Иеговэ си щІалэгъуэ лъандэрэ срегъаджэ

ИпэкІэ тІэкІу силъэда си гугъэщ. Іуэхур къызэрекІуэкІар зэрызэкІэлъыкІуэм хуэдэу вжесІэжмэ нэхъыфІщ. ЕтІуанэ дунейпсо зауэшхуэр екІуэкІыу, Канадэм щыІэ Ка́лгари къалэм сэ сыкъыщалъхуащ. 1940 гъэхэм и кІэм До́нальд Фре́йзер зицІэ къуэшыр ди бжэм къытеуІуащ. Ар ныбжькІэ щІалэт икІи пионеру лажьэт. Си анэр Библием ирагъэджэну занщІэу арэзы техъуащ икІи абы пэжыр фІыуэ илъагъуащ. Ауэ мамэ уз хэтІэса зэриІэм къыхэкІкІэ щІэх-щІэхыурэ зэІущІэхэр блигъэхун хуей хъут. Дауэ мыхъуами, 1950 гъэм мамэ псым зыщІигъэуащ. Ди жагъуэ зэрыхъунщи, абы иужькІэ илъэситІи дэмыкІыу си анэр дунейм ехыжащ. Абы щыгъуэ си адэр Иеговэ и Щыхьэту щымытми, мамэ щыщІэтлъхьэ махуэм къуэшхэм ящыщ зым псалъэ жиІэну абы хуит ищІащ.

Махуэ зыбжанэ дэкІауэ ныбжь зиІэ ди шыпхъу Э́лис сэ зэІущІэм сыкъригъэблэгъащ. Уафэм кІуэну гугъэ зиІэ а шыпхъур сэ сцІыхут, сыт щхьэкІэ жыпІэмэ мамэ и узыншагъэм къыщыхуидэм деж, сэ зэІущІэхэм сыздишэу щытат. Папэ идэнрэ имыдэнрэ сыщеупщІым, езыри зэ закъуэ накІуэу, псалъэ жызыІа къуэшым фІыщІэ хуищІыну мурад зэриІэр къызжиІащ. А пщыхьэщхьэм «Школа теократического служения», «служебная встреча» жыхуаІэ зэІущІэхэр екІуэкІт. Абы зэрытехуар фІы дыдэт, сыту жыпІэмэ папэ цІыхухэм я пащхьэ дахэу укъызэрыщыпсэлъэным хуеджауэ щытат. А зэІущІэм щызэхихар си адэм хуабжьу игу ирихьащ икІи абы мурад ищІащ тхьэмахуэ къэс абыхэм кІуэну. ИужькІэ абы адрей зэІущІэхэми кІуэуэ щІидзащ.

А зэманым «Школа теократического служения» жыхуаІэр езыгъэкІуэкІ къуэшым зэІущІэр щІидзэн ипэ, а Школым зыхезыгъэтха къуэшхэм я цІэхэр къриІуэт. Зи цІэр зэхэзыха дэтхэнэми «сыщІэсщ» жиІэн хуейт. Зэгуэр сэ а къуэшым селъэІуащ къыкІэлъыкІуэ зэІущІэм сэри си цІэр къриІуэну. А къуэшыр сэ къысщытхъуащ, ауэ абы къикІыр къызгурыІуэрэ къызгурымыІуэрэ зэхигъэкІакъым.

ДяпэкІэ псалъэхэр згъэхьэзырыну арэзы сызэрытехъуар сэ къызгурыІуэтэкъым. Сэ сызыхуейр адрейхэм я гъусэу сэри си цІэр къраІуэнырат. КъыкІэлъыкІуэ тхьэмахуэм си цІэр щызэхэсхам, «сыщІэсщ» жысІащ зызгъэщІагъуэу. ЗэІущІэ нэужьым сэ псори къысщытхъуащ. Тхьэмахуэ зыбжанэ дэкІри, ипэкІэ зи гугъу сщІа псалъэр згъэхьэзырыну къызатащ.

