Иеговэ и унагъуэм фызэрыщыщыр лъапІэу флъытэ!

1. Иеговэ къигъэщІа Дунеишхуэм и инагъым дыщегупсысым деж сыт хуэдэ гурыщІэхэр абы къыдитрэ?

ИЕГОВЭ къигъэщІа Дунеишхуэм и инагъым дыщегупсысым деж Даут зыхищІа гурыщІэхэм хуэдэ дэри зыхэтщІэфынущ. Абы Алыхьым тхьэлъэІукІэ зыхуигъазэу мыпхуэдэу еупщІат: «Уэ уи ІэдакъэщІэкІыу щыт уафэм, уэ къэбгъэщІа мазэмрэ вагъуэхэмрэ сыщеплъым деж, сэ согупсыс: лІэныгъэ къызыпэщылъ цІыхур сыт зищІысыр уэ ар пщымыгъупщэну икІи цІыхум къилъхуам уи нэІэ тебгъэтыну?» (Пс. 8:3, 4). Пэж дыдэу, вагъуэхэмрэ галактикэхэмрэ я инагъым елъытауэ, дэ сабэм дыхуэдэщ икІи гъэщІэгъуэнщ Иеговэ гу къызэрытлъитэр! Ауэ мы статьям къыщытлъэгъунущ Иеговэ япэ цІыхуитІыр къызэригъэщІам нэмыщІ абыхэм и нэІэ зэрытригъэтар икІи и унагъуэм щыщ зэрищІар.

2. Иеговэ Іэдэмрэ Хьэуарэ сыт хуэдэ къалэн яритар?

² Япэу Иеговэ щІылъэ бын хуэхъуар Іэдэмрэ Хьэуарэщ. Езы Иегови абыхэм лъагъуныгъэ зыхэлъ Адэ яхуэхъуащ. Абы япэ цІыхуитІым мыпхуэдэ къалэн яритащ: «Фылъхуэ-фыпІэ, фыбагъуэ, щІылъэм тез фыхъуи, ар къэвгъэІурыщІэ» (ЩІэдз. 1:28). НэгъуэщІу жыпІэмэ, абыхэм бын къалъхун икІи ЩІылъэм я унэм хуэдэу кІэлъыплъын хуейт. Іэдэмрэ Хьэуарэ Иеговэ хуэжыІэдаІуэу щытамэ, абыхэмрэ я щІэблэмрэ Алыхьым и унагъуэм щыщу игъащІэкІэ щытыфынут.

3. Иеговэ япэ цІыхуитІым пщІэ зыпылъ увыпІэ и унагъуэм щаритауэ сыт жыпІэ щІэхъунур?

³ Иеговэ япэ цІыхуитІым пщІэ зыпылъ увыпІэ и унагъуэм щаритащ. Библием Алыхьым цІыхур къызэригъэщІам теухуауэ щыжыІащ: «Ар мелыІычхэм нэхърэ тІэкІу нэхъ лъахъшэу бгъэуващ, щІыхьрэ пщІэрэ хуэбгъэфэщащ абы» (Пс. 8:5). ДауикІ, мелыІычхэм я акъылым, къарум, зэфІэкІым хуэдэ дэ диІэкъым (Пс. 103:20). Ауэ, апхуэдэу щыт пэтми, цІыхухэр «мелыІычхэм нэхърэ тІэкІу нэхъ лъахъшэу» аращ. Фи нэгу къыщІэвгъэхьэт Іэдэмрэ Хьэуарэ сыт хуэдэ гъащІэ къапэщылъу щытами!

4. Іэдэмрэ Хьэуарэ я жыІэмыдаІуэныгъэм сыт къыпэкІуар икІи мы статьям щызэпкърытхынур сыт?

⁴ Ди жагъуэ зэрыхъунщи, Іэдэмрэ Хьэуарэ Иеговэ и унагъуэм щыщу щытыну яІа хуитыныгъэр зыфІагъэкІуэдащ. Абы нэмыщІ а Іуэхугъуэм я щІэблэми гугъуехьрэ гуауэрэ къахуихьащ. Ауэ Иеговэ и мурадым зихъуэжакъым: ар хуейщ абы хуэжыІэдаІуэ цІыхухэр и быну игъащІэкІэ щытыну. Мы статьям дэ щызэпкърытхынущ Иеговэ цІыхухэм сыт хуэдэ пщІэ яхуигъэфэщами. Абы нэмыщІ дегупсысынущ Алыхьым и унагъуэм дыхыхьэну дызэрыхуейр дауэ къэдгъэлъэгъуэфынуми. ИкІи дэ къэтщІэнущ Алыхьым и бынхэм сыт хуэдэ гъащІэ дахэ къапэщылъми.

