Дунеишхуэр зи ІэмыщІэ илъым дзыхь хуэфщІ

1. Іэиуб сыт хуэдэ гугъуехьхэм пэщІэхуа?

ПАСЭРЕЙ зэманым псэуа, Алыхьым и лэжьакІуэ Іэиуб и бынхэри, и узыншагъэри, и мылъкури фІэкІуэдат. Абы нэмыщІ цІыхухэми Іэиуб зыщадзейуэ икІи пщІэ хуамыщІыжу хъуат. Абы и ныбжьэгъу хуэдэхэми ар ягъэгушхуэным ипІэкІэ, я псалъэ гуауэхэмкІэ и гур хагъэщІт. Уеблэмэ, абы и щхьэгъусэми и лъэр зэрыщІэхуам къыхэкІкІэ, мыпхуэдэу къыжриІащ: «Алыхьым ебги, лІэ!» (Иов 2:9; 15:4, 5; 19:1—3). Іэиуб зыпэщІэхуа гуауэхэм къыхэкІкІэ, Иеговэ дзыхь хуимыщІыжу икІи абы и лэжьакІуэхэр къызэрихъумэм шэч къытрихьэу щІидзэнкІэ хъунут.

2, 3. Дэ сытым шэч къытетхьэу щІэддзэнкІэ хъуну икІи Иов тхылъым сыт къыдигъащІэр?

² Дэри «зэман гугъухэм» дызэрыщыпсэум къыхэкІкІэ, Иеговэ дзыхь зэрыхуэтщІыр зыгъэунэху гугъуехьхэм зэман-зэманкІэрэ дыпэщІохуэ (2 Тим. 3:1). ГъэунэхуапІэхэр зыр адрейм иужьым иту къыщыттегуплІэм деж, ахэр тхуэмышэчын ди гугъэу, хуабжьу дыгузавэу къыщІэкІынщ. Гугъуехьхэм къыхэкІкІэ, языныкъуэхэм Иеговэ къазэрыдэІэпыкъум шэч къытрахьэу щІадзащ.

³ Апхуэдэ гурыщІэхэр уэри уиІэмэ, уи Іэр йомыхьэх. Іэиуб езым и щхьэкІэ игъэунэхуащ Иеговэ къыхуэпэжхэр зэи къызэримыгъанэр. Дэри Иеговэ нэгъэсауэ дзыхь хуэтщІу икІи ар къызэрыддэІэпыкъунум, и нэфІи къызэрытщыхуэнум шэч къытедмыхьэу зедгъэсэфынущ. Сыт дэ абыкІэ къыддэІэпыкъунур? Иов тхылъым дыхэплъэнщи, мыхьэнэшхуэ зиІэ гупсыситІым гу лъыттэнщ: 1) дэ нэгъэсауэ Иеговэ дзыхь хуэтщІ хъунущ, сыт щхьэкІэ жыпІэмэ Дунеишхуэр зи ІэмыщІэ илъыр аращ; 2) Псори зыхузэфІэкІ ди Алыхьым дунейм къыщыхъуу хъуам и нэІэ тригъэтщ, и мурадри Іэмал имыІэу игъэзэщІэнущ икІи абырэ дэрэ ди зэхуаку дэлъ зэхущытыкІэр тхъумэн щхьэкІэ дызыхуэныкъуэу хъуар адэкІи къыдитынущ.

ШЕЙТІАНЫР «АБЫХЭМ КЪАХЭУВАЩ»

4. Иов тхылъым зи гугъу ищІ зэІущІэм щыІар хэт?

⁴ Иов 1:6 дыкъыщоджэ: «Зэгуэр Алыхь пэжым и къуэхэр Иеговэ и пащхьэм къыщызэхуэсащ. ШейтІаныри къакІуэри абыхэм къахэуващ». Библием япэ дыдэу «ШейтІан» цІэр къыщихьыр Иов тхылъыращ икІи абы къикІыр «бий» жиІэу аращ. А зэманым ШейтІаныр Алыхьым и къуэ пэжу щытыжтэкъым. ЩІэдзапІэм 3:15a ит Иеговэ и псалъэхэм къагъэлъагъуэ уафэм щыІэ и унагъуэм ШейтІаныр зэрыщымыщыжыр. Иегови, абы хуэпэж мелыІычхэми, цІыхухэми ШейтІаныр бий яхуэхъуащ.

