СТАТЬЯР 31
Иеговэ уежьэну ухьэзыр?
«Сэ... шыІэныгъэ схэлъу сежьэнущ» (МИХ. 7:7).
128-НЭ УЭРЭДЫР ИкІэм нэс Иеговэ хуэпэжу къанэ
МЫ СТАТЬЯР ЗЫТЕПСЭЛЪЫХЬЫРa
1, 2. Мы статьям сыт щызэпкърытхынур?
УИ НЭГУ къыщІэгъэхьэт махуэ гуэрым ирихьэлІэу посылкэ къэкІуэн хуейуэ упэплъэу, ауэ ар къэскъыми къэскъым. ДауикІ, а Іуэхум уэ уегъэпІейтей. Притчи 13:12 щыжыІащ: «ГугъапІэ жыжьэм гур ехуз» (Гъэсэпэтхыдэхэр). Ауэ уи посылкэр иджыри къэс къыщІэмысам мыхьэнэшхуэ зиІэ щхьэусыгъуэхэр зэриІэр уэ къыбощІэ. Иджы абы упэплъэну нэхъ тыншкъэ?
2 Мы статьям дэ щызэпкърытхынущ шыІэныгъэ тхэлъу Алыхьым дежьэну къыддэІэпыкъун Библием ит принцип зыбжанэ (Мих. 7:7). Абы иужь деплъынщ сыт хуэдэ ІуэхугъуитІым теухуауэ Иеговэ къыхэІэбэху шыІэныгъэ тхэлъу дежьэн хуейми. Иджыри дэ къэтщІэнущ шыІэныгъэ хэлъу Иеговэ пэплъэну хьэзырхэм сыт хуэдэ тыгъэ къапэщылъми.
ШЫІЭНЫГЪЭМ ДЫХУЭЗЫГЪАСЭ БИБЛИЕМ ИТ ПРИНЦИПХЭР
3. Притчи 13:11 ит псалъэхэм сытым дыхуагъасэрэ?
3 ШыІэныгъэ бгъэлъэгъуэным мыхьэнэшхуэ зэриІэм теухуауэ Притчи 13:11 щыжыІащ: «Мылъку къуейщІейр уэсэпсу мэкІуэдыж, мащІэ-мащІэурэ зэхуэзыхьэсым хуэбэгъуэнщ» (Гъэс.). Мы псалъэхэм сыт къикІыр? ЦІыху Іущым и Іуэхур емыпІэщІэкІыу егъэзащІэ икІи хуэм-хуэмурэ и лэжьыгъэр егъэкІуатэ.
4. Притчи 4:18 ит псалъэхэм сытым дыхуагъасэрэ?
4 Притчи 4:18 щыжыІащ: «ЗахуащІэхэм я гъуэгу пщэдджыжь пшэкІэплъ къэщІыгъуэм ещхьщ, дыгъэпсым зиІэтыху нэхъ ину къызэщІэблэу» (Гъэс.). И нэхъыбэм дэ мы псалъэхэр идопх Иеговэ и мурадхэр хуэм-хуэмурэ къызэрытхузэІуихым. Ауэ, нэхъ убгъуауэ уеплъмэ, мы едзыгъуэм итыр къуэш, шыпхъухэр Алыхьым нэхъ гъунэгъу зэрыхуэхъум хуэпхь хъунущ. А Іуэхур нэхъ псынщІэ пхуэщІынукъым — абы зэман хуейщ. Иеговэ Библиемрэ и организацэмрэ къигъэсэбэпу къыдит чэнджэщхэм мыхьэнэшхуэ еттмэ икІи ди гъащІэм ахэр къыщыдгъэсэбэпмэ, дэ хуэм-хуэмурэ Хьисэ ещхь дохъу. Абы нэмыщІ Алыхьыр нэхъыфІу къыдоцІыху. А гупсысэр къыдгурыІуэн щхьэкІэ Хьисэ къихьа щапхъэм деплъынщ.