ИЕГОВЭ ЦІЫХУХЭМ СЫТ ХУЭДЭ ПЩІЭ ЯХУИГЪЭФЭЩА?

5. Иеговэ езым и хьэл-щэнхэм хуэдэ тхэлъу дыкъызэригъэщІам щхьэкІэ фІыщІэ зэрыхуэтщІыр дапхуэдэу къызэрыдгъэлъэгъуэфынур?

⁵ Иеговэ езым и хьэл-щэнхэм хуэдэ тхэлъу дыкъигъэщІащ (ЩІэдз. 1:26, 27). Абы и фІыгъэкІэ Алыхьым иІэ хьэл-щэнхэм ящыщ куэдыр дэри зыхэтлъхьэфынущ, псалъэм папщІэ, лъагъуныгъэр, гущІэгъур, пэжагъыр икІи захуагъэр (Пс. 86:15; 145:17). Иеговэ щапхъэ тетхыну дыщыхущІэкъум деж абы и цІэр догъэлъапІэ икІи ди гум илъ фІыщІэр догъэлъагъуэ (1 Пет. 1:14—16). Уафэм щыІэ ди Адэ лъапІэм игу зэрырихьым хуэдэу дунейм дыщытетым деж дэ езыр насыпыфІэ дохъу. Абы нэмыщІ езы Иеговэ хэлъ хьэл-щэнхэр тхэлъу дыкъызэригъэщІам къегъэлъагъуэ ар зыхуейм хуэдэ цІыху дызэрыхъуфынур.

6. Иеговэ ЩІылъэр къыщигъэщІым щыгъуэ цІыхухэм дапхуэдэу пщІэ зэрахуищІар?

⁶ Иеговэ унэ дахащэ тыгъэу къыдитащ. ЦІыхухэр къигъэщІын ипэ зэман куэд иІэу Алыхьым ЩІылъэр игъэхьэзыращ (Иов 38:4—6; Иер. 10:12). Абы и хьэлэлагъым къыхэкІыу гъащІэм гуфІэгъуэшхуэ къытхуихьу дунейр зэхилъхьащ (Пс. 104:14, 15, 24). Иеговэ ЩІылъэр къыщигъэщІым щыгъуэ зэман-зэманкІэрэ ищІам еплъыжти, абы арэзы техъуэт (ЩІэдз. 1:10, 12, 31). Абы нэмыщІ Алыхьым цІыхум хуигъэфэщащ псэущхьэхэмрэ къэкІыгъэхэмрэ я тепщэу щытыну (Пс. 8:6). Алыхьыр хуейщ дагъуэ зимыІэ цІыхухэм гъащІэ мыухыж яІэну икІи гуфІэгъуэ яІэу абы и ІэдакъэщІэкІхэм кІэлъыплъыну. Апхуэдэ гъащІэ дахэ диІэну дыкъызэригъэгугъэм щхьэкІэ Иеговэ сыт щыгъуи фІыщІэ хуэтщІу пІэрэ?

7. ЦІыхум зыхуейр къыхихыну хуитыныгъэ зэриІэм Иисус Навин 24:15 итыр дауэ щыхьэт техъуэрэ?

⁷ Иеговэ дызыхуейр къыхэтхыну хуитыныгъэ къыдитащ. Абы къокІ ди гъащІэм сыт хуэдэ гъуэгу къыхэтхынуми дэ езым унафэ зэрытщІыр. (Къеджэ Иисус Навин 24:15.) ФІыуэ дыкъэзылъагъу Алыхьыр мэгуфІэ дэ езыр дыхуейуэ абы и лэжьакІуэ дыщыхъум деж (Пс. 84:11; Прит. 27:11). А хуитыныгъэр дэ къэдгъэсэбэп хъунущ нэгъуэщІ унафэхэр къыщытщтэм дежи. Абы теухуауэ Хьисэ Мэссихь къигъэна щапхъэм деплъынщ.

