«Пэжыр къэщэху икІи ар умыщэж»

1, 2. 1) Ди гъащІэм сыт псом нэхърэ нэхъ лъапІэр? 2) Сыт хуэдэ пэжхэра дэ лъапІэу тлъытэр? (Статьям ипэм ит сурэтхэм феплъ.)

ФИ ГЪАЩІЭМ сыт псом нэхърэ нэхъ лъапІэу флъытэр? Иеговэ и лэжьакІуэхэм я деж а упщІэм и жэуапыр наІуэщ. Иеговэрэ дэрэ ди зэхуаку дэлъ зэхущытыкІэращ псом нэхърэ нэхъ лъапІэр икІи ар нэгъуэщІ гуэркІэ дэ зэи тхъуэжынукъым. Абы нэмыщІ дэ Библием ит пэжыр къызэрытщІам щхьэкІэ ди гум фІыщІэшхуэ илъщ. Сыт щхьэкІэ жыпІэмэ, а щІэныгъэхэм я фІыгъэкІэ уафэм щыІэ ди Адэр ди ныбжьэгъу хъуащ (Кол. 1:9, 10).

² Фегупсысыт ди ЕгъэджакІуэ Иеговэ и псалъэ БиблиемкІэ сыт хуэдиз пэж къытхузэІуихми. Абы къыдегъащІэ и цІэм мыхьэнэшхуэ иІэр, и хьэл-щэн дахэхэр икІи и лъагъуныгъэм къыхэкІыу и къуэр щхьэщэхужу дэр щхьэкІэ зэритар. Абы нэмыщІ Пащтыхьыгъуэм теухуа пэжыр къытхузэІуех. Ди къэкІуэнум теухуауи гугъэ дахэ псоми къыдет: уафэм кІуэнухэми щІылъэм щыІэну жэнэтым щыпсэунухэми (Ин. 10:16). Иеговэ къыджеІэ сыт хуэдэ принципхэм дытету дыпсэун хуейми. Библием ит пэжхэр ди дежкІэ лъапІэщ, сыт щхьэкІэ жыпІэмэ абыхэм я фІыгъэкІэ ДыкъэзыгъэщІам нэхъ гъунэгъу дыхуохъу икІи ди гъащІэм мыхьэнэ иІэу мэхъу.

3. «Пэжыр къэщэху» жыхуиІэ псалъэхэм сыт къимыкІыр?

³ Иеговэ — Алыхь хьэлэлщ. Абы пэжыр къэзылъыхъуэм фІыгъуэ куэд ирет. Уеблэмэ, фІыщэу илъагъу и къуэр щхьэщэхужу дэр щхьэкІэ итащ. ИкІи Алыхьым пэж къыдигъащІэхэм ахъшэ щІэттыну къытхуигъэувкъым. Зэгуэрым Симон зи цІэ зы цІыхухъу гуэрым Алыхьым и къару лъапІэр нэгъуэщІхэм яритыфу, апхуэдэ лъэкІыныгъэ иІэу хъун щхьэкІэ апостол Паул ахъшэ иритыну жриІат. Симон и еплъыкІэр зэрымытэмэмыр мы псалъэхэмкІэ Петр абы къыгуригъэІуащ: «Уэ уи ахъшэри уэри фызэдрекІуэд Тхьэм и тыгъэр къэпщэхуфын къызэрыпфІэщІам щхьэкІэ» (Апост. 8:18—20). Сыт-тІэ «пэжыр къэщэху» жыхуиІэ псалъэхэм къикІыр?

«ПЭЖЫР КЪЭЩЭХУ» ЖЫХУИІЭ ПСАЛЪЭХЭМ СЫТ КЪИКІЫР?

4. Пэжым теухуауэ сыт дэ мы статьям къыщытщІэнур?

