ЛІыхэ, фи щхьэгъусэхэм пщІэ яхуэфщІ

1. Иеговэ унагъуэр щІиухуа зы щхьэусыгъуэ къыжыфІэ.

ИЕГОВЭ — «Алыхь насыпыфІэщ» (1 Тим. 1:11, ДЩІ). Ар хуейщ дэри насыпыфІэу дыщытыну. Абы къыхэкІкІэ дэ абы тыгъэ куэд къытхуищІащ (Екъуб 1:17). Унагъуэр — абыхэм ящыщ зыщ. ЦІыхухъумрэ цІыхубзымрэ щызэрышэм деж абыхэм псалъэ ят фІыуэ зэрылъагъуну икІи зыр зым пщІэ хуищІыну. Зэщхьэгъусэхэм я зэхуаку дэлъ хуабагъэр яхъумэу щытмэ, я унагъуэм гуфІэгъуэ илъынущ (Прит. 5:18, Гъэсэпэтхыдэхэр).

2. Унагъуэ куэдыр нобэ сыт хуэдэ гугъуехьхэм пэщІэхуэрэ?

² Ди жагъуэ зэрыхъунщи, нобэ зэщхьэгъусэ куэдым щызэрыша махуэм зрата псалъэхэр яІыгъыжкъым. Абы кърикІуэр насыпыншагъэщ. «Всемирная организация здравоохранения» жыхуаІэм иджы дыдэ ищІа отчётым щыжыІащ цІыхухъу куэдым я щхьэгъусэхэм я пщІэр псалъэкІэ зэрыраудыхыр, удын зэрытралъхьэр е нэгъуэщІ зыгуэру лей къызэрытрагъэхьэр. Языныкъуэ цІыхухъухэр цІыхухэм щахэтым деж я щхьэгъусэм пщІэ хуащІ хуэдэу загъэлъагъуэ, ауэ унэм щыщІэсым деж я пщІэр ираудых. Иджыри зы Іуэхугъуэм хуабжьу зиубгъуащ: цІыхухъур порнографие еплъу щытмэ, и щхьэгъусэм къыщохъу и лІым фІыуэ къимылъагъужу, я насыпыри къутауэ. Апхуэдэу ахэр зэпэжыжьэ мэхъу.

3. Языныкъуэ цІыхухъухэм я щхьэгъусэхэм лей къыщІытрагъэхьэр сыт?

³ Языныкъуэ цІыхухъухэм я щхьэгъусэхэм лей къыщІытрагъэхьэр сыт? Абы щхьэусыгъуэ зэмылІэужьыгъуэхэр иІэщ. Языныкъуэхэм я адэ-анэр зэрызэхущытам щапхъэ трах: адэр и щхьэгъусэм пхъашэу епсалъэу щытамэ, ар тэмэму къалъытэ. НэгъуэщІхэри зыщІапІыкІа хабзэм тету цІыхубзхэм ткІийуэ хущытщ икІи шынагъэкІэ, къарукІэ зрагъэдэІуэну хэтщ. Хэти и губжьыр зэтриІыгъэу зригъэсакъым. Абы нэмыщІ порнографие еплъ цІыхухъухэм цІыхубзхэмрэ пІэщхьагъ Іуэхумрэ теухуауэ еплъыкІэ пхэнж яІэ мэхъу. Организацэ куэдым гу зэрылъатамкІэ, COVID-19 пандемиер щекІуэкІым щыгъуэ цІыхубзхэм лей къызэрытрагъэхьэр нэхъыбэ хъуащ. ДауикІ, уи фызым пхъашэу ущІыхущытын зы щхьэусыгъуи щыІэкъым.

4. Щхьэгъусэ зиІэ къуэшхэр сытым хуэсакъын хуей икІи сыт щхьэкІэ?

