КІэух зэманхэм «ищхъэрэ пащтыхьыр»

1. Библием ит псалъэхэм сыт къыдагъащІэр?

ИЕГОВЭ и лъэпкъым къэкІуэну зэманым сыт къыпэщылъыр? Дэ абы и жэуапыр къытхуэщІэнущ. Библием къыдегъащІэ мыхьэнэшхуэ зиІэ, куэд мыщІэу къэхъуну Іуэхугъуэхэр. Ахэр дэ псоми дэхьэлІащ. Бегъымбархэм ятха зы тхылъым итщ нэхъ лъэкІыныгъэ зиІэ державэхэм ящІэнум теухуауэ. Зи гугъу тщІыр Даниил тхылъым и 11-нэ псалъащхьэм итыращ. Ар топсэлъыхь зэпэщІэт пащтыхьитІым — ищхъэрэ пащтыхьымрэ ипщэ пащтыхьымрэ. А псалъащхьэм къэхъун хуейуэ ит Іуэхугъуэхэм щыщу и нэхъыбэр къэхъуащ, абы къыхэкІкІэ дэ шэч къытедмыхьэми хъунущ къэнэжар къызэрыхъунум.

2. ЩІэдзапІэ 3:15, абы нэмыщІ Апокалипсис 11:7 икІи 12:17 итым тепщІыхьмэ, сыт зыщыдгъэгъупщэн хуэмейр Даниил тхылъыр щыдджым деж?

² Даниил тхылъым и 11-нэ псалъащхьэм итыр къыдгурыІуэн щхьэкІэ дэ зыщыдгъэгъупщэн хуейкъым: ар зытепсэлъыхьыр Иеговэ и лъэпкъым зэран хуэхъу пащтыхьхэмрэ державэхэмрэщ. Дунейм тет цІыхухэм елъытауэ Иеговэ и лэжьакІуэхэр мащІэу щытми, ахэр щІэх-щІэхыурэ кърахуэкІ. Сыт апхуэдэу щІыщытыр? ШейтІанымрэ абы и ІэмыщІэм илъ дунеймрэ я мурад нэхъыщхьэр — Иеговэрэ Хьисэрэ хуэлажьэхэр ягъэкІуэдыныращ. (Къеджэ ЩІэдзапІэ 3:15; Апокалипсис 11:7; 12:17.) Дэ иджыри зыщыдгъэгъупщэн хуейкъым: Даниил тхылъым ит псалъэхэр бегъымбархэм ятхауэ Библием ит нэгъуэщІ псалъэхэм техуэн хуейщ. Даниил тхылъым итыр тэмэму къыщыдгурыІуэнур Библием ит нэгъуэщІ тхылъхэм едгъапщэу щытмэщ.

3. Мы статьямрэ къыкІэлъыкІуэмрэ сыт къыщытщІэнур?

³ А гупсысэхэр дигу илъу Даниил 11:25—39 итыр зэпкърытхынщ. 1870-нэ гъэм къыщыщІэдзауэ 1991-нэ гъэм нэс ищхъэрэ пащтыхьу щытар хэтми икІи ипщэ пащтыхьу щытар хэтми къэтлъэгъунущ, абы нэмыщІ а едзыгъуэхэм итыр нэгъуэщІу къыдгурыІуэн хуейуэ щхьэусыгъуэ диІэхэр къэтщІэнущ. КъыкІэлъыкІуэ статьям Даниил 11:40—12:1 итыр зэпкърытхынущ икІи къэтщІэнущ 1990 гъэхэм къыщыщІэдзауэ Армагеддон зауэм нэс къэхъунум теухуауэ а едзыгъуэхэм щыжыІар сытми. Мы статьяхэр щывджкІэ, «КІэух зэманхэм пащтыхь зэпэщІэтхэр» жыхуиІэ схемэм феплъ. ЯпэщІыкІэ деплъынщ ищхъэрэ пащтыхьу щытымрэ ипщэ пащтыхьу щытымрэ къызэрытщІэнум.

ДАУЭ КЪЫЗЭРЫТЩІЭНУР ХЭТ ИЩХЪЭРЭ ПАЩТЫХЬУ ЩЫТМИ ИКІИ ХЭТ ИПЩЭ ПАЩТЫХЬУ ЩЫТМИ?

4. Сыт къыддэІэпыкъур хэт ищхъэрэ пащтыхьу щытми икІи хэт ипщэ пащтыхьу щытми къэтщІэну?

