«Мыр Иеговэ и зауэщ»

Іуэхур къыщежьар 1999 гъэращ. Францием и правительствэм 1993 гъэм щыщІэдзауэ 1996 гъэм нэс ди филиалым къыІэрыхьа арэзыуэ къат ахъшэм налогышхуэ трилъхьат. ЯпэщІыкІэ дэ Францием и судхэм захуэдгъэзащ, ауэ абы зыри къикІакъым. Апелляционнэ судми ди лъэныкъуэр щимыубыдым, правительствэм евро мелуаниплІрэ ныкъуэрэ хуэдиз къыттрихащ. Дэ иужьрей гугъапІэу диІэр ЕСПЧ-м ищІыну унафэрат. Судым и унафэкІэ ЕСПЧ-м и лІыкІуэр ди гъусэу, лъэныкъуитІри дызэгурыІуэн щхьэкІэ, дэ Францием и юристхэм дахуэзэн хуейт.

ЕСПЧ-м къыджиІэнур дэ тщІэт: ар хуейт Францием и правительствэм ахъшэм щыщ Іыхьэ етту, Іуэхур судым нэдмыгъэсыну. Ауэ дэ къыдгурыІуэт зы евро нэхъ мыхъуми абыхэм еттмэ, Библием ит принципхэм дызэребэкъуэнур. Ди къуэш, ди шыпхъухэм арэзыуэ ахъшэ щІатыр Алыхьым и Пащтыхьыгъуэм щхьэкІэт. Абы къыхэкІкІэ правительствэм и Іуэху лъэпкъ а ахъшэм хэлътэкъым (Мт. 22:21). Ауэ судым пщІэ зэрыхуэтщІым къыхэкІкІэ, дэ а зэІущІэм дыкІуащ.

ЗэІущІэр конференц-зал дахэм щекІуэкІащ. Ауэ ар зэрыщІидза щІыкІэр дигу ирихьакъым: ЕСПЧ-м и лІыкІуэ цІыхубзым дэ занщІэу къыджиІащ ахъшэм щыщ Іыхьэ Францием и правительствэм едмыту зэрымыхъунур. Ауэ дэ ипэкІэ дызэмыгупсыса упщІэ а цІыхубзым еттащ: «Правительствэм евро мелуаниплІрэ ныкъуэрэ хуэдиз къызэрыттрихам уэ ущыгъуазэ?»

Ар зэрыпэжым Францием и юристхэр щыхьэт щытехъуэм, ЕСПЧ-м и лІыкІуэ цІыхубзыр къэуІэбжьащ икІи ди Іуэхум хуиІэ еплъыкІэр абы занщІэу ихъуэжащ. Францием и правительствэм ищІар зэрымытэмэмыр яжриІэри, абдежым зэІущІэр щиухащ. ТекІуэныгъэ къыдитын щхьэкІэ а Іуэхур Иеговэ зэриунэтІар сэ къызгурыІуащ. Къэхъуар ди фІэщ мыхъужу, дамэ къыттекІауэ судым дыкъыщІэкІыжащ.

2011 гъэм, июным и 30 ЕСПЧ-м ди лъэныкъуэр иубыдащ. Судым жиІащ апхуэдэ налогыр къэрал унафэм зэрытемыхуэр икІи унафэ ищІащ Францием и правительствэм къыттриха ахъшэр гъэбэгъуауэ къыдитыжыну! А унафэр иджыри къыздэсым Францие къэралым щыдиІэ хуитыныгъэм сэбэп хуохъу. ЦІыхубзым еттауэ щыта упщІэр иныжь ДжэлутІ и натІэм зыхэзыукІа мывэм хуэбгъадэ хъунут. Ди Іуэхур зэрызэхэкІам къигъэлъэгъуащ Даут и псалъэхэр зэрыпэжыр: «Мыр Иеговэ и зауэщ» (1 Сам. 17:45—47).