8. Хуитыныгъэ диІэр къызэрыдгъэсэбэпыным теухуауэ Хьисэ сыт хуэдэ щапхъэ къытхуигъэна?

⁸ Дэ, Хьисэ щапхъэ тетхыу, нэгъуэщІ цІыхухэм я Іуэхур ди щхьэ Іуэхум ипэ идгъэщыфынущ. Зэгуэр Хьисэрэ и апостолхэмрэ загъэпсэхун щхьэкІэ зыри здэщымыІэ щІыпІэм кІуэт. Ауэ абыхэм ар къехъулІакъым. ЦІыхухэр Хьисэ едэІуэну хуейти, ар къагъуэтащ. Хьисэ абы щхьэкІэ къэгубжьауэ пІэрэ? Хьэуэ, къэгубжьакъым. Уеблэмэ, а цІыхухэм игу ящІэгъури «Іуэхугъуэ куэд яригъащІэу щІидзащ» (Мк. 6:30—34). Хьисэ хуэдэу, нэгъуэщІхэм щхьэкІэ ди зэманымрэ ди къарумрэ щыдгъэкІуэдым деж уафэм щыІэ ди Адэм щІыхь къыхудохь (Мт. 5:14—16). АбыкІэ иджыри Иеговэ идогъэлъагъу и унагъуэм щыщ дыхъуну дызэрыхуейр.

9. Адэ-анэхэм сыт зыщагъэгъупщэн хуэмейр?

⁹ ЦІыхухэм сабий зрагъэгъуэтыну яІэ Іэмалыр — Иеговэ и тыгъэщ. Абы иджыри адэ-анэхэм къалэн яритащ я сабийхэм ар фІыуэ ялъагъуу икІи Алыхьым хуэлэжьэну гукъыдэж яІэу ягъэсэну. Адэ-анэхэ, а уасэ зимыІэ тыгъэр лъапІэу флъытэу пІэрэ фэ? Иеговэ мелыІычхэм зэфІэкІ куэд яритами, абыхэм сабий яІэфынукъым. Фегупсысыт: Алыхьым цІыхухэм щІыхьышхуэ яхуищІащ нэгъуэщІ цІыхум гъащІэ иратыну зэфІэкІ зэраритамкІэ. Сыту дзыхьышхуэ къытхуищІа дэ Алыхьым! Сабийхэр «Зиусхьэным зэрыфІэигъуэм тету» япІыну икІи ягъэсэну адэ-анэхэм я къалэн лъапІэщ (Еф. 6:4; Втор. 6:5—7; Пс. 127:3). Абыхэм дэІэпыкъун щхьэкІэ Алыхьым и организацэм публикацие, видео, уэрэд, интернет-статья куэд къыдегъэкІ икІи а псом наІуэ ещІ Иеговэрэ Хьисэрэ ди сабийхэр фІыуэ зэралъагъур (Лк. 18:15—17). Адэ-анэхэр Иеговэ щыщыгугъым икІи лъагъуныгъэ хэлъу я сабийхэм я нэІэ щытрагъэтым деж ар мэгуфІэ. Апхуэдэ адэ-анэхэм я сабийхэм Іэмал ират игъащІэкІэ Иеговэ и унагъуэм хэтыну.

10, 11. Иеговэ ита щхьэщэхуж къурмэныпхъэм и фІыгъэкІэ сыт хуэдэ Іэмал диІэ хъуа?

¹⁰ Иеговэ и Къуэ лъапІэм и гъащІэр дэр щхьэкІэ зэритамкІэ Іэмал къыдитащ и унагъуэм щыщ дыхъужыну. 4-нэ абзацым зэритымкІэ, Іэдэмрэ Хьэуарэ Иеговэ и унагъуэм хэтыну яІа Іэмалыр зэрызыфІагъэкІуэдам нэмыщІ я щІэблэми фІагъэкІуэдащ (Рим 5:12). Абыхэм ящІэр къагурыІуэжу Иеговэ и жыІэм ебэкІуащ. Абы къыхэкІкІэ Иеговэ ахэр и унагъуэм къызэрыхихуар яхуэфащэт. Іэдэмрэ Хьэуарэ я щІэблэр-щэ? Иеговэ хуэжыІэдаІуэу щыт цІыхухэм и унагъуэм къагъэзэжыну хуитыныгъэ яІэн щхьэкІэ «езым и Къуэ закъуэ» Хьисэ Мэссихь и гъащІэр къурмэныпхъэу итащ (Ин. 3:16; Рим 5:19). А къурмэныпхъэм и фІыгъэкІэ Иеговэ хуэпэж 144 000 хъу цІыхухъухэмрэ цІыхубзхэмрэ и бын ищІыжащ (Рим 8:15—17; Апок. 14:1).

