Лей къызытехьа цІыхубзхэм къадэІэпыкъуа статьяр
«ДУНЕЙ псом тет мелуан бжыгъэ хъу цІыхубзхэмрэ хъыджэбз цІыкІухэмрэ лей къатохьэ. Уэ абыхэм уащыщмэ, Алыхьым лъапІэу узэрилъытэмрэ, а гугъуехьым кІэ къызэрыхуигъэкІуэнумрэ теухуауэ къащІэ».
Мы псалъэхэмкІэ «Помощь женщинам, подвергшимся насилию. Утешение из Библии» жыхуиІэ статьяр къыщІедзэ. Ар jw.org сайтым къыщыбгъуэтыфынущ. А статьям икІэм деж щыІэ ссылкэм тепкъузэмэ, ар PDF форматкІэ къипхыу, тхылъымпІэм тебдзэу, напиплІ хъу буклету зыкІуэцІыплъхьэ хъунущ. США-м щыпсэу ди шыпхъу Сте́йси апхуэдэу ищІащ. Ар къыддогуашэ: «Ди зэхуэсым и территорием лей къызытехьа цІыхубзхэм щадэІэпыкъу центр щыІэщ. Ди зы шыпхъумрэ сэрэ а буклетым щыщ зыбжанэ а центрым тхьащ».
А центрым щылажьэ зы цІыхубзыр ди шыпхъухэм къелъэІуат а буклетхэм хуэдэ нэхъыбэу къахьыну. Арати, етІуанэу щытрагъэзэжым, шыпхъухэм буклету 40 икІи jw.org сайтым и визитнэ карточкэу 30 къыздащтащ. Абы нэмыщІ администраторыр ди шыпхъухэм къелъэІуащ а центрым щыпсэу цІыхубзхэм Библие джыныр дапхуэдэу екІуэкІми ирагъэлъэгъуну.
Стейсирэ ди шыпхъуитІымрэ иджыри нэгъуэщІ зы центр кІуахэщ. Абы щыІэхэм буклету тху къащтащ икІи нэхъыбэ къыхуахьыну къелъэІуахэщ. А центрым щылажьэ зы цІыхубзым жиІат: «Мы буклетхэр ди цІыхубзхэм сэбэп къахуэхъунущ икІи дэ абыхэм дыхуэныкъуэщ». Шыпхъухэм къыщытрагъэзэжам щыгъуэ, абы щыІэ цІыхубз зыбжанэ Библие джыныр зэрекІуэкІыр къащІэну хуейуэ къежьэт. Абыхэм щыщу тІум а тхьэмахуэм и кІэм екІуэкІыну зэІущІэм къэкІуэну зэрыхуейр жаІат.
Стейси къыддогуашэ: «Мы буклетыр цІыхухэм апхуэдизу яфІэгъэщІэгъуэн хъуну дэ дигугъакъым. А буклетым и фІыгъэкІэ лей къызытехьа цІыхубзхэм Алыхьым и Пащтыхьыгъуэм теухуауэ нэхъ тыншу допсэлъэф. Абы итым цІыхухэр насыпыфІэ зэрищІыр плъагъуну гухэхъуэт. Дэ Иеговэ дыщогугъ лей къызытехьа цІыхубзхэм хъыбарыфІымкІэ дадэгуэшэну адэкІи къыддэІэпыкъуну».