Алыхьым и еплъыкІэ нэхъыбэу фызэриІэным адэкІи фыхущІэкъу!
«Тхьэм и Псэ ЛъапІэм [къару лъапІэм, ДЩІ] къызэриущийм тету фыпсэу» (ГАЛ. 5:16).
1, 2. Сыт ди зы къуэшым езым теухуауэ къыгурыІуэжар икІи сыт абы ищІар?
РО́БЕРТ илъэс 15 хъууэ псым зыщІигъэуат, ауэ Библием ит пэжыгъэм мыхьэнэшхуэ ириту жыпІэ хъунутэкъым. Абы жеІэж: «Сэ зыри Іей сщІэтэкъым, ауэ гъащІэ есхьэкІым куууэ сегупсыстэкъым. Зы лъэныкъуэкІэ Алыхьым и еплъыкІэ сиІэу сыпсэууэ къыпщыхъуфынут: сэ зэІущІэхэм сыкІуэт икІи илъэсым и кІуэцІым подсобнэ пионеру зыбжанэрэ сылажьэт. Ауэ сщІэм зыгуэр къыхуэтт».
2 Езы Роберт къишэхукІэ зыми гу лъитакъым. Иныкъуэхэм деж и щхьэгъусэмрэ езымрэ Библием тегъэщІа упщІэхэр зратыжт. Абы и щхьэгъусэм Библием итыр фІыуэ къыгурыІуэти, упщІэхэм я жэуапыр тыншу итыфт, ауэ Роберт куэдым и жэуапыр ищІэтэкъыми, абы ириукІытэжт. Абы жеІэж: «Сэ зыри сымыщІэу зыкъысщыхъужт. Абы щыгъуэ сегупсысащ: „Сэ унагъуэм и нэхъыжьу икІи Алыхьым и еплъыкІэ зиІэ цІыхуу сыщытыну сыхуеймэ, зыгуэр схъуэжын хуейщ“». ИкІи Роберт абы иужь ихьащ. Ар къыддогуашэ: «Библием сегугъуу седжэт, абы итыр къызэрызгурыІуэным къару есхьэлІэт, а псом и фІыгъэкІэ хуэм-хуэмурэ щІэныгъэ зэзгъэгъуэтахэр зэпысщІэу щІэздзащ. Библием итыр нэхъыфІу къызгурыІуэу щІэздзащ икІи, псом нэхърэ нэхъапэр, Иеговэрэ сэрэ ди зэхуаку дэлъ зэхущытыкІэр нэхъ быдэ зэрыхъуаращ».
3. 1) Роберт и щапхъэм дэ сытым дыхуигъасэрэ? 2) Мы статьям сыт хуэдэ упщІэхэр щызэпкърытхыну?
3 Роберт и щапхъэм дэ дерс хэтхыфынущ. Дэ Библием тегъэщІауэ щІэныгъэ гуэрхэр диІэ хъунщ икІи зэІущІэхэми дэдмыгъэхуу декІуалІэу, хъыбарыфІ гъэІунми дыхэту къыщІэкІынщ. Ауэ а псор зэрытщІэм щхьэкІэ, Алыхьым и еплъыкІэ зиІэ цІыху дыхъуауэ жыпІэ хъунукъым. Дэ Алыхьым и еплъыкІэ зиІэ цІыху дыхъун щхьэкІэ къару етхьэлІауэ ехъулІэныгъэ гуэрхэри диІэу къыщІэкІынщ, ауэ дэ къыдгуроІуэ абы адэкІи нэхъыфІыжу дызэрелэжьын хуейр (Флп. 3:16). Алыхьым и еплъыкІэ нэхъыбэу адэкІи зэдгъэгъуэтын щхьэкІэ мы статьям упщІищ щызэпкърытхынущ: 1) Алыхьым и еплъыкІэ диІэрэ димыІэрэ зэхэдгъэкІыну сыт къыддэІэпыкъунур? 2) Алыхьым и еплъыкІэ нэхъыбэу диІэну сыт къыддэІэпыкъунур? 3) Алыхьым и еплъыкІэ дызэриІэр махуэ къэс тщІэ Іуэхухэм дауэ къызэрыхэщыр?