КъэкІыгъэр хуэм-хуэмурэ зэрыхэхъуэм хуэдэу, цІыхуми и фІэщхъуныгъэр тІэкІу-тэкІуурэ хохъуэ (5-нэ абзацым феплъ.)
5. ЦІыхум и фІэщхъуныгъэр зэрыхэхъуэр Хьисэ сытым иригъэщхьа?
5 Алыхьым и Пащтыхьыгъуэм теухуа хъыбарыр, жылэ цІыкІум хуэдэу, зигу къабзэ цІыхум и гум хуэм-хуэмурэ зэрыщыхэхъуэр Хьисэ жиІащ. Абы мыпхуэдэ щапхъэ къихьащ: «Жылэр къокІ, хохъуэ, ауэ ар зэрыхъур а лІым ищІэркъым. ЩІым япэщІыкІэ пкъыр езыр-езыру къыхокІ, итІанэ щхьэмыж къещІ, абы иужькІэ щхьэмыжым хьэдзэ ирещІэ» (Мк. 4:27, 28). Сыт Хьисэ абыкІэ жиІэну зыхуеяр? КъэкІыгъэр хуэм-хуэмурэ зэрыхэхъуэм хуэдэу, цІыхуми и фІэщхъуныгъэр тІэкІу-тІэкІуурэ хохъуэ. Псалъэм папщІэ, Библием едгъаджэхэр Иеговэ нэхъ гъунэгъу щыхуэхъум деж абыхэм фІыкІэ зэрызахъуэжыр нэхъ наІуэ мэхъу (Еф. 4:22—24). Ауэ зыщыдгъэгъупщэн хуейкъым жылэ цІыкІур къэзыгъэкІыр Иеговэу зэрыщытыр (1 Кор. 3:7).
6, 7. Иеговэ ЩІылъэр зэриухуам сытым дыхуигъасэрэ?
6 Иеговэ сыт хуэдэ Іуэхугъуэми шыІэныгъэ хэлъу бгъэдохьэ икІи абы ирикъун зэман хухех. Ар апхуэдэу щІищІэр и цІэр гъэлъэпІа хъун икІи нэгъуэщІхэми сэбэп яхуэхъун щхьэкІэщ. Псалъэм папщІэ, цІыхухэр ЩІылъэм щыпсэуфын щхьэкІэ Иеговэ ар хуэм-хуэмурэ зэригъэхьэзырам гу лъыттэнщ.
7 Библием зэрыжиІэмкІэ, Иеговэ ЩІылъэр щиухуэм щыгъуэ абы «и инагъыр триухуащ», «зэтезыІыгъ мывэ къуапэр» игъэтІылъащ икІи «лъабжьэ быдэхэм» ар тригъэуващ (Иов 38:5, 6; Пс. 104:5). Лэжьыгъэр кІуэтэхукІэ ар зэрыхъуам еплъын щхьэкІэ Иеговэ зэман къыдигъэкІт (ЩІэдз. 1:10, 12). Дунеишхуэмрэ ЩІылъэмрэ я теплъэм зэрызихъуэжыр мелыІычхэм щалъагъум щыгъуэ абыхэм гуфІэгъуэу яІар фи нэгу къыщІэвгъэхьэт. Иеговэ и ІэдакъэщІэкІхэм ахэр апхуэдизкІэ щыгуфІыкІати, макъышхуэкІэ щІыхь хуащІу щІадзащ (Иов 38:7). Сыт абы къыдгуригъаІуэр? Пэжщ, Иеговэ Дунеишхуэр щиухуэм щыгъуэ илъэс мин бжыгъэ тригъэкІуэдащ. Абы емылъытауэ, Иеговэ и ІэдакъэщІэкІхэм хэплъэжын щхьэкІэ зэман къыдигъэкІри, ар «икъукІэ фІы» зэрыхъуар жиІащ (ЩІэдз. 1:31).
