Псым зыщІэбгъэуэну мурад гъэув

1. 1) Псым зыщыщІэдгъауэм деж, ди гъащІэм дапхуэдэу фІыкІэ зэрызихъуэжыр? 2) Мы статьям сыт щызэпкърытхынур?

УИ ГЪАЩІЭР Иеговэ и ІэмыщІэ иплъхьэу псым зыщІэбгъэуамэ, напэ къабзэ къыуитыну Алыхьым уелъэІуауэ жыпІэ хъунущ (1 Пет. 3:21). Апхуэдэу щытмэ, пэж дыдэу Іущагъ зыхэлъ унафэ уэ къэпщтащ. Абы нэмыщІ ныбжьыщІэхэмрэ иджы дыдэ пэжыр къэзыщІахэмрэ щапхъэфІ ебгъэлъэгъуащ. Ауэ уэ иджыри псым зыщІомыгъэуамэ-щэ? Шэч хэмылъу уэ Иеговэ фІыуэ болъагъу икІи ар бгъэгуфІэну ухуейщ. Иджыри уэ бощІэ Алыхьым уи гуэныхьхэр къыпхуигъэгъуу, абы ныбжьэгъу ухуэхъун щхьэкІэ, псым зыщІэбгъэуэн зэрыхуейр (Апост. 2:38—40). Ауэ а лъэбакъуэр пчыну уэ зыгуэр зэран къыпхуэхъуу къыщІэкІынщ. Сыт-тІэ уэ къыбдэІэпыкъунур? Мы статьям дэ щызэпкърытхынущ: 1) псым зыщІагъэуэну языныкъуэхэр щІытемыгушхуэр; 2) мы дунейм и кІэр къызэрысар зыщыдгъэгъупщэн щІыхуэмейр; 3) едмыгъэтІылъэкІыу, ди гъащІэм зэхъуэкІыныгъэ хэтлъхьэу, псым зыщІэдгъэуэн щІыхуейр.

ПСЫМ ЗЫЩІАГЪЭУЭНУ ЯЗЫНЫКЪУЭХЭР ЩІЫТЕМЫГУШХУЭР

2. Языныкъуэхэм псым зыщІагъэуэну сыт зэран къахуэхъур?

² Языныкъуэхэм псым зыщІагъэуэну шынэр зэран къахуохъу. Псалъэм папщІэ, мыпхуэдэу къэхъуфынущ: цІыхур Иеговэ хуэлэжьэну хуейщ, ауэ сыт и лъэныкъуэкІи ар игъэгуфІэну хузэфІэмыкІынкІэ мэшынэ. Апхуэдэ гурыщІэхэр уиІэу щытмэ, дагъуэншэу дыщытыну Иеговэ къызэрытщымыгугъым икІи тхузэфІэкІыр щеттым деж, абы и гуапэ зэрыхъум теухуауэ Библием ит едзыгъуэхэм куууэ егупсыс (Пс. 103:13, 14; Кол. 3:23). Ауэ уэ цІыхухэр къыппэщІэувэнкІэ ушынэу щытмэ, 118 псаломыр зытхам иІа тегушхуэныгъэм хуэдэ къыуитыну Иеговэ елъэІу. А псаломым мыпхуэдэ псалъэхэр итщ: «Иеговэ си телъхьэщи, сышынэнукъым. Сыт къызищІэфын сэ цІыхум?» (Пс. 118:6).

3. Сыт иджыри языныкъуэхэм псым зыщІагъэуэну зыщІаІэжьэр?(Сурэтми феплъ.)