⁴ Зэрытлъагъущи, мы дунейм и нэхъыбэм цІыхубзхэм хуэфащэ пщІэр хуащІкъым. Абы къыхэкІкІэ Иеговэ хуэлажьэ цІыхухъухэр сакъын хуейщ мы дунейм и еплъыкІэр зыхамылъхьэн щхьэкІэa. Сыт щхьэкІэ жыпІэмэ цІыхум и ІуэхущІафэр и гупсысэкІэм елъытащ. Апостол Паул Рим къалэм дэса уафэм кІуэну гугъэ зиІэхэм мыпхуэдэу яхуитхащ: «Мы лъэхъэнэм и хабзэхэм Іэрылъхьэ зыхуэвмыгъэхъу» (Рим 12:1, 2). Паул а письмор щитхым щыгъуэ Рим щыІэ зэхуэсыр къызэрыунэхурэ илъэс зыбжанэ дэкІауэ къыщІэкІынут. Апхуэдэу щыт пэтми, Паул и псалъэхэм къыхощ языныкъуэ къуэшхэм зыщІапІыкІа хабзэр зэрызыхамынар икІи къэзыухъуреихь цІыхухэм я еплъыкІэм хуэдэ зэраІэр. Аращ Паул ахэр щІыхуигъэушар я гупсысэкІэмрэ я щытыкІэмрэ яхъуэжыну. Ноби а чэнджэщыр щхьэгъусэ зиІэ къуэшхэм я дежкІэ щхьэпэщ. Ди жагъуэ зэрыхъунщи, языныкъуэ къуэшхэм нобэр къыздэсым мы дунейм щыІэ еплъыкІэхэр зыханакъым икІи я щхьэгъусэхэм гущІэгъуншэу хущытщb. Ауэ Иеговэ цІыхухъухэм сыт зэрыщыгугъыр ахэр я щхьэгъусэхэм зэрыхущытын хуейм теухуауэ? А упщІэм и жэуапыр мы статьяр зытегъэщІа едзыгъуэм къыщытщІэнущ.

5. 1 Петр 3:7 зэритымкІэ, цІыхухъур и щхьэгъусэм дапхуэдэу зэрыхущытын хуейр?

⁵ Къеджэ 1 Петр 3:7. Иеговэ лІыхэм унафэ яхуещІ я щхьэгъусэхэм пщІэ хуащІыну. А унафэр зыгъэзащІэ цІыхухъум и щхьэгъусэм ирегъэлъагъу пщІэ зэрыхуищІыр икІи фІыуэ зэрилъагъур. Мы статьям дэ щызэпкърытхынущ цІыхухъум ар дапхуэдэу ищІэ хъунуми. Ауэ япэщІыкІэ дытепсэлъыхьынщ цІыхухъум сыт хуэдэ щытыкІэ иІэну къемызэгъми.

УИ ЩХЬЭГЪУСЭМ И ГУР ХЭЗЫГЪЭЩІЫН УМЫЩІЭ

6. Я щхьэгъусэхэм гущІэгъуншэу хущыт цІыхухъухэм Иеговэ дапхуэдэу зэрыхущытыр? (Колоссэ 3:19).

⁶ Удын телъхьэн. Иеговэ залымыгъэ зезыхьэ дэтхэнэ зыри илъагъу хъукъым (Пс. 11:5). Псом хуэмыдэу Иеговэ дежкІэ гущыкІыгъуэщ цІыхухъум и щхьэгъусэм лей къыщытригъэхьэм деж (Мал. 2:16; къеджэ Колоссэ 3:19). 1 Петр 3:7 зэритымкІэ, цІыхухъур и щхьэгъусэм Іейуэ хущытмэ, Иеговэрэ абырэ я зэхуаку дэлъ зэхущытыкІэр зэтекъутэнущ, уеблэмэ абы и тхьэлъэІум Алыхьыр емыдэІуэнкІэ хъунущ.

7. Ефес 4:31, 32 зэритымкІэ, цІыхухъур и щхьэгъусэм дапхуэдэу епсалъэ зэрымыхъунур? («Псалъэхэм къикІыр» жыхуиІэми феплъ.)

⁷ ПщІэр езыудых псэлъэкІэр. Языныкъуэ цІыхухъухэм я щхьэгъусэхэр псалъэкІэ ягъэпуд икІи кІий-гуоуурэ йопсалъэ. Ауэ Иеговэ «къызэщІэплъэнри, губжьынри, кІий-гуоунри, цІыхухэм ІейкІэ ятепсэлъыхьынриc» илъагъу хъукъым. (Къеджэ Ефес 4:31, 32.) Иеговэ псори зэхех икІи цІыхухъур и щхьэгъусэм зэрепсалъэ щІыкІэм мыхьэнэ иримыту щыткъым, ахэр я закъуэу къыщынэм дежи. ЦІыхухъур и щхьэгъусэм пхъашэу щыхущытым деж ар зэран зыхуэхъур и нэчыхьым и закъуэкъым, атІэ Иеговэрэ абырэ я зэхуаку дэлъ зэныбжьэгъугъэми зэран хохъу (Екъуб 1:26).

8. Дапхуэдэу Иеговэ порнографием зэрыхущытыр?