⁴ Израилым и ищхъэрэ лъэныкъуэмкІэ икІи ипщэ лъэныкъуэмкІэ щыІа щІыналъэхэм я пащтыхьхэращ япэщІыкІэ «ищхъэрэ пащтыхьу» икІи «ипщэ пащтыхьу» щытахэр. Сыт апхуэдэу жыпІэ щІэхъунур? Гу лъыфтэ Данил бегъымбарым хъыбар къыжезыІа мелыІычым и псалъэхэм: «Иджы уи деж сыкъэкІуащ, лъэхъэнэм и кІэм уи лъэпкъым къыщыщІынур ныбжесІэн щхьэкІэ» (Дан. 10:14). Япэм Алыхьым и лъэпкъыу щытар Израилыращ, ауэ ди эрэм 33-нэ гъэм Пэнтэкост махуэшхуэм щыгъуэ Иеговэ ІупщІу къигъэлъэгъуащ а махуэм щыщІэдзауэ и лъэпкъыу ибжыр Хьисэ и лъэужь ирикІуэхэрауэ зэрыщытыр. Абы къыхэкІкІэ Даниил тхылъым и 11-нэ псалъащхьэм итым и нэхъыбэр зэхьэлІар израил лъэпкъракъым, атІэ Хьисэ и лъэужь ирикІуэхэращ (Апост. 2:1—4; Рим 9:6—8; Гал. 6:15, 16). Абы нэмыщІ тхыдэм ухэплъэмэ, ищхъэрэ пащтыхьу икІи ипщэ пащтыхьу державэ зэмылІэужьыгъуэхэр щытащ. Ауэ ахэр псори зыгуэркІэ зэтехуэт. Япэрауэ, а пащтыхьхэр Алыхьым и лэжьакІуэ куэд щыпсэу щІыпІэм и тепщэу щытащ е Алыхьым и лъэпкъыр кърахуэкІыу щытащ. ЕтІуанэрауэ, Алыхьым и лэжьакІуэхэм зэрыхущытымкІэ абыхэм къагъэлъагъуэт Алыхь пэж Иеговэ ялъагъу мыхъуу зэрыщытыр. Ещанэрауэ, езы пащтыхьитІыр зэпэщІэтт.

5. II лІэщІыгъуэм щыщІэдзауэ XIX лІэщІыгъуэм и етІуанэ Іыхьэм нэс ищхъэрэ пащтыхьымрэ ипщэ пащтыхьымрэ щыІа? КъыдгурывгъаІуэ.

⁵ Ди эрэм, II лІэщІыгъуэм Хьисэ и лъэужь ирикІуэу зызыбжыжу, тхьэ нэпцІхэм хуэлэжьэным пыщІа хабзэхэм тетхэр зэхуэсым къыхыхьэу щІадзащ. ИкІи абыхэм Алыхьым и Псалъэм ит пэжхэр щІахъумэт. А зэманым къыщыщІэдзауэ 1870-нэ гъэм нэс Алыхьым зэгъэпэща лъэпкъ щІылъэм щиІакъым. А лъэхъэнэм Хьисэ зыхуригъаджэу щытам пэщІэувэ цІыхухэр губгъуэм къыщыкІ удзыжьым хуэдэу куэд хъуат. Абы къыхэкІкІэ пэжу Хьисэ и лъэужь ирикІуэхэр къэпцІыхуну гугъут (Мт. 13:36—43). Ар дэ тщІэным сыт мыхьэнэшхуэ щІиІэр? А зэманым зэгъэпэща лъэпкъ Алыхьым щІылъэм щиІакъым, абы къыхэкІкІэ ищхъэрэ пащтыхьымрэ ипщэ пащтыхьымрэ абы теуэфынутэкъым. Аращи, а пащтыхьхэм теухуауэ Даниил тхылъым ит псалъэхэр II лІэщІыгъуэм щыщІэдзауэ XIX лІэщІыгъуэм и етІуанэ Іыхьэм нэс къриубыдэ зэманым хуэхьакъымc. Ауэ XIX лІэщІыгъуэм и етІуанэ Іыхьэм ищхъэрэ пащтыхьымрэ ипщэ пащтыхьымрэ аргуэру къыкъуэкІыну уегупсыс хъунут. Сыт щхьэкІэ?