³ Мыпхуэдэуи къэхъуфынущ: цІыхум Иеговэ фІыуэ елъагъу, ауэ щІэныгъэ хуримыкъуу зэригугъэм щхьэкІэ, псым зыщІигъэуэну пІащІэкъым. НтІэ, псым зыщІэбгъэуэн щхьэкІэ щІэныгъэшхуэ уиІэн хуейуэ щыт? Иджыпсту Библием ит зы щапхъэ зэпкърытхынщ. Апостол Паулрэ Силэрэ лъэхъуэщым ису щІыр щыхъеям щыгъуэ, абыхэм Іэмал яІэ хъуащ лъэхъуэщым и хъумакІуэмрэ абы и унагъуэмрэ хъыбарыфІыр жраІэну. А хъумакІуэмрэ абы и унагъуэм щыщхэмрэ къагурыІуауэ къыщІэкІынущ, Алыхьым и лэжьакІуэхэр щхьэхуит ищІыжын щхьэкІэ, щІыр зэригъэхъеяр. Абы нэмыщІ а жэщым лъэхъуэщым и хъумакІуэмрэ и унагъуэм щыщхэмрэ Алыхьми Хьиси теухуа пэжхэр къащІащ. Абыхэм къаІэрыхьа щІэныгъэр ирикъуащ, занщІэу псым зыщІагъэуэн щхьэкІэ (Апост. 16:25—33). Аращи, уэ Иеговэ пцІыхумэ, ар фІыуэ плъагъумэ, Библием ит щІэныгъэ нэхъыщхьэхэр къыбгурыІуэмэ, уи гуэныхьхэм ухущІегъуэжамэ икІи Алыхьым и хабзэм утетыну быдэу тебухуамэ, псым зыщІэбгъэуэну ухьэзырщ (Мк. 12:30).

4. Языныкъуэхэр сыт иджыри псым зыщІагъэуэну щІытемыгушхуэр? (Сурэтми феплъ)

⁴ Хэти Алыхьыр игъэгуфІэну хуейщ, ауэ япэ дыдэу зэгупсысыр абы щхьэкІэ щІитын хуеину уасэращ. ДауикІ, акъыл хэлъщ къэпщтэну унафэм уи гъащІэр зэрихъуэжыным уегупсысыным (Лк. 14:27—30). Ауэ языныкъуэхэр Алыхьым хуэлэжьэн щхьэкІэ къагъэнэн хуейм хуабжьу ирогузавэ. Апхуэдэу ди шыпхъу Кэ́ндис къыщыщІащ. Ар иджыри щысабийм щыгъуэ, Иеговэ и хабзэхэм теухуауэ къищІащ, ауэ абыхэм зэи тетакъым. Кэндис балигъ щыхъуам щыгъуэ Библие джыныр щІидзэжыну хуагъэушащ. А дакъикъэм сыт абы зыхищІар? Ар къыддогуашэ: «Сэ къызгурыІуэт Иеговэ згъэгуфІэн щхьэкІэ сыт сщІэн хуейми. Ауэ нэгъуэщІ лъэныкъуэкІи сэ есхьэкІ гъащІэр сигу ирихьт икІи сщІэт ар схъуэжыну си дежкІэ гугъуу зэрыщытынур». НэгъуэщІхэри мэгузавэ псым зыщІагъэуа иужь гуэныхь хьэлъэ гуэр къаІэщІэщІэу, зэхуэсым хагъэкІынкІэ. Апхуэдэ гупсысэхэр уэри уиІэмэ, сыт пщІэ хъунур?

5. Псым зыщІэдгъэуэну дытемыгушхуэмэ, сытым дегупсысын хуей? (Маттэ 13:44—46).

⁵ Дэ зыгуэр къэтщэхуну дыщыхуейм деж, абы и уасэм нэмыщІ ар сэбэп къызэрытхуэхъунуми догупсыс. А хьэпшыпыр лъапІэу щытми, сэбэпынагъышхуэ къыпэкІуэну щытмэ, ар занщІэу къэтщэхуну къыщІэкІынщ. Апхуэдэ дыдэу псым зыщІэгъэуэным дыщегупсысым деж, къэдгъэнэн хуеиным имызакъуэу, уасэ зимыІэ Иеговэ и ныбжьэгъугъэр къызэрытІэрыхьэнуми дегупсысын хуейщ. Мы гупсысэр Хьисэ жиІа ущие хъыбархэм къыхигъэщат. (Къеджэ Маттэ 13:44—46.) А ущие хъыбархэм къыхощ цІыхум къигъуэта налкъутналмэс лъапІэр къищэхун щхьэкІэ, емыгупсысыххэу иІэу хъуар зэрищэжыр. Уэри налкъутналмэс лъапІэу щыт Алыхьым и Пащтыхьыгъуэм теухуа пэжыр къэбгъуэтащ. Ауэ пэжым утету упсэун щхьэкІэ, уи гъащІэм зэхъуэкІыныгъэ хэплъхьэну зэрыхуэфащэм шэч къытепхьэмэ, Хьисэ и ущие хъыбархэм куууэ егупсыс. Мыпхуэдэу зэупщІыж: «Библием ит пэжыр, Иеговэ и ныбжьэгъугъэр, абы къызита гугъэр икІи къуэш, шыпхъухэр лъапІэу слъытэу пІэрэ?» Мы упщІэм и жэуапыр къыбдэІэпыкъунущ сытым уелэжьын хуейми къыбгурыІуэну. Уэ гу лъыптэнкІэ хъунущ пэжым щхьэкІэ уи гум илъ фІыщІэр хэбгъэхъуэн зэрыхуейм. Е уэ къыбгурыІуэнкІэ хъунущ псым зыщІэбгъэуэн щхьэкІэ, нэгъуэщІ зыгуэр зэран къызэрыпхуэхъур. Апхуэдэу щытмэ, сыт зэран къыпхуэхъуми зэхэгъэкІ.