⁴ Къеджэ Притчи 23:23a. Алыхьым и Псалъэм ит пэжхэр къэдгъуэтын щхьэкІэ къару етхьэлІэн хуейщ икІи сытри къэдгъэнэну дыхьэзыру дыщытын хуейщ. «Пэжыр къэтщэхуа» е, нэгъуэщІу жыпІэмэ, къэтщІа иужь, сыт къэмыхъуами, дэ ар зэи «тщэж» е, нэгъуэщІу жыпІэмэ, къэдгъанэ хъунукъым. Библием ит пэжыр дауэ «къызэрытщэхунур»? Дапщэ ар зиуасэр? А упщІэхэм я жэуапхэр къыддэІэпыкъунущ пэжыр къызэрытщІам щхьэкІэ ди гум фІыщІэ илъыр хэхъуэну икІи ар зэи «дымыщэжыну» мурад тщІам дытетыну. Дэ къыдгурыІуэнущ пэжым сыт хуэдэ уаси щІэптыну зэрыхуэфащэр.

5, 6. 1) Дауэ ахъшэ едмыту «пэжыр къызэрытщэхуфынур?» Щапхъэ къэфхь. 2) Пэжым сыт хуэдэ сэбэпынагъ къытхуихьыр?

⁵ Иныкъуэм деж пщІэншэу зыгуэр къыпІэрыхьэн щхьэкІэ къару епхьэлІэн хуейщ. Притчи 23:23 ит «къэщэхун» журтыбзэ псалъэм иджыри «зэгъэгъуэтын» къокІ. А псалъитІми къагъэлъагъуэ зы лъапІэ гуэр зыІэрыбгъэхьэн щхьэкІэ къару епхьэлІэн е абы ипІэкІэ зыгуэр птын зэрыхуейр. «Пэжыр къызэрытщэху» хъунур къыдгурыІуэн щхьэкІэ зы щапхъэ зэпкърытхынщ. Псалъэм папщІэ, бэзэрым банан пщІэншэу щату зэхэфхащ. Ар езыр-езыру фи Іэнэм къытехутэну ущыгугъ хъуну? ДауикІ, хъунукъым. Бэзэрым укІуэу уэ езым ар къэпщтэн хуейщ. Ахъшэ ептын хуэмейми, къару епхьэлІэн хуейщ банан зыІэрыбгъэхьэн щхьэкІэ. Апхуэдэ дыдэу, пэжыр зыІэрыдгъэхьэн щхьэкІэ ахъшэ еттын хуейкъым, ауэ къару етхьэлІэн хуейщ.

⁶ Къеджэ Исаия 55:1—3b. Иеговэ бегъымбар Ешайа иригъэтха псалъэхэм къыдгурагъаІуэ «пэжыр къэщэхун» жиІэм къикІыр сытми. Мы пычыгъуэм Иеговэ пэжым и псалъэхэр псым, шэм икІи шагъырым хуегъадэ. Псы щІыІэтыІэм къару къызэрыпхилъхьэжым хуэдэу, Алыхьым и псалъэ пэжхэм къару къыпхалъхьэж. Шэм сабийм къару ириту, хэхъуэну зэрыдэІэпыкъум хуэдэу, дэри Иеговэ нэхъ гъунэгъу дыхуэхъун щхьэкІэ Библием ит пэжыр къыддоІэпыкъу. Абы нэмыщІ Иеговэ и псалъэхэр шагъырым ирегъэщхь. Сыт щхьэкІэ? Библием жеІэ шагъырым цІыхур нэжэгужэ ищІу (Пс. 104:15). Абы къыхэкІкІэ «шагъыр къэфщэху» Иеговэ къыщыджиІэм деж, абы къыдгуригъаІуэу аращ Библием дызыхуригъасэм дытету дыпсэумэ, гуфІэгъуэ зэрызыхэтщІэнур (Пс. 19:8). Зэпкърытха щапхъэхэм къагъэлъагъуэ Библием ит пэжхэр зэрыдджым икІи къэтщІахэм дызэрытетым сэбэп къытхуихьыр. Пэжым щхьэкІэ уасэ ттыр — къару етхьэлІэрауэ жыпІэ хъунущ. АдэкІэ дытепсэлъыхьынщ дэ тщыщ языныкъуэхэм «пэжыр къащэхун» щхьэкІэ ятын хуей хъуам.

