ХъыбарыфІыр дгъэІуну Иеговэ дапхуэдэу къызэрыддэІэпыкъур?

1. КъэкІуэну зэманым дызыпэщІэхуэнур сыт икІи сытым шэч къытедмыхьэми хъуну?

ХЪЫБАРЫФІЫР щыдгъэІукІэ цІыхухэр къызэрытпэрыуэнур дэ дощІэ. КІуэ пэтми, абыхэм я бжыгъэр хэхъуэнущ икІи ахэр къызэрытхущытыр нэхъ Іей хъунущ (Дан. 11:44; 2 Тим. 3:12; Апок. 16:21). Ауэ, абы емылъытауэ, дэ шэч къытедмыхьэми хъунущ Иеговэ дызыхуэныкъуэ дэІэпыкъуэгъур къызэрыдитынум, сыт щхьэкІэ жыпІэмэ Алыхьыр и лэжьакІуэхэм сыт щыгъуи дэІэпыкъуу щытащ, абыхэм я къалэнхэр дапхуэдизу гугъуу щымытами. Ар наІуэу къэтлъэгъун щхьэкІэ, Иезекииль бегъымбарым и гъащІэм къыщыхъуам дыхэплъэнщ. Абы Бабилэн гъэрыпІэм яша журт цІыхухэм Алыхьым и хъыбарыр яхуиІуатэу щытащ.

2. Иеговэ Иезекииль зыхуигъэкІуа цІыхухэм щхьэкІэ сыт жиІар икІи сыт мы статьям щызэпкърытхынур? (Иезекииль 2:3—6).

² Иезекииль Алыхьым и хъыбарыр щигъэІуа щІыпІэм сыт хуэдэ цІыхухэм хуэзэу щыта? Иеговэ абыхэм цІыху «напэншэкІэ», «ерыщкІэ» еджащ. Абы нэмыщІ ахэр банэхэмрэ акърэбхэмрэ ещхьу жиІащ. Аращи, гъэщІэгъуэнкъым «умышынэ» жиІэу Алыхьым и бегъымбарым мызэ-мытІэу зэрызыхуигъэзар. (Къеджэ Иезекииль 2:3—6.) Иезекииль Алыхьым и хъыбарыр ехъулІэныгъэ иІэу игъэІуащ, сыт щхьэкІэ жыпІэмэ: 1) абы а къалэныр къезытар Иеговэт, 2) Алыхьым и къару лъапІэм абы къару къыхилъхьэт, 3) абы и фІэщхъуныгъэр Алыхьым и псалъэхэм хагъахъуэт. Дапхуэдэу мы Іуэхугъуищыр бегъымбарым зэрыдэІэпыкъуар? Дауэ ахэр дэри къызэрыддэІэпыкъур?

ИЕЗЕКИИЛЬ И КЪАЛЭНЫР КЪЕЗЫТАР ИЕГОВЭТ

3. Сыт хуэдэ псалъэхэм Иезекииль ягъэгушхуауэ къыщІэкІыну икІи Иеговэ абы щІэгъэкъуэн зэрыхуэхъунур дапхуэдэу къызэрыгуригъэІуар?

³ Иеговэ Иезекииль мыпхуэдэу жриІащ: «[Сэ] узогъакІуэ» (Иез. 2:3, 4). А псалъэхэм бегъымбарыр хуабжьу ягъэгушхуауэ къыщІэкІынщ. Сыт апхуэдэу жыпІэ щІэхъунур? Иезекииль ищІэжу щытагъэнщ а псалъэ дыдэхэмкІэ Иеговэ Мусэрэ Ешайарэ зэрызыхуигъэзар, ахэр бегъымбару щытригъэувам щыгъуэ (Исх. 3:10; Ис. 6:8). Иезекииль иджыри ищІэт Алыхьыр абыхэм дэІэпыкъуу зэрыщытар. Абы къыхэкІкІэ «[Сэ] узогъакІуэ» жиІэу Иеговэ тІэунейрэ къыщыжриІам щыгъуэ, Алыхьыр къызэрыдэІэпыкъунур и фІэщ имыщІыну Иезекииль зы щхьэусыгъуи иІэтэкъым. Абы нэмыщІ Иезекииль тхылъым мыпхуэдэ псалъэхэм куэдрэ ущрохьэлІэ: «Иеговэ... къызжиІащ» (Иез. 3:16). Иджыри абы мызэ-мытІэу мыпхуэдэу щыжыІащ: «Иеговэ аргуэру зыкъысхуигъазэри... жиІащ» (Иез. 6:1). ДауикІ, Иезекииль шэч къытрихьэтэкъым а къалэныр Иеговэ къызэрыритам. А псом нэмыщІ Иезекииль и адэр дин пашэу зэрыщытам къыхэкІкІэ Алыхьыр и бегъымбархэм зэрыдэІэпыкъуу щытар и къуэм жриІэжу къыщІэкІынт. Псалъэм папщІэ, Исхьэкъ, Екъуб, Иеремие сымэ Иеговэ мыпхуэдэу яжриІауэ щытат: «Сэ сыуигъусэщ» (ЩІэдз. 26:24; 28:15; Иер. 1:8).

