Зэхуэсым и нэхъыжьхэр дауэ къызэрыддэІэпыкъур?

Ди организацэм дин пашэхэр диІэкъым икІи зыми лэжьапщІэ ираткъым. Япэ лІэщІыгъуэм щыІа зэхуэсхэм хуэдэу, дэ Алыхьым куэд щІауэ хуэлажьэ нэхъыжьхэр диІэщ. Абыхэм зэпымыууэ я нэІэ къыттрагъэтщ (Апостолхэм 20:28). Хэт хъуну зэхуэсым и нэхъыжьхэр? Ар Алыхьым куэд щІауэ пэжу хуэлажьэ икІи Алыхьым и еплъыкІэ зиІэ цІыхухъухэращ. Ахэр зэхуэсым кІэлъоплъ икІи мы псалъэхэр ягъэзащІэ: «Мэлыхъуэм и нэІэ мэлхэм зэратригъэтым хуэдэу, фэри Тхьэм и цІыхухэу фи деж щыпсэухэм мэлыхъуэ фахуэхъуи, фи нэІэ ятевгъэт, хэгъэзыхь хэмылъу, фи гуапэу, Тхьэм зэрыфІэзахуэм хуэдэу. Мылъкум фыщІэмыхъуэпсу, абыхэм фи фІэщу фахуэлажьэ» (1 Петр 5:1—3). Сыт абыхэм дэ къытхуащІэр?

Абыхэм зэхуэсыр яхъумэ. Ди нэхъыжьхэм Алыхьымрэ дэрэ ди зэхуаку дэлъ зэхущытыкІэфІхэм зэран хуэхъуфынум дыщахъумэ. Иеговэ я пщэм дилъхьа къалэнымкІэ абыхэм жэуап зэратыжынур къагуроІуэри, пхъашэу къытхущыткъым, атІэ гуфІэгъуэ къызэрыдатыным иужь итщ икІи сыт щыгъуи дифІ къалъыхъуэ (2 Коринф 1:24). МэлыхъуэфІым и мэл цІыкІухэр фІыуэ зэрицІыхум хуэдэу, зэхуэсым и нэхъыжьми зэхуэсым щыщ дэтхэнэ зы къуэш, шыпхъури зэрызригъэцІыхуным хущІокъу (Притчи 27:23).

Алыхьым и мурадым дытету дыпсэуну драгъасэ. Ди фІэщхъуныгъэр нэхъ быдэ хъун щхьэкІэ, зэхуэсым и нэхъыжьхэм тхьэмахуэ къэс зэІущІэхэр ирагъэкІуэкІ (Апостолхэм 15:32). Абыхэм хъыбарыфІыр нэхъыфІу дгъэІуфу драгъасэ икІи ди гъусэу а лэжьыгъэр ягъэзащІэ.

Абыхэм дэтхэнэ зыми гулъытэ къытхуащІ. Ди нэхъыжьхэр къыддоІэпыкъу Алыхьым гъунэгъу дыхуэхъуну. Абыхэм Тхыгъэ ЛъапІэр къагъэсэбэпу щІэгъэкъуэн къытхуэхъун икІи гупсэхугъуэ къыдатын щхьэкІэ, ди унэм къакІуэу е дыщызэхуэс Унэм деж къыщыдэпсэлъэфынущ (Екъуб 5:14, 15).

Нэхъыжьхэм я нэхъыбэм унагъуэ яІэщ. Абы къыхэкІкІэ зэхуэсым зэрыкІэлъыплъым нэмыщІ, ахэр лэжьэн икІи унагъуэм щаІэ къалэнхэр ягъэзэщІэн хуейщ. Псэемыблэжу лажьэ ди къуэшхэм лъагъуныгъэрэ пщІэрэ яхуэтщІыну къалэжь (1 Фессалоникэ 5:12, 13).

• Зэхуэсым и нэхъыжьхэм сыт хуэдэ къалэнхэр ягъэзащІэрэ?

• Ди нэхъыжьхэм дапхуэдэу гулъытэ къызэрытхуащІыр?