АЛЫХЬЫМ И ЕПЛЪЫКІЭ ДИІЭРЭ ДИМЫІЭРЭ ЗЭХЭДГЪЭКІЫНУ СЫТ КЪЫДДЭІЭПЫКЪУНУР?
4. Ефес 4:23, 24 ит чэнджэщыр хэт сэбэп зыхуэхъунур?
4 Алыхьым дыхуэлэжьэн щыщІэддзам зэхъуэкІыныгъэ куэд ди гъащІэм хэтлъхьащ. Ауэ псым зыщІэдгъэуа иужьи дэ зытхъуэжын щыдгъэткъым. Библием дыкъыхуреджэ ди гум илъри, ди гупсысэкІэри адэкІи тхъуэжыну Алыхьыр зыдэдгъэІэпыкъуну (Еф. 4:23, 24). Дэ псоми гуэныхь тхэлъщ, абы къыхэкІкІэ адэкІи зытхъуэжын хуейщ. Илъэс куэд щІауэ Иеговэ дыхуэлажьэми, Іэмал имыІэу, Алыхьымрэ дэрэ ди зэхуаку дэлъ зэхущытыкІэр нэхъ быдэ тщІын хуейщ (Флп. 3:12, 13).
5. Зыдгъэунэхужыну сыт хуэдэ упщІэхэр къыддэІэпыкъуну?
5 Алыхьым и еплъыкІэ нэхъыбэу диІэн щхьэкІэ дэ зыдгъэунэхужын хуейщ. Дэ тщыщ дэтхэнэ зыми и ныбжьым емылъытауэ мы упщІэхэр зыритыж хъунущ: «Алыхьым и еплъыкІэ зиІэ цІыху балигъыу сыщытыну сызэрыхущІэкъур си дуней тетыкІэм къигъэлъагъуэрэ? Хьисэ щапхъэ тесхыну сыхущІэкъурэ? ЗэІущІэхэм сызэрыхущытымрэ абы сыкІуа иужь сиІэ щытыкІэмрэ сэ стеухуауэ сыт къагъэлъагъуэр? Сызытепсэлъыхьхэм тепщІыхьмэ, си гъащІэм сыт псом япэ изгъэщыр? Библие джыным икІи чэнджэщ къызатхэм сазэрыхущытым сэ стеухуауэ сыт къагъэлъагъуэр? Си щыгъынымрэ си теплъэмрэ щхьэкІэ сыт жыпІэ хъунур? ГъэунэхуапІэ сихуа иужь сыт сщІэр? Алыхьым и еплъыкІэ зиІэ цІыху балигъыу сыщытыну сызэрыхущІэкъур си дуней тетыкІэм къигъэлъагъуэрэ?» (Еф. 4:13). Мы упщІэхэм дызэрегупсысыр къыддэІэпыкъунущ Алыхьым и еплъыкІэ диІэрэ димыІэрэ зэхэдгъэкІыну.
6. Алыхьым и еплъыкІэ диІэрэ димыІэрэ зэхэдгъэкІын щхьэкІэ, сыт иджыри къыддэІэпыкъунур?
