенедикт XVI къыщыкІуам жиІа псалъэхэр
НАСЫПЫНШАГЪЭ ГУЭР КЪЫЩЫХЪУМ ДЕЖ, „ДЭНЭ АЛЫХЬЫР ЗДЭЩЫІАР?“ ЖЫПІЭУ УЭРИ УЗЭУПЩІЫЖУ КЪЫЩІЭКІЫНЩ. Е КЪЫПЛЪЭІЭСА ГУЗЭВЭГЪУЭМ АЛЫХЬЫМ УКЪЫФІЭМЫІУЭХУ ХУЭДЭУ УРИГЪЭГУПСЫСАУЭ КЪЫЩІЭКІЫНЩ.
Америкэм щыпсэу цІыхубз Шейла Алыхьыр зи фІэщ хъу унагъуэм къыщыхъуат. Абы иІа гурыщІэхэм хуэдэ уэри уиІэнкІэ хъунущ. Шейла къыддогуашэ: «Алыхьым дыкъызэригъэщІар сщІэти, сызэрыцІыкІурэ абы пщІэ хуэсщІт. Ауэ сэ абы гъунэгъу сыхуэхъуфыну къэслъытэтэкъым. Алыхьыр плъапІэм зэритыр икІи абы силъагъу мыхъуу зэрыщымытыр сщІэт, ауэ и фІылъагъуныгъэр зыхэсщІэуи схужыІэнутэкъым». Сытыт Шейла апхуэдэ гурыщІэхэр щІиІэр? Абы пещэ: «Ди унагъуэм насыпыншагъэхэр зыр зым къыкІэлъыкІуэу къыщыхъут икІи Алыхьыр къыддэІэпыкъуу зыхэтщІэтэкъым».
Шейла хуэдэу, уэри уи фІэщ хъууэ къыщІэкІынщ псори зыхузэфІэкІ Алыхьыр зэрыщыІэр. Ауэ къыпщыхъункІэ хъунущ уэ абы фІыуэ укъимылъагъуу. Алыхьым и къарумрэ и Іущагъымрэ зи фІэщ хъу Іэиуби апхуэдэ гурыщхъуэхэр иІэт (Иов 2:3; 9:4). Зым адрейр къыкІэлъыкІуэу гузэвэгъуэхэр къыщеуэлІам, Алыхьыр къызэрыдэІэпыкъунум Іэиуб гугъэ хихыжат. Абы щыгъуэ ар Алыхьым еупщІащ: «Уи напэр щхьэ щІэпхъумэрэ икІи уи бийуэ щхьэ сыплъытэрэ?» (Иов 13:24).
Абы теухуауэ Алыхьым и Псалъэм сыт щыжыІар? Ди насыпыншагъэхэмкІэ Алыхьыр къуаншэу пІэрэ? Алыхьым цІыхухэр фІыуэ дыкъилъагъуу пІэрэ? Дауэ пІэрэ Алыхьыр уэ къызэрыпхущытыр? УкъыгурыІуэу пІэрэ абы? Гузэвэгъуэ ущыІущІэм деж, абы и гур къыпщІэузу пІэрэ икІи къыбдэІэпыкъуну хьэзыру пІэрэ ар?
КъыкІэлъыкІуэ статьяхэм къыщытщІэнущ Алыхьым фІыуэ дыкъызэрилъагъум и ІэдакъэщІэкІхэр щыхьэт зэрытехъуэр (Рим 1:20). Иджыри дэ къэтщІэнущ Алыхьым и лъагъуныгъэм теухуауэ Библием щыжыІар. Алыхьым и ІэдакъэщІэкІхэм нэхъыбэу уегупсысыху икІи и Псалъэм нэхъ куууэ уеджэху, «абы и нэІэ» къызэрыптригъэтыр уи дежкІэ нэхъ нэрылъагъу хъунущ (1 Петр 5:7).