Дунейр мамыру щыщытми, зауэ щекІуэкІми, Иеговэ къару къыдитащ

Пол: 1985 гъэм ноябрь мазэм дэ миссионер лэжьыгъэр къытхуагъэфэщауэ ди гум гуфІэгъуэшхуэ илъу Либе́рием (КъухьэпІэ Африкэм) дыкІуэу гъуэгуанэ дытетт. Дызэрыс самолётыр Сенега́л къыщытІысам щыгъуэ Энн мыпхуэдэу зэрыжиІар сощІэж: «Зы сыхьэт нэхъ дэмыкІыу дэ Либерием дынэсынущ!» Абы хэту объявление къатащ: «Либерием кІуэхэр самолётым фикІын хуейщ, сыт щхьэкІэ жыпІэмэ абы цІыхухэм зыкъыщаІэтауэ хуабжьу зэрызохьэри дыщытІысыфынукъым». Арати, дэ Сенегал щыІэ миссионерхэм я деж махуипщІкІэ дыкъыщыувыІэн хуей хъуащ. ХъыбарыщІэхэм дыздедаІуэм Либерием къыщыхъухэм теухуауэ узыгъэшынэн фІэкІа зыри зэхэтхтэкъым. Абы къыщатт цІыху куэд зэрызэтраукІэр, «комендантский час» жыхуаІэм темытхэри занщІэу зэраукІыр.

Энн: Дэ тІури дыцІыху сакъти, зэрызехьэ здэщыІэхэм зэи дыкІуэтэкъым. Сэ сыщыцІыкІум шынэкъэрабгъэкІэ къызэджэт, уеблэмэ иджыпстуи гъуэгум сыщызэпрыкІым дежи согузавэ. Апхуэдэу щыт пэтми, дэ Либерием дыкІуэну дыхьэзырт.

Пол: Эннрэ сэрэ дыкъыщыхъуар Англием и КъухьэпІэ лъэныкъуэращ икІи километрий фІэкІ нэхъ дызэпэмыжыжьэу дыпсэут. Дэ школыр къызэрыдухыу тІуми пионер лэжьыгъэм щІэддзащ. Ар нэхъыбэу зи фІыщІэр си адэ-анэмрэ Энн и анэмрэщ. Абыхэм а лэжьыгъэм дыхэтыну сыт щыгъуи дыхуагъэушт икІи ахэр хуабжьу щыгуфІыкІащ ди гъащІэм япэ увыпІэр полновременнэ лэжьыгъэм зэреттам. Сэ илъэс 19 сыхъуу Вефилым срагъэблэгъащ икІи 1982 гъэм Эннрэ сэрэ дызэрыша иужь, ари Вефилым кърагъэблэгъащ.

Энн: Дэ Вефилым дыщылэжьэну дигу ирихьт, ауэ хъыбарыфІыр зыгъэІухэр мащІэу здэщыІэ щІыпІэм дыкІуэну сыт щыгъуи дыхуейт. Миссионеру лажьэу щыта дэлъху, шыпхъухэр Вефилым щыІэти, абыхэм дащыдэуэршэркІэ а лэжьыгъэм дыхэтыну диІэ гукъыдэжыр хэхъуэт. Илъэсищым къриубыдэу, апхуэдэ гукъыдэж дызэриІэр пщыхьэщхьэ къэс Иеговэ жетІащ. Галаад Школым дыщрагъэблэгъам гуфІэгъуэ диІар фи нэгу къыщІэвгъэхьэт! Дэ 79 классым дыщеджа иужь Либерием дагъэкІуащ.