4. Сыт хуэдэ гупсысэхэм Иезекииль гупсэхугъуэрэ къарурэ къратауэ къыщІэкІыну?

⁴ Иезекииль и хъыбарыр израил цІыхухэм дауэ къащыхъуа? Иеговэ мыпхуэдэу жиІат: «Израил лъэпкъым къодэІуэн идэнукъым, сыт щхьэкІэ жыпІэмэ сэ къызэдэІуэну ар хуейкъым» (Иез. 3:7). Иезекииль и хъыбарыр ІэщІыб зэращІымкІэ цІыхухэм ІэщІыб ящІыр Иеговэт. Алыхьым и псалъэхэм и фІыгъэкІэ бегъымбарым зы гупсысэ къыгурыІуат: журт лъэпкъыр Иезекииль зэремыдэІуам къикІтэкъым абы и къалэныр фІыуэ имыгъэзэщІауэ. Иеговэ иджыри Иезекииль жриІащ абы игъэІуа хьэкумыр къыщыхъунум «бегъымбар къазэрыхэтар» псоми зэращІэнур (Иез. 2:5; 33:33). Шэч хэмылъу, а гупсысэхэм Иезекииль гупсэхугъуэ къратащ икІи, Алыхьым и хъыбарыр игъэІун щхьэкІэ, къару къыхалъхьащ.

ДИ КЪАЛЭНЫР КЪЫДЭЗЫТАР ИЕГОВЭЩ

5. Исайя 44:8 зэритымкІэ, къару къыздитхыр дэнэ?

⁵ Дэри хъыбарыфІыр дгъэІуну къалэн тщызыщІар Иеговэу зэрыщытыр зэрытщІэм къару къытхелъхьэ. Абы и «щыхьэту» дыщытыну пщІэ къытхуищІащ (Ис. 43:10). Ар сыту щІыхьышхуэ! «Умышынэ» жиІэу Иезекииль зэрыжриІам хуэдэ дыдэу, дэри Иеговэ «фымышынэ» жиІэу зыкъытхуегъазэ. НтІэ, ди жагъуэгъухэм дащымышынэну сыт хуэдэ щхьэусыгъуэхэр диІэ? Дэри, Иезекииль хуэдэу, хъыбарыфІыр дгъэІуну дызыгъакІуэр Иеговэщ икІи а лэжьыгъэр тэмэму дгъэзэщІэну ар къыддоІэпыкъу. (Къеджэ Исайя 44:8.)

6. 1) Иеговэ къыддэІэпыкъуну сыт хуэдэ псалъэхэмкІэ дыкъигъэгугъэрэ? 2) Гупсэхугъуэрэ къарурэ къыдэзытыр сыт?