ПЭЖЫР КЪЭФЩЭХУН ЩХЬЭКІЭ СЫТ ФЭ ФТЫН ХУЕЙ ХЪУАР?

7, 8. 1) Пэжыр къэтщэхун щхьэкІэ, сыт уасэу ди зэманыр ттын щІыхуейр? 2) Зы хъыджэбз гуэрым пэжым сыт хуэдэ уасэ щІита икІи сыт абы къыпэкІуар?

⁷ Зэманыр. Пэжыр къэзыщэху дэтхэнэ зыми а уасэр ет. Зэман хуейщ цІыхур хъыбарыфІым едэІуэн щхьэкІэ, Библиемрэ абы тегъэщІа тхыгъэхэмрэ еджэн щхьэкІэ икІи «Иеговэ и Щыхьэтхэм» я гъусэу ар иджын щхьэкІэ, абы нэмыщІ зэІущІэхэм зыхуигъэхьэзыру абыхэм екІуэлІэн щхьэкІэ. А зэманыр къыдэдгъэкІын хуейщ, мыхьэнэшхуэ зимыІэ Іуэхухэр лъэныкъуэ едгъэзу. (Къеджэ Ефес 5:15, 16.) Зэман дапщэ хуей цІыхум Библием ит щІэныгъэ нэхъыщхьэхэм фІыуэ хищІыкІыу хъун щхьэкІэ? ЦІыху къэс зэхуэдэкъым, я Іуэхур зыІутри зыкъым. Алыхьым и Іущагъым икІи и Іуэхухэм гъунэ яІэкъым, абыхэм теухуауэ сыт щыгъуи щІэныгъэ зэдгъэгъуэтыфынущ (Рим 11:33). Япэ дыдэу къыдэкІа «ХъумакІуэ Чэщанэ» журналым пэжыр «удз гъэгъа цІыкІум» иригъэщхьт. А статьям щыжыІат: «Удз гъэгъам ещхь зы пэж къэвгъуэтакІэ фыкъэмыувыІэ. Зыр дрикъуну щытамэ, апхуэдиз пэж Алыхьым къыдитынтэкъым. Зэхуэфхьэс, зэпымыууэ къэфлъыхъуэ». УзэупщІыж хъунущ: «Дапхуэдиз удз гъэгъа сэ зэхуэсхьэсар?» ГъащІэ мыухыж диІэу дыпсэууэ хъуа нэужьи Иеговэ теухуауэ щІэ гуэр сыт щыгъуи къэтщІэнущ. Ауэ иджыпсту ди зэманыр Іущагъ хэлъу къэдгъэсэбэпын хуейщ, зэрыхъукІэ ди щІэныгъэхэр нэхъ куу тщІын папщІэ. Пэжыр къэзылъыхъуа зы хъыджэбз гуэрым и щапхъэ адэкІэ зэпкърытхынщ.

⁸ Ма́рикэc зи цІэ зы хъыджэбз гуэр Нью-Йорк (Америкэм) щеджэну кІуат. Зэгуэрым пионеру лажьэ ди зы шыпхъур хъыбарыфІыр унэ-унэкІэ щигъэІум абы и деж Іухьат. Марикэ езыр дин гуэрым хэтт, ауэ абы ди шыпхъум и гъусэу Библиер джын щІидзащ. Зэджэр апхуэдизкІэ абы игу ирихьти, тхьэмахуэм тІэу иригъэджэну шыпхъум елъэІуащ. ЕджапІэмрэ махуэ ныкъуэкІэ зэрылажьэмрэ зэман куэд зэрихьым емылъытауэ, Марикэ зэІущІэхэм занщІэу кІуэн щІидзащ. Абы нэмыщІ абы нэгъуэщІ и Іуэхухэри къигъэнащ, зэман нэхъыбэ Библие джыным къыхудигъэкІын щхьэкІэ. Апхуэдэу зэрищІам и фІыгъэкІэ ар Алыхьым нэхъ гъунэгъу хуэхъуащ икІи илъэс дэмыкІыу псым зыщІигъэуащ. Мазих дэкІа иужь 2006 гъэм Марикэ пионер лэжьыгъэр къищтащ. Ар иджыри къыздэсым пионеру мэлажьэ.