6 Алыхьым и еплъыкІэ диІэрэ димыІэрэ зэхэдгъэкІын щхьэкІэ, дэ иныкъуэм деж нэгъуэщІхэри зыдэдгъэІэпыкъун хуейщ. Апостол Паул зэрыжиІамкІэ, и Іэпкълъэпкъыр зыщІэхъуэпсым хущІэкъу цІыхум Алыхьым и пащхьэм зыгуэркІэ щыкъуаншэу къилъытэкъым. Ауэ абы елъытауэ, Алыхьым и еплъыкІэ зиІэ цІыхум Иеговэ сыт хуэдэ Іуэхугъуэми зэрыхущытыр къыгуроІуэ икІи сыт хуэдэ псэукІэр къемызэгъыу къилъытэми ещІэ (1 Кор. 2:14—16; 3:1—3). Зэхуэсым и нэхъыжьхэм Хьисэ и гупсысэкІэм хуэдэ зэраІэм щхьэкІэ, и Іэпкълъэпкъыр зыщІэхъуэпсым хущІэкъу цІыхум и гупсысэкІэ диІэу гу лъатэмэ, чэнджэщ къыдатынкІэ хъунущ. Зыхэтлъхьэну дэ чэнджэщ къыдатар? Апхуэдэу тщІэмэ, дэ абыкІэ къэдгъэлъэгъуэнущ Алыхьым и еплъыкІэ зиІэ цІыхуу дыщытыну дызэрыхуейр (Эккл. 7:5, 9).
АЛЫХЬЫМ НЭХЪ ГЪУНЭГЪУ ФЫХУЭХЪУН ЩХЬЭКІЭ АДЭКІИ КЪАРУ ЕФХЬЭЛІЭ
7. Алыхьым и еплъыкІэ зиІэ цІыху дыхъун щхьэкІэ, Библием ит щІэныгъэ диІэн закъуэр сыт мащІэу жыпІэ щІэхъунур?
7 Зыщывмыгъэгъупщэ: Алыхьым и еплъыкІэ зиІэ цІыху дыхъун щхьэкІэ Библием ит щІэныгъэ диІэн закъуэр мащІэщ. Пащтыхь Сэлмэн Иеговэ теухуауэ щІэныгъэшхуэ иІэт икІи абы жиІа псалъэхэр Библием иратхэжащ. Ауэ иужькІэ абы Алыхьым и еплъыкІэр фІэкІуэдащ икІи ар Иеговэ хуэпэжу къыхуэнакъым (1 Цар. 4:29, 30; 11:4—6). Библием ит щІэныгъэхэм нэмыщІ сыт-тІэ иджыри дызыхуейр? Ди фІэщхъуныгъэр адэкІи хэдгъэхъуэн хуейщ (Кол. 2:6, 7). Сыт абыкІэ къыддэІэпыкъунур?
8, 9. 1) Сыт къыддэІэпыкъунур ди фІэщхъуныгъэр нэхъ быдэ тщІыну? 2) Библием дыщІеджэм икІи дызэджам дыщІегупсысым сыт и щхьэусыгъуэу щытын хуейр? (Статьям ипэм ит сурэтым феплъ.)
8 Паул Хьисэ и лъэужь ирикІуэхэр къыхуриджэт: «Зи ныбжь нэса цІыхухэм зэрагъэщІэн хуей Іуэхухэм захуэдвгъэгъазэ» (Евр. 6:1). Дауэ а чэнджэщым дэ нобэ дызэрытетыфынур? Библием тегъэщІа тхыгъэхэм деджэмэ, Алыхьым и Псалъэм ит принципхэр ди гъащІэм къызэрыщыдгъэсэбэп хъунур къыдгурыІуэнущ. Абы ди фІэщхъуныгъэр нэхъ быдэ ищІынущ (Кол. 1:23). Абы нэмыщІ дэ къэтщІахэм дегупсысын хуейщ икІи Иеговэ делъэІун хуейщ ахэр ди гъащІэм къыщыдгъэсэбэпыну къыддэІэпыкъуну.
9 Зыщыдгъэгъупщэ хъунукъым: дыщІеджэм икІи дызэджам дыщІегупсысым и щхьэусыгъуэу щытын хуейр Иеговэ дгъэгуфІэну, абы и хабзэхэм дытетыну дызэрыхуейращ (Пс. 40:8; 119:97). ИкІи Алыхьым и еплъыкІэ адэкІи зэдгъэгъуэтыну зэран къытхуэхъу псори ІэщІыб тщІын хуейщ (Тит 2:11, 12).
