Хэт нобэ «ищхъэрэ пащтыхьыр»?

1, 2. Сыт мы статьям щызэпкърытхынур?

НОБЭ, зэи хуэмыдэу дэ нэхъ ІупщІу долъагъу мы дунейм и иужьрей махуэхэм дызэрыщыпсэур. Куэд мыщІэу Иеговэрэ Хьисэ Мэссихьрэ Алыхьым и Пащтыхьыгъуэм пэщІэт правительствэ псори ягъэкІуэдынущ. Ауэ а зэманыр къэсыху ищхъэрэ пащтыхьымрэ ипщэ пащтыхьымрэ зэпэщІэтынущ икІи Алыхьым и лъэпкъыр кърахуэкІынущ.

² Даниил 11:40—12:1 ит псалъэхэр мы статьям щызэпкърытхынущ. Дэ къэтщІэнущ хэт нобэ ищхъэрэ пащтыхьу щытми икІи дытепсэлъыхьынущ гугъуехь къытпэщылъхэм емылъытауэ зы щхьэкІи дымыгузавэу Иеговэ дзыхь хуэтщІыну щхьэусыгъуэ диІэхэм.

ИЩХЪЭРЭ ПАЩТЫХЬЫЩІЭ КЪЫКЪУОКІ

3, 4. Хэт ищхъэрэ пащтыхьыщІэ хъуар? КъыдгурывгъаІуэ.

³ Советскэ Союзыр 1991-нэ гъэм лъэлъэжа иужь, абы и щІыналъэ иным щыпсэу Алыхьым и лъэпкъым зы зэман гуэркІэ хуитыныгъэ иІэ хъуащ Алыхьым хуэлэжьэну икІи хъыбарыфІыр игъэІуну. Апхуэдэу Данил Алыхьым и лъэпкъым теухуауэ итха мы псалъэхэр къэхъуащ: «Ахэр дэІэпыкъуэгъуншэ дыдэу къэнэнукъым» (Дан. 11:34). Куэд дэмыкІыу СССР-м хэта къэралхэм щыпсэу Иеговэ и Щыхьэтхэр мин щэ бжыгъэм нэсащ. Зэман дэкІри Урысеймрэ абы и лъэныкъуэр зыІыгъ къэралхэмрэ ищхъэрэ пащтыхь хъуащ. Мы статьям ипэ дызэджам зэритамкІэ, ищхъэрэ пащтыхьымрэ ипщэ пащтыхьымрэ къэтцІыхуну Іуэхугъуищ къыддоІэпыкъу: 1) а пащтыхьхэр Алыхьым и лэжьакІуэ куэд щыпсэу щІыпІэм и тепщэу щытщ е Алыхьым и лъэпкъыр кърахуэкІ; 2) я ІуэхущІафэхэмкІэ абыхэм къагъэлъагъуэ Иеговэрэ абы и лъэпкъымрэ ялъагъу мыхъуу зэрыщытыр; 3) езы пащтыхьитІыр зэпэщІэтщ.

⁴ Нобэ Урысеймрэ абы и лъэныкъуэр зыІыгъхэмрэ ищхъэрэ пащтыхьу щыту къыщІэтлъытэм и щхьэусыгъуэхэр мыращ: 1) а къэралхэм хъыбарыфІ гъэІун лэжьыгъэр къагъэувыІэну иужь итщ икІи я щІыпІэм щыпсэу ди къуэш, шыпхъухэр мин щэ бжыгъэкІэ кърахуэкІ; 2) апхуэдэу зэращІэмкІэ абыхэм къагъэлъагъуэ Иеговэрэ абы и лъэпкъымрэ ялъагъу мыхъуу зэрыщытыр; 3) ахэр пэщІэтщ ипщэ пащтыхьым — Англо-Американскэ дунейпсо державэм. АдэкІэ зэпкърытхынщ Урысеймрэ абы и лъэныкъуэр зыІыгъхэмрэ ищхъэрэ пащтыхьу зэрыщытыр я ІуэхущІафэхэмкІэ къызэрагъэлъагъуэр.

ИЩХЪЭРЭ ПАЩТЫХЬЫМРЭ ИПЩЭ ПАЩТЫХЬЫМРЭ АДЭКІИ ЗЭПЭЩІЭТЩ

5. Даниил 11:40—43 сыт хуэдэ зэман зытепсэлъыхьыр икІи а зэманым сыт къэхъур?