5. Иов тхылъым ит Иеговэрэ ШейтІанымрэ я псалъэхэм сыт къыдгурагъаІуэр?

⁵ А зэІущІэм щыжаІа псалъэхэр Иеговэ Библием ирыригъэтхащ. ШейтІаным жиІа псалъэхэм къагъэлъагъуэ ар гущІэгъуншэу икІи пцІыупсу зэрыщытыр (Иов 1:9; евгъапщэ Апокалипсис 12:10). Иов тхылъым иджыри къегъэлъагъуэ Иеговэ гъунэ зимыІэ и тепщэныгъэр къыщигъэсэбэпым деж, пэжагъымрэ захуагъэмрэ зэрытетыр. Иджыри дэ абы къыдгурегъаІуэ Псори зыхузэфІэкІ Алыхьым нэгъуэщІхэм я хуитыныгъэм гъунэ зэрахуигъэувыр.

ИЕГОВЭ НЭГЪУЭЩІХЭМ Я ХУИТЫНЫГЪЭМ ГЪУНЭ ХУЕГЪЭУВ

6. Уафэм щекІуэкІа зэІущІэм къыщыхъуа псоми и нэІэ зэрытетар Иеговэ дапхуэдэу къызэригъэлъэгъуар? (Иов 1:7, 8).

⁶ Къеджэ Иов 1:7, 8. Уафэм щекІуэкІа зэІущІэм къыщыхъуа псоми Иеговэ и нэІэ тригъэтт. Ар ШейтІаным мыпхуэдэу еупщІащ: «Си лэжьакІуэ Іэиуб гу лъыптауэ пІэрэ?» Иеговэ ищІэт ШейтІаным Іэиуб лей тригъэхьэну мурад зэрищІар. АдэкІэ къэтщІэнщ Іэиуб ифІ къикІын щхьэкІэ, Иеговэ и тепщэныгъэр дапхуэдэу къигъэсэбэпами.

7. ШейтІаным Иеговэ и лэжьакІуэхэм сыт хуэдэ пцІыт ятрилъхьэр? (Иов 1:10, 11).

⁷ Къеджэ Иов 1:10, 11. Иеговэ — Псори зи ІэмыщІэ илъ Зиусхьэнщ икІи абы и къарумрэ и тепщэныгъэмрэ зэрыхуейм хуэдэу къегъэсэбэп (Иер. 32:17; Дан. 4:35). Ауэ ШейтІаным жиІащ Алыхьым и тепщэныгъэмкІэ иригъэлейуэ. НэгъуэщІу жыпІэмэ, ШейтІаным жиІэт Іэиубрэ нэгъуэщІ цІыхухэмрэ я пэжагъыр Иеговэ къищэхуу. Абы нэмыщІ ШейтІаным Алыхьым ириІуэкІт цІыхухэр я фейдэ щхьэкІэ абы хуэлажьэу. Дапхуэдэу Иеговэ ШейтІаным жэуап зэрыритар?

8, 9. Иеговэ ШейтІаным сыт хуэдэ гъунэхэр хуигъэува икІи сыт щхьэкІэ? (Иов 1:12). (Сурэтми феплъ.)

⁸ Къеджэ Иов 1:12. Алыхьым ШейтІаным Іэмал иритащ Іэиуб игъэунэхуну, ауэ абы ищІэ хъунум теухуауэ гъунэ хуигъэуващ. «Абы езым уемыІусэ» жиІэри, Иеговэ ШейтІаным унафэ пыухыкІа хуищІащ. Иеговэ жиІа псалъэхэр а зэІущІэм щыІа псоми зэхахащ. Алыхьым къыхуищІа унафэм ШейтІаныр ебэкъуэну Іэмал иІэтэкъым, ноби зыми зихъуэжакъым. Апхуэдэу Иеговэ и къарумрэ и тепщэныгъэмрэ къигъэсэбэпащ захуагъэрэ лъагъуныгъэрэ зэрыхэлъыр къигъэлъэгъуэн икІи Іэиуб къыщхьэщыжын щхьэкІэ.

⁹ ШейтІаным Іэиуб япэу зэригъэунэхуам зыри къикІакъым. Іэиуб уафэм щыІэ и Адэм пэжу къыхуэнащ (Иов 1:22). Ауэ ШейтІаныр абыкІэ къэувыІакъым.

10. Іэиуб адэкІи игъэунэхуну Иеговэ ШейтІаныр хуит щІищІар сыт? (Иов 2:2—6).