10. ЩІалэгъуалэм Алыхьым и еплъыкІэ нэхъыбэу зрагъэгъуэтыну сыт къадэІэпыкъунур?
10 НыбжьыщІэхэ, Алыхьым нэхъ гъунэгъу фыхуэзыщІыну мурадхэр вгъэуврэ? Вефилым щылажьэ ди зы къуэшыр зэхуэсышхуэхэм кІуа иужь, псым зыщІэзыгъэуэну щІалэгъуалэм адэкІэ я мурадхэм теухуауэ йоупщІ. Абыхэм я нэхъыбэм Иеговэ дапхуэдэу хуэлэжьэнуми ящІэ: хэти полновременнэ лэжьыгъэр игъэзэщІэну хуейщ, хэти хъыбарыфІыр зыгъэІу цІыхухэм нэхъыбэу здыхуей щІыпІэхэм Іэпхъуэну мурад иІэщ. Ауэ языныкъуэхэм жэуап ятынур ящІэкъым. Ахэр емыгупсысыхэу къыщІэкІынщ Алыхьым зэрыхуэлэжьэным теухуауэ мурад гуэрхэр ящІын зэрыхуейм. Фэри фыщІалэу щытмэ, фызэупщІыж: «Сэ зэІущІэхэмрэ хъыбарыфІ гъэІунымрэ сыщІэкІуэр си адэ-анэр абы зэрыхуей закъуэра? Иеговэ и ныбжьэгъу сыхъуну сыхущІэкъурэ?» ДауикІ, Иеговэ нэхъ гъунэгъу ухуэзыщІыну мурадхэр щІалэгъуалэм ямызакъуэу псоми ягъэувын хуейщ. Апхуэдэ мурадхэр къыддэІэпыкъунущ Алыхьым и еплъыкІэ нэхъыбэу зэдгъэгъуэтыну (Эккл. 12:1, 13).
11. 1) Алыхьым и еплъыкІэ зиІэ цІыху балигъ дыхъун щхьэкІэ, сыт тщІэн хуейр? 2) Иеговэ и лэжьакІуэхэм щыщу хэт щапхъэ зытетх хъунур?
11 Зызэрытхъуэжын хуей гуэрым гу лъытта иужь, занщІэу абы елэжьын щІэддзэн хуейщ. Дэ дыхущІэкъун хуейщ Алыхьым и еплъыкІэ зиІэ цІыху балигъ дыхъуну. Къапщтэмэ, ди гъащІэр абы елъытащ (Рим 8:6—8). Иеговэ къытщыгугъкъым цІыху дагъуэншэу дыщытыну икІи ар и къару лъапІэмкІэ къыддоІэпыкъу езым и еплъыкІэм хуэдэ диІэну. Ауэ дэри езым къару етхьэлІэн хуейщ. УнафэщІ гупым хэта Джон Барр илъэс зыбжанэ ипэ Лука 13:24 тепсэлъыхьу мыпхуэдэу жиІауэ щытащ: «Куэдым яхузэфІэкІкъым „куэбжэ зэвымкІэ дыхьэну“, сыт щхьэкІэ жыпІэмэ абыхэм нэгъэсауэ къару ирахьэлІэкъым Алыхьым и еплъыкІэ зрагъэгъуэтын щхьэкІэ». Дэ Екъуб щапхъэ тетхын хуейщ. Ар мелыІычым ебэнащ икІи Алыхьым и нэфІ къыщыхуэху ар иутІыпщыжын идакъым (ЩІэдз. 32:26—28). ДауикІ, Библием дызэреджэм гуфІэгъуэ къытхуехь, ауэ дэ дегупсысын хуейкъым Библие джыныр тыншу щытыну, уздихьэх роман гъэщІэгъуэнхэм хуэдэу. Тхыгъэм ит налкъутхэр къэтлъыхъуэн щхьэкІэ, дэ къару етхьэлІэн хуейщ.