А зы текІуэныгъэм и закъуэкъым дэ диІар. Къэрал зэмылІэужьыгъуэхэм я правительствэхэмрэ диным епха организацэхэмрэ къызэрытпэщІэувэм емылъытауэ, дэ къэрал 70 я суд нэхъыщхьэхэм Іуэху 1 225 къыщытхьащ. Абы иджыри хохьэ международнэ суд зыбжанэм къыщытхьа текІуэныгъэхэр. А текІуэныгъэхэм ноби Иеговэ и Щыхьэтхэм я хуитыныгъэр къехъумэ. Абы хохьэ Алыхьым дыхуэлэжьэну къэралхэр зэран къызэрытхуэмыхъур, хъыбарыфІыр дгъэІуну, къэралыр гъэлъэпІэным пыщІа хабзэхэм дыхэмытыну икІи лъы зыхэдмыгъэлъэдэну хуит дызэращІыр.

США-м щыІэ Иеговэ и Щыхьэтхэм я дунейпсо ІуэхузехьэпІэм сыщылажьэу, Европэм щекІуэкІа судым сыт сыхэтын хуей щІэхъуар?

СИ АДЭ-АНЭР МИССИОНЕРУ ЗЭРЫЩЫТАМ СЭРИ А ЛЭЖЬЫГЪЭМ СЫХЭТЫНУ СЫХУИГЪЭУШАЩ

Си адэ Джорджрэ си анэ Люси́льрэ Галаад Школым и 12 классыр къаухри, ахэр Эфиопием ягъэкІуащ. 1956 гъэм сэ абы сыкъыщалъхуащ. Япэ лІэщІыгъуэм хъыбарыфІыр зыгъэІуу щыта Фи́лип и цІэр сэ къысфІащащ. 1957 гъэм Эфиопием и правительствэм ди лэжьыгъэр зэхуищІащ. Абы щыгъуэ сэ сыцІыкІуами, фІы дыдэу сощІэж дэ щэхуу ди зэІущІэхэр зэредгъэкІуэкІыу щытар икІи хъыбарыфІыр зэрыдгъэІуу щытар. Сэ сысабийти, а псор сфІэгъэщІэгъуэнт. Ди жагъуэ зэрыхъунщи, 1960 гъэм дэ а къэралым дыкърахуащ.

Сэри, си шыпхъу нэхъыжь Джу́ди, си къуэш нэхъыщІэ Ле́сли щыри Эфиопием дыкъыщалъхуат. ИужькІэ ди унагъуэр Уи́чито (штат Канза́с, США) Іэпхъуащ. Си адэ-анэм Африкэр къагъэнэн хуей хъуами, миссионер лэжьыгъэм хэтыну яІэ гукъыдэжыр зыфІагъэкІуэдакъым. Ахэр пэжым тету псэут икІи Алыхьым и Іуэхур япэ зэридгъэщын хуейр бынхэм псоми къытхапщат. Сэ илъэс 13 сыхъуу псым зыщІэзгъэуащ. Илъэсищ дэкІри, ди унагъуэр хъыбарыфІыр зыгъэІухэр мащІэу здэщыІэ Ареки́пу къалэм (Перу) Іэпхъуащ.

1974 гъэм сэ илъэс 18 сыхъуу къуэшиплІ си гъусэу специальнэ пионеру Центральные Анды жыхуаІэм дагъэкІуащ. А щІыпІэм зыми хъыбарыфІыр щызэхихатэкъым икІи дэ ке́чуа, аймара́ бзэхэмкІэ псалъэ цІыхухэм а хъыбарымкІэ дадэгуашэт. Дэ хъыбарыфІыр дгъэІун щхьэкІэ къэдгъэсэбэп машинэм «ковчегкІэ» деджэт, сыт щхьэкІэ жыпІэмэ ар ашыкышхуэм ещхьт икІи дэ абы дыщыпсэут. Куэд мыщІэу Иеговэ тхьэмыщкІагъэри, узыфэхэри, лІэныгъэри зэригъэкІуэдыжынум теухуа хъыбарыфІымкІэ а щІыпІэм щыпсэухэм садэгуэшэну сфІэфІт (Апок. 21:3, 4). Куэдым Иеговэ хуэлэжьэн щІадзэт. А зэманыр ІэфІу сэ си гум къокІыж.

ДУНЕЙПСО ІУЭХУЗЕХЬЭПІЭМ СЫЩЫЛЭЖЬЭН ЩІЫЗОДЗЭ

1977 гъэм УнафэщІ гупым щыщ А́льберт Шрёдер Перу къэкІуат. Абы сэ сыхуигъэушащ Вефилым заявление стхыну. Сэ а заявлениер стхыри, 1977 гъэм, июным и 17 Бруклин щыІэ Вефилым сыщылэжьэн щІэздзащ. ИлъэсиплкІэ сэ къабзагъэм кІэлъыплъ отделымрэ техобслуживание отделымрэ сыщылэжьащ.