⁵ Къеджэ Даниил 11:40—43. Мы едзыгъуэхэр кІэух зэманхэм топсэлъыхь икІи ищхъэрэ пащтыхьымрэ ипщэ пащтыхьымрэ зэрызэпэщІэтыр къыщыхощ. Данил зэритхам хуэдэу, кІэух зэманхэм ипщэ пащтыхьыр ищхъэрэ пащтыхьым пэщІэтынущ (Дан. 11:40).

6. Ищхъэрэ пащтыхьымрэ ипщэ пащтыхьымрэ дапхуэдэу адэкІи зэрызэпэщІэтыр?

⁶ Ищхъэрэ пащтыхьымрэ ипщэ пащтыхьымрэ дуней псом и тепщэу щытыну хуейуэ зэпэщІэтщ. Псалъэм папщІэ, ЕтІуанэ дунейпсо зауэшхуэм иужь, СССР-мрэ абы и лъэныкъуэр зыІыгъахэмрэ Европэм щыщ къэрал куэдым я унафэ халъхьащ икІи я тепщэныгъэр щыкІуэцІрагъэкІыну хэтащ. Абы къыхэкІкІэ ипщэ пащтыхьым НАТО-кІэ зэджэ къэрал куэд зыхэт военно-политическэ зэгурыІуэныгъэ зэригъэпэщын хуей хъуащ. Ищхъэрэ пащтыхьым адэкІи ахъшэшхуэ трегъэкІуадэ Іэщэ зэгъэпэщынымкІэ ипщэ пащтыхьым текІуэн щхьэкІэ. Ищхъэрэ пащтыхьыр ипщэ пащтыхьым пэщІэтащ зауэхэм щыгъуэ абы и бийхэм дэІэпыкъуу, псалъэм папщІэ Африкэм, Азием икІи Латинскэ Америкэм. Иужьрей илъэсхэм Урысеймрэ абы и лъэныкъуэр зыІыгъхэмрэ дуней псом лъэкІыныгъэшхуэ щаІэ хъуащ. Абы нэмыщІ ищхъэрэ пащтыхьымрэ ипщэ пащтыхьымрэ кибервойна жыхуаІэ зауэ ирагъэкІуэкІ. Къэралым и экономикэмрэ политикэмрэ зэран хуэхъуфын компьютернэ программэхэр къагъэсэбэпауэ жаІэурэ зыр зым егъэкъуаншэ. Абы нэмыщІ Данил зэритхам хуэдэу ищхъэрэ пащтыхьыр Алыхьым и лъэпкъым адэкІи тоуэ (Дан. 11:41).

ИЩХЪЭРЭ ПАЩТЫХЬЫР «ЩІЫНАЛЪЭ ГЪУЭЗЭДЖЭМ» ЙОХЬЭ

7. «ЩІыналъэ гъуэзэджэр» сыт зищІысыр?

⁷ Даниил 11:41 щыжыІат ищхъэрэ пащтыхьыр «щІыналъэ гъуэзэджэм» ихьэну. Ар сыт хуэдэ щІыналъэ? Пасэрей зэманым ар Израилырат, а щІыналъэм «щІылъэ псор игъэдахэу» щытт (Иез. 20:6). СыткІэт ар адрейхэм къазэрыщхьэщыкІыр? А щІыналъэм Иеговэ хуэлажьэ лъэпкъыр щыпсэут. Ауэ ди эрэм 33-нэ гъэм Пэнтэкост махуэшхуэм щыщІэдзауэ а «щІыналъэр» щІылъэм щыІэ щІыпІэ гуэру щытыжкъым. Нобэ Иеговэ и лъэпкъыр щІылъэ псом тегуэшащ. Ди зэманым «щІыналъэ гъуэзэджэр» — Алыхьым и лъэпкъым ирихьэкІ псэукІэращ, абы хохьэ зэІущІэхэм кІуэныр икІи хъыбарыфІ гъэІуныр.

8. Дапхуэдэу ищхъэрэ пащтыхьыр «щІыналъэ гъуэзэджэм» зэрихьар?

⁸ Мы дунейм и иужьрей махуэхэм ищхъэрэ пащтыхьыр мызэ-мытІэу «щІыналъэ гъуэзэджэм» ихьащ. Дигу къэдгъэкІыжынщ нацистхэр зи тепщэу щыт Германиер ищхъэрэ пащтыхьу щыщытам щыгъуэ къэхъуахэр, псом хуэмыдэу ЕтІуанэ дунейпсо зауэшхуэм щыгъуэ. Алыхьым и лэжьакІуэхэр кърихуэкІыурэ икІи иукІыурэ а пащтыхьыр «щІыналъэ гъуэзэджэм» ихьащ. ЕтІуанэ дунейпсо зауэшхуэм иужь, Советскэ Союзыр «щІыналъэ гъуэзэджэм» ихьащ — Алыхьым и лэжьакІуэхэр кърихуэкІащ икІи ахэр ссылкэ игъэкІуащ.