Абдежым сэ сызэрыхэлъэдар къызгурыІуащ! Иджыпсту ещхьу Библием щыщ пычыгъуэ дыкъеджэну абы щыгъуэ къыдаттэкъым. Дакъикъэ зыбжанэ хъу псалъэ дгъэхьэзырын хуейт. А псалъэр зэхэслъхьэну папэ къыздэІэпыкъуащ икІи зэІущІэм ар щыжысІэн ипэ, тІощІрэ къызигъэпщытэжащ. Псалъэр жысІа иужь, зэІущІэр езыгъэкІуэкІым чэнджэщ щхьэпэхэр къызитащ. Илъэс куэдым къриубыдэу Иеговэ куэдым сыхуигъэсащ, папэ, къуэш, шыпхъухэр икІи и организацэр къигъэсэбэпу.

АДЭКІИ ЩІЭ ГУЭРЫМ ЗЫХУЗОГЪАСЭ

ИпэкІэ зи гугъу сщІа ди шыпхъу Элис хъыбарыфІыр згъэІуу сригъасэт. А зэманым дэ япэщІыкІэ цІыхум Библием щыщ едзыгъуищ дыкъыхуеджэти, иужькІэ тхылъ етт. Элисрэ сэрэ гъуэрыгъуэурэ цІыхухэм депсалъэт. Ауэ сэ къыщыслъысым деж, Элис къригъажьэти, итІанэ япэ едзыгъуэм сыкъеджэну къызэлъэІут. Абы иужькІэ псалъэмакъыр сэ езым пысщэт: етІуанэ, ещанэ едзыгъуэхэм сыкъеджэти, цІыхум тхылъ естт. Хуэм-хуэмурэ псалъэмакъыр сэ езым къыщІэздзэфу зезгъэсащ. 1954 гъэм и кІэм папэ псым зыщІигъэуа нэужь, хъыбарыфІыр згъэІуу абы сригъасэу щІидзащ. Си адэм и закъуэу сипІами, абы хузэфІэкІ къигъэнакъым пэжыр фІыуэ слъагъуу сигъэсэн щхьэкІэ. Папэ и гур етауэ Алыхьым хуэлажьэт. Абы къыхэкІкІэ, цІыхухэр щыдэс махуэхэм дэ зэгъусэу хъыбарыфІыр дгъэІут икІи ди зэІущІэхэр зэи блэдгъэкІтэкъым.

Сэ сабий къызэрыгуэкІыу сыщытами, школым сыщеджа илъэс 12 къриубыдэу гъащІэм къыщысхуэсэбэпа куэдым зыхуезгъэсащ. Псалъэм папщІэ, сэ бжыгъэшхуэхэр зэхэслъхьэфу зезгъэсащ. Абы нэмыщІ текстхэр дахэу зэхэслъхьэфу срагъэсащ икІи английскэбзэм и грамматикэм теухуауэ сэ щІэныгъэфІ къызбгъэдалъхьащ. А псор сыщылажьэ писательскэ отделым иджыри къыздэсым къыщыздоІэпыкъу.

Музыкэр фІыуэ щІэслъагъумкІэ щІэх-щІэхыурэ къызоупщІ. Си адэ-анэм музыкэр фІыуэ ялъагъуу щытащ. Абы къыхэкІкІэ, илъэсибл сыщыхъум фортепианом зыхуезгъэсэну сратащ. Ауэ си егъэджакІуэм си зэфІэкІхэр игу ирихьыщатэкъыми, си адэм жриІащ ар къэзгъанэмэ нэхъыфІу. ИкІи, пэжыр жыпІэмэ, а зэманым сэ музыкэм апхуэдизуи сыдихьэхтэкъым.