6. Ди гур нэхъ щабэ тщІыну сыт къыддэІэпыкъунур?

⁶ Жылэр зысэм теухуа ущие хъыбарыр Хьисэ щыжиІам щыгъуэ, къигъэлъэгъуащ цІыхур Алыхьым гъунэгъу хуэхъунрэ хуэмыхъунрэ и гум и щытыкІэм елъытауэ зэрыщытыр. Мы дунейм щыІэ Іуэхугъуэхэм зи гур ета цІыхур Алыхьым гъунэгъу хуэхъуфкъым. Ауэ зигу къабзэхэм Алыхьым и Пащтыхьыгъуэм теухуа хъыбарыфІыр къащтэ (Лк. 8:5—15). Уэ уригузавэу къыщІэкІынщ Алыхьми ухуэлэжьэну, уи щхьэми ухуэпсэужыну ухуейуэ зэрыщытым щхьэкІэ. Апхуэдэу щытмэ, уи Іэр йомыхьэх! Иеговэ къыбдэІэпыкъунущ абы и псалъэхэр зыхэзыщІэ гу къабзэ зэбгъэгъуэтыну. Уи гур нэхъ щабэ пщІын икІи пэжым утету упсэуфын щхьэкІэ, Алыхьым къыбдэІэпыкъуну елъэІу (Иез. 18:31; 36:26).

7, 8. Языныкъуэ ныбжьыщІэхэм псым зыщІагъэуэну щІытемыгушхуэр сыт? (Сурэтми феплъ)

⁷ Языныкъуэ ныбжьыщІэхэм Иеговэ фІыуэ ялъагъуми, къэзыухъуреихьхэр зэран къазэрыхуэхъум щхьэкІэ псым зыщІагъауэкъым. Псалъэм папщІэ, егъэджакІуэхэм ахэр хуагъэушыфынущ къабзагъэм теухуауэ мы дунейм къыщекІуэкІ еплъыкІэхэр къезэгъыу къалъытэну, апхуэдэ еплъыкІэхэр Алыхьым и хабзэм пэщІэувэу щытми. Ауэ а чэнджэщхэм уедаІуэу щытмэ, гугъуехьышхуэхэм упэщІэхуэфынущ (Пс. 1:1, 2; Прит. 7:1—5). Апхуэдэу къыпщымыщІын щхьэкІэ, 119 псаломыр зытхам и щапхъэм утетыным мыхьэнэшхуэ иІэщ. Абы Иеговэ мыпхуэдэу жриІауэ щытащ: «Си егъэджакІуэ псоми нэхърэ зэхэщІыкІ нэхъ куу зэзгъэгъуэтащ, сыт щхьэкІэ жыпІэмэ сигу къэбгъэкІыжхэм согупсыс» (Пс. 119:99).

⁸ Иныкъуэхэм деж Иеговэ хуэлажьэ адэ-анэхэр я сабийхэм псым зыщІагъэуэну зэран яхуохъу. Хэти куэдыІуэу йогупсыс абыхэм сыт хуэдэ щІэныгъэ зрагъэгъуэтынуми икІи сыт хуэдэ лэжьыгъэ къыхахынуми. НэгъуэщІхэри я сабийхэм дэІэпыкъукъым Алыхьым гъунэгъу хуэзыщІыну мурадхэр ягъэувыну. «Алыхьым гъунэгъу сыхуэхъун щхьэкІэ си адэ-анэр нэхъыбэу къыздэІэпыкъуами хъунут» жыпІэу уегупсысрэ? Апхуэдэу щытмэ, а Іуэхум теухуауэ абыхэм епсалъэ. Зыщомыгъэгъупщэ: Иеговэ ныбжьэгъуфІ ухуэхъун щхьэкІэ, ныбжьыщІэу узэрыщытыр зэран къыпхуэхъукъым (Прит. 20:11).