9. Урысеймрэ абы и лъэныкъуэр зыІыгъхэмрэ дапхуэдэу «щІыналъэ гъуэзэджэм» зэрихьар?

⁹ Илъэс зыбжанэкІэ узэІэбэкІыжмэ, ищхъэрэ пащтыхьыр аргуэру «щІыналъэ гъуэзэджэм» ихьащ. Ар дапхуэдэу къызэрыхъуар? 2017-нэ гъэм Урысейм Иеговэ и лъэпкъым иригъэкІуэкІ лэжьыгъэр зэхуищІащ икІи языныкъуэ ди къуэш, ди шыпхъухэр тутнакъым иригъэтІысхьащ. Абы нэмыщІ ди тхыгъэхэр къэдгъэсэбэп мыхъуну унафэ къыдигъэкІащ, ДунеищІэкІэ еджэу урысыбзэкІэ зэдзэкІа Тхыгъэ ЛъапІэри абы хэту. ИужькІэ Урысейм щыІэ филиалым и мылъкур, дыщызэхуэс Унэхэр икІи конгресс щедгъэкІуэкІ Унэхэр къыттрихащ. А Іуэхугъуэхэм иужь 2018-нэ гъэм УнафэщІ гупым къыгурыІуащ Урысеймрэ абы и лъэныкъуэр зыІыгъхэмрэ ищхъэрэ пащтыхьу зэрыщытыр. Ауэ гущІэгъуншэу къыщрахуэкІ зэманым дежи, Иеговэ и лъэпкъым къэрал унафэщІхэр тезыгъэкІыну хэтхэм икІи абыхэм пэщІэувэхэм я лъэныкъуэр иубыдкъым. Алыхьым и лэжьакІуэхэр «пащтыхьхэмрэ тепщэныгъэ зиІэхэмрэ Тхьэм фахуелъэІу» жыхуиІэ чэнджэщым тетщ, псом хуэмыдэу унафэщІхэм Алыхьым хуэлэжьэным ехьэлІа унафэхэр къыщащтэм деж (1 Тим. 2:1, 2).

ИЩХЪЭРЭ ПАЩТЫХЬЫР ИПЩЭ ПАЩТЫХЬЫМ ТЕКІУЭНУ?

10. Ищхъэрэ пащтыхьыр ипщэ пащтыхьым текІуэну пІэрэ? КъыдгурывгъаІуэ.

¹⁰ Даниил 11:40—45 ит псалъэхэр нэхъыбэу зыхуэгъэзар ищхъэрэ пащтыхьыращ. Абы къикІрэ ар ипщэ пащтыхьым текІуэну? Хьэуэ. Ипщэ пащтыхьыр «псэууэ» щытынущ е, нэгъуэщІу жыпІэмэ ар иджыри щыІэнущ Иеговэрэ Хьисэрэ щІылъэм тет правительствэхэр Армагеддон зауэм щагъэкІуэдынум деж (Апок. 19:20). Сыт дэ абы шэч къыщІытедмыхьэр? Даниил тхылъымрэ Апокалипсис тхылъымрэ къэхъун хуейуэ ит псалъэхэр адэкІэ зэпкърытхынщ.

11. Даниил 2:43—45 ит псалъэхэм сыт къыдгурагъаІуэр? (Обложкэм тет сурэтым феплъ.)

¹¹ Къеджэ Даниил 2:43—45. Бегъымбар Данил гъущІыкІэ зэмылІэужьыгъуиплІым къыхэщыкІа статуе иным топсэлъыхь. А статуер зэрызэхэлъ ІыхьиплІым зыр зым ихъуэжурэ теувэ дунейпсо державэхэр къагъэлъагъуэ икІи а державэхэм я щІыпІэм Алыхьым и лэжьакІуэ куэд щопсэу. Абыхэм ящыщу иужь дыдэу щыІэну державэр къэгъэлъэгъуащ и ныкъуэр гъущІым, и ныкъуэр ятІэ гъэжам къыхэщІыкІа лъэтхьэмпэу. Ар Англо-Американскэ дунейпсо державэращ. Абы дэ къыдгурегъаІуэ Алыхьым и Пащтыхьыгъуэм дунейм щыІэ правительствэхэр щигъэкІуэдым деж ар иджыри дунейпсо державэу зэрыщытынур.