8. Иджыпсту зи гугъу тщІынур сыт?
8 Зэрытлъагъущи, шыІэныгъэм мыхьэнэшхуэ зэриІэр къэзыгъэлъагъуэ принцип куэд Библием итщ. Иеговэ къыхэІэбэху дыпэплъэн щыхуей ІуэхугъуитІ адэкІэ зэпкърытхынущ.
ИЕГОВЭ КЪЫХЭІЭБЭХУ ДЫПЭПЛЪЭН ЩЫХУЕЙР ДАПЩЭЩ?
9. Дапщэщ Иеговэ дыпэплъэн щыхуейр?
9 Иныкъуэхэм деж ди тхьэлъэІухэм я жэуапхэм дежьэн хуей мэхъу. ГъэунэхуапІэ гуэрым дыпэщІэтын е хьэл-щэн Іей гуэр зыхэднэн щхьэкІэ къару къыдитыну Иеговэ дыщелъэІу, ауэ жэуапыр занщІэу къыщытІэрымыхьэ къохъу. Иеговэ ди тхьэлъэІухэм псоми занщІэу жэуап къыщІримытыр сыт?
10. ШыІэныгъэ тхэлъу ди тхьэлъэІухэм я жэуапхэм дыпэплъэн щІыхуейр сыт?
10 Иеговэ тхьэлъэІукІэ зыщыхуэдгъазэм деж дэ жытІэм ар йодаІуэ (Пс. 65:2). Ди гум къыбгъэдэкІ тхьэлъэІухэм Алыхьыр ди фІэщ зэрыхъур къагъэлъагъуэ (Евр. 11:6). Иджыри ди тхьэлъэІухэм тету дызэрыпсэур икІи Иеговэ и Іэмырыр зэрыдгъэзащІэр зэрилъагъум абы и дежкІэ мыхьэнэшхуэ иІэщ (1 Ин. 3:22). Псалъэм папщІэ, хьэл мыхъумыщІэ гуэрым дыпэлъэщын щхьэкІэ Иеговэ къыддэІэпыкъуну долъэІу. Абы щыгъуэ шыІэныгъэ дгъэлъэгъуэн икІи а хьэлым дыпэлъэщын щхьэкІэ дэ езым къару етхьэлІэн хуейщ. Иеговэ занщІэу тхьэлъэІу псоми жэуап зэрыримытым Хьисэ и псалъэхэр щыхьэт тохъуэ: «ФелъэІуи, Тхьэм къывитынущ; фылъыхъуи, къэвгъуэтынущ; куэбжэм фытеуІуи, Тхьэм къыфхуІуихынущ» (Мт. 7:7, 8). А чэнджэщым дытетмэ икІи зэпымыууэ Алыхьым зыхуэдгъазэмэ, шэч къытедмыхьэми хъунущ уафэм щыІэ ди Адэр къызэрыдэдаІуэм икІи Іэмал имыІэу жэуап къызэрыдитынум (Кол. 4:2).
ТхьэлъэІумрэ абы жэуап зэриІэнум шэч къызэрытедмыхьэмрэ дэ къыддоІэпыкъу шыІэныгъэ тхэлъу Иеговэ дежьэну (11-нэ абзацым феплъ.)b
11. Ди тхьэлъэІухэм я жэуапхэр занщІэу къытІэрымыхьэу къыщытщыхъум деж Еврейхэм 4:16 ит псалъэхэр дапхуэдэу къызэрыддэІэпыкъунур?