Мазэ зыбжанэ дэкІри си адэм нэгъуэщІ егъэджакІуэ къысхуигъуэтащ. Иджы сэ фортепианом имызакъуэу, уэрэд жыІэнми зыхуезгъасэт икІи ехъулІэныгъэ хъарзынэхэр сиІэт. Сэ си макъыр дахэт (сопрано) икІи конкурс зыбжанэм текІуэныгъэ къыщысхьат. Сэ сыхуейт музыкэм епхауэ щІэныгъэ зэзгъэгъуэту, иужькІэ егъэджакІуэ сыхъуну. СызэригугъэмкІэ, а ІэщІагъэр сэ къыздэІэпыкъунут Алыхьым полновременнэу сыхуэлэжьэну. Ауэ зэман дэкІри сэ къызгурыІуащ ар мурадыфІу зэрыщымытыр. Сыт щхьэкІэ? Гармония, композиция, музыкэм и тхыдэ жыхуаІэ предметхэм я экзаменхэм зыхуэбгъэхьэзырын щхьэкІэ егъэлеяуэ зэман куэд ухуейт. Абы къыхэкІкІэ, 1963 гъэм сэ еджапІэр къэзгъанэри, общэ пионеру лэжьэн щІэздзащ.

ПИОНЕРУ СЫЗЭРЫЛАЖЬЭМ ГУФІЭГЪУЭ КЪЫСХУЕХЬ

Сэ общэ пионеру зы илъэскІэ сылэжьа нэужь, спецпионеру Онта́рио провинцием щыІэ Капуске́йсинг къалэ цІыкІум сагъэкІуащ. Сэ гъусэ схуащІащ ди къуэш Дэ́ниел Ски́ннер икІи ар сэр нэхърэ тІукІэ нэхъыжьт. Зэхуэсыр зэрызэгъэпэщам теухуауэ абы сэ куэд къызжиІэжт. Служебнэ комитетым сыщыхагъэхьам илъэс 20 фІэкІа сыхъутэкъыми, сэ куэдым зыхуезгъэсэн хуейт. Сэ икъукІэ си гуапэщ ди организацэм ди зэманми къуэш ныбжьыщІэхэр егъэджэным мыхьэнэшхуэ зэрыритыр. Абыхэм я къарури я зэфІэкІри Иеговэ и лэжьыгъэм трагъэкІуадэмэ, ныбжькІэ щІалэми пщІэ зыпылъ къалэнхэр къыхуагъэфэщэфынущ.

Капускейсинг къалэм гугъуехь щыдимыІауэ жысІэнкъым. ЩІымахуэм щІыІэр градус 44 нэст, нэхъ хуабэу къалъытэ махуэхэм щІыІэр градус 33 хъут. Дунейр зищІыІагъым Дэнрэ сэрэ и нэхъыбэм лъэсу къэткІухьын хуей хъут. Ауэ гуфІэгъуэ къысхуэзыхь куэди щыІэт. Псалъэм папщІэ, щхьэгъусэ схуэхъуа ди шыпхъу Ли́ндэ Ко́ул а къалэм сыщыхуэзащ.

Линдэ хъыбарыфІыр игъэІуну ифІэфІт икІи абы ар фІы дыдэу хузэфІэкІт. Ар цІыху хьэлэлт, гуапэт икІи цІыхухэм хуиту ядэуэршэрыфт. Линдэ и анэ Го́лди Алыхьым пэжу хуэлажьэ ди шыпхъут, ауэ и адэ А́ллен Иеговэ и Щыхьэтхэр игу ирихьтэкъым. И щхьэгъусэр къызэрыпэщІэтым емылъытауэ, Голди и бынищыр (Линдэ, Джон, Го́рдон) дыщызэхуэс Унэм сыт щыгъуи къыздищтэт икІи хъыбарыфІ гъэІун лэжьыгъэм хэтыфу иригъасэт. Щыри зэман гуэркІэ пионер лэжьыгъэм хэтащ. Илъэс зыбжанэ дэкІри пэжым къыпэщІэувэу щыта Аллен Иеговэ гъунэгъу зыхуищІри, зэхуэсым жыджэру хэту щІидзащ.