9. Языныкъуэхэм псым зыщІэгъэуэныр щІрагъэтІылъэкІыр сыт?

⁹ Укъэзыухъуреихь цІыхухэр нэгъуэщІ лъэныкъуэкІи зэран къыпхуэхъуфынущ. Иныкъуэхэм деж цІыхум псым зыщІигъэуэну хьэзырщ, ауэ и ныбжьэгъум е фІыуэ илъагъу гуэрым поплъэ, абы и гъусэу зы махуэм псым зыщІигъэуэн щхьэкІэ. Къапщтэмэ, абы зыри Іей хэлъкъым. Ауэ егупсысыт: абы щхьэкІэ псым зыщІэбгъэуэныр ебгъэтІылъэкІын хуейуэ пІэрэ? Зыщомыгъэгъупщэ: уи гъащІэр Иеговэ и ІэмыщІэ иплъхьэныр зылъэІэсыр абырэ уэрэ фи закъуэщ. А лъэбакъуэр пчыныр нэгъуэщІхэм ящІэм елъытауэ щытын хуейкъым (Рим 14:12).

МЫ ДУНЕЙМ И КІЭР КЪЫЗЭРЫСАР ЗЫЩЫДГЪЭГЪУПЩЭН ЩІЫХУЭМЕЙР

10. Языныкъуэхэр я гъащІэм зэхъуэкІыныгъэ халъхьэну щІэмыпІащІэр сыт?

¹⁰ Языныкъуэхэр я гъащІэм зэхъуэкІыныгъэ халъхьэну пІащІэкъым, сыт щхьэкІэ жыпІэмэ мы дунеижьым и кІэр къэсыным иджыри зэман куэд иІэу къащохъу. Ауэ апхуэдэу уегупсысыным Іущагъ хэлъ? Хьисэ и гъэсэнхэм мыпхуэдэу яжриІат: «Фэри фыхьэзырын хуейщ, фыщимыгугъэ сыхьэт гуэрым ЦІыху Лъэпкъым и Къуэр дунейм къэкІуэжынущи» (Лк. 12:40).

11. Иеговэ теухуауэ нэхъыбэ къызэрытщІэм сытым дыхуигъэушрэ? (Псалом 119:60).

¹¹ Ди гъащІэр Иеговэ и ІэмыщІэ итлъхьэну дыхуэзыгъэушын хуейр абы худиІэ лъагъуныгъэращ. Ди Алыхьыр нэхъыфІу къэтцІыхуху абы и хабзэри нэхъыфІыжу тлъагъуу дохъу икІи ар занщІэу дгъэзэщІэну дыхущІокъу. (Къеджэ Псалом 119:60.) Иеговэ и унафэхэр занщІэу дгъэзэщІэн щІыхуейм иджыри и зы щхьэусыгъуэ Екъуб къыхигъэщат: дэ зыми тщІэкъым пщэдей къэхъунур. Хэт ищІэрэ иджыри зы махуэ диІэну пІэрэ, Алыхьым и фІэфІ Іуэху тщІэн щхьэкІэ? Аращи, тщІэн хуейр къыдгурыІуэу щытмэ, ар едмыгъэтІылъэкІыу тщІэн хуейщ (Екъуб 4:13—17).

12. Жызум хадэм теухуауэ Хьисэ жиІа ущие хъыбарым сытым дыхуигъасэрэ?

¹² Языныкъуэхэм ягугъэнкІэ хъунущ иджыпсту мыхъуми, иужькІэ псым зыщІагъауэмэ, абы зыри Іей хэмылъу. Хьисэ жызум хадэм теухуауэ жиІа ущие хъыбарыр ягу къагъэкІыжу, ахэр мыпхуэдэу егупсысыфынущ: «Махуэ псокІэ лэжьахэмрэ зы сыхьэткІэ лэжьахэмрэ зэхуэдэ лэжьапщІэкъэ къаІэрыхьар?» Ар пэжщ, ауэ зы сыхьэт фІэкІа мылэжьахэм нэхъ пасэу лэжьэн щІыщІамыдзам и щхьэусыгъуэр зыщыдгъэгъупщэн хуейкъым. Абыхэм жаІащ: «Іуэху дэзыгъэлэжьын дгъуэтакъым». НэгъуэщІу жыпІэмэ ахэр лэжьэну хуэмейуэ аратэкъым. Жызум хадэр зейм ахэр къыщриджам щыгъуэ, абыхэм занщІэу лэжьэн щІадзащ (Мт. 20:1—16). Хьисэ дэри дыкъриджащ и лъэужь диувэн икІи Пащтыхьыгъуэм теухуа хъыбарыфІыр дгъэІун щхьэкІэ. Аращи, зэрыхъукІэ нэхъ псынщІэу абы и лъэужь диувэным мыхьэнэшхуэ иІэщ.