12, 13. 1) Филиппи 2:5 дыкъызыхуриджэм дытетыну сыт къыддэІэпыкъунур? 2) Апостол Петр и щапхъэмрэ абы къыдита чэнджэщымрэ сыткІэ сэбэп тхуэхъуну? 3) Алыхьым и еплъыкІэ нэхъыбэу диІэну сыт къыддэІэпыкъунур? («Алыхьым и еплъыкІэ нэхъыбэу фиІэну къывдэІэпыкъунур» рамкэм феплъ.)
12 Алыхьым нэхъ гъунэгъу зыхуэтщІыну дыхущІэкъумэ, Алыхьым и къару лъапІэм и фІыгъэкІэ дэ хуэм-хуэмурэ Хьисэ и гупсысэкІэм хуэдэ зэдгъэгъуэтыфынущ (Флп. 2:5). Абы нэмыщІ Алыхьым и къару лъапІэр къыддэІэпыкъунущ хъуэпсэныгъэ мыхъумыщІэхэр зыхэдну, Иеговэ ифІэфІ хьэл-щэнхэр зыхэтлъхьэну (Гал. 5:16, 22, 23). Мылъкумрэ нэгу зегъэужьынымрэ уи гъащІэм увыпІэ нэхъыщхьэ щиІыгъыу гу лъыптамэ щэ? Уи Іэр йомыхьэх! АдэкІи Иеговэ и къару лъапІэр къыуитыну елъэІу, ар къыбдэІэпыкъунущ Алыхьым пэжу къилъытэм уи гур тебухуэну (Лк. 11:13). Фигу къэвгъэкІыж апостол Петр. Абы Алыхьым и еплъыкІэ иІэу сыт щыгъуи и ІуэхущІафэхэм къыхэщтэкъым (Мт. 16:22, 23; Лк. 22:34, 54—62; Гал. 2:11—14). Ауэ Петр и Іэр ирихьэхтэкъым. Иеговэ къызэрыдэІэпыкъум и фІыгъэкІэ, абы хуэмурэ Хьисэ и гупсысэкІэм хуэдэ иІэ хъуащ. Дэри ар тхузэфІэкІынущ.
13 АбыкІэ къыддэІэпыкъуну хьэл-щэнхэм Петр иужькІэ и гугъу ищІащ. (Къеджэ 2 Петр 1:5—8.) Дэ къарууэ диІэр етхьэлІэн хуейщ «зышыІэныгъэр», «теубыдагъэр» икІи «зэкъуэшыныгъэр» зыхэтлъхьэн щхьэкІэ. Махуэ къэс мыпхуэдэ упщІэ зэптыж хъунущ: «Сыт нобэ сызэлэжьынур, Алыхьым и еплъыкІэ нэхъыбэу зэзгъэгъуэтын щхьэкІэ?»
БИБЛИЕМ ИТ ПРИНЦИПХЭР МАХУЭ КЪЭС КЪЭВГЪЭСЭБЭП
14. Алыхьым и еплъыкІэ дызэриІэр сыт къэзыгъэлъагъуэр?