¹¹ Абыхэм нэмыщІ Алыхьым хуэжыІэдаІуэу щыт мелуан бжыгъэ хъу цІыхухэми Іэмал яІэщ абы и унагъуэм щыщ хъужыну. Ар къыщыхъунур иужьрей гъэунэхуапІэм ахэр пхырыкІа иужьщ, Хьисэ илъэс минкІэ тепщэу щыщытыну зэманым и кІэм (Пс. 25:14; Рим 8:20, 21). Апхуэдэ гугъэ зэраІэм къыхэкІкІэ ахэр иджыпсту щыщІэдзауэ «ди Адэ» жаІэу Иеговэ зыхуагъазэ (Мт. 6:9). ЛІахэм къахэтэджыкІыжа цІыхухэми Іэмал яІэнущ Иеговэ къацІыхуну икІи абы и хабзэхэр къащІэну. Абыхэм ящыщу Алыхьым хуэжыІэдаІуэу щытыну цІыхухэри икІэм-икІэжым абы и унагъуэм хыхьэнущ.

12. АдэкІэ сыт хуэдэ упщІэ зэпкърытхынур?

¹² Зэрытлъагъущи, Иеговэ цІыхухэм щІыхьышхуэ яхуищІащ. Абы уафэм щыпсэуну гугъэ зиІэхэр и бын ищІыжащ, «цІыху куэдыкІейм» щыщхэми Іэмал яритащ дунеищІэр къэса иужь и бын хъужыну (Апок. 7:9). Дауэ-тІэ Иеговэ зэредгъэлъэгъунур и унагъуэм щыщ дыхъуну дызэрыхуейр?

ИЕГОВЭ ЕВГЪЭЛЪАГЪУ АБЫ И УНАГЪУЭМ ЩЫЩУ ФЫЩЫТЫНУ ФЫЗЭРЫХУЕЙР

13. Алыхьым и унагъуэм щыщ дыхъун щхьэкІэ сыт дэ тщІэн хуейр? (Марк 12:30).

¹³ Иеговэ фІыуэ флъагъу икІи фи гум къыбгъэдэкІыу абы фыхуэлажьэ. (Къеджэ Марк 12:30.) Иеговэ къыдита тыгъэ лъапІэхэм ящыщщ — абы дыхуэлэжьэну Іэмал дызэриІэр. Дэ Иеговэ и хабзэхэм дызэрытетымкІэ ар фІыуэ зэрытлъагъур идогъэлъагъу (1 Ин. 5:3). Хьисэ и Адэм и цІэкІэ къалэн къыдитащ и гъэсэнхэр дгъэхьэзырыну икІи псым щІэдгъэуэну (Мт. 28:19). Абы иджыри жиІащ ди зэхуаку лъагъуныгъэ дэлъын зэрыхуейр (Ин. 13:35). А хабзэхэм тет цІыхухэр Иеговэ и унагъуэм хигъэхьэнущ (Пс. 15:1, 2).

14. Ди лъагъуныгъэр нэгъуэщІхэм дауэ зэредгъэлъэгъуфынур? (Маттэ 9:36—38; Рим 12:10).

