Иерихон и блынхэр

СЫТ Иерихон и блынхэр къыщІэуар? Бомбэшхуэ къытехуам хуэдэщ. Ауэ а зэманым бомбэ щыІакъым. Апщыгъуэм фоч къудей щыІакъым. Мыр иджыри Иеговэ ищІа зы телъыджэщ! ИІэт, къэтщІэнти къэхъуар сытми.

ЕдаІуэт, Иеговэ Исус Навин жриІэр сытми: «ЗэуэлІхэр уи гъусэу къалэр и хъуреягъкІэ къэфкІухь. Махуихым и кІуэцІкІэ ар зэрызэ къэфкІухь, зэгурыІуэныгъэм и пхъуантэр къыздефхьэкІыурэ. Пхъуантэм и пэ иту накъырэ епщэу кІуэн хуейщ дин пашибл.

Ебланэ махуэм фэ къалэр блэней къэфкІухьын хуейщ. ИтІанэ зэпывмыгъэууэ накъырэ кІыхьу фепщи псори макъышхуэкІэ фыгуоуи, блынхэр и лъабжьэм нэс зэтещэхэнущ!»

Исуси цІыхухэми Иеговэ жыхуиІа дыдэм хуэдэу ящІащ. КъыщакІухьым деж псори щымщ. Зы цІыхум зы псалъи жиІэкъым. Зэхэпхыр нэкъырэ макърэ лъэ макърэщ. Алыхьым къыхиха цІыхухэм я бий Иерихон дэсхэр Іейуэ шынэу къыщІэкІынущ. Плъагъурэ щхьэгъубжэм къыдэлэл кІапсэ плъыжьыр? Хэтыт ар зи щхьэгъубжэр? Пэжщ — Раав игъэзэщІащ тІасхъэщІэхитІым я унафэр. Абы и унагъуэр псори и гъусэу, къэхъу псоми кІэлъоплъ.

Иджы мис ебланэ махуэр къосри цІыхухэм блэней къалэр къакІухь, накъырэм йопщэ, мэгуоури — блынхэр къоуэ. ИтІанэ Исус Навин унафэ ещІ: «Къалэм дэс псори фыукІи езы къалэм мафІэ щІэвдзэ. Псори вгъэс. Дыщэр, дыжьыныр, гъуаплъэр, гъущІыр къэвгъани, мылъку гъэтІылъыпІэу Иеговэ и шатырым иІэм щІевгъалъхьэ».

Иисус тІасхъэщІэхитІым яжреІэ: «Раав и унэм фыкІуи и унагъуэмрэ езымрэ къыщІэфш»,— жеІэри. Рааврэ и унагъуэмрэ тІасхъэщІэхитІым къызэрагъэгугъам хуэдэу псэууэ къонэ.