1965 гъэм, Канадэм щыІэ Вефилым зы мазэкІэ щекІуэкІ «Школа священного служения» жыхуаІэм сыкърагъэблэгъащ. Абы сыщеджэм Галаад Школым и анкетэ стхыну сыхуагъэушащ. ЗэфІэкІ сиІэхэр мащІэу къызэрыслъытэм къыхэкІкІэ миссионеру сылэжьэфыну сигугъэтэкъым. Абы емылъытауэ, анкетэр стхыри, сэ Галаадым и 42 классым сыкърагъэблэгъащ. А Школым дыщеджэм егъэджакІуэхэм ди ехъулІэныгъэхэр зэрыт письмохэр зэзэмызэ къыдатт. Япэу апхуэдэу къызата письмомкІэ къуэшхэм сыхуагъэушащ седжэхукІэ ди организацэм теухуауэ нэхъыбэ къэсщІэну. А чэнджэщыр си дежкІэ щхьэпэт, сыт щхьэкІэ жыпІэмэ а зэманым сэ илъэс 21 сыхъуу арат.

Галаад Школым дэ драгъэсащ СМИ-м и лэжьакІуэхэм дадэлэжьэфу. Си дежкІэ ар егъэлеяуэ гъэщІэгъуэнт, ауэ абы щыгъуэ сэ иджыри къызгурыІуэтэкъым а псор сэ дяпэкІэ къызэрысхуэсэбэпынур. Абы теухуауэ адэкІэ иджыри сытепсэлъыхьынущ.

СЕНЕГАЛ КЪЭРАЛЫМ СОІЭПХЪУЭ

Галаад Школыр къызэрызухрэ махуэ зыбжанэ дэкІауэ Майкл Хёле и гъусэу Африкэм щыІэ Сенега́л къэралым сагъэкІуащ. А зэманым Сенегал хъыбарыфІыр щызыгъэІухэр цІыхуищэ хуэдиз хъууэ арат.

Мазэ зыбжанэ дэкІауэ сэ къызэлъэІуащ тхьэмахуэм зэ филиалым сыщылэжьэну. «Филиал» хъужтэр миссионерхэр щыпсэу унэм и зы пэшырат. Филиалым и лэжьакІуэ ди къуэш Эммануэ́ль Патера́кис сыт щыгъуи сигу къигъэкІыжт филиалыр дапхуэдизу цІыкІуу щымытами, ар Иеговэ и организацэм а къэралым щрихьэкІ лэжьыгъэм зэрыкІэлъыплъыр. Зэгуэр ди къуэш Патеракис мурад ищІащ миссионерхэм зыгъэгушхуэн письмохэр яхуэттхыну. А зэманым тхыгъэхэр тыншу зэрыбгъэбэгъуэн Іэмалхэр щыІэтэкъым. Абы къыхэкІкІэ, письмо къэс зэрызыххэу печатнэ машинэмкІэ птхын хуейт. Лэжьыгъэр куэд хъут, сыт щхьэкІэ жыпІэмэ здэптхым зэ ущыуамэ, псори щІэрыщІэу къыщІэбдзэжын хуейт.

А пщыхьэщхьэ дыдэм унэм сыкІуэжын ипэ, ди къуэш Патеракис конверт къысхуишийри, мыпхуэдэу къызжиІащ: «Дейвид, ди организацэм къыбгъэдэкІ мы письмор къащтэ». ИужькІэ конвертыр къызэтесча нэужь, сэ езым стха письмохэм ящыщ зы абы къыдэсхащ. А Іуэхум сэ мыпхуэдэ дерс къыхэсхащ: Иеговэ и организацэм пщІэ хуэтщІыным мыхьэнэшхуэ иІэщ, абы и филиалыр инми цІыкІуми.

А щІыпІэм щыпсэу къуэш, шыпхъу куэд сэ ныбжьэгъу схуэхъуащ икІи щэбэт пщыхьэщхьэхэр и нэхъыбэм абыхэм я гъусэу згъакІуэт. Дэ иджыри къыздэсым дызэрощІэ. Сенегал къэралым сэ французыбзэт сызэрыщыпсалъэр икІи ар хуабжьу къысхуэсэбэпыжащ нэгъуэщІ филиалхэм сыщыкІуэхэм щыгъуэ.