9, 10. 1) ЦІыхум пэжыр къищІа иужь, мылъкум зэрыхущытым дауэ зэрызихъуэжыр? 2) Зы цІыхубз гуэрым сыт къигъэнар икІи абы теухуауэ сыт абы иджы жиІэр?

⁹ Мылъкур. Иныкъуэм деж пэжыр къэтщэхун щхьэкІэ ахъшэфІ къызэрыкІ лэжьыгъэ е къулыкъу къэдгъэнэн хуейщ. Псалъэм папщІэ, Петрырэ Индрисрэ я щапхъэм деплъынщ. Ахэр бдзэжьеящэт, ауэ Хьисэ и лъэужь иувэну абыхэм щажриІам щыгъуэ, я лэжьыгъэр къагъэнащ (Мт. 4:18—20). ДауикІ, нобэ пэжыр къэзыщІэ цІыхухэм я нэхъыбэм я лэжьыгъэр занщІэу хыфІадзэфынукъым. Библием зэрыжиІэмкІэ абыхэм я унагъуэр зыхуей хуагъэзэн хуейщ (1 Тим. 5:8). Ауэ Библиер зыдж куэдым мылъкум зэрыхущытыр яхъуэжын икІи я гъащІэм япэ ирагъэщынур зэхагъэкІын хуейщ. Хьисэ жиІауэ щытащ: «ЩІылъэм мылъкушхуэ щызэхуэвмыхьэс... Ауэ уафэм мылъкушхуэ [щы]зэхуэфхьэс» (Мт. 6:19, 20). Апхуэдэу зы цІыхубз гуэрым ищІащ.

¹⁰ Мария школым мыкІуэ щІыкІэ гольф джэгуу щІидзащ. А спортымкІэ абы ехъулІэныгъэшхуэхэр иІэ хъуащ икІи университетым щІэтІысхьэну стипендия къратащ. Мария и гъащІэ псор гольфым етат икІи ар хущІэкъут абыкІэ ахъшэшхуэ къилэжьыну. Ауэ Мария Библиер джын щІидзащ. Абы игу ирихьт Библием ит пэжхэр къищІэну икІи къищІэхэм я фІыгъэкІэ и гъащІэм зэрызихъуэжым щыгуфІыкІт. Абы жеІэ: «Си еплъыкІэмрэ дуней тетыкІэмрэ Библием ит принципхэм тету схъуэжыхукІэ нэхъ насыпыфІэ сыхъут». Мария къыгурыІуащ Алыхьыми и ныбжьэгъу хъуну мы дунейми мылъку щызэхуихьэсыну гугъу зэрыхъунур (Мт. 6:24). Гольф джэгуакІуэ цІэрыІуэ хъуну икІи мылъкушхуэ зэхуихьэсыну мурад иІар абы пэжым щхьэкІэ къигъэнащ. Мария пэжыр къищэхури пионер лэжьыгъэм щІидзащ. Иджы абы зэрыжиІэмкІэ ар насыпыфІэ дыдэщ икІи и гъащІэм мыхьэнэ иІэщ.

11. Библием ит пэжым дытету дыпсэууэ щІэддза иужь, ди ныбжьэгъухэмрэ ди Іыхьлыхэмрэ къызэрытхущытым дапхуэдэу зихъуэжынкІэ хъуну?

