Иеговэ зыгъэгуфІэн унафэхэр къафщтэ

1. Сыт дэ махуэ къэс тщІэн хуей хъур?

ДЭ МАХУЭ къэс унафэ гуэрхэр къыдощтэ. Псалъэм папщІэ, тшхынымрэ дыщыгъуэлъыжыну зэманымрэ къыхэтхыну тыншщ. Ауэ унафэ гуэр пщІыну щыгугъуи щыІэщ. Дэ къатщтэ унафэхэм елъытащ ди узыншагъэри, ди насыпри, ди унагъуэм иІэ ехъулІэныгъэри, Алыхьым дызэрыхуэлажьэри. Дэ дыхуейщ унафэ къатщтэхэм дэри ди унагъуэми сэбэпынагъ къытхуахьыну. Ауэ ди дежкІэ псом нэхърэ нэхъапэр Иеговэ дгъэгуфІэныращ (Рим 12:1, 2).

2. Унафэ пэжхэр къэтщтэн щхьэкІэ сыт хуэдэ лъэбакъуэхэр къыддэІэпыкъуну?

² Дэ унафэ пэжхэр къэтщтэфыну къыщІэкІынщ: 1) Іуэхугъуэм теухуауэ псори къатщІэмэ, 2) Иеговэ и еплъыкІэр къатщІэмэ, 3) Іуэхум и лъэныкъуэ псори зэпэтшэчмэ. Мы лъэбакъуищыр зэпкърытхынщи къэтщІэнщ ди акъылыр къэдгъэсэбэпу дапхуэдэу унафэ тэмэм къэтщтэфынуми (Прит. 2:11, Гъэс.).

ІУЭХУГЪУЭМ ТЕУХУАУЭ ПСОРИ КЪАФЩІЭ

3. Унафэ гуэр къэтщтэн ипэ а Іуэхугъуэм теухуауэ псори зэхэдгъэкІын щІыхуейр сыт? Щапхъэ къэфхь.

³ Унафэ гуэр къэтщтэн ипэ а Іуэхугъуэм теухуауэ зэхэдгъэкІын хуейщ. Сыт абы мыхьэнэ щІиІэр? Ди нэгу къыщІэдгъэхьэнщ цІыхум и узыншагъэм пыщІа гугъуехь гуэр иІэу дохутырым и деж кІуауэ. Дохутырыр сымаджэм емыплъауэ икІи зы упщІи иримытауэ хущхъуэ хуитхыну? ДауикІ, хуитхынукъым! Дэри унафэ гуэр къыщытщтэкІэ апхуэдэ бгъэдыхьэкІэ къэдгъэсэбэпу ди Іуэхум теухуауэ куууэ дыхэплъэ хъунущ. Дапхуэдэу ар зэрытщІ хъунур?

4. Притчи 18:13 зэритымкІэ, Іуэхум теухуауэ нэхъыбэ къэпщІэну сыт къыддэІэпыкъунур? (Сурэтми феплъ.)

⁴ Унафэ гуэр къыщыпщтэн хуей Іуэхугъуэм теухуауэ нэхъыбэ къэпщІэн щхьэкІэ упщІэ зыбжанэ зэптыж хъунущ. Псалъэм папщІэ, уи нэгу зебгъэужьыну зыщІыпІэ урагъэблэгъащ икІи абы укІуэнрэ умыкІуэнрэ унафэ пщІын хуейщ. А Іуэхур къыдэзыхар умыцІыхумэ е абы къыщекІуэкІынур умыщІэмэ, а цІыхум мыпхуэдэ упщІэхэмкІэ зыхуэбгъазэ хъунущ: «Дапщэщ икІи дэнэ ар щекІуэкІынур? ЦІыху дапщэ абы къекІуэлІэнур? А Іуэхур тэмэму екІуэкІын щхьэкІэ хэт кІэлъыплъынур? Хэт иджыри кърагъэблэгъар? Сыт абы къыщекІуэкІынур? А зэхуэсым фадэ щыІэну?» Мы упщІэхэм я жэуапхэр къыддэІэпыкъунущ Іущагъ зыхэлъ унафэ къэтщтэну. (Къеджэ Притчи 18:13, Гъэс.).