⁸ Порнографием еплъыныр. Дапхуэдэу Иеговэ порнографием зэрыхущытыр? Абы ар илъагъу хъукъым! Аращи, цІыхухъур порнографие еплъмэ, Иеговэрэ абырэ я зэхуаку дэлъ зэхущытыкІэр зэтрекъутэ икІи и щхьэгъусэм пщІэ зэрыхуимыщІыр къегъэлъагъуэd. Иеговэ цІыхухъум щогугъ и щхьэгъусэм хуэпэжыну, уеблэмэ и гукІи хуэпэжу щытыну. Хьисэ жиІащ цІыхухъур хъуэпсэнэгуу цІыхубзым еплъмэ «игукІэ и щхьэгъусэм епцІыжауэ» (Мт. 5:28, 29, ДЩІ)e.

9. ПІэщхьагъ Іуэхум теухуауэ цІыхухъум и щхьэгъусэм и пщІэр щриудыхым деж Иеговэ илъагъу щІэмыхъур сыт?

⁹ ПІэщхьагъ Іуэхум теухуауэ цІыхубзым и пщІэр езыудыхыу къилъытэр. Языныкъуэ цІыхухъухэм я щхьэгъусэхэр хагъэзыхь пІэщхьагъ Іуэхум теухуауэ я пщІэр езыудых гуэр ящІэну. Апхуэдэм деж цІыхубзым и напэр къоныкъуэкъу икІи и щхьэгъусэм фІыуэ къимылъагъуу къелъытэ. Иеговэ илъагъу хъукъым цІыхухъур апхуэдэу щхьэхуещэу щыщытым деж. Иеговэ цІыхухъум щогугъ и щхьэгъусэр фІыуэ илъагъуну, хуэсакъыну икІи и гурыщІэхэм пщІэ хуищІыну (Еф. 5:28, 29). Иеговэ хуэлажьэ цІыхухъум и щхьэгъусэм удын трилъхьэмэ, и пщІэр ириудыхмэ е порнографие еплъмэ, абы и гупсысэкІэмрэ и щытыкІэмрэ дапхуэдэу зэрихъуэж хъунур?

ЦІЫХУХЪУМ И ГУПСЫСЭКІЭМРЭ И ЩЫТЫКІЭМРЭ ДАПХУЭДЭУ ЗЭРИХЪУЭЖЫФЫНУР?

10. ЦІыхухъухэм Хьисэ сыткІэ щапхъэ трах хъуну?

¹⁰ ЦІыхухъум и щхьэгъусэм удын трилъхьэмэ, и пщІэр ириудыхыу епсалъэмэ е къемызэгъ гуэр иригъэщІэну хигъэзыхьмэ, абы зихъуэжыну сыт къыдэІэпыкъунур? Абы Хьисэ щапхъэ трихын хуейщ. ДауикІ, Хьисэ щхьэгъусэ иІакъым, ауэ ар и апостолхэм зэрыхущытар цІыхухъухэм щапхъэфІ яхуохъу. Ахэри я щхьэгъусэхэм апхуэдэу хущытын хуейщ (Еф. 5:25). Хьисэ и апостолхэм зэрыхущытамрэ зэрепсэлъа щІыкІэмрэ иджыпсту гу лъыттэнщ.

11. Хьисэ и апостолхэм дапхуэдэу зэрыхущытар?

¹¹ Хьисэ и апостолхэм пщІэ яхуищІт, щабэуи яхущытт. Ар абыхэм яхуэпхъашэу икІи ятрикъузэу зэи щытакъым. Ар Зиусхьэну щыта пэтми, залымыгъэкІэ апостолхэм щІыхь зыхуригъэщІыну хэтакъым, атІэ Іэдэбагъ хэлъу абыхэм яхуэлэжьащ (Ин. 13:12—17). Хьисэ и лъэужь ирикІуэхэм яжриІащ: «ЖысІэр зэвгъащІэ, сэ си гур щабэщ икІи пагагъэ схэлъкъым» (Мт. 11:28—30). Хьисэ Іэдэбагъ хэлъащ. ЦІыхур Іэдэбу щытмэ, абы къикІкъым ар и щхьэм къыщхьэщымыжыфу икІи нэгъуэщІхэр зытригъэгушхуэу. Апхуэдэ цІыхум зышыІэныгъэ хэлъщ. Ар и пІэм кърашыну щыхэтым дежи зэпІэзэрыту къонэ икІи и гурыщІэхэр зэтреІыгъэ.

12. Хьисэ нэгъуэщІхэм дапхуэдэу зэрепсалъэу щытар?