11 Иеговэ ди тхьэлъэІухэм занщІэу жэуап иримыту къытщыхъункІэ хъунущ. Ауэ Алыхьым щыфІэигъуэм деж абыхэм жэуап ирет. (Къеджэ Еврейхэм 4:16.) Абы къыхэкІкІэ Иеговэ зэи дгъэкъуаншэ хъунукъым дэ дызэрыхуейм хуэдэу псынщІэу жэуап къызэрытІэрымыхьам щхьэкІэ. Псалъэм папщІэ, мы дунейм къыщекІуэкІ Іейм Алыхьым и Пащтыхьыгъуэм кІэ иритыну илъэс Іэджэ щІауэ куэдым Иеговэ лъэІукІэ зыхуагъазэ. Хьиси жиІащ абы щхьэкІэ Алыхьым лъэІукІэ зэрызыхуэдгъэзэн хуейр (Мт. 6:10). Ауэ дунеищІэр цІыхухэр щыпэплъа зэманым къызэрымысам щхьэкІэ Алыхьыр уи фІэщ умыщІыжыным Іущагъ хэлъкъым! (Авв. 2:3; Мт. 24:44). Дэ адэкІи Иеговэ делъэІун икІи ди лъэІухэм жэуап абы къызэрыритынур ди фІэщ хъун хуейщ. Мы дунейм и кІэухыр игъуэу къэсынущ, сыт щхьэкІэ жыпІэмэ Иеговэ а махуэмрэ а сыхьэтымрэ куэд щІауэ триухуащ. Абы нэмыщІ абы къыхиха зэманыр Иеговэ фІыуэ зылъагъухэм я дежкІэ псом нэхърэ нэхъ игъуэу щытынущ (Мт. 24:36; 2 Пет. 3:15).
Исуф шыІэныгъэ дапхуэдэу зэригъэлъэгъуар икІи абы и щапхъэм дэ сытым дыхуигъэсэфыну? (12—14-нэ абзацхэм феплъ.)
12. Сыт хуэдэ Іуэхугъуэм деж шыІэныгъэ бгъэлъэгъуэну щымытыншыр?
12 Иныкъуэхэм деж дэ захуагъэр зэтрагъэувэжыху дежьэн хуей мэхъу. Мы дунейм куэдыр езыхэм емыщхь цІыхухэм зэхэгъэж ящІу яхущытщ, псалъэм папщІэ, я теплъэм, къызыхэкІа лъэпкъым икІи зыщІапІыкІа хабзэхэм елъытауэ. Абы нэмыщІ ІэпкълъэпкъкІэ е акъылкІэ узыншагъэ зимыІэхэм нэмыплъ ират. Иеговэ и Щыхьэт куэдри захуагъэ хэмылъу нэгъуэщІхэр къазэрыхущытым пэщІохуэ. Апхуэдэу цІыхухэр къыщытхущытым деж Хьисэ и псалъэхэр дигу къэдгъэкІыжыным мыхьэнэшхуэ иІэщ: «ИкІэм нэсыху теубыдэныгъэ зиІэр Тхьэм мыкІуэду къригъэлынущ» (Мт. 24:13). Ауэ Алыхьым и лэжьакІуэм гуэныхь хьэлъэ зэрищІар къэпщІауэ щытмэ, сыт уэ пщІэн хуейр? А Іуэхум зэхуэсым и нэхъыжьхэр щыгъуазэ хъуа иужь абыхэм унафэ ящІыху шыІэныгъэ пхэлъу уежьэфыну пІэрэ? Зэхуэсым и нэхъыжьхэм апхуэдэ Іуэхугъуэхэр щызэпкърахым деж, Иеговэ абыхэм яхуигъэувыр пщІэуэ щытмэ, шыІэныгъэ бгъэлъэгъуэну нэхъ тынш хъунущ.
13. Зэхуэсым и нэхъыжьхэм зыгуэрым гуэныхь хьэлъэ ищІар щызэпкърахым деж Иеговэ абыхэм сыт яхуигъэувыр?