6. Дапщэщ Алыхьым и лъэпкъыр щІылъэм щызригъэпэщыжу щыщІидзар? КъыдгурывгъаІуэ.

⁶ 1870-нэ гъэм щыщІэдзауэ Алыхьым и лъэпкъыр щІылъэм щызэригъэпэщыжу щІидзащ. А илъэсым Чарлз Тейз Расселлрэ абы еплъыкІэ иІэм хуэдэ зиІэ нэгъуэщІ цІыхухэмрэ Алыхьым и Псалъэм итыр нэхъыфІу къащІэн щхьэкІэ зэхуэсу щІадзащ. Расселлрэ абы и гъусэхэмрэ бегъымбархэм зи гугъу ящІа «хъыбарегъащІэ» хъуащ. А «хъыбарегъащІэм» Хьисэ зи тепщэу щытыну Пащтыхьыгъуэр къэунэхун ипэ гъуэгур игъэкъэбзэн хуейт (Мал. 3:1). Иджы Алыхьым и лъэпкъыу щытыр хэтми къыпхуэщІэнут! А зэманым Алыхьым и лэжьакІуэхэр къезыхуэкІ «пащтыхьхэр» щыІауэ пІэрэ? АдэкІэ къэтщІэнщ.

ИПЩЭ ПАЩТЫХЬЫР ХЭТ?

7. 1917-нэ гъэ хъуху ипщэ пащтыхьу хэт щытар?

⁷ 1870-нэ гъэм Великобританиер щІылъэм империе нэхъ ин дыдэ щыхъуащ икІи абы ІэщэкІэ зэщІэузэдауэ псом нэхърэ нэхъ лъэщ дзэшхуэ иІэт. Бегъымбар Данил а империем щытепсэлъыхьым, абы бжьакъуэ цІыкІукІэ еджащ. А бжьакъуэ цІыкІур нэгъуэщІ бжьакъуищым текІуащ — Францием, Испанием, Нидерландым (Дан. 7:7, 8). 1917-нэ гъэ хъуху Великобританиеращ ипщэ пащтыхьу щытар. А зэманым США-м экономикэ нэхъ лъэщ дыдэ иІэ хъуащ икІи абырэ Великобританиемрэ зэдэлажьэу щІадзащ.

8. Мы дунейм и иужьрей махуэхэм икІэм хэт ипщэ пащтыхь хъуар?

⁸ Япэ дунейпсо зауэшхуэм щыгъуэ Великобританиемрэ США-мрэ зэгухьэри, дзэшхуэ лъэщ зэрагъэпэщащ икІи Англо-Американскэ дунейпсо державэ хъуащ. Бегъымбар Данил зэрыжиІам хуэдэу, а пащтыхьым «дзэшхуэ лъэщ» зэхуишэсащ (Дан. 11:25). А зэманым къыщыщІэдзауэ Англо-Американскэ державэр ипщэ пащтыхь хъуащ икІи ар мы дунейм икІэ хъуху апхуэдэу щытынущd. Ауэ хэт ищхъэрэ пащтыхьу щытар?

ИЩХЪЭРЭ ПАЩТЫХЬЫР АРГУЭРУ КЪЫКЪУОКІ

9. Дапщэщ ищхъэрэ пащтыхьыр аргуэру къыщыкъуэкІар икІи Даниил 11:25 ит псалъэхэр дауэ къызэрыхъуар?

⁹ 1871-нэ гъэм ищхъэрэ пащтыхьыр аргуэру къыкъуэкІащ, Расселлрэ абы и гъусэхэмрэ Библиер яджу щІадза иужь илъэс дэкІауэ. А гъэм О́тто фон Би́смарк къару зэрырихьэлІам и фІыгъэкІэ Германскэ империе къэунэхуащ. Пруссием и король Вильге́льм I абы и император хъуащ икІи абы Бисмарк япэ рейхсканцлеру тригъэуващe. КъыкІэлъыкІуэ илъэсхэм Германиер колоние зиІэ державэ хъуащ. Абы Африкэмрэ Тихий океанымрэ щыІэ языныкъуэ щІыпІэхэр иубыдащ икІи Великобританием пэщІэуващ. (Къеджэ Даниил 11:25.) Германскэ империем дзэ лъэщрэ инагъкІэ дуней псом етІуанэ увыпІэр зыІыгъ кхъухь гупышхуэрэ зэригъэпэщащ икІи ахэр Япэ дунейпсо зауэшхуэм къыщигъэсэбэпащ.

