7-НЭ УРОКЫР

Дзыхь зыхуэпщІ хъуну информацие

Лука 1:3

ПЩІЭН ХУЕЙР: КъодаІуэхэр гупсысэ пэжхэм къыхуэкІуэн щхьэкІэ, дзыхь зыхуэпщІ хъуну информацие къэхь.

АР ЗЭРЫПЩІ ХЪУНЫР:

Дзыхь зыхуэпщІ хъуну тхыгъэхэм зыхуэгъазэ. Уи псалъэхэм Библиер лъабжьэ хуэщІ икІи Іэмал зэриІэкІэ Библием итыр къиджыкІ. Уэ научнэ факт, хъыбарыщІэ, къэхъукъащІэ е нэгъуэщІ Іуэхугъуэ гуэр узытепсэлъыхьым щыхьэт техъуэну къэпхьу щытмэ, ар къыздипхам дзыхь хуэпщІ хъунрэ мыхъунрэ зэхэгъэкІ икІи а информацием зихъуэжарэ зимыхъуэжарэ къащІэ.
Библиемрэ нэгъуэщІ тхыгъэхэмрэ итыр пэжу къодаІуэхэм ябгъэдэлъхьэ. Библием ит едзыгъуэхэр контекстым, Библием и темэ нэхъыщхьэм техуэу, икІи «зэхэщІыкІ зиІэ, узыщыгугъ хъун унэІутым» и публикациехэм зэритым хуэдэу къодаІуэхэм ябгъэдэлъхьэ (Мт. 24:45). Тхыгъэ гуэрым итыр къэпхьу щытмэ, ар зытхам и гупсысэр умыхъуэж.

Фактхэмрэ бжыгъэхэмрэ зэбломыш. «Языныкъуэхэр» жыхуиІэ псалъэр — «и нэхъыбэ», «зэзэмызэр» — «сыт щыгъуи» е «къэхъункІэ хъунущ» жыхуиІэ псалъэхэр — «шэч хэмылъу къэхъунущ» зэромыщІыным хуэсакъ.
КъодаІуэхэр гъэгупсысэ. Библием ит едзыгъуэм е тхыгъэ гуэрым итым укъеджа нэужь, упщІэ ты е щапхъэ къэхьи, къодаІуэхэр гупсысэ пэжым къыхуэкІуэну ядэІэпыкъу.