12. Хьэщхьэвылъэм и ебланэ щхьэм сыт къигъэлъагъуэр икІи ар тщІэным мыхьэнэшхуэ щІиІэр сыт?

¹² Иеговэ и лъэпкъыр щыпсэу дунейпсо державэхэм апостол Иуани топсэлъыхь. Апокалипсис тхылъым а правительствэхэр щхьибл зыпыт хьэщхьэвылъэу къыщыгъэлъэгъуащ. Ебланэ щхьэм Англо-Американскэ дунейпсо державэр къегъэлъагъуэ. Абы мыхьэнэшхуэ иІэщ, сыт щхьэкІэ жыпІэмэ а тхылъым щыжыІакъым хьэщхьэвылъэм иджыри щхьэ къыпыкІэну. Ебланэ щхьэр иджыри тепщэу щытынущ Хьисэрэ уафэм щыІэ абы и дзэмрэ а хьэщхьэвылъэр щагъэкІуэдым дежb (Апок. 13:1, 2; 17:13, 14).

КУЭД МЫЩІЭУ СЫТ ИЩХЪЭРЭ ПАЩТЫХЬЫМ ИЩІЭНУР?

13, 14. «Магог щІыналъэм щыщ Гогыр» хэт икІи ар Алыхьым и лъэпкъым теуэну хуэзыгъэушынкІэ хъунур сыт?

¹³ Къэхъун хуейуэ Иезекииль тхылъым итым къыдгурегъаІуэ ищхъэрэ пащтыхьымрэ ипщэ пащтыхьымрэ ягъэкІуэдын ипэ сыт къэхъункІэ хъунуми. Иезекииль 38:10—23, Даниил 2:43—45; 11:44—12:1, абы нэмыщІ Апокалипсис 16:13—16, 21 ит псалъэхэр зытепсэлъыхьыр зы Іуэхугъуэщ. Ар щхьэусыгъуэ хуохъу адэкІэ дызытепсэлъыхьынур къэхъуну дегупсысыну.

¹⁴ Гузэвэгъуэшхуэм щІидза иужь «дуней псом я пащтыхьхэм» я унафэкІэ лъэпкъхэр зэгухьэнущ (Апок. 16:13, 14; 19:19). Лъэпкъ зэгухьэнухэм (коалиция нациим) Библиер «Магог щІыналъэм щыщ ГогкІэ» йоджэ (Иез. 38:2). Лъэпкъ зэгухьэнухэр Алыхьым и лъэпкъым теуэнущ икІи къарууэ яІэр ирахьэлІэнущ, ар ягъэкІуэдын щхьэкІэ. Сыт апхуэдэу къыщІэхъунур? Апостол Иуан а зэманым щытепсэлъыхьым жиІащ Алыхьым и бийхэм «уэшхуэхэр» къателъэлъэну (Апок. 16:21). А уэшхуэм къигъэлъагъуэр Алыхьым цІыхухэм ятрилъхьэну тезырырауэ къыщІэкІынщ. А хъыбар шынагъуэр Иеговэ и лэжьакІуэхэм ягъэІунущ. Арауэ къыщІэкІынщ Магог щІыналъэм щыщ Гогыр Алыхьым и лъэпкъыр щІылъэм тригъэкІуэдыкІын щхьэкІэ щІытеуэнур.

15, 16. 1) Даниил 11:44, 45 итым сыт хуэдэ Іуэхугъуэхэм и гугъу ищІу къыщІэкІыну? 2) Магог щІыналъэм щыщ Гогым, ищхъэрэ пащтыхьри абы хэту, сыт къыщыщІынур?

¹⁵ Даниил 11:44, 45 зи гугъу ищІыр а Іуэхугъуэ дыдэхэрауэ къыщІэкІынущ — хъыбар шынагъуэ зэрагъэІунумрэ Алыхьым и лъэпкъым зэрытеуэнумрэ (къеджэ). Абы щыжыІащ: «КъуэкІыпІэмрэ ищхъэрэкІэ къикІыну хъыбархэм ар [ищхъэрэ пащтыхьыр] ягъэгузэвэнурэ, и нэм щІы имылъагъужу къагъэгубжьынущ икІи куэдыр хьэлэчыпцІэ зэтрищІэну, лъапсэрыхыр къахуигъэкІуэну ежьэнущ». «Куэдыр» жиІэу мы едзыгъуэм ит псалъэм къигъэлъагъуэр Иеговэ и лэжьакІуэхэрауэ къыщІэкІынущ. Данил итха мы едзыгъуэхэр зытепсэлъыхьыр иужь дыдэу бийхэр губжьауэ Иеговэ и лъэпкъым щытеуэнура хъунщc.

