6-НЭ УРОКЫР

Библием ит едзыгъуэхэр цІыхухэм къагурыгъаІуэ

Иуан 10:33—36

ПЩІЭН ХУЕЙР: Библием щыщ пычыгъуэ укъеджа нэужь занщІэу адрей гупсысэм ухэмыхьэу, узытепсэлъыхьымрэ укъызэджамрэ зэрызэпхар ІупщІу къэгъэлъагъуэ.

АР ЗЭРЫПЩІ ХЪУНЫР:

Псалъэ нэхъыщхьэхэр къыхэгъэщ. Библием щыщ пычыгъуэ укъеджа нэужь гупсысэ нэхъыщхьэм епха псалъэхэр къыхэгъэщ. Ар пщІэ хъунущ, къытебгъэзэжу а псалъэхэр жыпІэмэ е къодаІуэхэм езыхэм а псалъэхэр къагъуэтыну хуэзыгъэуш упщІэ птымэ.

Едзыгъуэм и купщІэр уи псалъэкІэ щыжыпІэжкІэ Библием ит псалъэхэмрэ гупсысэ нэхъыщхьэмрэ зэрызэпыщІар къодаІуэхэм ІупщІу къагурыІуэрэ къагурымыІуэрэ кІэлъыплъ.
Гупсысэ нэхъыщхьэр къыхэгъэщ. Библием ит едзыгъуэм укъыщІеджэм и щхьэусыгъуэр укъеджэн ипэ жыпІауэ щытмэ, а едзыгъуэм хэт псалъэ нэхъыщхьэхэм а гупсысэр белджылы зэращІыр къэгъэлъагъуэ.

Библием ит пычыгъуэр щызэпкърыпхым деж Библиер зэІухауэ Іыгъ. Ар къодаІуэхэм къадэІэпыкъунущ укъызэджамрэ уи псалъэхэмрэ зэрызэпыщІар къалъэгъуну.
Нэхъ тыншу къазэрыгурыбгъэІуэнум иужь ит. Гупсысэ нэхъыщхьэм епхауэ щымыт мыхьэнэшхуэ зимыІэ Іуэхугъуэхэм куууэ утемыпсэлъыхь. Библием ит пычыгъуэм узэрытепсэлъыхьынум ущегупсысым деж къодаІуэхэм а темэм теухуауэ сыт ящІэми уигу игъэлъ.