¹⁰ Къеджэ Иов 2:2—6. Иджы ШейтІаным и губжьыр нэхъ Іейуэ Іэиуб трикъутэу щІидзащ. Абы жиІэт и гъащІэр къригъэлын щхьэкІэ Іэиуб сытри ищІэну хьэзыру, уеблэмэ, Алыхьми ебгыну. А упщІэр зэхэгъэкІа хъун щхьэкІэ, Иеговэ ШейтІаныр хуит ищІащ Іэиуб уз хьэлъэ иригъэуэлІэну. Ауэ абы щыгъуэми «абы и гъащІэм уемыІусэ» жиІэри, Алыхьым ШейтІаным гъунэ хуигъэуващ. Иеговэ жиІам фІэкІыну ШейтІаным зы Іэмали иІакъым. Аращи, Иеговэ иджыри зэ къигъэлъэгъуащ тепщэныгъэ псори и ІэмыщІэ зэрилъыр икІи абы игъэува гъунэм фІэкІыну ШейтІаным хузэфІэкІакъым.

ИЕГОВЭ ІЭИУБ И ГУГЪУЕХЬХЭМ КІЭ ИРИТАЩ

11. Іэиуб и гугъуехьхэм кІэ ирита иужь, Иеговэ абы дапхуэдэу и нэфІ зэрыщыхуар? (Иов 42:10—13).

¹¹ Къеджэ Иов 42:10—13. Іэиуб сыт и лъэныкъуэкІи Алыхьым хуэпэжу къызэрынэнур наІуэ хъуа иужь, Иеговэ ШейтІаным хуидакъым ар адэкІи игъэунэхуну. Алыхьым Іэиуб и гугъуехьхэм кІэ иритащ. Абы щыгъуи Иеговэ жиІам фІэкІыу, ШейтІаныр Іэиуб адэкІи теуэну зы Іэмали иІакъым.

12. Иеговэ и къарум щыгугъахэм я фІэщхъуныгъэм къыпэкІуам и щапхъэ къэфхь.

¹² Мы дунейм и иужьрей махуэхэм куэдым я щхьэкІэ ягъэунэхуащ Иеговэ и лэжьакІуэхэр къригъэлыну къару зэриІэр. Псалъэм папщІэ, 1945 гъэм, концлагерым иса 230 хъу Иеговэ и Щыхьэтхэр «марш смерти» жыхуаІэ Іуэхугъуэ шынагъуэм къелащ. Абы иужь абыхэм мыпхуэдэ псалъэхэр зэрыт резолюцие зэхалъхьащ: «ГъэунэхуапІэ гугъухэм дыщыпэщІэхуа зэман кІыхьыр икІэм нэсащ. Дэ мафІэкІэ зыщІэблэ хьэкум дыкърагъэла хуэдэщ икІи Іугъуэмэ лъэпкъ къыткІэрихкъым. [...] Уеблэмэ, дэ Иеговэ и къарур хуабжьу зыхыдощІэ...» Абыхэм иджыри мыпхуэдэу ятхащ: «...аслъэнхэр зэрыс мащэм диса [иужь]... дэ дызыхуейр зыщ... игъащІэ псокІэ... Иеговэ дыхуэлэжьэну хуит дищІыну. А зы закъуэр ди дежкІэ егъэлеяуэ тыгъэшхуэу щытынут». (Евгъапщэ Даниила 3:27; 6:22.)

13. Гугъуехьхэм фыщыпэщІэхуэм деж сытым шэч къытевмыхьэми хъуну? (Сурэтхэми феплъ.)

¹³ Дэри иныкъуэхэм деж аслъэнхэр зэрыс мащэм драдзауэ къытщыхъункІэ хъунущ (1 Пет. 5:8—10). Дэ ди лъэр щІэхуауэ щытыфынущ икІи ди гугъуехьхэм зэи кІэ ямыІэну дегупсысынкІэ хъунущ. Апхуэдэхэм деж Іэиуб и щапхъэр дигу къэдгъэкІыжыным мыхьэнэшхуэ иІэщ. Ди гугъуехьхэм кІэ иритыну Алыхьым къару зэриІэм шэч къытедмыхьэми хъунущ. Абы ар Іэмал имыІэу ищІэнущ е иджыпсту е дунеищІэм. Иеговэ хуит ищІынукъым ШейтІаным и ІэмыщІэ илъ дунейм хуигъэува зэманым нэхърэ нэхъыбэ щыІэну.