5. Іуэхум теухуауэ псори къэтщІамэ, сыт адэкІэ тщІэн хуейр?

⁵ А Іуэхум теухуауэ псори къэпщІамэ, адэкІэ пщІэ хъунум егупсыс. Псалъэм папщІэ, уэ къэпщІащ кърагъэблэгъахэм Иеговэ и хабзэм пщІэ хуэзымыщІхэр зэрахэтынур икІи фадэкІэ зэрырамыгъэлеиным зыри зэрыкІэлъымыплъынур. Аращи, уегупсыс хъунущ: «Абы фадэкІэ ирагъэлейуэ къемызэгъ гуэрхэр къыщемыкІуэкІыну пІэрэ?», — жыпІэу (1 Пет. 4:3). Иджыри зы Іуэхугъуэ гуэрым гу лъыттэн хуейщ. А Іуэхугъуэр щекІуэкІыну зэманыр уи зэхуэсым и зэІущІэм е хъыбарыфІыр бгъэІуну зыгуэрым ущыгурыІуа зэманым техуэнкІэ хъунущ. Іуэхур зыІутыр зэхэбгъэкІа иужь, унафэ пэж къэпщтэну нэхъ тынш хъунущ. Иджы етІуанэ лъэбакъуэм дегупсысынщ. Дэ ди еплъыкІэр къэтщІащ, ауэ Иеговэ абы дапхуэдэу зэреплъыр? (Прит. 2:6).

ИЕГОВЭ И ЕПЛЪЫКІЭР КЪАФЩІЭ

6. Екъуб 1:5 зэритымкІэ, Иеговэ Іущагъ къыдитыну дыщІелъэІун хуейр сыт?

⁶ Иеговэ фелъэІу а Іуэхум теухуауэ и еплъыкІэр къэфщІэн щхьэкІэ къывдэІэпыкъуну. Алыхьым дыкъегъэгугъэ Іущагъ къыдитыну. Іущагъыр къыддэІэпыкъунущ унафэ тщІар Иеговэ игу ирихьрэ иримыхьрэ къыдгурыІуэну. Апхуэдэ Іущагъыр Иеговэ «зыри имыгъэкъуаншэу, и гуапэу... цІыху псоми» ярет. (Къеджэ Екъуб 1:5.)

7. Иеговэ и еплъыкІэр дапхуэдэу къызэрытщІэнур? Щапхъэ къэфхь.

⁷ Фи лъэІум жэуап къритыну Иеговэ Іэмал ефт. Уи нэгу къыщІэгъэхьэт умыцІыху къалэ гуэрым ущыгъуэщауэ уздэкІуэнумкІэ абы щыпсэу цІыху гуэрым уеупщІу. Уэ абы и жэуапым и кІэм нэс уемыдаІуэу адэкІэ укІуэну? ДауикІ, уэ апхуэдэу пщІэнукъым. Абы жиІэнум фІыуэ уедэІуэнущ. Апхуэдэ дыдэу Иеговэ Іущагъ къыуитыну уелъэІуа иужь абы и жэуапыр къызэрыбгурыІуэным хущІэкъу. Абы щхьэкІэ уи Іуэхум хуэкІуэ Библием ит унафэхэмрэ принципхэмрэ уегупсысын хуейщ. Псалъэм папщІэ, дыздрагъэблэгъам дыкІуэнрэ дымыкІуэнрэ унафэ къэтщтэну сыт къыддэІэпыкъунур? Алыхьым и Псалъэр куууэ зэпкърых. ЩхьэрыутІыпщу ешхэн-ефэным теухуауэ, Иеговэ и хабзэхэм пщІэ хуэзымыщІхэм ятеухуауэ икІи Алыхьым и Пащтыхьыгъуэм япэ увыпІэр зэреттын хуейм теухуауэ сыт абы щыжыІар? (Мт. 6:33, ДЩІ; Рим 13:13; 1 Кор. 15:33).