10. Даниил 11:25 и етІуанэ Іыхьэмрэ, 26-мрэ ит псалъэхэр дапхуэдэу къызэрыхъуар?

¹⁰ Бегъымбар Данил жиІауэ щытащ Германскэ империемрэ абы зэригъэпэща дзэ лъэщымрэ сыт къащыщІынуми. Данил жиІат пащтыхьхэм щыщ зыр «къыхагъэщІэну», нэгъуэщІу жыпІэмэ зы пащтыхьыр адрей пащтыхьым текІуэну. Хэт абы зи гугъу ищІар? Къэхъуа Іуэхугъуэхэм къагъэлъагъуэ ар ищхъэрэ пащтыхьырауэ зэрыщытыр. Сыт ар щІытемыкІуар? Данил къыдгурегъаІуэ: «Іуэху щэху хузэІуащэнурэ къыхагъэщІэнущ. И Іэнэгъуу щытахэм абы и унагъуэбжэр хурагъэщІыжынущ» (Дан. 11:25 и етІуанэ Іыхьэр, 26 и япэ Іыхьэр). Данил и зэманым щыгъуэ пащтыхьым «езым и Іэнэм къытекІ ерыскъыгъуэхэр» зышхыу щытар абы къыхуэлажьэу нэхъ и гъунэгъуу щыта цІыхухэрат (Дан. 1:5). Хэт-тІэ а псалъэхэр зыхуэгъэзар? Германскэ империем увыпІэ лъагэ щызыІыгъ чиновникхэращ, абыхэм хохьэ генералхэр, зауэ ІуэхукІэ императорым и чэнджэщэгъухэр. Абыхэм я ягъэкІэ империер лъэлъэжащf. Ауэ бегъымбарым зи гугъу ищІар империер зэрылъэлъэжынум и закъуэкъым, атІэ ипщэ пащтыхьымрэ ищхъэрэ пащтыхьымрэ зэзэуа иужь хэт текІуэнуми жиІащ. Ищхъэрэ пащтыхьым теухуауэ Данил жиІащ: «И дзэри, псыдзэм ихьам хуэдэу, ягъэбзэхынущ, зауэм куэд хэкІуэдэнущ» (Дан. 11:26 и етІуанэ Іыхьэр). А псалъэхэр къэхъуащ: Япэ дунейпсо зауэшхуэм Германием и дзэр «псыдзэм ихьам хуэдэу» ягъэбзэхащ икІи пэж дыдэу «зауэм куэд» хэкІуэдащ. Апхуэдэу цІыху куэд зыхэкІуэда зауэ зэи щыІатэкъым.

11. Ищхъэрэ пащтыхьымрэ ипщэ пащтыхьымрэ дапхуэдэут зэрызэхущытыр?

¹¹ Япэ дунейпсо зауэшхуэр щІидзэн ипэ къэхъунум теухуауэ Даниил 11:27, 28 итщ: ищхъэрэ пащтыхьымрэ ипщэ пащтыхьымрэ «зы Іэнэ зэдэтІысынурэ пцІы зэхуаупсынущ». Абы нэмыщІ «ищхъэрэ пащтыхьым мылъкушхуэ» зэхуихьэсын хуейт. Абы теухуауи Данил зэрыжиІа дыдэм хуэдэу къэхъуащ. Германиемрэ Великобританиемрэ мамырыгъэ щыІэну хуейуэ зыр зым жраІэт, ауэ 1914-нэ гъэм къэхъуа зауэм къигъэлъэгъуащ абыхэм пцІы зэраупсар. Абы нэмыщІ 1914-нэ гъэм Германием и экономикэм и лъэщагъымкІэ дуней псом етІуанэ увыпІэ щиубыдащ. ИужькІэ Даниил 11:29-мрэ, 30 и япэ Іыхьэмрэ зэрыщыжыІам хуэдэу Германиер ипщэ пащтыхьым теуащ, ауэ ар хуабжьу къыхагъэщІащ.

ПАЩТЫХЬХЭР АЛЫХЬЫМ И ЛЪЭПКЪЫМ ТОУЭ

12. Япэ дунейпсо зауэшхуэм щыгъуэ ищхъэрэ пащтыхьымрэ ипщэ пащтыхьымрэ сытыт ящІэр?