14 Хьисэ и гупсысэкІэм хуэдэ дызэриІэр къыхэщынущ ди псэлъэкІэм, лэжьапІэмрэ школымрэ дыщиІэ щытыкІэм икІи махуэ къэс унафэ къатщтэхэм. Ди унафэхэм къыхэщын хуейщ Хьисэ и лъэужь дрикІуэну дызэрыхуейр. Дэ Алыхьым и еплъыкІэ диІэщи, Алыхьымрэ дэрэ ди зэхуаку дэлъ зэхущытыкІэм зыри зэран хуэдгъэхъуну дыхуейкъым. ГъэунэхуапІэ дихуэмэ, дэ дызыІэпызышэр занщІэу ІэщІыб зэрытщІыным иужь дитынущ. Ауэ унафэ къыщытщтэм деж дэ дыпІэщІэнукъым икІи мыпхуэдэ упщІэхэм дегупсысынущ: «Библием ит сыт хуэдэ принципхэр къыздэІэпыкъуну унафэ пэж къэсщтэну? Мыпхуэдэ Іуэхугъуэ Хьисэ пэщІэхуамэ, сытыт ищІэнур? Сыт хуэдэ унафэм Иеговэ игъэгуфІэну?» Апхуэдэ упщІэхэр зэттыжыну хьэл тхуэхъун хуейщ. Абы къыхэкІкІэ дызыпэщІэхуэнкІэ хъуну Іуэхугъуэ зыбжанэ зэпкърытхынщ. Дэтхэнэ зы Іуэхугъуэм щыгъуи унафэ пэж къэтщтэну къыддэІэпыкъуну Библием ит принципхэм деплъынщ.
15, 16. Алыхьым и еплъыкІэ дызэриІэр дауэ къызэрыддэІэпыкъур: 1) щхьэгъусэ къыщыхэтхкІэ? 2) ныбжьэгъу къыщыхэтхкІэ?
15 Щхьэгъусэ къыщыхэпхкІэ. 2 Коринф 6:14, 15 (къеджэ) ит принципыр абыкІэ къыбдэІэпыкъунущ. Паул жеІэ Алыхьым и еплъыкІэ зиІэ цІыхумрэ и Іэпкълъэпкъыр зыщІэхъуэпсым хущІэкъу цІыхумрэ зэрызэгурымыІуэфынур. Щхьэгъусэ къыщыхэпхкІэ дауэ ар къызэрыбдэІэпыкъунур?
16 Ныбжьэгъу къыщыхэпхкІэ. 1 Коринф 15:33 (къеджэ) ит принципым гу лъытэ. Алыхьымрэ дэрэ ди зэхуаку дэлъ зэхущытыкІэр ди дежкІэ лъапІэу щытмэ, ди фІэщхъуныгъэр махэ зыщІыну цІыхухэр ныбжьэгъу тщІынукъым. Егупсыс мы принципыр къызэрыбгъэсэбэп хъунум. Псалъэм папщІэ, социальнэ сетьхэр къызэрыбгъэсэбэпыным теухуауэ унафэ пщІыну дауэ мы принципыр къызэрыбдэІэпыкъунур? Е дауэ ар сэбэп къызэрыпхуэхъунур, умыцІыхухэм онлайну уадэджэгуну зыгуэрым къыбжиІэмэ?
Дауэ унафэ сщІыхэр къызэрыздэІэпыкъунур Алыхьым и еплъыкІэ зэзгъэгъуэтыну? (17-нэ абзацым феплъ.)
17—19. Алыхьым и еплъыкІэ дызэриІэр дауэ къызэрыддэІэпыкъур: 1) «лІэныгъэ къызыхэкІыну Іуэхухэр» ІэщІыб тщІыну? 2) Алыхьым нэхъ гъунэгъу дыхуэзыщІыну мурадхэр дгъэувыну? 3) мамырыгъэр зытедгъэувэжыну?
17 Алыхьым и еплъыкІэ диІэным зэран хуэхъу Іуэхугъуэхэр. Еврейхэм 6:1 (къеджэ) мыхьэнэшхуэ зиІэ чэнджэщ итщ. Дэ «лІэныгъэ къызыхэкІыну Іуэхухэр» ІэщІыб тщІын хуейщ, нэгъуэщІу жыпІэмэ Алыхьым и еплъыкІэ зэдгъэгъуэтыну зэран къытхуэхъу Іуэхугъуэ дэтхэнэми зыпыІуддзын хуейщ. Мы принципыр къыддэІэпыкъунущ къыкІэлъыкІуэ упщІэхэм жэуап еттыну: «Мы Іуэхур „лІэныгъэ къызыхэкІыну Іуэхухэм“ хиубыдэрэ? Ахъшэ нэхъыбэ къэзлэжьыну Іэмал къыкъуэкІмэ, сыт сщІэнур? Дунейр нэхъыфІ ящІын ягугъэу зэхъуэкІыныгъэ гуэрхэр къэзыгъэхъуну хэт гупхэм сыт сахыхьэн щІыхуэмейр?»