⁶ Сыт щыгъуи щІэгъэкъуэн къытхуэхъуну Иеговэ дыкъегъэгугъэ. Псалъэм папщІэ, и щыхьэту дызэрыщытыр жиІэн ипэ абы мыпхуэдэу дыкъигъэгугъащ: «Псым ущызэпрыкІкІэ сэ сыуигъусэнущ, псыежэххэми ущызэпрыкІкІэ абыхэм ущІахъумэнукъым. МафІэм укІуэцІрыкІми, абы уисынукъым икІи мафІэ бзийр къопхъуэнукъым» (Ис. 43:2). ИкІи пэжщ, хъыбарыфІыр щыдгъэІукІэ псы уэрхэм ещхь гугъуехьхэм икІи мафІэм хуэбгъадэ хъуну гъэунэхуапІэхэм дыпэщІохуэ. Ауэ, а псом емылъытауэ, Иеговэ къызэрыддэІэпыкъум и фІыгъэкІэ дэ хъыбарыфІыр дгъэІун щыдгъэткъым (Ис. 41:13). Иезекииль и зэманым хуэдэу, ноби Библием ит хъыбарыр и нэхъыбапІэм ІэщІыб ящІ. Ауэ дэ къыдгуроІуэ цІыхухэм къыдэдэІуэн зэрамыдэм ди къалэныр тэмэму дымыгъэзащІэу къызэримыкІыр. Иеговэ икъукІэ мэгуфІэ, хъыбарыфІыр щыдгъэІукІэ ди Іэр зэредмыхьэхыр щилъагъум деж. Ар зэрытщІэ закъуэм гупсэхугъуэ къыдет икІи къару къытхелъхьэ. Апостол Паул жиІауэ щытат: «Хэти и Іуэхум пэкІуэ и Іыхьэр игъуэтынущ» (1 Кор. 3:8; 4:1, 2). Абы теухуауэ илъэс куэд хъуауэ пионеру лажьэ ди зы шыпхъум мыпхуэдэу жиІауэ щытащ: «Лэжьыгъэ дгъэзащІэм къару етхьэлІэр Иеговэ гулъытэншэу къызэримыгъанэр пщІэну сыту гуфІэгъуэшхуэ!»

АЛЫХЬЫМ И КЪАРУ ЛЪАПІЭМ ИЕЗЕКИИЛЬ КЪАРУ КЪРИТТ

7. Алыхьым и нэгу щІигъэкІам щегупсысым сытыт Иезекииль и гум щыщІэр? (Обложкэм тет сурэтым феплъ.)

⁷ Алыхьым и къару лъапІэм и инагъыр Иезекииль и нэгу щІигъэкІащ. Абы илъэгъуащ лъэкІыныгъэшхуэ зиІэ мелыІычхэмрэ уафэм щыІэ гум и шэрхъышхуэхэмрэ Алыхьым и къару лъапІэм зэриунэтІыр (Иез. 1:20, 21). Иезекииль илъэгъуар дауэ къызэрыщыхъуар? Абы мыпхуэдэу итхыжащ: «Ар къыщыслъагъум щІыгум нэкІукІэ зытездзащ» (Иез. 1:28). ГъэщІэгъуэнкъым Иезекииль шынэм зэрызэщІищтар. ИужькІэ ар и нэгу щІэкІам мызэ-мытІэу егупсысауэ къыщІэкІынщ. Абы и фІыгъэкІэ Иезекииль шэч къытрихьэтэкъым Алыхьым и къару лъапІэр къриту и къалэныр игъэзэщІэну къызэрыдэІэпыкъунур.

8, 9. 1) Иеговэ кърита къалэным и фІыгъэкІэ сыт Иезекииль иІэ хъуар? 2) Иезекииль цІыху ерыщхэм Алыхьым и хъыбарыр хуиІуэтэфын щхьэкІэ, дапхуэдэу Иеговэ абы къару къызэрыритар?

⁸ Иеговэ Иезекииль мыпхуэдэу унафэ хуищІащ: «ЦІыху лъэпкъым и къуэ, къызэфІэувэ! Сэ уэ сынопсэлъэнущ». А унафэмрэ Алыхьым и къару лъапІэмрэ бегъымбарым къызэфІэувэну къару иратащ. Абы мыпхуэдэу итхащ: «Къару къысхыхьэри, сыкъызэфІигъэуващ» (Иез. 2:1, 2). Алыхьым и бегъымбару лэжьэху Иезекииль Иеговэ и къару лъапІэм иунэтІащ (Иез. 3:22; 8:1; 33:22; 37:1; 40:1). Алыхьым и къарум и фІыгъэкІэ абы и къалэныр игъэзэщІэну хузэфІэкІт: «зи натІэхэр, мывэм хуэдэу, быдэхэм, зигухэри ерыщ» цІыхухэм Иеговэ и хъыбарыр хуиІуэтэну (Иез. 3:7). Иеговэ Иезекииль жриІащ: «Уи нэкІур, абыхэм я нэкІухэм хуэдэу, быдэ сщІащ, уи натІэри, абыхэм я натІэхэм хуэдэу, быдэ сщІащ. Уи натІэр налмэс мывэм хуэдэу сщІащ, егъэлеяуэ мывэ быдэм хуэдэу. Абыхэм уащымышынэ, я теплъэми Іэнкун зомыгъэщІ» (Иез. 3:8, 9). НэгъуэщІу жыпІэмэ, Иеговэ и псалъэхэм къикІыр мырат: «ЦІыхухэм я ерыщагъым щхьэкІэ, уи Іэр йомыхьэх. Сэ уэ къару уэстынущ».