¹⁴ НэгъуэщІхэр фІыуэ флъагъу. Лъагъуныгъэр — Иеговэ и хьэл-щэн нэхъыщхьэ дыдэщ (1 Ин. 4:8). Дэ ар къэдмыцІыху щІыкІэ езым фІыуэ дыкъилъэгъуащ (1 Ин. 4:9, 10). ЦІыхухэр фІыуэ тлъагъумэ, дэ Иеговэ щапхъэ тыдох (Еф. 5:1). Ди лъагъуныгъэр къызэрыдгъэлъэгъуэфыну Іэмалхэм ящыщ зыр — ар иджыри зэман щыІэ щІыкІэ абыхэм Иеговэ къацІыхуну дадэІэпыкъуныращ. (Къеджэ Маттэ 9:36—38.) Апхуэдэу дэ цІыхухэм Іэмал ядот къэкІуэну зэманым Алыхьым и унагъуэм щыщ хъуну. ЦІыхум псым зыщІигъэуа иужьи дэ ар фІыуэ тлъагъун икІи пщІэ хуэтщІын хуейщ (1 Ин. 4:20, 21). Псалъэм папщІэ, цІыхум зыгуэр щІищІам и щхьэусыгъуэр дымыщІэми, абы и ІуэхущІафэхэм мурад Іей гуэр лъабжьэ хуэхъуауэ дэ дегупсысынукъым. Абы ипІэкІэ а цІыхум пщІэ хуэтщІынущ икІи дэ нэхърэ «нэхъ ину» тлъытэнущ (Флп. 2:3; къеджэ Рим 12:10).

15. ГущІэгъурэ щабагърэ хэлъу хэт дызыхущытын хуейр?

¹⁵ ГущІэгъурэ щабагърэ хэлъу псоми фахущыт. Иеговэ и унагъуэм дыхэтыну дыхуейуэ щытмэ, Библием ит принципхэм дытету дыпсэун хуейщ. Псалъэм папщІэ, Хьисэ цІыхухэр игъасэт гущІэгъурэ щабагърэ хэлъу цІыху псоми, уеблэмэ, я бийхэми яхущытын зэрыхуейм теухуауэ (Лк. 6:32—36). Ауэ нэгъуэщІхэм апхуэдэу дахущытыну щымытынши къохъу. Абы къыхэкІкІэ дэ Хьисэ и гупсысэкІэмрэ и щытыкІэмрэ щапхъэ тетхын хуейщ. Дэ сыт и лъэныкъуэкІи Иеговэ и жыІэм дыщІэтыну дыхущІэкъумэ икІи Хьисэ щапхъэ тетхмэ, абыкІэ къэдгъэлъэгъуэнущ Алыхьым и унагъуэм игъащІэкІэ дыхэтыну дызэрыхуейр.

16. Иеговэ и унагъуэм и цІэр къабзэу къэнэн щхьэкІэ сыт дэ тщІэн хуейр?

¹⁶ Иеговэ и унагъуэм и цІэр къабзэу къэнэн щхьэкІэ къару ефхьэлІэ. И нэхъыбэм унагъуэм щыщ сабий нэхъыщІэхэм быным я нэхъыжьхэм щапхъэ трах. Псалъэм папщІэ, къуэ нэхъыжьыр Библием ит принципхэм тету псэууэ щытмэ, ар нэхъыщІэм щапхъэфІ хуэхъунущ. Ауэ къуэ нэхъыжьым гъащІэ мыхъумыщІэ ирихьэкІыу щІидзэмэ, и къуэш нэхъыщІэр абы дэплъеину шынагъэ щыІэщ. Иеговэ и унагъуэми апхуэдэу къыщыхъуфынущ. Япэм Алыхьым хуэпэжу щыта цІыхур абы щепцІыж е гъащІэ мыхъумыщІэ ирихьэкІыу щыщІидзэ къохъу. Ар нэгъуэщІхэм щалъагъукІэ абы щапхъэ трахыу щІадзэнкІэ хъунущ икІи абыкІэ Иеговэ и унагъуэм и цІэр ягъэулъиифынущ (1 Фес. 4:3—8). Дэ апхуэдэу дыщыт хъунукъым. Абы нэмыщІ уафэм щыІэ фІыуэ дыкъэзылъагъу ди Адэм пэІэщІэ дыхуэзыщІыну хъуа псоми зыпыІуддзын хуейщ.

17. Сыт хуэдэ гупсысэкІэм пэІэщІэ зыхуэтщІын хуей икІи сыт щхьэкІэ?