13 Зэхуэсым щыщ гуэрым гуэныхь хьэлъэ ищІауэ зэхуэсым и нэхъыжьхэм къыщащІэм деж а Іуэхугъуэм Иеговэ и нэкІэ еплъын щхьэкІэ «уафэм къикІ акъылыфІагъэр» къаритыну Алыхьым ахэр йолъэІу (Екъуб 3:17). Абыхэм я мурадыр гуэныхь зыщІам «гъуэгу пхэнжыр» къигъэнэну дэІэпыкъуныращ (Екъуб 5:19, 20). Абы нэмыщІ абыхэм яхузэфІэкІыу хъуар ящІэ зэхуэсыр яхъумэн икІи а Іуэхугъуэр зэран зыхуэхъуа къуэш, шыпхъухэм гупсэхугъуэ иратыжын щхьэкІэ (2 Кор. 1:3, 4). Зэхуэсым и нэхъыжьхэм апхуэдэ Іуэхугъуэхэр щызэпкърахкІэ япэ дыдэу Іуэхур зытетыр зэхагъэкІын хуейщ икІи абы зэман гуэр ихьынущ. ИужькІэ абыхэм тхьэлъэІукІэ Алыхьым зыхуагъазэ, а Іуэхум хуэкІуэ Библием ит едзыгъуэхэр къыхах, гуэныхь зыщІам зихъуэжыну дэІэпыкъун щхьэкІэ. Абы иужькІэщ тезыр тралъхьэным теухуауэ унафэ щащІыр (Иер. 30:11). Зэхуэсым и нэхъыжьхэм а унафэм теухуауэ кІыхьлІыхь защІкъым, ауэ епІэщІэкІыуи зэмыгупсыса унафэ къащтэкъым. Ахэр Иеговэ и хабзэхэм щытетым деж абы зэхуэс псом сэбэп къыхуехь. Апхуэдэ Іуэхур тэмэму зэхагъэкІауэ щытми, лей къызытехьа къуэш, шыпхъухэм я гум уІэгъэ куу абы къытринэфынущ. Апхуэдэ Іуэхугъуэм ущыпэщІэхуа къэхъуа? УпэщІэхуауэ щытмэ, сыт уэ гупсэхугъуэ къозытыфынур?
14. Зэхуэсым щыщ гуэр захуагъэ хэмылъу къыпхущытауэ щытмэ, Библием ит сыт хуэдэ щапхъэ уэ къыбдэІэпыкъуну?
14 Зыгуэр захуагъэ хэмылъу къыщыпхущыта къэхъуа? Псалъэм папщІэ, зэхуэсым щыщ гуэрым уи жагъуэ ищІауэ жытІэнщ. Абы щыгъуэ Библием зи гугъу ищІ цІыхухэм я щапхъэхэм уэ куэдым ухуагъэсэфынущ. Абыхэм шыІэныгъэ яхэлъу Иеговэ Іуэхур зэхигъэкІыху ежьащ. Исуф и щапхъэр зэпкърытхынщ. Абы и къуэшхэм хьэзаб ирагъэшэча пэтми, абы и гум лъагъумыхъуныгъэм лъабжьэ щригъэщІакъым. Абы и пІэкІэ Исуф и къарууэ хъуар Иеговэ зэрыхуэлэжьэным тригъэкІуадэт. ШыІэныгъэрэ теубыдагъэрэ зэригъэлъэгъуам и фІыгъэкІэ Алыхьым и нэфІ абы щыхуащ (ЩІэдз. 39:21). Зэман дэкІа иужь Исуф апхуэдиз гуауэ къыхуэзыхьа и къуэшхэм яхуигъэгъуащ икІи а Іуэхугъуэм Иеговэ зэпымыууэ зэрыкІэлъыплъар къилъэгъуащ (ЩІэдз. 45:5). Исуф ещхьу, дэри Иеговэ нэхъ гъунэгъу зэрызыхуэтщІым икІи абы захуагъэр зэтригъэувэжыху дызэрежьэм зэи дыхущІегъуэжынукъым (Пс. 7:17; 73:28).
15. Ди шыпхъум захуагъэ хэмылъу къызэрыхущытам пэлъэщыну сыт къыдэІэпыкъуар?