⁹ Абы иужь Иеговэ и къару лъапІэм Иезекииль Алыхьым и хъыбарыр щигъэІун хуей щІыпІэм ишэри, ар иригъэлъэгъуащ. Бегъымбарым мыпхуэдэу итхыжащ: «Иеговэ и къару лъапІэм и лъэщагъыр зыхэсщІэт». Алыхьым и хъыбарыр икІэм нэс зыгуригъэІуэн икІи фІэщхъуныгъэ быдэ иІэу ар игъэІун щхьэкІэ, Иезекииль махуиблкІэ абы егупсысащ (Иез. 3:14, 15). ИужькІэ Иеговэ и бегъымбарыр губгъуэ нэщІым ишэри, абы «къару къыхыхьащ» (Иез. 3:23, 24). Иджы Иезекииль а къалэным пэрыувэну хьэзырт.

АЛЫХЬЫМ И КЪАРУ ЛЪАПІЭМ КЪАРУ КЪЫТХЕЛЪХЬЭ

10. ХъыбарыфІыр дгъэІун щхьэкІэ, сыт хуэдэ дэІэпыкъуэгъум дыхуэныкъуэ икІи сыт абы и щхьэусыгъуэр?

¹⁰ ХъыбарыфІыр дгъэІун щхьэкІэ, сыт хуэдэ дэІэпыкъуэгъум дыхуэныкъуэ? Мы упщІэм жэуап еттын щхьэкІэ, Иезекииль и щапхъэм дегупсысынщ. Иеговэ кърита къалэным пэрыувэн ипэ Алыхьым и къару лъапІэм абы къару къыхилъхьащ. Абы ещхьу дэри Алыхьым и къару лъапІэр димыІэу хъыбарыфІыр тхуэгъэІунукъым, сыт щхьэкІэ жыпІэмэ, а лэжьыгъэр къигъэувыІэн щхьэкІэ, ШейтІаныр къытпэщІоувэ (Апок. 12:17). ЦІыху еплъыкІэкІэ ШейтІаным дыпэлъэщыну зы Іэмали щыІэкъым. Ауэ, ди Іэр едмыхьэхыу хъыбарыфІыр дгъэІумэ, дэ абы дытекІуэу жыпІэ хъунущ (Апок. 12:9—11). Дапхуэдэ щІыкІэкІэ? ХъыбарыфІыр щыдгъэІукІэ дэ къыдогъэлъагъуэ ШейтІаным дигъэшынэну зэрыхузэфІэмыкІыр. Алыхьым и хъыбарыр дгъэІуну дыкІуэху, ШейтІаным дытокІуэ. Ар къызэрытпэщІэтым емылъытауэ, хъыбарыфІыр зэрыдгъэІум сыт къигъэлъагъуэр? Алыхьыр къызэрытхуэарэзыр икІи и къару лъапІэр къызэрыдитыр (Мт. 5:10—12; 1 Пет. 4:14).

11. Алыхьым и къару лъапІэр дапхуэдэу къызэрыддэІэпыкъур икІи, Иеговэ ар зэпымыууэ къыдитын щхьэкІэ, сыт тщІэн хуейр?

¹¹ Иеговэ Иезекииль и нэкІури и натІэри быдэ зэрищІам сытым дыхуигъасэрэ? Алыхьым и къару лъапІэр къызэрыддэІэпыкъум и фІыгъэкІэ хъыбарыфІыр щыдгъэІукІэ дызыпэмылъэщын гугъуехь щыІэкъым (2 Кор. 4:7—9). НтІэ, Алыхьым и къару лъапІэр зэпымыууэ къыдитын щхьэкІэ, сыт тщІэн хуейр? Дэ еш дымыщІэу и къарур къыдитыну Иеговэ делъэІун хуейщ икІи ди лъэІухэм ар зэредаІуэм шэч къытетхьэн хуейкъым. Хьисэ и лъэужь ирикІуэхэр «фелъэІу... фылъыхъуэ... фытеуІуэ» жиІэу къыхуриджауэ щытащ. А унафэм дытету щытмэ, уафэм щыІэ ди Адэм и къару лъапІэр къыдитынущ (Лк. 11:9, 13; Апост. 1:14; 2:4).

ИЕЗЕКИИЛЬ И ФІЭЩХЪУНЫГЪЭР АЛЫХЬЫМ И ПСАЛЪЭХЭМ ХАГЪАХЪУЭТ

12. Свитокыр дэнэт къыздикІар икІи сытыт абы итыр? (Иезекииль 2:9—3:3).

