Психикэм епха узыфэхэм дуней псом зыщаубгъуащ
«Сэ сыт щыгъуи, мащІэми куэдми, си гум гузавэ телъщ, унэм си закъуэу сыщыщІэсым дежи».
«Гукъыдэжрэ къарурэ щызыхэсщІэм деж, сыгузавэу щІызодзэ, сыт щхьэкІэ жыпІэмэ сэ сощІэ абы занщІэу къыкІэлъыкІуэу къарууншэ дыдэ сыхъуу, си лъэр зэрыщІэхунур».
«Си гугъуехьхэр зыр зым иужь иту зэхэзгъэкІыну сыхуейт, ауэ псоми зэуэ сригузавэу щыщІэздзэ къохъу».
Мыращ психикэм епха узыфэ зиІэхэм я щытыкІэм теухуауэ жаІэр. Уэри мыпхуэдэ гурыщІэхэр ущиІэ къэхъурэ? Е уи Іыхьлы гуэр пэщІэхуа мыпхуэдэ Іуэхугъуэм?
Мыпхуэдэ гуэрым упэщІэхуамэ, зыщумыгъэгъупщэ: уэ уи закъуэкъым. Ди зэманым куэдыр е езыхэр сымаджэщ е я благъэхэм, я ныбжьэгъухэм ящыщ гуэр сымаджэщ.
Дэ «зэман гугъухэм» дыщопсэу икІи ар цІыхухэм я психическэ узыншагъэм зэран хуэмыхъуу къанэкъым (2 Тимофей 3:1). «Всемирная организация здравоохранения» жыхуаІэм зэрыжиІэмкІэ, цІыху псори къапщтэмэ, процент 12,5-м психикэм епха гугъуехь гуэр иІэщ. 2020-нэ гъэм COVID-19 пандемием и ягъэкІэ «тревожное расстройство» зиІэхэм я бжыгъэр процент 26 хуэдизкІэ хэхъуащ, «клиническая депрессия» зиІэхэм я бжыгъэр — процент 28-кІэ.
Статистикэр пщІэным мыхьэнэ иІэщ, ауэ уи психическэ узыншагъэмрэ уи Іыхьлыхэм я узыншагъэмрэ укІэлъыплъыныр нэхъапэжщ.
Психическэ узыншагъэр зищІысыр сыт?
Психическэ лъэныкъуэмкІэ узыншэ цІыхум гурыщІэфІхэр иІэщ икІи махуэ къэс игъэзэщІэн хуей къалэнхэм фІы дыдэу полъэщ. Ар стрессым пэщІэтыфщ, фІыуэ мэлажьэ икІи гъащІэм гуфІэгъуэ хех.
Психическэ узыншагъэм епха гугъуехьхэр:
АР езы цІыхум и ягъэкъым;
АР цІыхур гугъу езыгъэхь, и гупсысэкІэм, и щытыкІэм, и гурыщІэхэм зэран хуэхъу узыфэщ;
цІыхур адрейхэм ядэлэжьэну икІи зэса гъащІэм хуэдэ ирихьэкІыну зэран мэхъу;
и ныбжьым, и культурэм, и фэм, и диным, бгъэдэлъ щІэныгъэм икІи къилэжь ахъшэм емылъытауэ, хэти ар къеуэлІэфынущ.
Психическэ узыфэ зиІэм къыдэІэпыкъунур
ЦІыхум и щытыкІэм хуабжьу зихъуэжамэ, жеймрэ шхэнымрэ епхауэ гугъуехь иІэмэ, зэман куэдкІэ гукъыдэж имыІэу щытмэ, гузавэ и гум телъмэ е и лъэр щІэхуамэ, сыт абы ищІэ хъунур? Дохутырхэм захуигъазэ хъунущ, и щытыкІэм и щхьэусыгъуэр къыгурыІуэн икІи зигъэхъужын щхьэкІэ.
Хьисэ Мэссихь хуэдэу Іущагъышхуэ зыбгъэдэлъа зы цІыху мы дунейм тетакъым. Абы жиІауэ щытащ: «Узыншэхэракъым дохутыр хуэныкъуэр, атІэ сымаджэхэращ» (Маттэ 9:12). Дохутырхэмрэ хущхъуэхэмрэ я фІыгъэкІэ сымаджэм и щытыкІэр куэдкІэ нэхъыфІ хъуфынущ, гъащІэми гуфІэгъуэ хихыу псэуфынущ. ЦІыхум и щытыкІэр мыщІагъуэу зэман куэдкІэ къекІуэкІмэ е зэуэ и Іуэхур нэхъ Іей хъуамэ, кІыхь-лІыхь зимыщІу дохутырым захуигъэзэным мыхьэнэшхуэ иІэщa.
ДауикІ, Библиер — медицинэм теухуа тхылъкъым. Ауэ абы ит чэнджэщхэр цІыхум и психическэ узыншагъэм сэбэп хуэхъуфынущ. Абы теухуауэ къыкІэлъыкІуэ статьяхэм нэхъыбэ къыщыпщІэфынущ.
a «ХъумакІуэ чэщанэ» журналым зэрызагъэхъуж Іэмалхэм щыщ гуэр игъэкІуатэу аракъым. Мы упщІэм теухуауэ щхьэж и Іуэхур зыІутым елъытауэ езым унафэ ищІыжын хуейщ.