Дауэ унафэ сщІыхэр къызэрыздэІэпыкъунур Алыхьым нэхъ гъунэгъу сыхуэзыщІыну мурадхэр згъэувыну? (18-нэ абзацым феплъ.)
18 Алыхьым нэхъ гъунэгъу ухуэзыщІыну мурадхэр. Хьисэ Іуащхьэм тету жиІа псалъэхэм ІупщІу къыдгурагъэІуащ ди гъащІэм ипэ идгъэщын хуейр сытми (Мт. 6:33). Алыхьым и еплъыкІэ зиІэ цІыхум игъэув мурадхэр Алыхьым и Пащтыхьыгъуэм пыщІащ. Мы принципыр тщІэжмэ, мыпхуэдэ упщІэхэм жэуап еттыфынущ: «Школыр къэзуха нэужь щІэныгъэ нэхъыщхьэ зэзгъэгъуэтын хуейуэ пІэрэ? КъыкъуэкІа лэжьыгъэм сыув хъуну пІэрэ?»
Дауэ унафэ сщІыхэр къызэрыздэІэпыкъунур мамырыгъэм сыхущІэкъуну? (19-нэ абзацым феплъ.)
19 Зэдэуэнымрэ зэгурымыІуэныгъэмрэ. Рим дэсхэм апостол Паул чэнджэщ яритар дауэ къызэрыддэІэпыкъунур зэгурымыІуэныгъэ ди зэхуаку къыдыхьэмэ? (Рим 12:18). Дэ, Хьисэ и лъэужь ирикІуэхэр, «цІыху псоми фазэрыгурыІуэным фыхущІэкъу» жыхуиІэ псалъэхэм дызэрытетыным иужь дитщ. Дауэ дэ зэрызытщІыр жытІэм нэгъуэщІхэр арэзы щытемыхъуэм деж? НэгъуэщІхэм жаІэр къэтщтэну къыдэхьэлъэкІрэ, хьэмэрэ мамырыгъэм хущІэкъу цІыхуу дыщыт? (Екъуб 3:18).
20. АдэкІи Алыхьым и еплъыкІэ нэхъыбэу зэвгъэгъуэтыну сыт фыщІыхуейр?
20 Щапхъэ зэпкърытхахэм къагъэлъагъуэ Алыхьыр зыгъэгуфІэну унафэхэр къэтщтэн щхьэкІэ дауэ Библием ит принципхэр къыддэІэпыкъуфынуми. Алыхьым и еплъыкІэ дызэриІэм и фІыгъэкІэ ди гъащІэр нэхъ насыпыфІэ икІи мыхьэнэ иІэу мэхъу. Статьям ипэм дызытепсэлъыхьа ди къуэш Роберт жеІэ: «Сэ Алыхьым нэхъ гъунэгъу сыхуэхъуащ икІи абы и фІыгъэкІэ щхьэгъусэфІрэ адэфІрэ сыхъуащ. Абы хуабжьу сегъэгуфІэ!» Дэ Алыхьым и еплъыкІэ нэхъыбэу зэдгъэгъуэтмэ, Иеговэ и нэфІ къытщыхуэнущ. Дэ иджыпсту нэгъэсауэ насыпыфІэу дыщытыфынущ икІи къэкІуэну зэманым «мыкІуэдыжын гъащІэ» къытпэщылъщ (1 Тим. 6:19).