8. Узыхуей информацие дапхуэдэу къызэрыбгъуэтыфынур? (Сурэтми феплъ.)

⁸ Иныкъуэхэм деж дызыхуейм теухуауэ информацие къэдгъуэтыну тыншкъым. Аращи, апхуэдэ Іуэхум пэлъэща къуэшым е шыпхъум уечэнджэщ хъунущ. Ауэ уэ езым ар куууэ зэпкърыпхыным мыхьэнэшхуэ иІэщ. АбыкІэ уэ къыбдэІэпыкъунущ «Путеводитель по публикациям Свидетелей Иеговы» жыхуаІэмрэ «Библейские стихи в помощь христианину» жыхуиІэ тхылъымрэ. Зыщумыгъэгъупщэ: уэ уи мурад нэхъыщхьэр Иеговэ зыгъэгуфІэн унафэ къэпщтэныращ.

9. Унафэ къэтщтам Иеговэ игъэгуфІэнрэ имыгъэгуфІэнрэ дапхуэдэу зэрызэхэдгъэкІынур? (Ефес 5:17).

⁹ Унафэ къэтщтам Иеговэ игъэгуфІэнрэ имыгъэгуфІэнрэ дапхуэдэу зэрызэхэдгъэкІынур? Псом япэ, ди Алыхьыр фІыуэ тцІыхун хуейщ. Библием щыжыІащ: «Тхьэ ЛъапІэр къэпцІыхуныр — акъылым ищхьэщ» (Прит. 9:10, Гъэс.). Дэ къыдгурыІуэн хуейщ Иеговэ сыт хуэдэ Алыхьми, ар сыткІэ къытщыгугъми, абы сыт фІыуэ илъагъуми, сыт илъагъу мыхъуми. Аращи зэупщІыж: «Иеговэ теухуауэ къэсщІам тепщІыхьмэ, ар зыгъэгуфІэн сыт хуэдэ унафэ къэсщтэнур?» (Къеджэ Ефес 5:17.)

10. Унагъуэмрэ лъэпкъымрэ я хабзэхэм нэхърэ Библием ит принципхэр щІэнэхъапэр сыт?

¹⁰ Иныкъуэхэм деж Иеговэ дгъэгуфІэн щхьэкІэ ди благъэхэм я жагъуэ тщІын хуеинкІэ хъунущ. Щапхъэ къэтхьынщ. Адэ-анэм балигъ хъуа я пхъур хагъэзыхь хуэщІауэ псэу, ауэ Иеговэ и хабзэхэм апхуэдэуи темыт къуэшым дэкІуэну. ДауикІ, ахэр хуейщ я пхъур зыри хуэмыныкъуэу псэуну. Ауэ шыпхъур зэупщІыж хъунущ: «Сэ абы сыдэкІуэмэ, Иеговэрэ сэрэ ди зэхуаку дэлъ зэхущытыкІэр нэхъ быдэ сщІыну ар къыздэІэпыкъуну пІэрэ?» Апхуэдэ Іуэхугъуэм Иеговэ дапхуэдэу зэреплъыр? Абы и жэуапыр Маттэ 6:33 (ДЩІ) къыщыдгъуэтынущ. А едзыгъуэм Иеговэ и лэжьакІуэхэр хуегъэуш я гъащІэм япэ увыпІэр Алыхьым и Пащтыхьыгъуэм иратыну. Дэ ди адэ-анэми дыкъэзыухъуреихь цІыхухэми пщІэ яхудощІ, ауэ ди дежкІэ псом нэхърэ нэхъапэр Иеговэ арэзы тщІыныращ.