КЪУЭШ, ШЫПХЪУХЭМ Я ЛЪАГЪУНЫГЪЭМ КЪАРУ КЪЫТХИЛЪХЬЭТ

Пол: Самолётхэр Либерием лъатэу зэрыщІадзэжу япэ рейсымкІэ дэ абы дылъэтащ. «Комендантский час» жыхуаІэр къэралым иджыри щыІэт икІи Іуэхур зэхэзэрыхьат, убэлэрыгъи хъунутэкъым. А зэманыр апхуэдизкІэ шынагъуэти, машинэм и глушителыр къыщиукІым деж цІыхухэр гужьеяуэ зэбгрыжт. Эннрэ сэрэ ди гум гупсэхугъуэ илъын щхьэкІэ Псалом тхылъым пщыхьэщхьэ къэс деджэт. Къэралым апхуэдэ гузэвэгъуэ зэрыщыІэм емылъытауэ, дэ ди лэжьыгъэр хуабжьу дигу ирихьт. Энн миссионер лэжьыгъэр игъэзащІэт, сэ Вефилым Джон Чару́кa зи цІэ къуэшым сыдэлажьэт. Ар илъэс куэд хъуауэ Либерием щыпсэут икІи къуэш, шыпхъухэм я гугъуехьхэм фІыуэ щыгъуазэти, абы и деж куэдым зыщезгъэсащ.

Энн: Либерием щыІэ дэлъху, шыпхъухэм я гуапагъым дэ занщІэу дыкъыдихьэхащ. Абыхэм я гур зэІухат икІи ахэр Алыхьым хуэпэжт. Дэ ди гур абыхэм занщІэу кІэрыпщІащ, зы унагъуэм хуэдэуи дыхъуащ. Ахэр сыт и лъэныкъуэкІи къыддэІэпыкъут, чэнджэщыфІхэри къыдатт. Абы хъыбарыфІыр щыбгъэІуну хъуэпсэгъуэт! ЦІыхухэм я деж дыкъызэрыкІуэратэкъым яфІэмыфІыр, атІэ ахэр хуеиху я деж дызэрыщымыІэрат. Уэрамым ущрикІуэкІэ щІэх-щІэхыурэ зэхэпхыфынут цІыхухэр Библием ит темэхэм зэрытепсэлъыхьыр. Дэ абыхэм дабгъэдыхьэу псалъэмакъым пытщэн хуей къудейуэ арат. Апхуэдизу цІыху куэд Библием едгъэджэн щІэддзэти, ахэр псори ебгъэджэн щхьэкІэ зэман яхухэпхыну тынштэкъым. Апхуэдэ гугъуехь псоми яІакІэрэт!

ШЫНЭР ЗЫТЕДМЫГЪЭКІУЭНУ ИЕГОВЭ КЪЫДДЭІЭПЫКЪУАЩ

Пол: ИлъэсиплІкІэ мамырыгъэ гуэр щыІа иужь 1989 гъэм Либерием зауэ къыщыхъеящ. 1990 гъэм июлым и 2 ди филиалыр здэщыІэ щІыпІэр зыкъэзыІэтахэм яубыдащ. НэгъуэщІ къэралхэм щыпсэухэм запытщІэну мазищкІэ Іэмал лъэпкъ диІакъым, ди Іыхьлыхэри, дунейпсо Іуэху зехьэпІэри абыхэм хэту. Унафи хабзи зэрыщымыІэжым къыхэкІкІэ ихъуреягъкІэ зэрызехьэт икІи мэжэщІалІэмрэ залымыгъэмрэ дэнэкІи зыщаубгъуат, цІыхубз куэдми лей ирахат. Апхуэдэу илъэс 14 екІуэкІащ.

Энн: Зы лъэпкъым щыщхэм нэгъуэщІ лъэпкъым щыщхэр яукІт. ІэщэкІэ зэщІэузэда цІыху гущІэгъуншэхэм зыми емыщхь щыгъын ящыгъыу уэрамхэр щІащыкІт икІи унэхэр псори яхъунщІэт. Языныкъуэхэм цІыху яукІыну зыуи къащыхъутэкъым. Блокпостхэм деж яукІа цІыхухэр Іуащхьэу щызэтралъхьэт (апхуэдэ блокпостхэр Вефилым и пэгъунэгъууи щыІэт). ЯукІахэм ди дэлъху, ди шыпхъуи миссионеритІи хэтащ.