¹² Иезекииль къару къезыту щытар Алыхьым и къару закъуэратэкъым. Алыхьым и псалъэхэми абы и фІэщхъуныгъэр нэхъ быдэ ящІт. Иеговэ абы свиток зыІэщІэлъ Іэ и нэгу щІигъэкІащ. (Къеджэ Иезекииль 2:9—3:3.) А свитокыр дэнэт къыздикІар? Сытыт абы итыр? Иезекииль и фІэщхъуныгъэр дапхуэдэут абы нэхъ быдэ зэрищІыр? Иджыпсту мы упщІэхэм я жэуапхэр къэтщІэнщ. А свитокыр Алыхьым и тахътэм деж къикІащ. Иезекииль нэхъапэІуэкІэ илъэгъуа мелыІычиплІым щыщ зыр къигъэсэбэпу Иеговэ ар абы къритауэ къыщІэкІынущ (Иез. 1:8; 10:7, 20). А свитокым Иеговэ и псалъэхэр итт: Иезекииль лъэпкъ ерыщым жриІэн хуей хьэкумхэр (Иез. 2:7). А хьэкумхэр свитокым и лъэныкъуитІымкІи тетхауэ щытат.

13. Иезекииль свитокым сытыт ирищІэн хуеяр икІи сыт ар абы и дежкІэ ІэфІу щІыщытар?

¹³ Иеговэ и бегъымбарым жриІащ: «Свиток уэстыр шхы, уи ныбэр абыкІэ из щІы». Иезекииль жыІэдаІуэу а свитокыр зэрыщыту ишхащ. Сыт абы къикІыр? Алыхьым и хъыбарыр игъэІун ипэ бегъымбарым ар зэхищІыкІын хуейт. Ар абы и фІэщ хъун икІи и гум нэсын хуейт, гукъыдэжышхуэ иІэу Алыхьым и хъыбарыр игъэІун щхьэкІэ. ИужькІэ къэхъуар нэхъ гъэщІэгъуэныжт. Иезекииль ишхар «фом хуэдэу ІурыІэфІащ» (Иез. 3:3). Сыт ар абы ІэфІу къыщІыщыхъуар? Иезекииль и дежкІэ Иеговэ и лІыкІуэу щытыныр, ІэфІыкІэм хуэдэу, гурыхьт (Пс. 19:8—11). Абы и гум фІыщІэ илът бегъымбару хуэлэжьэну Иеговэ хуит зэрищІам щхьэкІэ.

14. Кърата къалэным пэрыувэну сыт Иезекииль къыдэІэпыкъуар?

¹⁴ ИужькІэ Иеговэ Иезекииль мыпхуэдэу жриІащ: «Зы псалъэ домыгъэхуу жысІэм фІыуэ къедаІуи, куууэ абы егупсыс» (Иез. 3:10). НэгъуэщІу жыпІэмэ, Иезекииль свитокым ит псалъэхэр и гум ириубыдэн икІи зэхищІыкІын хуейт. Апхуэдэу зэрищІам и фІыгъэкІэ Иезекииль и фІэщхъуныгъэр нэхъ быдэ хъуащ. Иджы ар хьэзыр хъуат гъэрыпІэм щыпсэухэм деж кІуэуэ, Алыхьым и хъыбарыр яхуиІуэтэну (Иез. 3:11). Иеговэ и псалъэхэр Иезекииль и гумрэ и акъылымрэ нэса иужь, Алыхьым кърита къалэным пэрыувэну икІи ар икІэм нигъэсыну къару иІэ хъуащ. (Евгъапщэ Псалом 19:14.)

ДЭРИ ДИ ФІЭЩХЪУНЫГЪЭР АЛЫХЬЫМ И ПСАЛЪЭХЭМ ХАГЪАХЪУЭ

15. ХъыбарыфІыр щыдгъэІукІэ ди Іэр едмыхьэхын щхьэкІэ, сыт куууэ дызэгупсысын хуейр?

¹⁵ ХъыбарыфІыр щыдгъэІукІэ ди Іэр едмыхьэхын щхьэкІэ, дэри Алыхьым и псалъэхэмкІэ ди фІэщхъуныгъэр нэхъ быдэ тщІын хуейщ. Абы щхьэкІэ Иеговэ жиІэ псом куууэ дегупсысын хуейщ. Нобэ ар къыдэпсэлъэн щхьэкІэ и Псалъэ Библиер къегъэсэбэп. НтІэ, сыт дэ тщІэн хуейр ди гупсысэхэр, ди гурыщІэхэр, ди мурадхэр Алыхьым и Псалъэм зэпымыууэ нэхъыфІ ищІын щхьэкІэ?