¹² Хьисэ и псалъэхэмкІэ нэгъуэщІхэм гупсэхугъуэ яритт, къаруи ящІилъхьэт. Ар и лъэужь ирикІуэхэм пхъашэу зэи епсэлъакъым (Лк. 8:47, 48). Абы и бийхэм и пІэм кърашыну хуейуэ и пщІэр щраудыхым «къыхуэхъущІэу щытахэм яхуэхъущІэжакъым» (1 Пет. 2:21—23). Иныкъуэхэм деж Хьисэ цІыхум пхъашэу емыпсэлъэн щхьэкІэ зыри жимыІэмэ нэхъ къищтэт (Мт. 27:12—14). Щхьэгъусэ зиІэ къуэшхэм дежкІэ ар сыту щапхъэфІ!

13. Маттэ 19:4—6 итым щхьэгъусэ зиІэ цІыхухъур дапхуэдэу зэрытетыфынур? (Сурэтми феплъ.)

¹³ Хьисэ цІыхухъухэм унафэ яхуищІащ я щхьэгъусэхэм хуэпэжыну. Абы и Адэм жиІа мы псалъэхэр къихьащ: «ЛІыр и адэ-анэм яхэкІынурэ, и фызым щІыгъуу, тІури зыпкъ хъунущ». (Къеджэ Маттэ 19:4—6.) «И фызым щІыгъуу» жаІэу зэрадзэкІа алыджыбзэ псалъэм «кІэрыпщІэн» жиІэу къокІ. Аращи, зэщхьэгъусэхэр зэкІэрыпщІэу зы хъуам хуэдэу, я зэхуаку дэлъ лъагъуныгъэр гуащІэу щытын хуейщ. Апхуэдэу зэкІэрыпщІар тІуми зэран хуэмыхъуу пхузэкІэрычыжынукъым. Зи щхьэгъусэр фІыуэ зылъагъу цІыхухъур порнографие еплъынукъым. Абы занщІэу «мыхъумыщІэ псоми» и нэр къытригъэкІынущ (Пс. 119:37). Іэиуб хуэдэу, абы псалъэ быдэ зритыжынущ нэгъуэщІ цІыхубзхэм гулъытэ къемызэгъ яхуимыщІыну (Иов 31:1).

14. ЦІыхухъум и щхьэгъусэм и жагъуэ ищІмэ, сыт хуэдэ лъэбакъуэхэр ичын хуей и щхьэгъусэмрэ Иеговэрэ хуиІэ зэхущытыкІэр зэтригъэувэжын щхьэкІэ?

¹⁴ Зи щхьэгъусэм удын тезылъхьэ е абы и пщІэр езыудых псалъэхэр жызыІэ цІыхухъум лъэбакъуэ зыбжанэ ичын хуейщ, и щхьэгъусэмрэ Иеговэрэ хуиІэ зэхущытыкІэр зэтригъэувэжын щхьэкІэ. Сыт хуэдэ лъэбакъуэ ахэр? Япэр: абы ищІэр зэрымытэмэмыр къыгурыІуэжын хуейщ. Иеговэ абы ищІэ псори елъагъу, жиІэри зэхех (Пс. 44:21; Эккл. 12:14; Евр. 4:13). ЕтІуанэр: абы и щхьэгъусэм и жагъуэ ищІын щегъэт, и щытыкІэри ехъуэж (Прит. 28:13). Ещанэр: абы и щхьэгъусэми Иегови жреІэ ищІам зэрыхущІегъуэжыр икІи къыхуагъэгъуну йолъэІу (Апост. 3:19). Абы нэмыщІ цІыхухъум Иеговэ лъэІу гуащІэкІэ зыхуигъэзэн хуейщ зихъуэжыну гукъыдэж иІэн щхьэкІэ икІи и гупсысэхэм, и псалъэхэм, и щытыкІэм кІэлъыплъын щхьэкІэ къыдэІэпыкъуну (Пс. 51:10—12; 2 Кор. 10:5; Флп. 2:13). ЕплІанэр: ар и тхьэлъэІум тетыжщ икІи сыт хуэдэ залымыгъэри псэлъэкІэ къемызэгъри илъагъу мыхъуу зрегъасэ (Пс. 97:10). Етхуанэр: абы занщІэу зэхуэсым и нэхъыжьхэм захуегъазэ, ахэр къыдэІэпыкъун щхьэкІэ (Екъуб 5:14—16). Еханэр: абы адэкІэ апхуэдэ щытыкІэм пэІэщІэ зэрызыхуищІын план ещІ. Порнографие еплъ цІыхухъум а лъэбакъуихри ичын хуейщ. Зызыхъуэжыну хуей цІыхухъум Иеговэ Іэмал имыІэу дэІэпыкъунущ (Пс. 37:5). Ауэ цІыхубзым игу хэзыгъэщІ Іуэхугъуэхэр къэбгъанэкІэ зэфІэкІкъым. ЦІыхухъум и щхьэгъусэм пщІэ хуищІу зригъэсэн хуейщ. Абы щхьэкІэ сыт цІыхухъум ищІэн хуейр?