ІУЭХУМ И ЛЪЭНЫКЪУЭ ПСОРИ ЗЭПЭФШЭЧ

11. Іуэхур зэпэпшэчу унафэ тэмэм къэпщтэну сыт къыбдэІэпыкъунур? (Притчи 2:11, Гъэс.).

¹¹ Библием ит принципхэм ухэплъа иужь Іуэхум и лъэныкъуэ псори зэпэпшэчу, дэтхэнэ зы унафэми кърикІуэнкІэ хъуным уегупсысын хуейщ. (Къеджэ Притчи 2:11, Гъэс.) Ар пщІэну щытынши щыгугъуи къохъу. Ауэ зэхэщІыкІыр къыбдэІэпыкъунущ Іуэхур егъэлеяуэ щыгугъум дежи Іущагъ зыхэлъ унафэ къэпщтэну.

12, 13. ЗэхэщІыкІыр дапхуэдэу къызэрыбдэІэпыкъунур лэжьапІэ къыщыхэпхкІэ Іущагъ зыхэлъ унафэ къэпщтэну?

¹² Псалъэм папщІэ, уи унагъуэр зыхуей хуэбгъэзэн щхьэкІэ лэжьапІэ къыболъыхъуэ. Уэ объявленитІ къыппэщІэхуащ. Абы теухуауэ узыхуей информациехэр зэхуэпхьэсащ: уэ зэхэбгъэкІащ сыт хуэдэ лэжьыгъэ бгъэзэщІэн хуейми, узэрылэжьэну графикыр, гъуэгум тебгъэкІуэдэну зэманыр, нэгъуэщІ Іуэхугъуэхэри. ЛэжьапІитІри Библием ит принципхэм пэувкъым. Зыр уэ нэхъ уигу ирихьынкІэ хъунущ, сыт щхьэкІэ жыпІэмэ ахъшэ къыуатынур нэхъыбэщ, лэжьыгъэри гъэщІэгъуэнщ. Ауэ унафэ къэпщтэн ипэ нэгъуэщІ лъэныкъуэхэми уегупсысын хуейщ.

¹³ ЛэжьапІэм теухуауэ унафэ пэж къэпщтэну мы упщІэхэр къыбдэІэпыкъунущ: «А лэжьапІэм и зэранкІэ иныкъуэхэм деж зэІущІэхэр блэзмыгъэкІыну пІэрэ? Си унагъуэм духовнэ, эмоциональнэ лъэныкъуэкІэ сыдэІэпыкъуну зэман къысхуэнэну пІэрэ?» Апхуэдэ упщІэхэр къыбдэІэпыкъунущ ахъшэр нэхъапэ йомыгъэщу Алыхьым узэрыхуэлажьэмрэ уи унагъуэр абы гъунэгъу зэрыхуэпщІымрэ нэхъапэ ибгъэщыну (Флп. 1:10, япэ Іыхьэр, ДЩІ). Апхуэдэу пщІэмэ, Иеговэ фІыгъуэ къызыпигъэкІуэн унафэ къыпщтэфынущ.

14. ЗэхэщІыкІымрэ лъагъуныгъэмрэ дапхуэдэу къызэрыддэІэпыкъунур нэгъуэщІхэм я фІэщхъуныгъэм зэран дыхуэмыхъуну?