ЩІэпхъаджащІэхэм ялъагъу мыхъу лъэпкъхэм щыщхэр къалъыхъуэт икІи къагъуэта иужь яукІт. Абы къыхэкІкІэ Иеговэ и Щыхьэт куэдым миссионерхэми Вефилым щылажьэхэми дэлъху, шыпхъухэр я деж щагъэпщкІут. Филиалым зыщызыгъэпщкІухэр хэти япэ этажым коридорхэм, кабинетхэм, хэти етІуанэ этажым пэшхэм ди гъусэу щыжейт. Псалъэм папщІэ, дэ ди пэшым цІыхуибл хъу унагъуэ ди гъусэу щыпсэуащ.

Пол: Махуэ къэс ІэщэкІэ зэщІэузэда цІыхухэр Вефилым къакІуэт къалъыхъуэхэм щыщ гуэр дгъэпщкІурэ дымыгъэпщкІурэ къащІэн щхьэкІэ. Абы къыхэкІкІэ филиалым хъумакІуэу къуэшиплІ дгъэувт: тІур куэбжэм деж щытт, тІур унэ кІуэцІым щхьэгъубжэм дэплъу куэбжэм деж щытитІым кІэлъыплът. Куэбжэм деж щытхэм я Іэр я гупэмкІэ щыІэмэ, псори тэмэмт, я щІыбагъымкІэ щыІэмэ, псынщІэу къуэш, шыпхъухэр гъэпщкІун хуейт.

Энн: Зэгуэр ІэщэкІэ зэщІэузэдауэ губжьа цІыху гуп филиалым къыщІэлъэдати, сэ зы шыпхъу си гъусэу ванэм зыщІэдубыдащ. Абы шкаф щІэтым гъэпщкІупІэ иІэт. Шыпхъум абы зыщигъэпщкІуа къудейуэ а гупым щыщ гуэрхэр бжэм къытеуІуэу щІадзащ. КъызэрыщІэкІамкІэ, ахэр сэ къыскІэлъыплъат. Зэман нэхъ диІэн щхьэкІэ Пол абыхэм яжриІащ: «Зэ фымыпІащІэ, си щхьэгъусэр ваннэм щІэсщи, иджыпсту къыщІэкІыжынущ». Ауэ макъ имыщІу гъэпщкІупІэм и щхьэр теппІэу, щыгъынхэр псынщІэу дэплъхьэжыфынутэкъым. Сэ апхуэдизкІэ сыгузавэти сыкІэзызу щІэздзащ. Апхуэдэу сыгузавэу бжэр Іусхатэмэ, Іуэхур зыІутыр къащІэнкІэ шынагъэ щыІэт. Сэ сщІэнур сымыщІэу Иеговэ лъэІукІэ зыхуэзгъэзащ. Арати, бжэр Іусхри, зыри къэмыхъуам хуэдэу абыхэм сэлам есхащ. А цІыхухъухэм ящыщ зыр къызэІунщІщ, шкафымкІэ иунэтІри, щыгъынхэр зэІипщІыкІыу щІидзащ. ГъэщІэгъуэныращи, абы а шыпхъур къигъуэтакъым. ИтІанэ абыхэм адрей пэшхэри унащхьэри къащащ, ауэ зыри къагъуэтакъым.

ПЭЖЫР КІЫФІЫГЪЭМ АДЭКІИ КЪЫХЭЛЫДЫКІТ

Пол: Мазэ зыбжанэкІэ дэ шхынкІэ гугъу дехьащ. Ауэ псом нэхърэ нэхъапэр — Алыхьым къыбгъэдэкІ духовнэ ерыскъыр — сыт щыгъуи диІэт. Иныкъуэхэм деж «пщэдджыжьышхэу» диІэр пщэдджыжьым екІуэкІ программэрат. Абы дэ махуэ къэс къару къытщІилъхьэт.