1968 гъэм, Линдэрэ сэрэ дызэрышэну дызэгурыІуащ. Дэ Сенегал къэралым адэкІи пионеру дыщылэжьэну дыхуейти, къыкІэлъыкІуэ мазэ зыбжанэм къриубыдэу сэ абы хуэкІуэ лэжьыгъэ къэслъыхъуащ. Ауэ унафэщІхэм цІыху зыгъэлажьэхэм хуадэтэкъым хамэ къэралым къикІахэр къащтэну. Абы къыхэкІкІэ, сэ лэжьыгъэ лъэпкъ къысхуэгъуэтакъым. ИкІэм-икІэжым Канадэм згъэзэжын хуей хъуащ. Дэ дызэрышэри, Нью-Бра́нсуик провинцием щыІэ, Э́дмундстон къалэ цІыкІум спецпионеру дагъэкІуащ.

НЬЮ-БРАНСУИКРЭ КВЕБЕКРЭ ПИОНЕРУ ДЫЩОЛАЖЬЭ

Дэ Эдмундстон дагъэкІуэн ипэ, а къалэм ди къуэш, ди шыпхъу зыри дэсакъым, Библием ирагъаджэхэри цІыху зыбжанэ хъууэ арат. А зэманым католикхэм я дин пашэхэм езыхэм зыхуейр цІыхухэм ирагъащІэт. Псалъэм папщІэ, абыхэм я унафэкІэ унэ къэс жыхуаІэм хуэдэу «Иеговэ и Щыхьэтхэм ди гугъу къэвмыщІ» жиІэу табличкэ фІэлът. Ауэ дэ а табличкэхэм мыхьэнэ едмыту, унэ къэс дытеуІуэт. Католикхэм я зы организацэм тхьэмахуэ къэс газетым мыпхуэдэ объявление къытридзэт: «Ди къалэм дэс удхэм — Иеговэ и Щыхьэтхэм — кІэ едвгъэт!» Къалэм «уду» дэсыр цІыхуиплІт — Но́рберг Ви́кторрэ Ве́льдэрэ, абы нэмыщІ Линдэрэ сэрэ. Абы къыхэкІкІэ, зи гугъу ящІыр хэтми къыбгурыІуэну гугъутэкъым.

Районым и нэхъыжьыр япэу къыщыкІуар сэ иджыри къэс сощІэж. Тхьэмахуэм и кІэм абы мыпхуэдэу къыджиІащ: «Фэ куэд фхузэфІэмыкІми, мы щІыпІэм щыпсэухэм Иеговэ и Щыхьэтхэм теухуауэ еплъыкІэ тэмэм яІэну фадэІэпыкъумэ, ари куэд и уасэщ». Дэ абы и чэнджэщыр дгъэзэщІащ икІи ехъулІэныгъэ гуэрхэр диІауэ жыпІэ хъунущ. Хуэм-хуэмурэ цІыхухэм гу лъатэу щІадзащ католик дин пашэ пагэхэм елъытауэ, Иеговэ и Щыхьэтхэм Іэдэбагъ зэрахэлъыр. Иджыпсту Эдмундстон зэхуэс цІыкІу щыІэщ.

Эдмундстон илъэскІэ дыщылэжьа нэужь, дэ Квебек щыІэ зэхуэсышхуэм дыдэІэпыкъуну дагъэкІуащ. А зэхуэсым щыщ къуэш, шыпхъухэм хьэщІагъэ яхэлът икІи дэ ди гуапэу абыхэм дадэлэжьащ. Илъэс ныкъуэ дэкІри дэ районнэ лэжьыгъэм дыхэтыну дыкърагъэблэгъащ.

КъыкІэлъыкІуэ илъэс 14 дэ Квебек провинцием районнэ лэжьыгъэр щетхьэкІащ. Сыту зэманыфІт ар! Абы щыгъуэ хъыбарыфІ гъэІунымкІэ Квебек ехъулІэныгъэ щыдиІэт. Унагъуэ псом зэгъусэу Библиер щадж икІи псым зыщыщІагъауэ щІэх-щІэхыурэ тлъагъут.

