Хульдэ и мурадыр къехъулІащ
ИЛЪЭС зытІущ ипэ уэ Индонезием и хытІыгу Санги́хе укІуауэ щытамэ, тенджыз Іуфэм ди шыпхъуищ щыплъагъуну къыщІэкІынт. А щІыпІэм щыпсэухэм а шыпхъухэр фІы дыдэу яцІыху, сыт щхьэкІэ жыпІэмэ ахэр цІыхухэм ядоІэпыкъу Библием итыр къащІэну. Ауэ иджыпсту ди шыпхъухэм нэгъуэщІ Іуэхущ ящІэр.
Сангихе хытІыгур Индонезием и ищхъэрэ лъэныкъуэмкІэ щыІэщ
ЯпэщІыкІэ ахэр тенджызым хыхьэурэ мывэшхуэхэр къыхах. А мывэхэм щыщ гуэрхэр футбол зэрыджэгу топ хуэдиз мэхъу. Абы иужь шыпхъухэр шэнт цІыкІу тотІысхьэри, уадэкІэ лэжьэн щІадзэ. Абыхэм а мывэхэр цІыкІу-цІыкІуххэу, джэд джэдыкІэ нэхърэ нэхъ цІыкІуу якъутэ. ИтІанэ а мывэкІэщхъыр пластикым къыхэщІыкІа пэгунхэм иралъхьэурэ я унэм нэс дэкІуеяпІэ защІэкІэ яхь. Абдеж мывэкІэщхъыр къэпхэм щракІутэ. ИужькІэ къэпхэр машинэм иралъхьэри гъуэгум елэжь ІуэхущІапІэм яшэ.
Хульдэ псы Іуфэм мывэ щызэхуехьэс
Ху́льдэ а шыпхъуищым языхэзщ. Япэм ар и унагъуэр зэрыпсэун ахъшэ къилэжьыхут зэрылажьэу щытар. Ауэ иджы Хульдэ планшет къищэхун щхьэкІэ ахъшэ зэхуихьэсыну мурад ищІащ. Планшет къищэхумэ, абы JW Library® приложениер къигъэсэбэпыфынут. Хульдэ ищІэт хъыбарыфІыр игъэІуну икІи Библиер нэхъыфІу къыгурыІуэну приложением илъ видеохэмрэ нэгъуэщІ материалхэмрэ къызэрыдэІэпыкъунур.
Хульдэ махуэ къэс зэрылажьэ сыхьэт бжыгъэм сыхьэтитІ хигъахъуэри, мазэрэ ныкъуэкІэ лэжьащ. Абы мыин Іейуэ зы грузовой машинэ из хъун мывэкІэщхъ икъутащ. ИкІэм-икІэжым Хульдэ планшет уасэ зэхуихьэсащ.
Хульдэ и планшетыр иІыгъыу
«Мывэ пкъутэну — ар лэжьыгъэ тыншкъым. ДауикІ, сэ егъэлеяуэ сешт икІи си Іэпкълъэпкъри зэрыщыту къызэузт, — жеІэ Хульдэ. — Ауэ сэ планшетыр къызэрысІэрыхьэу, сызэрешари, си Іэпкълъэпкъ узри сщыгъупщэжащ. Абы и фІыгъэкІэ сэ нэхъ тыншу хъыбарыфІыр согъэІу, ди зэІущІэхэми зыхузогъэхьэзыр». Иджыри Хульдэ жеІэ пандемиер щыщІидзам щыгъуэ, зэІущІэхэм зыпищІэн икІи хъыбарыфІыр игъэІун щхьэкІэ планшетыр икъукІэ узыхуэныкъуэ Іэмэпсымэу зэрыщытар. Хульдэ и мурадыр къызэрехъулІам дэри хуабжьу дыщогуфІыкІ.