Филиалым щыІэ шхынымрэ псымрэ дыухатэмэ, дэ шхын къэтлъыхъуэну дежьэу, ди деж зыщызыгъэпщкІу къуэш, шыпхъухэр я закъуэ къэдгъэнэн хуей хъунут. Апхуэдэу тщІатэмэ, абыхэм я гъащІэр яфІэкІуэдынкІэ шынагъэ щыІэнут. Ауэ Иеговэ сыт щыгъуи гъэщІэгъуэныщэу и нэІэ къыттригъэтт икІи шынэм дызэщІимыубыдэну къыддэІэпыкъут.

Іуэхур нэхъ Іей хъуурэ кІуэми, пэжыр нэхъ нэху хъуурэ кІуэт. Къуэш, шыпхъухэм я гъащІэр кърагъэлын щхьэкІэ мызэ-мытІэу здэщыІэ щІыпІэр къагъэнэн хуей хъут. Ауэ ахэр псоми пэлъэщащ, Алыхьми пэжу къыхуэнащ. Уеблэмэ языныкъуэхэм жаІэт а зауэм ахэр гузэвэгъуэшхуэм хуигъэхьэзырауэ. Зэхуэсым и нэхъыжьхэмрэ нэгъуэщІ къуэшхэмрэ лІыгъэ ягъэлъагъуэу зэхуэсым щыщхэм псэемыблэжу я нэІэ трагъэтт. Пэжщ, къуэш, шыпхъу куэдым я унэхэр къагъэнэн хуей хъуащ, ауэ абы емылъытауэ хъыбарыфІыр ягъэІун, зэІущІэхэми кІуэн къагъэнакъым. Абыхэм зэІущІэхэр щекІуэкІын щхьэкІэ узыщІэс хъун гуэрхэр мэзым щащІт. А зэман шынагъуэхэм зэІущІэхэмрэ хъыбарыфІ гъэІунымрэ къуэш, шыпхъухэм гушхуэныгъэрэ гугъэрэ къаритт. ГъэщІэгъуэныращи, шхын, щыгъын, нэгъуэщІ хьэпшыпхэри щахуэдгуэшкІэ куэдыр щыгъыным щІэмыупщІэу, хъыбарыфІыр щагъэІукІэ яІыгъын сумкэ щхьэкІэ къыдэлъэІут. Абы дэ икъукІэ дигъэгушхуэт! Зигу икъутыхьа цІыхухэр хъыбарыфІым яфІэфІу едаІуэт. Абыхэм ягъэщІагъуэт апхуэдиз зэрызехьэ здэщыІэм Иеговэ и Щыхьэтхэр насыпыфІэу, гуфІэгъуэ я нэгум кърихыу зэрыщытыр. Ахэр дуней кІыфІым дыгъэ бзий къыхэлыдыкІым хуэдэт (Мт. 5:14—16, ДЩІ). А псом и фІыгъэкІэ щІэпхъаджащІэ гущІэгъуншэхэм щыщ гуэрхэри иужькІэ Иеговэ и Щыхьэт хъуащ.

КЪУЭШ, ШЫПХЪУХЭР КЪЭДГЪЭНЭН ХУЕЙ ЩЫХЪУАМ ИЕГОВЭ КЪАРУ КЪЫДИТАЩ

Пол: Дэ мызэ-мытІэу Либериер къэдгъэнэн хуей хъуащ: щэ — зэман кІэщІкІэ, тІэу — илъэс псокІэ. Миссионеру лажьэ ди зы шыпхъум ди гурыщІэхэр къызыхэщ псалъэхэр жиІащ: «Галаад Школым дызэрагъэсам хуэдэу дэнэ щІыпІэ дымыкІуами къуэш, шыпхъухэр фІыуэ тлъагъут. Абы къыхэкІкІэ ахэр апхуэдэ гугъуехь пэщІэту къэдгъэнэн хуей щыхъум деж дэ ди гур икъутыхьт». Ауэ нэгъуэщІ къэралхэм дыщыщыІэм дежи дэ абыхэм дадэІэпыкъуну Іэмал дызэриІэм гурыфІыгъуэ къыдитт.