1978 гъэм, июнь мазэм Новый Орлеа́н (штат Луизиа́на) международнэ конгресс щекІуэкІат. Абы сэ щызэзгъэцІыхуащ Эли́забет Авалло́н. Абы и адэ-анэри, сысейхэм хуэдэу, пэжым тету псэут. Элизабет илъэсиплІ хъуауэ общэ пионеру лажьэт икІи абы мурад быдэ иІэт и гъащІэ псокІэ Иеговэ полновременнэу хуэлэжьэну. Конгресс нэужьым дэ нэхъыфІу дызэрыцІыхун щІэддзащ икІи куэд дэмыкІыу лъагъуныгъэ гуащІэ зэхуэтщІащ. 1979 гъэм, октябрым и 20 дэ дызэрышащ икІи Элизабет си гъусэу Вефилым щылажьэу щІидзащ.

Зэгъусэу япэу дыщылэжьа зэхуэсыр «Бруклин, Испанское» жыхуиІэрат. Абы хэт къуэш, шыпхъухэм гурэ псэкІэ фІыуэ дыкъалъэгъуащ. ИужькІэ дэ нэгъуэщІ зэхуэсищым дыщылэжьащ. Дэтхэнэ зэхуэсми дэ щызыхэтщІэт фІыуэ дыкъызэралъагъур икІи Вефилым щыдгъэзащІэ лэжьыгъэр лъапІэу зэралъытэр. Унагъуэм хуэдэ тхуэхъуа ди къуэш, шыпхъухэми ди Іыхьлыхэми фІыщІэ яхудощІ, зи ныбжь хэкІуэта ди адэ-анэхэм дакІэлъыплъыжыну къызэрыддэІэпыкъуам щхьэкІэ.

КЪАЛЭНЫЩІЭР: ЮРИДИЧЕСКЭ ОТДЕЛЫМ САГЪАКІУЭ

1982 гъэм, январь мазэм сэ симыгугъэххауэ юридическэ отделым сагъэкІуащ. Илъэсищ дэкІауэ, диплом сиІэу адвокат сыхъуну къуэшхэр хуейти, ахэр къызэлъэІуащ юридическэ щІэныгъэ нэхъыщхьэ зэзгъэгъуэтыну. Сыщеджэм щыгъуэ сэ къэсщІащ США-ми нэгъуэщІ къэралхэми щыпсэу цІыхухэм щаІэ хуитыныгъэм Иеговэ и Щыхьэтхэм я фІыгъэ зэрыхэлъыр. Дэ еджапІэм Алыхьым и лъэпкъым судхэм къыщихьа текІуэныгъэхэр убгъуауэ щызэпкърытхт. Си дежкІэ ар хуабжьу гъэщІэгъуэнт.

1986 гъэм, илъэс 30 сыхъуу юридическэ отделым и нэхъыжьу сыщытыну къысхуагъэфэщащ. Апхуэдэу дзыхь къызэрысхуащІар сэ хуабжьу си гуапэ хъуащ. Ауэ а къалэныр си дежкІэ тынштэкъым. Сэ абы сигъэгузавэт, сыт щхьэкІэ жыпІэмэ си щІэныгъэри, опыт сиІэри мащІэт.

1988 гъэм адвокат сызэрыхъуам щыхьэт техъуэ диплом къызатыжащ. Ауэ сэ си гущхьэ къэкІтэкъым Иеговэрэ сэрэ ди зэхущытыкІэм ар зэран хуэхъуфыну. ЩІэныгъэшхуэм цІыхум зыкъыфІигъэщІыжыфынущ икІи адрейхэм нэхърэ езыр нэхъыфІу зыкъыщигъэхъужыфынущ. Си насыпти, Элизабет къыздэІэпыкъури, Алыхьым сызэрыхуэлажьэр щІэрыщІэу зэтезухуэжащ. Зэман дэкІри, Иеговэрэ сэрэ ди зэхуаку дэлъ зэхущытыкІэфІхэр зэтеувэжащ. Пэжыр жысІэнщи, мыхьэнэ зиІэр щІэныгъэшхуэ уиІэныракъым. Нэгъэсауэ насыпыфІэ ухъун щхьэкІэ Иеговэ уи ныбжьэгъуу, абырэ и лъэпкъымрэ фІыуэ плъагъуу ущытын хуейщ.