¹⁶ Ищхъэрэ пащтыхьымрэ нэгъуэщІ къэрал унафэщІхэмрэ Алыхьым и лъэпкъым зэрытеуэм Иеговэ хуабжьу къигъэгубжьынурэ, Армагеддон зауэм щІидзэнущ (Апок. 16:14, 16). Абы щыгъуэ Магог щІыналъэм щыщ ГогкІэ Библиер зэджэ лъэпкъ зэгухьэнухэм, ищхъэрэ пащтыхьри абыхэм хэту, кІэ къахуэкІуэнущ икІи абыхэм зыри къадэІэпыкъунукъым (Дан. 11:45).

17. Даниил 12:1 зи гугъу ищІ «тепщэ ин» Михаилыр хэт? Сыт абы иджыпсту ищІэр икІи куэд мыщІэу сыт ищІэнур?

¹⁷ Даниил тхылъым ит къыкІэлъыкІуэ едзыгъуэр къыддоІэпыкъу ищхъэрэ пащтыхьымрэ абы и лъэныкъуэр зыІыгъхэмрэ зэрагъэкІуэдынум теухуауэ икІи дэ дыкъызэрелынум теухуауэ нэхъыбэ къэтщІэну (Къеджэ Даниил 12:1.) Мы едзыгъуэм сыт къикІыр? Ди Пащтыхьу щыт Хьисэ Мэссихь иджыри зы цІэ иІэщ: мы едзыгъуэм зэритымкІэ ар «МыхьэІилщ», нэгъуэщІу жыпІэмэ Михаилщ. Ар Алыхьым и лъэпкъым «щхьэщытщ», 1914-нэ гъэм Алыхьым и Пащтыхьыгъуэм и Пащтыхь зэрыхъу лъандэрэ. Куэд мыщІэу Хьисэ Алыхьым и лъэпкъым «щхьэщытынущ», и бийхэр Армагеддон зауэм щыхигъэкІуадэм деж. А зауэмкІэ иухынущ цІыхубэм и тхыдэм зэман нэхъ гугъу дыдэкІэ Даниил тхылъыр зэджэ лъэхъэнэр. Иуан итхыжа Апокалипсис тхылъым ар «гузэвэгъуэшхуэ» зэману щыжыІащ (Апок. 6:2; 7:14).

ФИ ЦІЭР «ТХЫЛЪЫМ» ИТЫНУ ПІЭРЭ?

18. Сытым и фІыгъэкІэ дэ зы щхьэкІи дымыгузавэу къэкІуэну зэманым дыщІыпэплъэфынур?

¹⁸ Данилрэ Иуанрэ жаІащ гузэвэгъуэшхуэм деж Иеговэрэ Хьисэрэ я лэжьакІуэхэр къызэрырагъэлынур. Абы къыхэкІкІэ зы щхьэкІи дымыгузавэу къэкІуэну зэманым дыпэплъэ хъунущ. Данил жиІащ «зи цІэр ГъащІэм и Тхылъым иту къагъуэтыну дэтхэнэри» къызэрелынур (Дан. 12:1). Сыт дэ тщІэн хуейр ди цІэр а «тхылъым» иратхэн щхьэкІэ? Дэ Хьисэ, «Тхьэм и... щынэр», ди фІэщ зэрыхъур къэдгъэлъэгъуэн хуейщ (Ин. 1:29). Ди гъащІэр Алыхьым и ІэмыщІэ итлъхьэу, псым зыщІэдгъэуэн хуейщ (1 Пет. 3:21). Абы нэмыщІ Алыхьым и Пащтыхьыгъуэр дэтІыгъын хуейщ — Иеговэ теухуауэ адрей цІыхухэм къащІэн щхьэкІэ къарууэ диІэр етхьэлІэу.

19. Сыт дэ иджыпсту тщІэн хуейр икІи сыт щхьэкІэ?

¹⁹ Иджыпсту Иеговэрэ абы и организацэмрэ нэхъыбэжу дзыхь хуэтщІу зыщедгъэсэн хуей зэманщ. Иджыпсту Алыхьым и Пащтыхьыгъуэр дэтІыгъыну и зэманщ. Апхуэдэу тщІэуэ щытмэщ дэ Алыхьым и Пащтыхьыгъуэм ищхъэрэ пащтыхьымрэ ипщэ пащтыхьымрэ щигъэкІуэдым деж дыкъыщелынур.