Гузэвэгъуэшхуэ къыщыхъум деж, дауэ ди къуэш, ди шыпхъухэм дазэрыдэІэпыкъур?

Гузэвэгъуэшхуэ къыщыхъум деж, ар зылъэІэса ди къуэш, ди шыпхъухэм занщІэу дадоІэпыкъу. АбыкІэ ди лъагъуныгъэр къыдогъэлъагъуэ (Иуан 13:34, 35; 1 Иуан 3:17, 18). СыткІэ дэ абыхэм дазэрыдэІэпыкъур?

МылъкукІэ дадоІэпыкъу. Япэ лІэщІыгъуэм Иудей хэкум гъаблэ къыщыхъуам щыгъуэ, къуэш, шыпхъухэр егъэлеяуэ гугъу ехьт. Ауэ Антиохие щыпсэу Хьисэ и лъэужь ирикІуэхэр абыхэм ядэІэпыкъуащ (Апостолхэм 11:27—30). Абыхэм хуэдэу, нобэ дэри гугъу ехь ди къуэш ди шыпхъухэм тхузэфІэкІымкІэ дадоІэпыкъу (2 Коринф 8:13—15).

ІуэхукІэ дадоІэпыкъу. Гузэвэгъуэшхуэ къыщыхъуа щІыпІэм зэхуэсым и нэхъыжьхэм зэхуэсым хэтхэр зырызыххэу къалъыхъуэ, абыхэм я Іуэху зытетыр къащІэн щхьэкІэ. Гузэвэгъуэшхуэр къызылъэІэсахэм ядэІэпыкъун щхьэкІэ зэрагъэпэща комитетым ерыскъыр, псы къабзэр, щыгъыныр зэрегъэзахуэ. А комитетыр кІэлъоплъ къуэш, шыпхъухэм щыпсэун унэ зэраІэным икІи дохутыр хуэныкъуэхэм зэрадэІэпыкъуным. ІэщІагъэ гуэр зиІэ Иеговэ и Щыхьэтхэр а щІыпІэхэм къокІуэри ди къуэш, ди шыпхъухэм я унэхэмрэ дыщызэхуэс Унэхэмрэ ящІыж икІи абы щхьэкІэ зыми ахъшэ къыІрахкъым. Алыхьым и лэжьакІуэхэр зэрызэкъуэтым икІи фІыуэ зэрызэдэлэжьэфым и фІыгъэкІэ гузэвэгъуэшхуэ къызылъэІэсахэм псынщІэу дэІэпыкъуэгъу ягъуэт. Ди къуэш, ди шыпхъухэм дащыдэІэпыкъум деж, адрейхэри зыщыдгъэгъупщэкъым, абыхэм яІыгъ диным емылъытауэ (Галатие 6:10).

Я фІэщхъуныгъэр нэхъ быдэ зэрытщІынымрэ гукъыдэж зэреттынымрэ иужь дитщ. Гузэвэгъуэшхуэ къызылъэІэсар псом хуэмыдэу гупсэхугъуэм хуэныкъуэщ. Апхуэдэ зэман гугъум «гу зыгъэзагъэ псори къызыбгъэдэкІ» Иеговэ къару къыдет (2 Коринф 1:3, 4). Тхыгъэ ЛъапІэм ит гугъэ дахэмкІэ цІыхухэм дадэгуэшэну ди гуапэщ. Абы нэмыщІ Алыхьым и Пащтыхьыгъуэм куэд мыщІэу гузэвэгъуэ псоми кІэ зэрыритынур икІи афІэкІа гуауэрэ узрэ зэрыщымыІэжынур дэ абыхэм яжыдоІэ (Апокалипсис 21:4).

• Иеговэ и Щыхьэтхэр гузэвэгъуэшхуэ къызылъэІэсахэм занщІэу ядэІэпыкъуну щІахузэфІэкІыр сыт?

• Гузэвэгъуэшхуэ къызылъэІэсахэм я фІэщхъуныгъэр дауэ нэхъ быдэ зэрытщІыр?