¹⁴ Дэ зэхэщІыкІыр къыддэІэпыкъунущ къатщтэ унафэхэр нэгъуэщІхэм дапхуэдэу къащыхъунуми дегупсысыну. Дэ дыхуейкъым нэгъуэщІхэм я фІэщхъуныгъэм зэран дыхуэхъуну (Флп. 1:10, етІуанэ Іыхьэр). ЗэхэщІыкІым мыхьэнэшхуэ иІэщ ди щыгъынымрэ ди теплъэмрэ теухуауэ унафэ къыщытщтэкІэ. Псалъэм папщІэ, дэ дигу ирихьынкІэ хъунущ зыхуэпэкІэ хэхарэ щхьэц щІыкІэ гуэррэ. Ауэ апхуэдэ теплъэр къемызэгъыу зэхуэсым щыщхэми нэгъуэщІ цІыхухэми къалъытэмэ-щэ? ЗэхэщІыкІыр къыддэІэпыкъунущ нэгъуэщІхэм я гурыщІэм пщІэ хуэтщІыну. Лъагъуныгъэм дыхуигъэушынущ ди «фІагъ зыхэлъым и ужь» димыту «нэгъуэщІ цІыхухэм я фІагъ зыхэлъым и ужь» дитыну икІи ди теплъэмкІэ зыри дымыгъэукІытэну (1 Кор. 10:23, 24, 32; 1 Тим. 2:9, 10). Абы щыгъуэ нэгъуэщІхэр фІыуэ зэрытлъагъур икІи пщІэ зэрахуэтщІыр къызыхэщ унафэхэр къэтщтэфынущ.

15. Мыхьэнэшхуэ зиІэ унафэ къэпщтэн ипэ сыт узэгупсысын хуейр?

¹⁵ Мыхьэнэшхуэ зиІэ унафэ къэпщтэн ипэ а унафэр гъэзэщІа хъун щхьэкІэ сыт пщІэн хуейми егупсыс. Хьисэ хуригъаджэу щытащ зыгуэр пщІэн ипэ абы текІуэдэнур къэббжын зэрыхуейм (Лк. 14:28). Абы хохьэ зэманыр, ахъшэр, къарур. Иныкъуэхэм деж уи унагъуэм щыщхэр дапхуэдэу къыбдэІэпыкъуфынуми уечэнджэщ хъунущ. Апхуэдэ бгъэдыхьэкІэм сыт хуэдэ сэбэпынагъ хэлъыр? Уэ къэплъэгъункІэ хъунущ унафэ къэпщтам зэхъуэкІыныгъэ гуэр хэплъхьэн е псори пхъуэжын зэрыхуейр. Абы нэмыщІ уи унагъуэм щыщхэм я чэнджэщым ущІэдэІумэ, унафэ къэпщтар къыбдаІыгъыну абыхэм нэхъ гукъыдэж яІэнущ (Прит. 15:22).

УНАФЭ ПЭЖХЭР КЪАФЩТЭ

16. Унафэ тэмэм къэпщтэн щхьэкІэ сыт хуэдэ лъэбакъуэхэр пчын хуей? («Унафэ тэмэм къэпщтэн щхьэкІэ сыт къыбдэІэпыкъунур?» жыхуиІэ рамкэми феплъ.)

¹⁶ Мы статьям зи гугъу ищІ лъэбакъуэхэр пчымэ, унафэ пэж къэпщтэфынущ. Унафэ къэпщтам Алыхьыр игъэгуфІэн щхьэкІэ Іуэхум теухуауэ уэ псори къэпщІащ икІи Библием ит принципхэм уегупсысащ. Иджы уэ Иеговэ уелъэІу хъунущ уи мурадыр къохъулІэну къыбдэІэпыкъун щхьэкІэ.

17. Унафэ пэжхэм дыхуэзышэнур сыт?

¹⁷ Дэ япэм унафэ пэжхэр къатщтэу щытами, мыхьэнэшхуэ иІэщ ехъулІэныгъэм дыхуэзышэр зыщыдмыгъэгъупщэным. Ар ди акъылыфІагъэракъым, атІэ Иеговэ къыбгъэдэкІ Іущагъыращ. Іущагъ пэжым хыхьэ щІэныгъэр, зэхэщІыкІыр, акъылыфІагъэр къыдэзытыфынур Иеговэ закъуэщ (Прит. 2:1—5). Иеговэ зыдэдгъэІэпыкъуу щытмэ, ар зыгъэгуфІэн унафэхэр къытхуэщтэнущ (Пс. 23:2, 3).