ХЪЫБАРЫФІЫМРЭ АР ДГЪЭІУНУ ДИІЭ ХУИТЫНЫГЪЭМРЭ СЫКЪЫЩХЬЭЩОЖ

ЕджапІэр къэзуха нэужь си гури си акъылри къалэн къызатам тезухуащ. Юридическэ ІуэхухэмкІэ Вефилым сыдэІэпыкъут икІи Иеговэ и организацэм иІэ хуитыныгъэм сыкъыщхьэщыжын щхьэкІэ судхэм сыхэтт. Си лэжьыгъэр тынштэкъым, ауэ гъэщІэгъуэнт, сыт щхьэкІэ жыпІэмэ зэпымыууэ зэхъуэкІыныгъэ гуэрхэр къэхъут. Псалъэм папщІэ, зэман куэдым къриубыдэу ди тхыгъэхэм щхьэкІэ цІыхухэм арэзыуэ ахъшэ гуэр щІатын хуейт. Ауэ 1990 гъэхэм къуэшхэм а Іуэхум и бгъэдыхьэкІэр яхъуэжащ. Къуэшхэр ди отделым къелъэІуащ а Іуэхур нэхъыфІ зэрытщІ хъуным теухуауэ чэнджэщ гуэрхэр еттыну. Абы лъандэрэ дэ ди тхыгъэхэр цІыхухэм пщІэншэу идот. Апхуэдэ зэхъуэкІыныгъэм хъыбарыфІыр зыгъэІухэми Вефилым и лэжьакІуэхэми я Іуэхур нэхъ тынш ищІащ. Абы нэмыщІ налогхэм теухуауэ къуэшхэр щІэгузэвэн щыІэжтэкъым. Языныкъуэхэр гузавэт апхуэдэ бгъэдыхьэкІэм и ягъэкІэ ди тхыгъэхэр къызэрыдэдгъэкІын ахъшэмкІэ гугъуехь диІэну икІи ар хъыбарыфІ гъэІуным зэран хуэхъуну. Ауэ ахэр щІэгузэвар къэхъуакъым. 1990 гъэм щыщІэдзауэ Иеговэ и Щыхьэтхэм я бжыгъэр тІу нэхърэ нэхъыбэкІэ хэхъуащ. Нобэ дэтхэнэ зы цІыхуми Іэмал иІэщ Библием тегъэщІа ди тхыгъэхэр ахъшэ щІимыту къыІэрыхьэну. Апхуэдэ зэхъуэкІыныгъэшхуэ куэд сэ слъэгъуащ икІи къызгурыІуар зыщ: дэ ехъулІэныгъэ дыщІиІэр Иеговэ къызэрыддэІэпыкъур икІи унэІут пэжым къыдит унафэхэм дызэрыщІэтыращ (Исх. 15:2; Мт. 24:45).

Ди текІуэныгъэхэр зи фІыгъэр адвокатхэм я закъуэтэкъым. Иеговэ и лэжьакІуэхэм я хьэл-щэныфІхэр щалъагъукІэ хьэкумыщІэхэмрэ къулыкъущІэхэмрэ ди лъэныкъуэр щаубыд щІэх-щІэхыурэ къэхъут. Псалъэм папщІэ, 1998 гъэм Кубэ къэралым щекІуэкІа конгресс хэхахэм УнафэщІ гупым щыщ къуэшищ я щхьэгъусэхэр я гъусэу къэкІуат. Абы ипэ дэ къэрал унафэщІхэм къагурыдгъэІуэну дыхэтащ Иеговэ и Щыхьэтхэр нейтралитетым зэрытетыр. Ауэ УнафэщІ гупым щыщ къуэшищым ягъэлъэгъуа гуапагъэмрэ пщІэмрэ къару нэхъыбэ щІэлъу къыщІэкІащ.