¹¹ Ди ныбжьэгъухэмрэ ди Іыхьлыхэмрэ. Библием ит пэжым дытету дыпсэууэ щІэддза иужь, ди ныбжьэгъухэмрэ ди Іыхьлыхэмрэ къызэрытхущытым зихъуэжынкІэ хъунущ. Сыт щхьэкІэ? Хьисэ абы и щхьэусыгъуэр къыдгуригъэІуащ и лъэужь ирикІуэхэм щхьэкІэ Алыхьым щелъэІуам: «Абыхэм пэжыгъэкІэ зыкъыуатын щІы. Уэ уи псалъэхэращ щыпкъэр» (Ин. 17:17). «Зыкъыуатын щІы» жыхуиІэ псалъэхэм иджыри «къыхэш» къикІыфынущ. Пэжыр къэтщта иужь дэ мы дунейм дыкъыхэкІауэ жыпІэ хъунущ, сыт щхьэкІэ жыпІэмэ афІэкІа дунейм и хабзэм дытету дыпсэукъым. Дэ лъапІэу тлъытэм икІи ди еплъыкІэм зехъуэж, абы и гъусэу цІыхухэр къызэрытхущытми зехъуэж. Иджы дэ Библием ит хабзэращ дызытетыр. ИкІи ди ныбжьэгъухэмрэ ди Іыхьлыхэмрэ гуапэу дахущытми, ахэр нэхъ тпэжыжьэ хъуфынущ е ди фІэщ хъум пэувыфынущ. Ар дэ дгъэщІагъуэкъым. Хьиси жиІауэ щытащ и унагъуэм исхэр цІыхум и бий зэрыхъунур (Мт. 10:36). Ауэ абы дыкъигъэгугъащ пэжыр къэтщэхуу щытмэ, къэдгъэнам нэхърэ нэхъыбэ къытІэрыхьэжыну. (Къеджэ Марк 10:28—30.)

12. Ди зы къуэшым пэжым сыт хуэдэ уасэ щІита?

¹² Ааро́н зицІэ зы цІыхухъум зэрыцІыкІурэ къыжраІэт Алыхьым и цІэр жыпІэ мыхъуну. Ар журт лъэпкъым щыщт. Ауэ итІанэми Аарон хущІэкъут Алыхьым теухуа пэжыр къищІэну. Зэгуэрым Иеговэ и Щыхьэту щыт гуэрым Алыхьым и цІэм укъызэреджэ хъунур абы къыгуригъэІуат: журтыбзэкІэ Алыхьым и цІэр щатхым деж хьэрф дэкІуашэу плІы къагъэсэбэп, ауэ а цІэм хьэрф зешэхэр хэбгъэувэу щытмэ, «Иеговэу» укъеджэфынущ. Аарон ар апхуэдизкІэ игу ирихьати, синэгуэгум кІуащ къищІамкІэ раввинхэм дэгуэшэну и мураду! Алыхьым и цІэм теухуауэ пэжыр къащІэмэ, ахэри гуфІэн и гугъащ абы. Ауэ ахэр гуфІакъым, атІэ абы теубжьытхэри, синэгуэгум къыщІахужащ. Ааронрэ и Іыхьлыхэмрэ я зэхущытыкІэри зэІыхьащ. Ауэ абы и Іэр ирихьэхакъым икІи адэкІи Иеговэ теухуауэ нэхъыбэ къищІэн щигъэтакъым. Аарон Иеговэ и Щыхьэт хъури, игъащІэ псокІэ Алыхьым хуэлэжьащ. Аарон хуэдэу дэри пэжым сыт хуэдэ уаси щІэттыну дыхьэзырщ, ди Іыхьлыхэмрэ дэрэ ди зэхущытыкІэр зихъуэжыну щытми.

13, 14. Пэжыр къэтщэхун щхьэкІэ ди гупсысэкІэмрэ дуней тетыкІэмрэ дапхуэдэу тхъуэжын хуей? Щапхъэ къэфхь.