13. ЛутІ и щхьэгъусэм теухуа хъыбарым сытым дыхуигъасэрэ?

¹³ Зыгуэрым игугъэфынущ Армагеддоныр щІидзэным куэд имыІэжу Иеговэ хуэлэжьэн щІидзэфыну. Ауэ цІыхум нэхъыбэрэ зиІэжьэху, абы и дежкІэ нэхъ гугъу хъунущ и гъащІэм зэхъуэкІыныгъэ гуэрхэр хилъхьэну. Хьисэ ар фІы дыдэу къыгурыІуэти, аращ и лъэужь ирикІуэхэм мыпхуэдэу щІажриІар: «ЛутІ и фызым къыщыщІар фигу къэвгъэкІыж» (Лк. 17:31—35). ЛутІ и фызым ищІэт Алыхьым Іэмал имыІэу Содомрэ Іаморэрэ зэригъэкІуэдынур. Ауэ а цІыхубзым къыщыщІам тепщІыхьмэ, абы къигъэнам и гур кІэрыпщІауэ жыпІэ хъунут (ЩІэдз. 19:23—26). А хъыбарым къегъэлъагъуэ дыкъелын щхьэкІэ диІэ Іэмалыр игъащІэкІэ зэрыщымыІэнур. Алыхьым игъэува зэманыр къэсмэ, абы ухуэлэжьэн щІэбдзэну зы Іэмали щыІэжынукъым (Лк. 13:24, 25).

14. Библием ит пророчествэхэр къызэрыхъум сыт дыкІэлъыплъын щІыхуейр?

¹⁴ Махуэ къэс мы дунейм къыщыхъу Іуэхугъуэхэм къагъэлъагъуэ иужьрей махуэхэм теухуауэ Библием ит пророчествэхэр къызэрыхъур. А Іуэхугъуэхэр уэ езым къыплъэмыІэсми, ахэр щІыпІэ-щІыпІэкІэ къызэрыхъур зэрыплъагъум ухуигъэушын хуейщ зумыІэжьэу, Алыхьым гъунэгъу ухуэзыщІыну лъэбакъуэхэр пчыну. Апостол Петр къуэш, шыпхъухэм яхуитхар дигу къэдгъэкІыжынщ. Абы ахэр мыбэлэрыгъыну хуигъэушри, мыпхуэдэу жиІащ: «Псоми я кІэухыр къэблэгъащ» (1 Пет. 4:7). «КІэух» псалъэм Петр къригъэкІар Ерусалимрэ абы дэт Иеговэ и унэшхуэмрэ зэрызэтракъутэнырат. Петр зыхуитхахэр Ерусалим пэжыжьэу псэут икІи а къалэр щызэтракъутэкІэ абыхэм зыри къалъэІэсынутэкъым (1 Пет. 1:1). Ауэ а пророчествэр гъэзэщІа щыхъуам щыгъуэ, а къуэш, шыпхъухэм, дауикІ, Иеговэ нэхъыбэу дзыхь хуащІу хъуауэ къыщІэкІынущ. Пророчествэхэр къызэрыхъум укІэлъыплъыным уи дежкІи мыхьэнэшхуэ иІэщ. Абы щыгъуэ уэ къэплъэгъунущ мы дунейм и кІэр къызэрысыпар икІи абы ухуигъэушынущ псым зыщІэбгъэуэн щхьэкІэ, пхузэфІэкІыу хъуар пщІэну.

15. Иеговэ и махуэшхуэм дапхуэдэу зэрызыхуэдгъэхьэзыр хъунур? (2 Петр 3:10—13).