Иныкъуэм деж дэ хъыбарыфІымрэ ар зэрыдгъэІумрэ дыкъыщхьэщыжын щхьэкІэ судым зыхуэдгъэзэн хуей мэхъу (Флп. 1:7). Псалъэм папщІэ, илъэс куэдым къриубыдэу Европэм и языныкъуэ къэралхэмрэ Ипщэ Кореемрэ Іэмал къыдаттэкъым армэм и пІэкІэ альтернативная гражданская служба жыхуиІэр тхьыну. Абы и ягъэкІэ Европэм ди къуэшу 18 000 хуэдиз икІи Ипщэ Кореем ди къуэшу 19 000 щІигъу армэм дэкІын зэрамыдэм щхьэкІэ ягъэтІысащ.

Арати, 2011 гъэм, июлым и 7 ЕСПЧ-м «Баятян против Армении» жыхуиІэ Іуэхум теухуауэ мыхьэнэшхуэ зиІэ унафэ ищІащ. А унафэм и фІыгъэкІэ Европэм хыхьэ къэрал псоми хуит ящІын хуейщ ди къуэшхэм альтернативная гражданская служба жыхуаІэр ирахьэкІыну. ИужькІэ 2018 гъэм, июным и 28 Ипщэ Кореем и Конституционнэ судми апхуэдэ унафэ къищтащ. А текІуэныгъэхэр къытхуэхьынутэкъым ди къуэш щІалэщІэхэм щыщ гуэр нейтралитетым текІатэмэ.

Иеговэ дыхуэлэжьэну икІи Пащтыхьыгъуэм теухуа хъыбарыфІыр дгъэІуну диІэ хуитыныгъэм къыщхьэщыжын щхьэкІэ ди юристхэм лэжьыгъэшхуэ ирахьэкІ. Абыхэм я дежкІэ пщІэшхуэщ кърахуэкІ ди къуэш, ди шыпхъухэм дэІэпыкъуну. ТекІуэныгъэ къэтхьми къэдмыхьми, суд екІуэкІхэм я фІыгъэкІэ къулыкъущІэхэм, пщыхэм икІи нэгъуэщІ цІыхухэм хъыбарыфІыр зэхахыну Іэмал яІэщ (Мт. 10:18). СудыщІэхэр, къулыкъущІэхэр, журналистхэр икІи судым къекІуэлІа адрей цІыхухэр Библием ит пычыгъуэхэм еджэн икІи едэІуэн хуей мэхъу. Гу къабзэ зиІэхэм къагуроІуэ Иеговэ и Щыхьэтхэр хэт хъунуми икІи я фІэщ хъур зытегъэщІар сытми. Абыхэм щыщу языныкъуэхэм Иеговэ хуэлэжьэн щІадзэ.

ФІЫЩІЭ ПХУЗОЩІ, ИЕГОВЭ!

Сэ илъэс 40 щІигъуауэ дуней псом щыІэ ди филиалхэм юридическэ ІуэхухэмкІэ садолажьэ. Суд куэдым сэ сыхэтащ икІи увыпІэ лъагэ зыІыгъ къулыкъущІэ куэдми сепсэлъэн хуей хъуащ. Дунейпсо Іуэху зехьэпІэми адрей къэралхэми сызыдэлажьэ ди къуэш, ди шыпхъухэр фІыуэ солъагъу икІи лъапІэу солъытэ. Сэ купщІэ зиІэ гъащІэ насыпыфІэ изохьэкІ.

Элизабетрэ сэрэ дызэрызэдэпсэурэ илъэс 45 мэхъу. Зэманыр щытыншми щыгугъуми си щхьэгъусэр лъагъуныгъэ хэлъу щІэгъэкъуэн къысхуохъу. Сэ ар лъапІэу солъытэ, сыт щхьэкІэ жыпІэмэ абы и лъэр щІэзых узыфэ хьэлъэ иІэми абы ар къригъэкІуэткъым.

Дэ мызэ-мытІэу гу зэрылъыттащи, ди зэфІэкІхэракъым мыхьэнэ зиІэр. Къаруи текІуэныгъи къыдэзытыр Иеговэщ. Даути аращ жиІар: «Иеговэ — и лъэпкъым и къарущ» (Пс. 28:8). «Мыр Иеговэ и зауэщ» жыхуиІэ псалъэхэр сыту пэж!