¹³ Алыхьым ифІэмыфІ гупсысэкІэмрэ дуней тетыкІэмрэ. Гъуэгу пэжым утехьэу, Библием ит хабзэхэм утету упсэун щхьэкІэ, уи гупсысэкІэмрэ дуней тетыкІэмрэ пхъуэжын хуейщ. Апхуэдэ зэхъуэкІыныгъэхэм теухуауэ Петр итхащ: «Щыпкъагъэр зыхуэдэр фымыщІэу, фи хъуэпсэныгъэ Іейхэм Іэрылъхьэ фызэрыщытам хуэдэу, иджы Іэрылъхьэ зыхуэвмыгъэхъу, сабий ІурыщІэхэм хуэдэу. Ауэ... фи гур лъапІэу икІи къабзэу влэжь псори вгъэзащІэ» (1 Пет. 1:14, 15). Коринф къалэм дэсахэм мыхъумыщІагъэ куэд ящІэт. Абы къыхэкІкІэ абы дэсхэм я гъащІэм зэхъуэкІыныгъэшхуэхэр халъхьэн хуейт, Алыхьым и дежкІэ къабзэу щытын щхьэкІэ (1 Кор. 6:9—11). Ноби, абы хуэдэу пэжыр къащэхун щхьэкІэ куэдым Алыхьым ифІэмыфІ псэукІэр къагъэнэн хуейщ. Петр абы теухуауэ итхат: «Тхьэр зымыщІэ цІыхухэм я псэукІэм хуэдэу, фэри пасэрей зэманым фызэрыпсэууэ щытар куэдкъэ? МыхъумыщІэ псэукІэм зефтурэ фыпсэуащ, хъуэпсэныгъэ фІейхэм фыкърашэкІыу щытащ, удэфэнми ефэ-ешхэми щхьэрутІыпщу фыхэтащ. Тхьэ нэпцІ гъэлъэпІэным фыхэтащ» (1 Пет. 4:3).

¹⁴ Де́виннрэ Джа́сминрэ я щапхъэр зэпкърытхынщ. Ахэр илъэс куэдкІэ хуабжьу фадэ ефэу щытащ. Девинн бухгалтерыфІу щытами, фадэм зэрыдихьэхам и зэранкІэ зы лэжьыгъэми куэдрэ Іутыфтэкъым. Джасмини къэгубжьыгъуафІэу щытт. Зэгуэрым ар ефауэ гъуэгу здрикІуэм, Иеговэ и Щыхьэту щыт миссионеритІым хуэзащ. Абыхэм къыжраІащ Библиер иджыну хуеймэ, зэрыдэІэпыкъуфынур. Ауэ къыкІэлъыкІуэ тхьэмахуэм миссионерхэр Девиннрэ Джасминрэ я деж щыкІуам ахэр чэфу къыщІэкІащ. Абыхэм я гугъакъым миссионерхэм апхуэдэ гулъытэ къыхуащІыну. Ауэ иужькІэ щытрагъэзэжам, ахэр чэфтэкъым. Девиннрэ Джасминрэ Библием итыр къащІэну икІи абы тету псэуну занщІэу хущІэкъуу щІадзащ. Мазищым и кІуэцІым абыхэм ефэн щагъэтыжащ икІи ахэр зэдэпсэууэ арати, нэчыхь ирагъэтхащ. Девиннрэ Джасминрэ щыпсэу къуажэм дэсхэм абыхэм зэхъуэкІыныгъэ ящІахэм гу лъатати, куэдым Библиер джын щІадзащ.

15. Языныкъуэхэм пэжым сыт хуэдэ уасэ щІатыр икІи сыт щхьэкІэ?