КЪУЭШ, ШЫПХЪУХЭР ГУАПЭУ ДИГУ КЪЫДОГЪЭКІЫЖ

А провинцием щыпсэу къуэш, шыпхъухэр жыджэрт, цІыху зэІухат икІи гуфІэгъуэ я нэгум кърихт. Ахэр фІыуэ умылъагъункІэ Іэмал щыІэтэкъым. Ауэ а щІыпІэм цІыхухэм пэжыр къащтэну тынштэкъым, сыт щхьэкІэ жыпІэмэ я унагъуэм щыщхэр къапэщІэувэт. ЩІалэу пэжыр къэзыщІахэм я адэ-анэхэм мыпхуэдэу къыжраІэт: «Е Библие джыныр къэбгъэнэнущ е удэтхунущ!» Апхуэдэу ягъэшынэфахэр мащІэ дыдэщ. Ауэ теубыдагъэ зыгъэлъэгъуахэм Иеговэ ирипагэт!

А илъэсхэм Квебек щылэжьа общэ пионерхэмрэ спецпионерхэмрэ я щапхъэр жызмыІэжу хъунукъым. Абыхэм я нэхъыбэр Канадэм и нэгъуэщІ щІыпІэхэм къикІат. А пионерхэм французыбзэр зэрызрагъащІэм нэмыщІ, а щІыпІэм къыщекІуэкІ хабзэхэмрэ католикхэм я гупсысэкІэмрэ къагурыІуэн хуейт.

Спецпионерхэр щІэх-щІэхыурэ хъыбарыфІыр зыгъэІухэр здэщымыІэ щІыпІэ пхыдзахэм ягъакІуэт. ЦІыхухэм нэмыплъ къызэрыратым къыхэкІкІэ, абыхэм я дежкІэ гугъут фэтэру зыщІэсын унэ къагъуэтыну. Абы нэхърэ нэхъ гугъужыр лэжьыгъэ гуэр къагъуэтынырат. Ахъшэ мащІэ яІэр нэхъ зэгъэзэхуа хъун щхьэкІэ, зэрышагъащІэ нэгъуни адрейхэм ядэпсэун хуей хъут — цІыхуиплІ, цІыхуих е цІыхуий зэгъусэу. Спецпионеру улажьэу а щІыпІэм ущыпсэуну нэгъуэщІ Іэмал щыІэтэкъым. Сыту псэемыблэжт а пионерхэр! Зыгуэр Библием ирагъаджэу щыщІадзэм деж, а Іуэхум я гури я псэри халъхьэт. Иджыпсту Квебек хъыбарыфІыр щызыгъэІухэр мащІэкъым. Абы къыхэкІкІэ, а пионерхэм щыщу куэдыр хъыбарыфІыр ягъэІуну нэгъуэщІ щІыпІэхэм Іэпхъуащ.

Районнэ лэжьыгъэм дыщыхэтым щыгъуэ, дэ щэбэт махуэхэм ныбжьыщІэхэм я гъусэу хъыбарыфІыр дгъэІуну дыхущІэкъут. Абы и фІыгъэкІэ абыхэм Іэмал яІэт зыпэщІэхуэ гугъуехьхэмкІэ къыддэгуэшэну. А ныбжьыщІэхэм щыщу языныкъуэхэр иджыпсту хамэ къэралхэм миссионеру щолажьэ е пщІэ зыпылъ нэгъуэщІ къалэнхэр ягъэзащІэ.

