3 | Алыхьым и лэжьакІуэхэм я щапхъэр
БИБЛИЕР ТОПСЭЛЪЫХЬЫЖ... Алыхьым хуэпэжу щыта цІыхухъухэмрэ цІыхубзхэмрэ, ахэр «дэ дэщхь цІыхуу щытащ» (ЕКЪУБ 5:17).
Сыт абы къикІыр?
Библием къеІуэтэж япэм псэуа цІыхухъухэмрэ цІыхубзхэмрэ я хъыбархэр икІи абыхэм яІа гурыщІэ зэмыщхьхэм топсэлъыхьыж. ДауикІ, абыхэм яхэтщ уи гурыщІэхэм хуэдэ зиІаи.
Дауэ ар къызэрыбдэІэпыкъуфынур?
Дэтхэнэ зы цІыхури хуейщ и гурыщІэхэр адрейхэм къагурыІуэу щытыну. Псом хуэмыдэу абы мыхьэнэшхуэ иІэщ психическэ узыншагъэмкІэ гугъуехь зиІэхэм я дежкІэ. Алыхьым и лэжьакІуэхэм теухуауэ Библием итым дыщеджэм деж, абыхэми ди гурыщІэхэм хуэдэ яІэу зэрыщытам гу лъыдотэ. Абы и фІыгъэкІэ закъуэныгъэр апхуэдэу къыттехьэлъэжкъым икІи дызыгъэгузавэ гупсысэхэмрэ гурыщІэ Іейхэмрэ нэхъ тыншу дыполъэщ.
Зи лъэр щІэхуа икІи дэІэпыкъуэгъуншэу къэнауэ къызыщыхъуу щытахэм я псалъэхэр Библием итщ. «АфІэкІа схуэхьыжкъым» жыпІэу уегупсысмэ, Мусэ, Иляс, Даут сыми апхуэдэ гурыщІэхэр зэраІар зыщумыгъэгъупщэ (Числа 11:14; 1 Царей 19:4; Псалом 55:4).
Библием итщ Аннэ зи цІэ цІыхубзым и щапхъэр. Абы сабий зэримыІэр и гум хьэлъэу телът икІи абы щхьэкІэ Аннэ и пщІэр и жагъуэгъум зэпымыууэ ириудыхт (1 Самуила 1:6, 10).
Библием итщ Іэиуб зи цІэ цІыхухъум и щапхъэр. Абы фІэщхъуныгъэ быдэ иІэ пэтми, и гум уз зэрытелъым къыхэкІыу зэгуэр мыпхуэдэу жиІауэ щытащ: «ГъащІэм гущыкІ хуэсщІащ, афІэкІа сыпсэуну сыхуеижкъым» (Иов 7:16).
Алыхьым и лэжьакІуэ пэжхэр гупсысэ Іейхэм зэрытекІуар дэри къыддоІэпыкъу гурыщІэ Іейхэм дыпэщІэтыну.