¹⁵ Библием итым темыхуэ хабзэхэр. Языныкъуэхэм уасэ нэхъ ин дыдэу пэжым щІатыр — Библием итым темыхуэ хабзэхэр къызэрагъанэращ. Хэти и дежкІэ тыншщ Библием итыр къищІа иужь зытету щыта хабзэхэр къигъэнэну. Хэти и Іыхьлыхэм, къыдэлажьэхэм икІи и ныбжьэгъухэм къызэрытракъузэм щхьэкІэ апхуэдэ зэхъуэкІыныгъэхэр ищІыну хьэзыркъым. Ар нэхъ гугъуж хъункІэ хъунущ лІахэр гъэлъэпІэным пыщІа хабзэхэм Іуэхур нэса иужь (Втор. 14:1). Ауэ Алыхьым и лэжьакІуэ япэм псэуахэм я щапхъэм дыхуигъэушыфынущ дэри ди гъащІэм зэхъуэкІыныгъэхэр хэтлъхьэну. Псалъэм папщІэ, япэ лІэщІыгъуэм Ефес къалэм дэсахэм я щапхъэр дигу къэдгъэкІыжынщ.

16. Ефес къалэм дэс языныкъуэхэм сыт ящІар, пэжыр къащэхун щхьэкІэ?

¹⁶ Ефес къалэм Іэзэгъуазэм зыщиубгъуауэ щытащ. Іэзэгъуазэ Іуэхум хэта Хьисэ и лъэужь иувагъащІэхэм сыт ящІар, а Іуэхур Алыхьым и Псалъэм итым зэрыпэщІэувэр къыщащІам щыгъуэ? Библием итщ: «Удыгъэ Іуэхум хэт цІыху куэдым я тхылъхэр зэхуахьэсри, цІыху псоми ялъагъуу ягъэсащ. А тхылъхэм я уасэхэр къыщалъытэм, дыжьын ахъшэ мин щэ ныкъуэ хъуащ. Апхуэдэу, Зиусхьэным и псалъэхэм ину заубгъуурэ, цІыху нэхъыбэм ялъэІэсащ» (Апост. 19:19, 20). Алыхьым и лэжьакІуэ пэжхэм уасэшхуэ зиІэ я тхылъхэр ягъэсащ, абы щхьэкІэ Иеговэ фІыгъуэ куэд къахуищІэжащ.

17. 1) Пэжыр къэтщэхун щхьэкІэ сыт хуэдэ уасэ щІэттар? 2) КъыкІэлъыкІуэ статьям сыт щызэпкърытхынур?

¹⁷ Пэжыр къэфщэхун щхьэкІэ сыт хуэдэ уасэ фэ щІэфтар? Удз гъэгъам ещхь пэжхэр зэхуэтхьэсын щхьэкІэ дэ псоми абы зэман тедгъэкІуэдащ. Хэти пэжым щхьэкІэ ахъшэшхуэ къилэжьыну Іэмал иІар къигъэнащ, хэти и ныбжьэгъухэмрэ и Іыхьлыхэмрэ къызэрыхущытым зихъуэжащ. Куэдым я гупсысэкІэмрэ дуней тетыкІэмрэ яхъуэжащ е Библием итым темыхуэ хабзэхэр къагъэнащ. Ауэ сыт хуэдэ уасэ щІэдмытами, Библием ит пэжыр псом нэхърэ зэрынэхъ лъапІэм дэ шэч къытетхьэкъым. Абы и фІыгъэкІэ Иеговэ и ныбжьэгъу дохъу — абы нэхърэ нэхъыфІ зыри щыІэкъым! Пэжыр зэрытщІэм къытхуихь фІыгъуэхэм дыщегупсысым деж дэ къыдгурымыІуэнкІэ хъунущ нэгъуэщІхэм ар «щІащэжыр», нэгъуэщІу жыпІэмэ, къыщІагъанэр. Сыт апхуэдэу къыщІэхъур икІи сыт къыддэІэпыкъунур апхуэдэ щыуагъэ дымыщІэну? Мы упщІэхэм я жэуапхэр къыкІэлъыкІуэ статьям щызэпкърытхынущ.