ИЕГОВЭ И ЛЭЖЬАКІУЭ ПЭЖХЭР ФІЫУЭ ЕЛЪАГЪУ

14, 15. Иеговэ и лэжьакІуэ пэжхэм щхьэкІэ сыт ищІэну зыхуейр икІи сыт щхьэкІэ? (Иов 14:15). (Сурэтми феплъ.)

¹⁴ Къеджэ Иов 14:15. Уафэм щыІэ ди Адэ лъапІэм и гур псом хуэмыдэу къыхуэпэжхэм кІэрыпщІащ. Абы апхуэдэ цІыхухэр лъапІэу елъытэ икІи абыхэм я гъащІэр яфІэкІуэд хъумэ, къигъэтэджыжынущ. ЛІэныгъэм къихь гуауэр Алыхьым зэрыщыту Іуихынущ (Ис. 65:17).

¹⁵ Іэиуб щыпсэуа дунейр адэкІи ШейтІаным и ІэмыщІэ илъами, Библием итщ Иеговэ ар узыншэ зэрищІыжар икІи иІам нэхърэ нэхъыбэ зэрыритыжар. Алыхьым Іэиуб и нэфІ зэрыщыхуэнум ар и щІэдзапІэ дыдэу арат. Иеговэ къигъэлъэгъуащ абы и лэжьакІуэ пэжхэм нэгъэсауэ гуфІэгъуэрэ насыпрэ зыхащІэу псэуну зэрыхуейр. Абы къыхуэпэж псоми Іэмал яритынущ жэнэт хъужа щІылъэм щыІэну гъащІэ дахэмкІэ затІыжыну (Апок. 21:3, 4). Иеговэ и лэжьакІуэхэм щхьэкІэ ар ищІэну хуейщ икІи абы зыри зэран хуэхъуфынукъым, сыт щхьэкІэ жыпІэмэ Дунеишхуэр зи ІэмыщІэ илъыр аращ. Гугъуехьхэм дыщыпэщІэхуэм деж, мы гупсысэм сыту гупсэхугъуэ къытхилъхьэрэ!

16. Дунеишхуэр зи ІэмыщІэ илъ Иеговэ иджыри дзыхь щІыхуэтщІ хъунур сыт?

¹⁶ Іэиуб гъащІэ кІыхь ирихьэкІа иужь лІащ. Ауэ Дунеишхуэр зи ІэмыщІэ илъ икІи Псори зыхузэфІэкІ ди Алыхь Иеговэ лІэныгъэми тепщэныгъэ хуиІэщ (Втор. 32:39). Алыхьым фІыуэ илъагъухэр къыщигъэтэджыжыну махуэр триухуакІэщ икІи абы зэран хуэхъуфын зыри щыІэкъым (Рим 8:38, 39).

ИЕГОВЭ НЭГЪЭСАУЭ ДЗЫХЬ ХУЭФЩІ

17. ШейтІаным Алыхьым и лъэпкъыр игъэкІуэдыну зэрыхузэфІэмыкІар сытым къыхэщрэ?

¹⁷ Іэиуб теухуауэ Библием ит хъыбарым къегъэлъагъуэ Иеговэ нэгъэсауэ дзыхь хуэтщІ зэрыхъунур. Дэ хуабжьу ди гуапэщ ШейтІаным Алыхьым и лъэпкъыр игъэкІуэдыну зэрыхузэфІэмыкІар. Нобэ цІыху мелуанибгъу хуэдиз Иеговэ пэжу хуолажьэ икІи ар щыхьэт тохъуэ Дунеишхуэр зи ІэмыщІэ илъым и къарум гъунэ зэримыІэм. Дэ мызэ-мытІэу тлъэгъуащ къытпэщІэувэн щхьэкІэ ящІа Іэщэм ехъулІэныгъэ зэримыІар (Ис. 54:17). Иеговэ и лъэпкъым къыщхьэщыжын имыІэу къыпщыхъункІэ хъунущ, ауэ тепщэныгъэшхуэ зиІэ къэрал унафэщІхэми дин пашэхэми а лъэпкъыр къагъэувыІэну яхузэфІэкІакъым. Алыхьым теухуа пэжымрэ ШейтІаныр пцІыупсу икІи цІыхуукІыу зэрыщытымрэ дгъэІуну зыри зэран къытхуэхъуфынукъым. Уеблэмэ, ди гъащІэр тфІэкІуэдыну шынагъэ щыІэми, дэ дыкъэувыІэнукъым, сыт щхьэкІэ жыпІэмэ Иеговэ и лэжьакІуэ пэжхэр къызэригъэтэджыжынур дощІэ (Ос. 13:14).