Энн: 1996 гъэм, май мазэм дэ Либерием хъыбарыфІ гъэІуным епха мыхьэнэшхуэ зиІэ документхэр машинэм итлъхьэри, дэр нэмыщІ Иеговэ и ЩыхьэтитІ ди гъусэу шынагъуэ нэхъ здэмащІэ щІыпІэм дыкІуэну гъуэгу дытеуващ. А щІыпІэр филиалым километр 16 хуэдизкІэ пэжыжьэт. Дэ гъуэгу дыздытетым щІэпхъаджащІэхэм даІууащ. Ахэр уафэм ІэщэкІэ дэуейуэ щІадзэри дыкъагъэувыІащ. Пол къагъанэри адрейхэр машинэм дыкърадзри ежьэжахэщ. Дэ ди пІэм дижыхьауэ дыщыту Пол къызэрытхуэкІуэр къэтлъэгъуащ. Абы и натІэм лъыпсыр къежэхти, и щхьэм фочкІэ къеуа ди гугъащ. АпхуэдизкІэ дыгужьеяти, Пол и щхьэм фочкІэ еуауэ щытамэ, ар псэууэ къызэрымынэным дегупсысакъым. КъызэрыщІэкІамкІэ, а цІыхухъухэм щыщ зым Пол машинэм къыщридзым и щхьэм къеуауэ арат. Ди насыпти, абы уІэгъэ телъыр шынагъуэтэкъым.

Абы хэту дэ къэтлъэгъуащ зауэлІхэм зауэ щекІуэкІ щІыпІэм цІыхухэр ирашын щхьэкІэ машинэшхуэм зэрырагъэтІысхьэр. Машинэм цІыхухэр игуауэ исти, дэ абы и бортыр дыубыдыфа къудейуэ аращ. Шофёрым машинэм апхуэдизу псынщІэу зырыригъэчати, дэ дыкъехуэх пэтащ. Машинэр къигъэувыІэну дэ дылъаІуэт, ауэ ар апхуэдизу гужьеяти зыри зэхихтэкъым. Абы дыкъызэремыхуэхар гъэщІэгъуэнщ икІи машинэр къыщыувыІам дэ дызэщІэкІэзызэт.

Пол: Ди щыгъыныр фІей хъуат икІи зэфІэтхъат. «Дауэ дыкъела?» — жытІэу дызэплъыжу дыщытт. А жэщым дэ щІыбым нэху дыкъыщекІащ. ЕтІуанэ махуэм шэхэм гъуанэ-пщІанэ ящІа вертолётымкІэ Сьерра-Лео́не дынагъэсащ. Дэ псэууэ дыкъызэрынам щхьэкІэ дыгуфІэми, Либерием къыщына къуэш, шыпхъухэм ди гур ящІэузт.

КЪЫКІЭЛЪЫКІУЭ ГУГЪУЕХЬЫМ ДЫПЭЛЪЭЩЫНУ ИЕГОВЭ КЪАРУ КЪЫДИТАЩ

Энн: Дэ Сьерра-Леоне, Фрита́ун къалэм щыІэ филиалым дыщынэсам дэлъхухэм гуапэу драгъэблэгъащ икІи дызыхуей дыхуагъэзащ. Шынагъуэ здэщымыІэ щІыпІэм дыщыІэми, сэ Либерием щыслъэгъуа псор си нэгум щІэтт. Махуэм шынэмрэ гузавэмрэ сызэщІиубыдауэ сыщытт, жэщым сыкъыхэщтыкІт зы шынагъуэ гуэр къэхъуа хуэдэу сепщІыхьу. Иныкъуэхэм деж жьы схуримыкъуу сыхъут. Апхуэдэу сыщыхъум деж Пол си Іэр къиубыдтти, тхьэлъэІукІэ Алыхьым зыхуигъазэт. Сэ шынэм сыкъиутІыпщыху ди уэрэдылъэм ит уэрэдхэр жытІэт. Сэ си щхьэр зэІыхьэу къысщыхъут икІи миссионер лэжьыгъэм сыхэмытыжыфыну си гугъэт.