А зэманым зэхуэсхэм ахъшэкІэ зыкъытщІагъэкъуэну Іэмал щамыІэ щІэх-щІэхыурэ къэхъут. Абы къыхэкІкІэ, мазэм и кІэм ахъшэ лъэпкъ диІэжтэкъым. Апхуэдэ къыщыхъум деж, дэ икІэм нэс Иеговэ дзыхь хуэтщІын хуейт. А зырат ди Іуэхур зыІутыр зыщІэр икІи ди Алыхьым дэ зэи дыкъигъэнакъым. Дауэ мыхъуами, дэ сыт щыгъуи Іэмал къэдгъуэтт зы зэхуэсым дикІыу адрей зэхуэсым дыкІуэну.

КЪУЭШХЭМ САЩЫДЭЛАЖЬЭМ ЗЫЗЫХУЕЗГЪЭСАР

Журналистхэм уазэрыдэлажьэ хъунум теухуауэ Галаад Школым къыщысщІар къызэрысхуэсэбэпам ипэкІэ и гугъу сщІащ. А илъэсхэм Квебек Іэмал куэд щыдиІэт ди фІэщхъуныгъэм теухуауэ радиом, телевидением икІи газетхэм дыкъыщыпсэлъэну. Сэ щІэх-щІэхыурэ дзыхь къысхуащІт районым и нэхъыжь Лео́нс Крепо́ сыдэІэпыкъуну. Абы фІы дыдэу хузэфІэкІт СМИ-м и лэжьакІуэхэм епсэлъэну. Псалъэм папщІэ, увыпІэ лъагэ зыІыгъ гуэрым щепсалъэкІэ, Леонс псори ищІэ хуэдэу зыкъыщигъэхъуну иужь иттэкъым. Абы жиІэт: «Си гъусэ щІалэмрэ сэрэ радиомрэ телевидениемрэ укъызэрыщыпсэлъэн хуейм теухуауэ мащІэщ тщІэр. Ауэ конгрессышхуэ едгъэкІуэкІынум дытепсэлъыхьыну къыдэлъэІуащи, фыкъыддэІэпыкъуамэ ди гуапэт». Леонс Іэдэбагъ хэлъу а Іуэхум зэрыбгъэдыхьэм дэ Іэмал куэд къытхузэІуихт.

ИужькІэ ди филиалыр къызэлъэІуащ юристу лажьэ ди къуэш Гле́н Ха́у сыдэлэжьэну. СМИ-м гулъытэншэу къимыгъанэ Іуэху нэхъ гугъухэм дэ зэгъусэу дыхэтт. Галаад Школым щызэзгъэгъуэта щІэныгъэмрэ ди къуэш Леонс сызэрыдэлэжьамрэ сэ хуабжьу къыздэІэпыкъут. Сыту гуапэт ди къуэш Глен удэлэжьэну! Ар судым и пащхьэм лІыгъэшхуэ хэлъу ди организацэм къыщхьэщыжт. Ауэ псом япэрауэ, Глен Иеговэ фІыуэ илъагъут икІи фІэщхъуныгъэ быдэ иІэт.

1985 гъэм, дэ Канадэм и къухьэпІэ лъэныкъуэмкІэ дагъэкІуащ. А щІыпІэм пэмыжыжьэу си адэр щыпсэут икІи а зэманым ар дэІэпыкъуэгъу хуэныкъуэт. Си жагъуэ зэрыхъунщи, мазищ дэкІри папэ дунейм ехыжащ. Дэ а щІыпІэм районнэ лэжьыгъэр 1989 гъэм нэс щетхьэкІащ. ИужькІэ США щыІэ Вефилым дыкъыщрагъэблэгъам хуабжьу дгъэщІэгъуащ. Илъэс 19 хуэдизкІэ дызыхэта районнэ лэжьыгъэр иджы къэдгъэнэн хуейт. А илъэсхэм къриубыдэу хьэщІагъэ зыхэлъ къуэш, шыпхъу куэд дэ зэдгъэцІыхуащ. Я унэм дыщыпсэуну дыкъезыгъэблэгъахэмрэ шэджагъуашхэ дэзыгъэщІахэмрэ дэ хуабжьу дахуэарэзыщ!