¹⁵ Петр итха и етІуанэ письмом къыдгурегъаІуэ Иеговэ хьэкум щищІыну махуэм дапхуэдэу зыхуэдгъэхьэзыр хъунуми. Абы а письмор щитхам щыгъуэ, Иеговэ и махуэшхуэр къэсыным иджыри зэман куэд иІэт. Ауэ, абы емылъытауэ, Петр къуэш, шыпхъухэр хуигъэушт а махуэм теухуауэ зыщамыгъэгъупщэну икІи къахуэмыгъэсу пэплъэну. (Къеджэ 2 Петр 3:10—13.) Дэри а махуэр дигу илъу жыпІэ хъунущ, абы дыхуэхьэзырмэ икІи къытхуэмыгъэсу дыпэплъэмэ. НтІэ, абы дызэрежьэр дапхуэдэу къызэрыдгъэлъэгъуэнур? Мы упщІэм и жэуапыр Петр итха псалъэхэм къыхощ: «Фигу къабзэу Тхьэм фыфІэлІыкІыу фыпсэун хуейщ». Уи нэгу къыщІэгъэхьэт Иеговэ дапхуэдэу гуфІэми, абы узэрыхуэпэжыр къэзыгъэлъагъуэ Іуэхухэр щилъагъум деж. Иеговэ хуабжьу и гуапэ хъунущ уи гъащІэр абы и ІэмыщІэ иплъхьэу, псым зыщІэбгъауэмэ.

ЗУМЫІЭЖЬЭУ ПСЫМ ЗЫЩІЭГЪАУЭ

16. Ди гъащІэм зэхъуэкІыныгъэхэр хэтлъхьэу, псым зыщІэдгъэуэну дапщэщ игъуэ дыдэу щыщытыр? (2 Коринф 6:1, 2). (Сурэтхэми феплъ.)

¹⁶ Уи гъащІэм зэхъуэкІыныгъэхэр хэплъхьэу, псым зыщІэбгъэуэну иджыпсту игъуэ дыдэщ. (Къеджэ 2 Коринф 6:1, 2.) Филипп зыхуэза Ефиопие къэралым щыщ Іэтащхьэм къыгурыІуэт Иеговэ гъунэгъу хуэзыщІыну лъэбакъуэр иримыгъэтІылъэкІыу, ичын зэрыхуейр. Абы Хьисэ теухуа хъыбарыфІыр щызэхихам икІи псым зыщыщІигъэуэфын щІыпІэ къыщилъэгъуам мыпхуэдэу егупсысакъым: «Сэ япэщІыкІэ щІэныгъэ нэхъыбэ зэзгъэгъуэтын хуейщ. Абы нэмыщІ гъуэгу дыщытеткІэ нэгъуэщІ псыи дыхуэзэну къыщІэкІынщ». АтІэ абы мыпхуэдэу Филипп жриІащ: «Мис псы. Сыбумэхъ хъунукъэ?» (Апост. 8:26, 27, 35—39). Ар ди дежкІэ сыту щапхъэшхуэ! А Іэтащхьэм псым зыщІигъэуа иужь «гуфІэгъуэм хэту... и гъуэгу техьэжащ».

17. Сыт зыщыдгъэгъупщэн хуэмейр?

¹⁷ Псым зыщІэбгъэуэну утемыгушхуэмэ, зыщомыгъэгъупщэ: Иеговэ хуабжьу хуейщ уэ абы и ныбжьэгъу ухъуну (Рим 2:4). Абы гъунэгъу ухуэхъун щхьэкІэ мурад бгъэувахэр къохъулІэну ар къыбдэІэпыкъунущ. Псалъэм папщІэ, уэ Иеговэ къару къыуитынущ, шынэм упэлъэщын икІи нэгъуэщІхэр зэран зыхуомыгъэхъун щхьэкІэ. Псым зыщІэбгъауэу, Алыхьым и пащхьэ напэ къабзэ щызэбгъэгъуэта иужь, уэ къэплъэгъунущ «блэкІа Іуэхухэм» уи дежкІэ мыхьэнэ зэримыІэжыр (Флп. 3:8, 13). АдэкІэ упэплъэ хъунущ «уи япэкІэ ит Іуэхухэм», нэгъуэщІу жыпІэмэ, зи гъащІэр Иеговэ и ІэмыщІэ изылъхьэу, псым зыщІэзыгъэуахэр абы къызэригъэгугъэ фІыгъуэхэм (Апост. 3:19).