¹² 1914-нэ гъэм къыщыщІэдзауэ пащтыхьитІыр нэхъ зэпэщІэт хъуащ икІи абыхэм Алыхьым и лэжьакІуэхэр нэхъ гущІэгъуншэу кърахуэкІыу щІадзащ. Псалъэм папщІэ, Япэ дунейпсо зауэшхуэм щыгъуэ Іэщэ къащтэну зымыдэ Алыхьым и лэжьакІуэхэр Германиеми Великобританиеми я унафэщІхэм кърахуэкІт. ИкІи хъыбарыфІ гъэІуным теухуауэ унафэ зыщІ къуэшхэр США-м и унафэщІхэм ягъэтІысауэ щытащ. Апхуэдэу Апокалипсис 11:7—10 ит псалъэхэр къэхъуащ.

13. 1930 гъэхэм щыгъуэ, абы нэмыщІ ЕтІуанэ дунейпсо зауэшхуэм щыгъуэ ищхъэрэ пащтыхьым сыт ищІар?

¹³ 1930 гъэхэм икІи псом хуэмыдэу ЕтІуанэ дунейпсо зауэшхуэм щыгъуэ ищхъэрэ пащтыхьыр гущІэгъуншэу Алыхьым и лъэпкъым теуэт. Германием тепщэныгъэр нацистхэм къаІэрыхьа иужь Гитлеррэ абы и лъэныкъуэр зыІыгъхэмрэ Алыхьым и лъэпкъым иригъэкІуэкІ лэжьыгъэр зэхуащІащ. Щэ бжыгъэкІэ Иеговэ и лэжьакІуэхэр яукІащ, мин бжыгъэкІэ — концлагерым ирагъэтІысхьащ. А псор къызэрыхъунур Данил итхауэ щытащ. Ищхъэрэ пащтыхьым «Тхьэм и Унэр» иуфІеящ икІи Иеговэ и лэжьакІуэхэм Алыхьым и цІэр ягъэІуну хуитыныгъэ яІар къатрихри «махуэ къэс ящІ къурмэныр» щригъэгъэтащ. (Дан. 11:30 и етІуанэ Іыхьэр, 31 и япэ Іыхьэр). Уеблэмэ, Гитлер тхьэ иІуат Германием щыІэ Иеговэ и Щыхьэтхэр игъэкІуэдыну.

ИЩХЪЭРЭ ПАЩТЫХЬЫМ ЗЕХЪУЭЖ

14. ЕтІуанэ дунейпсо зауэшхуэм иужь хэт ищхъэрэ пащтыхь хъуар? КъыдгурывгъаІуэ.

¹⁴ ЕтІуанэ дунейпсо зауэшхуэм Германием иІыгъа щІыпІэшхуэхэр Советскэ Союзым Іэрыхьащ. Нацистхэр зи тепщэу щыт Германием хуэдэу, СССР-мрэ абы и лъэныкъуэр зыІыгъхэмрэ Алыхь пэжым хуэлэжьэныр япэ изыгъэщ цІыхухэр кърахуэкІт. Апхуэдэу а къэралхэр ищхъэрэ пащтыхьыщІэ хъуащ.

15. ЕтІуанэ дунейпсо зауэшхуэр иуха иужь ищхъэрэ пащтыхьым сыт ищІар?

¹⁵ ЕтІуанэ дунейпсо зауэшхуэр иуха иужь куэд мыщІэу ищхъэрэ пащтыхьыщІэр — СССР-мрэ абы и лъэныкъуэр зыІыгъхэмрэ — Алыхьым и лъэпкъым теуэу щІидзащ. Апокалипсис 12:15—17 зэритым хуэдэу а пащтыхьым хъыбарыфІ гъэІуныр зэхуищІащ икІи мин бжыгъэкІэ Иеговэ и лэжьакІуэхэр ссылкэ игъэкІуащ. Къэхъуа Іуэхугъуэхэм къызэрагъэлъагъуэмкІэ иужьрей зэманым ищхъэрэ пащтыхьыр псы уэрым хуэдэу Алыхьым и лъэпкъым тоуэ, абы иригъэкІуэкІ лэжьыгъэр къигъэувыІэну и мураду. Ауэ ар абы къехъулІэкъымg.

16. Дапхуэдэу Советскэ Союзым Даниил 11:37—39 ит псалъэхэр зэригъэзэщІар?