США ДОІЭПХЪУЭ

Бруклин дыщыІэпхъуам, сэ служебнэ отделым сагъэкІуащ. Абы сыщылэжьэху зызыхуезгъэсар иджыри къыздэсым фІыщІэ сощІ. Псалъэм папщІэ, сэ мыпхуэдэ дерс къыхэсхащ: зыгуэрым и Іуэхум теухуауэ унафэ пщІын ипэ, умыпІащІэу а Іуэхум теухуауэ псори къапщІэмэ нэхъыфІщ. ИужькІэ 1998 гъэм, писательскэ отделым сагъэкІуащ икІи нобэр къыздэсым сэ абы куэдым зыщыхузогъасэ. Писательскэ комитетым и координатору лэжьа ди къуэш Джон Барр илъэс зыбжанэм къриубыдэу сыдэлэжьащ. Абы сызэрыдэлэжьа зэманымрэ къызита щІэныгъэмрэ сэ лъапІэу солъытэ. Джон узыдэплъей хъун къуэшыфІ дыдэт!

Писательскэ отделым къуэш, шыпхъухэм садэлэжьэну сэ зыкІэ си гуапэщи! Абыхэм Іэдэбагъышхуэ ягъэлъагъуэ. Я лэжьыгъэр щагъэзащІэкІэ ахэр Иеговэ щогугъ икІи къагуроІуэ Алыхьым и къару лъапІэм зэрыхуэныкъуэр.

Линдэрэ сэрэ къэрал 110 дыщыІащ икІи абыхэм щыпсэу къуэш, шыпхъу куэд зэдгъэцІыхуащ. Абыхэм яхэтщ миссионерхэр, филиалым и комитетым хыхьэхэр икІи Алыхьым полновременнэу хуэлажьэ нэгъуэщІ куэд. Абыхэм псоми гурэ псэкІэ Иеговэ фІыуэ ялъагъу. Абы нэмыщІ зауэхэм, ахъшэм пыщІа гугъуехьхэм икІи къызэрырахуэкІым емылъытауэ, къуэш, шыпхъухэм Алыхьым и лэжьыгъэр япэ зэрырагъэщыр плъэгъуну икъукІэ гуапэт! Шэч лъэпкъ хэлъкъым абыхэм ягъэлъэгъуа теубыдагъэр Иеговэ лъапІэу зэрилъытэм.

Си къалэнхэр згъэзэщІэну си щхьэгъусэ Линдэ къызэрыздэІэпыкъур си дежкІэ лъапІэщ. Абы цІыхухэр фІыуэ елъагъу икІи адрейхэм зэрыдэІэпыкъун Іэмал сыт щыгъуи къелъыхъуэ. Абы нэмыщІ неформальнэу хъыбарыфІыр игъэІуну Линдэ фІы дыдэу хузэфІокІ. Си щхьэгъусэм и фІыгъэкІэ куэдым пэжыр къащІащ икІи Иеговэ пэжыжьэ хуэхъуахэм щыщу языныкъуэхэм къагъэзэжыну ар дэІэпыкъуащ. Иеговэ тыгъэ лъапІэу Линдэ къызитащ! Ди ныбжьыр хэкІуэтэхукІэ дэІэпыкъуэгъу дызэрыхуэныкъуэр зыхыдощІэ икІи ныбжькІэ нэхъ щІалэхэр къызэрыддэІэпыкъур дэ фІыщІэ дощІ. Ахэр ди гъусэщ ди къалэнхэр щыдгъэзащІэкІэ е зыщІыпІэ дыщыкІуэкІэ (Мар. 10:29, 30).

КъэзгъэщІа илъэс 80 сыщыхэплъэжым деж, си гум фІыщІэшхуэ илъщ. Псаломыр зытхам иІа гурыщІэхэм хуэдэ сэри сиІэщ: «Си щІалэгъуэ лъандэрэ сыбогъаджэ, си Алыхь, икІи уэ блэжьа Іуэху телъыджэхэр иджыри къыздэсым адрейхэм яхузоІуатэ» (Пс. 71:17). Мы псалъэхэм сытету адэкІи сыпсэуну сыхуейщ!