18. КъэкІуэну зэманым дыщышынэн щІыхуэмейр сыт?

¹⁸ Іэиуб теухуа хъыбарым ди фІэщхъуныгъэр егъэбыдэ икІи къэкІуэну зэманым дыщышынэн зэрыхуэмейр дегъэлъагъу. Гузэвэгъуэшхуэм щІидза иужь къыпщыхъункІэ хъунущ Алыхьым и лъэпкъыр тегушхуэгъуафІэу икІи ШейтІанымрэ абы и лъэныкъуэр зыІыгъхэмрэ нэхъ къарууфІэу щыту. Ауэ Іэиуб и зэманым хуэдэуи Иеговэ къэхъуну псоми и нэІэ тригъэтынущ икІи и лъэпкъыр ШейтІаным игъэкІуэдыну хуит ищІынукъым. ШейтІаным и зэранкІэ цІыхубэр зыхэт гугъуехьхэр Алыхьым щигъэкІуэдыну зэманыр псынщІэ Іейуэ къоблагъэ. Иблисымрэ абы и жин бзаджэхэмрэ «щІым и кууупІэу щІэ зимыІэм» илъэс 1 000 ирадзэнущ (Лк. 8:31; Апок. 20:1—3). Абы иужькІэ ШейтІанымрэ абы и лъэныкъуэр зыІыгъхэмрэ Иеговэ игъащІэкІэ игъэкІуэдынущ (ЩІэдз. 3:15; Рим 16:20; Апок. 20:10).

19. Иеговэ нэгъэсауэ дзыхь хуэзыщІхэм сыт хуэдэ фІыгъуэхэр къапэщылъ? (Сурэтми феплъ.)

¹⁹ Дэ къытхуэмыгъэсу дыпоплъэ нэгъэсауэ насыпыфІэу икІи дагъуэншэу дыщыпсэуну дунеищІэм. Абы дыщиІэну гъащІэр дызэригугъэм нэхърэ куэдкІэ нэхъыфІу щытынущ. Иеговэ мыпхуэдэу дыкъегъэгугъэ: «Іуэху псори щІэуэ солэжь» (Апок. 21:5). ШейтІанымрэ жин бзаджэхэмрэ афІэкІа цІыхухэм Іей иращІэфынукъым икІи лей зрахьэну, хабзэншагъи ящІэну ахэр хуагъэушыфынукъым. Абы щыгъуэ дэ сыту дытыншыжыну! Мы дунеижьым гугъу дезыгъэхь Іуэхугъуэхэм афІэкІа дагъэпІейтеижынукъым. Армагеддоным пхырыкІынухэм телъыджэ куэд ялъэгъунущ, псалъэм папщІэ, цІыхухэр узыншэ зэрыхъужыр икІи лІахэр къызэрытэджыжыр. Уафэм щыІэ ди Адэ лъапІэм япэм иІа мурадым хуэдэу гъащІэр щытынущ!

20. Сыт уэ пщІэну уи мурадыр?

²⁰ Мы иужьрей махуэхэм дэ гъэунэхуапІэ зэмылІэужьыгъуэхэм дыпэщІохуэ икІи Алыхьым хуэпэжу дыкъэнэн щхьэкІэ лІыгъэ дыхуэныкъуэщ. Абы къыхэкІкІэ, мыхьэнэшхуэ иІэщ Иеговэ нэгъэсауэ дзыхь хуэтщІыным икІи и тепщэныгъэр дэтІыгъыным. Аращи, адэкІи дгъэлъэгъуэнщ уафэм щыІэ ди Адэр фІыуэ зэрытлъагъур икІи ШейтІаныр зэрыпцІыупсыр къыщІэдгъэщынщ. Дэ шэч лъэпкъ къытедмыхьэми хъунущ Иеговэ хуэпэжу дыкъанэмэ, гъащІэ дахэ дызэриІэнум, сыт щхьэкІэ жыпІэмэ езы Иеговэ хуейщ и лэжьакІуэ пэжхэм и нэфІ щыхуэну икІи ар Іэмал имыІэу ищІэнущ!