¹⁶ Къеджэ Даниил 11:37—39. Данил жиІауэ щытащ: ищхъэрэ пащтыхьым «и адэжьхэм я тхьэхэр... зыуи къридзэнукъым». Мы псалъэхэр дапхуэдэу къызэрыхъуар? Советскэ Союзым диныр игъэкІуэдыну мурад ищІати, динхэм яІэ тепщэныгъэр къатрихыну хэтащ. Абы щхьэкІэ 1918-нэ гъэм абы декрет къыдигъэкІащ Алыхьыр щымыІэу сабийхэр школхэм щрагъэджэну. Ауэ дапхуэдэу ищхъэрэ пащтыхьым «быдапІэхэм я тхьэм пщІэшхуэ» хуищІу зэрыщытар? Нэхъ лъэщ хъун папщІэ, Советскэ Союзым ахъшэшхуэ тригъэкІуадэу щытащ и армэм зиужьын щхьэкІэ икІи мин бжыгъэкІэ ядернэ Іэщэхэр ищІын щхьэкІэ. Апхуэдэу ищхъэрэ пащтыхьымрэ ипщэ пащтыхьымрэ щІылъэм тет цІыхухэр миллиард бжыгъэкІэ зыгъэкІуэдыфын Іэщэ куэд зэрагъэпэщащ.

ЗЭБИЙХЭР ЗЭДОЛАЖЬЭ

17. «ЩІыпІэм лъапсэрыхыр къыхуэзыгъэкІуэн гущыкІ теплъэ зиІэр» сыт зищІысыр?

¹⁷ Илъэс бжыгъэ куэдкІэ зэбийуэ зэрыщытам емылъытауэ, ипщэ пащтыхьым Организация Объединенных Наций жыхуаІэр ищІыну мурад иІар ищхъэрэ пащтыхьым диІыгъащ. Апхуэдэу бегъымбарым итха псалъэхэр къэхъуащ: а пащтыхьхэм «а щІыпІэм лъапсэрыхыр къыхуэзыгъэкІуэн гущыкІ теплъэ зиІэ щагъэувынущ» (Дан. 11:31).

18. Организация Объединенных Наций жыхуаІэм «щІыпІэм лъапсэрыхыр къыхуэзыгъэкІуэн гущыкІ теплъэ зиІэкІэ» сыт щІеджэр?

¹⁸ Организация Объединенных Наций жыхуаІэм «гущыкІ теплъэ» иІэу сыт щІыжиІэр? Алыхьым и Пащтыхьыгъуэм фІэкІа нэгъуэщІым зыми хуэмыгъэзэщІэну Іэхугъуэ абы ищІэну жеІэ,— дуней псом мамырыгъэ щыІэу ищІыну. Ауэ сыт «гущыкІ теплъэ» зиІэ ООН-ым «щІыпІэм лъапсэрыхыр» къыхуигъэкІуэну щІыжиІэр? Дин нэпцІхэр псори щызэтракъутэкІэ ООН-ращ къалэн нэхъыщхьэ зыгъэзэщІэнур. («КІэух зэманхэм пащтыхь зэпэщІэтхэр» жыхуиІэ схемэм феплъ.)

АР ТЩІЭНЫМ МЫХЬЭНЭШХУЭ ЩІИІЭР СЫТ?

19, 20. 1) БлэкІа зэманым къэхъуа Іуэхугъуэхэр тщІэным сыт мыхьэнэшхуэ щІиІэр? 2) КъыкІэлъыкІуэ статьям сыт щызэпкърытхынур?

¹⁹ БлэкІа зэманым къэхъуа Іуэхугъуэхэр тщІэным сыт мыхьэнэшхуэ щІиІэр? А къэхъуахэм ІупщІу къыдгурагъаІуэ 1870 гъэхэм щыщІэдзауэ 1990 гъэхэм ипэхэм нэс ищхъэрэ пащтыхьымрэ ипщэ пащтыхьымрэ теухуауэ бегъымбар Данил итхахэр къызэрыхъуар. Абы дэ быдэу ди фІэщ ещІ бегъымбарым итха адрей псалъэхэри къызэрыхъунур.

²⁰ 1991-нэ гъэм Советскэ Союзыр лъэлъэжащ. Хэт-тІэ нобэ ищхъэрэ пащтыхьу щытыр? Ар къыкІэлъыкІуэ статьям щызэпкърытхынщ.