15 ДауикІ, Исуф иІа гугъуехьым хуэдэ псори пэщІэмыхуэнкІэ хъунущ, ауэ захуагъэ хэмылъу зыгуэр къыщыпхущытым деж абы уи гур хигъэщІынкІэ хъунущ (Флп. 2:3, 4). Ди шыпхъум къыщыщІа зы Іуэхугъуэм деплъынщ. Абы къыдэлажьэ цІыхубзыр ІейкІэ къызэрыхуэпсэлъар къищІащ. Шыпхъум ар егъэлеяуэ игу къеуащ, ауэ, абы емылъытауэ, занщІэу а Іуэхур зэхигъэкІыну иужь ихьакъым. Сыт абы къыдэІэпыкъуар? Ди шыпхъур Хьисэ и щапхъэм егупсысащ. ЦІыхухэм Хьисэ псалъэ жагъуэхэр къыщыжраІэм щыгъуи абыхэм ар яригъэпшыныжыну хэтакъым (1 Пет. 2:21, 23). А гупсысэр игу илъу ди шыпхъум мурад ищІащ къыдэлажьэ цІыхубзым и псалъэхэм мыхьэнэшхуэ иримытыну. ИужькІэ абы къищІащ а цІыхубзым и узыншагъэм пыщІа гугъуехьхэр зэриІэр. Ди шыпхъум ар къыдэІэпыкъуащ и жагъуэ имыщІыну икІи а цІыхубзым и псалъэхэм мыхьэнэшхуэ иримытыну. ШыІэныгъэм и фІыгъэкІэ ди шыпхъур а Іуэхугъуэм апхуэдэу зэрыхущытам хуабжьу игъэгушхуащ икІи и гум мамырыгъэ кърилъхьащ.
16. Захуагъэ хэмылъу зыгуэр къыпхущытауэ щытмэ, сыт хуэдэ гупсысэм гупсэхугъуэ къыуитыфыну? (1 Петр 3:12).
16 Захуагъэ хэмылъу зыгуэр къызэрыпхущытам щхьэкІэ е нэгъуэщІ щхьэусыгъуэ гуэрым къыхэкІкІэ гурыщІэ Іей уиІэу щытмэ, зыщомыгъэгъупщэ: «Иеговэ зи гур кІуэдахэм пэгъунэгъущ» (Пс. 34:18). Уэ абы фІыуэ укъелъагъу шыІэныгъэ зэрыбгъэлъагъуэм икІи уи гугъуехьхэм хэкІыпІэ къыхуигъуэтыну Іэмал зэрептым щхьэкІэ (Пс. 55:22). Иеговэ ЩІылъэ псом и хеящІэщ. Абы гу лъимытэу зыри къэнэнукъым. (Къеджэ 1 Петр 3:12.) Аращи, гугъуехь гуэрым упэщІэхуамэ икІи абы хэкІыпІэ имыІэу къыпщыхъумэ, шыІэныгъэ пхэлъу Иеговэ уежьэным мыхьэнэшхуэ зэриІэр зыщомыгъэгъупщэ.
ИЕГОВЭ ЕЖЬЭХЭМ МЫУХЫЖ ФІЫГЪУЭХЭР КЪАІЭРЫХЬЭНУЩ
17. Исаия 30:18 зэритымкІэ, Иеговэ сыткІэ дыкъигъэгугъэрэ?
17 Куэд мыщІэу уафэм щыІэ ди Адэм дыкъызэригъэгугъа псори Алыхьым и Пащтыхьыгъуэм игъэзэщІэнущ. Исаия 30:18 щыжыІащ: «Иеговэ къыфпэплъэнущ и фІыгъуэр къыфлъигъэсын щхьэкІэ, абы зыкъиІэтынущ, гущІэгъу къыфхуищІын папщІэ. Сыт щхьэкІэ жыпІэмэ, Иеговэ — захуагъэ зыщІэ Алыхьщ. НасыпыфІэщ абы пэплъэ псори». Иеговэ дзыхь хуэзыщІхэм икІи абы пэплъэхэм мы дунейми къэкІуэну дунеищІэми фІыгъуэ куэд къаІэрыхьэнущ.