ЦІЫХУХЪУМ И ЩХЬЭГЪУСЭМ ДАПХУЭДЭУ ПЩІЭ ЗЭРЫХУИЩІ ХЪУНУР?

15. ЦІыхухъум и щхьэгъусэр фІыуэ зэрилъагъур дапхуэдэу зэригъэлъэгъуфынур?

¹⁵ ЦІыхухъум и щхьэгъусэр фІыуэ зэрилъагъур иригъэлъэгъун хуейщ. Унагъуэ насыпыфІэ зиІэ къуэшхэм щыщ языныкъуэхэм хабзэу зыхуагъэуващ махуэ къэс щхьэгъусэм и гуапэ хъун гуэр ящІэну, фІыуэ зэралъагъур зыхрагъэщІэн щхьэкІэ (1 Ин. 3:18). ЦІыхухъум и щхьэгъусэр фІыуэ зэрилъагъур Іэмал зэмылІэужьыгъуэкІэ къигъэлъэгъуэфынущ. Псалъэм папщІэ, абы и щхьэгъусэм и Іэр щабэу иубыд е ІэплІэ хуищІ хъунущ. Абы нэмыщІ «Сигу укъэкІащ» е «Дауэ ущыт?» жиІэу сообщенэ хуригъэхьыфынущ. Зэман-зэманкІэрэ и гурыщІэхэр зэрыт открыткэ е удз гъэгъа ирит хъунущ. ЦІыхухъум апхуэдэу щищІэм деж и щхьэгъусэм пщІэ хуещІ и нэчыхьри быдэ ещІ.

16. ЦІыхухъур и щхьэгъусэм щытхъун щІыхуейр сыт?

¹⁶ Уи щхьэгъусэм щытхъу, фІыщІи хуэщІ. Зи щхьэгъусэм пщІэ хуэзыщІ цІыхухъум ар лъапІэу елъытэ икІи абы теухуауэ жреІэ. Псалъэм папщІэ, щІэгъэкъуэн къызэрыхуэхъум щхьэкІэ фІыщІэ хуищІ хъунущ (Кол. 3:15). И гум къыбгъэдэкІыу цІыхухъур и щхьэгъусэм щыщытхъум деж абы и гур егъэхуабэ. ЦІыхубзым и гур гъэтІылъауэ щытщ и щхьэгъусэм фІыуэ къызэрилъагъур икІи лъапІэу зэрилъытэр щызэхищІэм деж (Прит. 31:28, Гъэс.).

17. ЦІыхухъум и щхьэгъусэм дапхуэдэу пщІэ зэрыхуищІ хъунур?

¹⁷ ЦІыхухъур и щхьэгъусэм гуапэу, пщІэ хэлъу хущытын хуейщ. Зи щхьэгъусэр фІыуэ зылъагъу цІыхухъум Иеговэ къыбгъэдэкІ тыгъэу и щхьэгъусэр къелъытэ (Прит. 18:22; 31:10, Гъэс.). ПІэщхьагъ Іуэхум теухуауи ар абы щабэу, пщІэ хэлъу хущытщ икІи и пщІэр езыудых, и напэр къыщІеныкъуэкъун гуэр иригъащІэкъымf. Иеговэ и пащхьэм деж цІыхухъуми и напэр къабзэу щытын хуейщ (Апост. 24:16).

18. ЦІыхухъухэр сыт зыхущІэкъун хуейр? («ЦІыхухъум и щхьэгъусэм пщІэ зэрыхуищІ хъуным теухуа чэнджэщиплІ» жыхуиІэ рамкэми феплъ.)

¹⁸ ЦІыхухъухэ, шэч лъэпкъ къытевмыхьэ: псалъэкІи ІуэхукІи фи щхьэгъусэм пщІэ хуэфщІыну фызэрыхущІэкъум Иеговэ гу лъетэ. Аращи, фи щхьэгъусэм и гур хэвмыгъэщІ, щабагъ, гуапагъ, пщІэ хэлъу фыхущыт. Апхуэдэу фэ къэвгъэлъэгъуэнущ ар фІыуэ зэрыфлъагъур, лъапІэуи зэрыфлъытэр. ЦІыхухъухэ, фи щхьэгъусэм пщІэ зэрыхуэфщІымкІэ псом нэхъ лъапІэ дыдэу щытыр — Иеговэрэ фэрэ фи зэхуаку дэлъ зэхущытыкІэр — фхъумэнущ (Пс. 25:14).