АдэкІэ къэхъуар сэ зэи сщыгъупщэжынукъым. Апхуэдэу сыхъуу щыщІэздза тхьэмахуэм журналитІ къытІэрыхьащ. Зыр 1996 гъэм июным и 8 къыдэкІа «Фыкъызэщыу!» журналыращ. Абы «Как справиться с приступами панического страха» жыхуиІэ статьяр итащ. А статьям къызгуригъэІуащ апхуэдэу сыщІыщытым и щхьэусыгъуэр. ЕтІуанэр 1996 гъэм майм и 15 къыдэкІа «ХъумакІуэ чэщанэращ». Абы «Откуда у них берутся силы?» жыхуиІэ статьяр итащ. Абы щыжыІат хьэндырабгъуэм и дамэм и нэхъыбэр пымытыжу щытми, ар зэрылъэтэфынур. Апхуэдэу дэри Иеговэ и къару лъапІэм и фІыгъэкІэ нэгъуэщІхэм зыгуэр яхуэтщІэфынущ, эмоциональнэу гугъу дехьми. Ар игъуэ дыдэу Иеговэ къыдита духовнэ ерыскъыт (Мт. 24:45). Сэ апхуэдэ статьяхэр зэхуэсхьэсат, къытезгъэзэжурэ седжэн щхьэкІэ. ИужькІэ гукъэкІыж Іейхэм апхуэдэуи самыгъэгузэвэжу хъуащ.

ЗЭХЪУЭКІЫНЫГЪЭХЭМ ДЕСЭНУ ИЕГОВЭ КЪЫДДЭІЭПЫКЪУАЩ

Пол: 2004 гъэр и кІэм щынэблагъэм Либерием дызэрагъакІуэрэ илъэс 20 хуэдиз хъуат. А зэманым къриубыдэу ар ди унэм хуэдэ хъуат. Зауэр иухат, филиалми ухуэныгъэ гуэрхэм щІадзэну траухуауэ къуэшхэр къыдэлъэІуащ нэгъуэщІ къэралым дыІэпхъуэну.

Либерием щыІэ къуэш, шыпхъухэм апхуэдизкІэ десати, ахэр къэдгъанэу, нэгъуэщІ щІыпІэ дыкІуэну икъукІэ къыдэхьэлъэкІт. Зэгуэр дэ ди Іыхьлыхэр къэдгъэнауэ щытащ, Галаад Школым дыкІуэн щхьэкІэ. Абы щыгъуэ Иеговэ и нэфІ къызэрытщыхуар тщІэжти, иджыпстуи къытхуагъэфэща къалэныщІэм арэзы дытехъуащ. Апхуэдэу дэ Либерием и гъунэгъу Га́нэ къэралым дагъэкІуащ.

Энн: Либериер къыщыдгъанэм дэ нэпс куэд щІэдгъэкІащ. Дэ Іейуэ дгъэщІэгъуат Фрэнк зи цІэ Іущагъ зыхэлъ, ныбжь зиІэ дэлъхум жиІа псалъэхэр: «Фэ дызыщывгъэгъупщэн хуейщ!» ИтІанэ пищащ: «ДауикІ, дэ фи гум сыт щыгъуи дилъынущ, ауэ къалэныщІэ къыватам фи гури фи псэри хэфлъхьэн хуейщ. А къалэныр къывэзытар Иеговэщ. Аращи, фи лъагъуныгъэр зэрыщыту Ганэ щыІэ къуэш, шыпхъухэм ефт». А псалъэхэм дэ Іейуэ дыхуэныкъуэт. Дэ а къэралым дыкъэзыцІыху куэди щыІэтэкъым икІи псори ди дежкІэ щІэт, ауэ дэ абыи ныбжьэгъущІэхэр щызэдгъэгъуэтыну дыхьэзырт.