18. Сыт хуэдэ фІыгъуэхэр къытпэщылъыр?
18 ДунеищІэм Алыхьым и лэжьакІуэхэм гугъуехьи ахэр зыгъэгузэвэн Іуэхугъуи яІэнукъым. Хабзэншагъэмрэ абы къихь гуауэмрэ игъащІэкІэ кІуэдыжынущ (Апок. 21:4). Дызыхуэныкъуэу хъуар диІэн щхьэкІэ дыгузэвэн хуеинукъым, сыт щхьэкІэ жыпІэмэ берычэту псори щыІэнущ (Пс. 72:16; Ис. 54:13). Сыту фІыгъуэшхуэ ар!
19. Иеговэ хуэм-хуэмурэ сыт дызыхуигъэхьэзырыр?
19 А зэманыр къэсыху Иеговэ и Пащтыхьыгъуэм дыщІэту дызэрыпсэуным дыхуегъэхьэзыр. Ар дэ къыддоІэпыкъу хьэл мыхъумыщІэхэр зыхэднэну икІи абы игу ирихь хьэл-щэнхэр зыхэтлъхьэну. Дэ гъащІэ дахащэ къытпэщылъщ, аращи, фыкъимыкІуэт! АдэкІи шыІэныгъэ дывгъэгъэлъагъуэ икІи Иеговэ дыкъызэригъэгугъа псори игъэзэщІэху девгъажьэ!
118-НЭ УЭРЭДЫР «ФІэщхъуныгъэу диІэм къытхухэгъахъуэ»
a Зи ныбжь хэкІуэта къуэшым е шыпхъум мыпхуэдэ псалъэхэр жиІэу фэ зэхэфха хъунщ: «Сэ зэи сигугъэнтэкъым Армагеддоныр къэмыс щІыкІэ жьы сыхъуну». ДауикІ, дэ псори мы дуней бзаджэм дыщыпсэуну дезэшащ икІи Иеговэ нэхъ псынщІэу абы кІэ иритыну хуабжьу дыхуейщ. А псом емылъытауэ, шыІэныгъэ дгъэлъагъуэу дэ зедгъэсэн хуейщ. Мы статьям щызэпкърытхынущ шыІэныгъэр зыхэтлъхьэну къыддэІэпыкъуну Библием ит принципхэр. Абы нэмыщІ Иеговэ къыхэІэбэху дыпэплъэн щыхуей ІуэхугъуитІ зэпкърытхынущ. ИужькІэ къэтщІэнущ Иеговэ ежьэну хьэзырхэм сыт хуэдэ фІыгъуэхэр къапэщылъми.
b СУРЭТХЭР. Шыпхъум щысабий лъандэрэ Иеговэ тхьэлъэІукІэ зыхуигъэзэну хьэл хуэхъуащ. Апхуэдэу ищІэну ар и адэ-анэм ягъэсащ. И щІалэгъуэм абы пионер лэжьыгъэр къищтащ икІи щІэх-щІэхыурэ Иеговэ къыдэІэпыкъуну елъэІут. ИужькІэ и щхьэгъусэр щысымаджэм щыгъуэ абы Алыхьым лъэІу гуащІэкІэ зыхуигъазэт къару къритын щхьэкІэ. Иджыпсту, фызабэ щыхъуам щыгъуи, абы тхьэлъэІукІэ Иеговэ зыхуегъазэ. Уафэм щыІэ и Адэм сыт щыгъуи жэуап къызэрыриту щытам хуэдэу и тхьэлъэІухэм жэуап зэриІэнум абы шэч лъэпкъ къытрихьэкъым.