¹⁷ Ахъшэмрэ мылъкумрэ фыщымыгугъыу Иеговэ фыщыгугъ. Алыхьым и Пащтыхьыгъуэмрэ абы игъэува хабзэхэмрэ ди гъащІэм япэ увыпІэр щедгъэубыду щытмэ, дызыхуэныкъуэ ерыскъыри, щыгъынри, дызыщІэсыну унэри къызэрыдитынумкІэ Иеговэ дыкъегъэгугъэ (Пс. 55:22; Мт. 6:33). Абы къыхэкІкІэ дэ мы дунейм зыщызыубгъуа гупсысэкІэр зыхэтлъхьэнукъым: ахъшэмрэ мылъкумрэ дыкъахъумэн икІи насыпыфІэ дащІыфын хуэдэу. Гупсэхугъуэ нэгъэса къытхуэзыхьыр дэ Иеговэ и Іэмырыр зэрыдгъэзащІэращ (Флп. 4:6, 7). Дызыхуейуэ хъуар къэтщэхуну Іэмал диІэу щытми, дэ мыпхуэдэу дызэупщІыжын хуейщ: «Хьэпшып къэсщэхуар къэзгъэсэбэпыну икІи абы сыкІэлъыплъыну къарурэ зэманрэ сиІэну пІэрэ? Си мылъкум си гур кІэрымыпщІэну пІэрэ?» Иеговэ и унагъуэм дызэрыщыщым къыхэкІкІэ къыдита къалэныр зыщыдмыгъэгъупщэным икІи ар дгъэзэщІэным мыхьэнэшхуэ иІэщ. Аращи, дэ нэгъуэщІ ІуэхукІэ дытеплъэкъукІ хъунукъым. Иеговэ хуэлэжьэну икІи и къуэ хъуну Іэмал зиІа, ауэ ар мылъку щхьэкІэ зыІэщІэзыгъэкІа щІалэщІэм ещхь дыхъуну дыхуейкъым (Мк. 10:17—22).

ИЕГОВЭ И БЫНХЭМ ГУФІЭГЪУЭ МЫУХЫЖ КЪАПЭЩЫЛЪЩ

18. Иеговэ и жыІэм щІэт цІыхухэм сыт хуэдэ щІыхь икІи сыт хуэдэ тыгъэ яхуигъэфэщэнур?

¹⁸ Алыхьым и жыІэм щІэт цІыхухэм псом хуэмыдэ щІыхьышхуэ къалъысынущ — игъащІэкІэ абы хуэлэжьэну икІи и ныбжьэгъуу щытыну! ЩІылъэм щыпсэуну гугъэ зиІэхэм Іэмал яІэнущ Алыхьым унэу къыдита ЩІылъэ дахащэр зрахьэну. Куэд мыщІэу Алыхьым и Пащтыхьыгъуэм и фІыгъэкІэ ЩІылъэр къэщІэрэщІэжынущ, абы щыІэну гъащІэми фІыкІэ зихъуэжынущ. Іэдэмрэ Хьэуарэ Алыхьым и унагъуэм къызэрыхэкІам къыпэкІуа Іей псор Хьисэ игъэкІуэдынущ. Иеговэ мелуан бжыгъэ хъу цІыхухэр лІахэм къахигъэтэджыкІыжынущ икІи узыншагъэ быдэрэ гъащІэ мыухыжрэ яІэу жэнэт хъужа ЩІылъэм щыпсэуну Іэмал яритынущ (Лк. 23:42, 43). ЩІылъэм щыІэ Иеговэ и бынхэр дагъуэншэ хъужа иужь Даут зи гугъу ищІа «щІыхьрэ пщІэрэ» нэгъэсауэ ягъэлъэгъуэфынущ (Пс. 8:5).

19. Сыт дэ зэи зыщыдгъэгъупщэн хуэмейр?

¹⁹ Уэ «цІыху куэдыкІейм» уащыщу щытмэ, гугъэ дахэ уиІэщ. Иеговэ уэ фІыуэ укъелъагъу икІи абы и унагъуэм щыщ ухъуну Іэмал къыует. Абы къыхэкІкІэ уи дуней тетыкІэмкІэ махуэ къэс ар гъэгуфІэ икІи абы укъызэригъэгугъа Іуэхугъуэхэр уи гум игъэлъ. Уафэм щыІэ ди Адэ лъапІэм ухуэлэжьэну икІи игъащІэкІэ и цІэр бгъэлъэпІэну уиІэ Іэмалыр лъапІэу лъытэ!