Пол: Зэман куэди дэмыкІыу Ганэ щыІэ ди къуэш, ди шыпхъухэр дэ фІыуэ тлъэгъуащ икІи дэ ахэр унагъуэщІэ тхуэхъуащ. Абы Иеговэ и Щыхьэт куэд щыІэт икІи абыхэм я фІэщхъуныгъэмрэ я пэжагъымрэ щапхъэ тхуэхъуащ. Ганэ илъэс 13 дыщыпсэуа иужь КъуэкІыпІэ Африкэм и филиалым, Ке́нием дагъэкІуащ. Япэм хъыбарыфІыр зи гъусэу дгъэІуа къуэш, шыпхъухэм дахуэзэшми, Кением ныбжьэгъу куэд занщІэу къыщыдгъуэтащ. Дэ дыздагъэкІуа щІыпІэм хъыбарыфІ зыгъэІунухэм егъэлеяуэ хуэныкъуэт!

ДИ ГЪАЩІЭМ ДЫХЭПЛЪЭЖМЭ

Энн: Дэ ди гъащІэм Іуэхугъуэ шынагъуэ куэдым дыпэщІэхуащ. ДауикІ, апхуэдэ Іуэхугъуэхэр цІыхум и эмоциональнэ, физическэ узыншагъэм зэран хуэмыхъуу къанэкъым. Алыхьым и лэжьакІуэхэри абы щыхъумакъым. Фочауэ макъ зэрызэхэсхыу е зыгуэр къызэрагъауэу си гур къокІуэ, си Іэхэри мэундэрабжьэ. Ауэ Иеговэ сыт щыгъуи къыддэІэпыкъуну хьэзырщ. Псалъэм папщІэ, дэлъху, шыпхъухэр къигъэсэбэпу къызэрыддэІэпыкъуар дэ мызэ-мытІэу ди щхьэкІэ зыхэтщІащ. Сэ иджыри къызгурыІуащ: Алыхьым дызэрыхуэлажьэр фІыуэ зэтеухуауэ щыщытым деж, сыт хуэдэ къалэнми упэлъэщыну Иеговэ къару къыует.

Пол: Къуэш, шыпхъухэр мыпхуэдэу къыщыдэупщІ къохъу: «Ди щІыпІэм хъыбарыфІыр щывгъэІуну фигу ирихьрэ?» Къапщтэмэ, къэралыр дахащэу щытыфынущ, ауэ уимыгугъэххауэ шынагъуэ гуэр къэхъуу псоми зихъуэжыфынущ. Аращи, ди дежкІэ нэхъ мыхьэнэ зиІэр къэрал дыздэщыІэракъым, атІэ абы щыІэ ди къуэш, ди шыпхъухэращ. Дэ дыкъызыхэкІари дызыщІапІыкІари зэтемыхуэми, ди гупсысэкІэр зыщ икІи Иеговэ фІыуэ зэрытлъагъум зэкъуэт дещІ. ГъэщІэгъуэныращи, дэ нэгъуэщІ къэралхэм дыщІагъэкІуар къуэш, шыпхъухэр дгъэгушхуэн щхьэкІэт, ауэ пэжыр жыпІэмэ, абыхэм дэращ нэхъыбэу ягъэгушхуар!

НэгъуэщІ щІыпІэ дапщэрэ дыІэпхъуэн хуей мыхъуами, дэ тлъэгъуащ дуней псом тет унагъуэшхуэр Иеговэ къыбгъэдэкІ тыгъэу зэрыщытыр! Дэнэ дыщымыІами, зэхуэсым и фІыгъэкІэ унагъуи уни сыт щыгъуи диІэщ. Аращи, дэ шэч лъэпкъ къытетхьэкъым, Иеговэ дыщыгугъмэ, сыт къэмыхъуами, абы къару къызэрыдитынум (Флп. 4:13, ДЩІ).