16. Сыт дэ тщІэн хуейр Алыхьым и Псалъэр нэхъыфІу къыдгурыІуэн щхьэкІэ?

¹⁶ Дыщышхэм деж къару зэрызэдгъэгъуэтым хуэдэ дыдэу, Алыхьым и Псалъэм дыщеджэм икІи абы дыщегупсысым деж ди фІэщхъуныгъэр нэхъ быдэ мэхъу. Аращ Иеговэ Иезекииль свитокыр щІригъэлъэгъуар. Ар хуейщ и ПсалъэмкІэ «ди ныбэр из тщІыну», нэгъуэщІу жыпІэмэ, Библиер фІыуэ къыдгурыІуэну. Абы щхьэкІэ дэ Иеговэ тхьэлъэІукІэ зыхуэдгъэзэн, абы и Псалъэм деджэн икІи куууэ дегупсысын хуейщ. Аращи, япэщІыкІэ Иеговэ долъэІу, и гупсысэхэр къыдгурыІуэн щхьэкІэ, ди гумрэ ди акъылымрэ къытхузэІуихыну. ИужькІэ Библием доджэ. ИтІанэ дыкъоувыІэри, дызэджам куууэ догупсыс. Апхуэдэу тщІэмэ, сыт абы къыпэкІуэнур? Иеговэ и Псалъэм нэхъыбэу дегупсысыху, ар нэхъыфІу къыдгурыІуэнущ икІи ди фІэщхъуныгъэр нэхъ быдэ хъунущ.

17. Библием куууэ дегупсысыным мыхьэнэшхуэ щІиІэр сыт?

¹⁷ Библием деджэным икІи абы куууэ дегупсысыным мыхьэнэшхуэ щІиІэр сыт? Апхуэдэу тщІэмэ, иджыпстуи хъыбарыфІыр дгъэІуну къару диІэнущ, дяпэкІи Иеговэ и хьэкумхэр цІыхухэм яжетІэну тхузэфІэкІынущ. Абы нэмыщІ, Иеговэ и хьэл-щэн дахэхэм дегупсысмэ, абы нэхъ гъунэгъу дыхуэхъунущ. А псом и фІыгъэкІэ фом хуэдэу ІэфІ мамырыгъэрэ гупсэхугъуэрэ дгъуэтынущ (Пс. 119:103).

ДИ ІЭР ЕДМЫХЬЭХЫНУ МУРАД БЫДЭ ДИІЭЩ

18. Ди щІыпІэм хъыбарыфІыр зыхуэтІуатэ цІыхухэр сытым арэзы техъуэн хуей хъуну икІи сыт щхьэкІэ?

¹⁸ Дэ, Иезекииль хуэдэу, бегъымбару дыщымытми, Иеговэ и Псалъэм ит хъыбарыр цІыхухэм яхуэтхьыну мурад быдэ диІэщ. А лэжьыгъэр Иеговэ къигъэувыІэху дэ ар дгъэзэщІэнущ. Алыхьыр мы дунейм къыщыхэІэбэну зэманыр къэсмэ, зыми жиІэфынукъым абы теухуауэ хъыбар ирамыгъэщІауэ икІи Алыхьым ахэр щыгъупщауэ (Иез. 3:19; 18:23). Хуей-хуэмейми цІыхухэр арэзы техъуэнущ къетхьэкІа хъыбарыр Алыхьым къыбгъэдэкІыу зэрыщытам.

19. ХъыбарыфІыр дгъэІуну сыт дэ къыддэІэпыкъунур?

¹⁹ ХъыбарыфІыр дгъэІуну сыт дэ къыддэІэпыкъунур? Иезекииль къару къезыта Іуэхугъуищ дыдэращ. Дэ ди Іэр едмыхьэхыу хъыбарыфІыр догъэІу, сыт щхьэкІэ жыпІэмэ а къалэныр къыдэзытар Иеговэщ, Алыхьым и къару лъапІэм къару къытхелъхьэ икІи абы и Псалъэм ди фІэщхъуныгъэр нэхъ быдэ ещІ. Аращи, Иеговэ къызэрыддэІэпыкъум и фІыгъэкІэ «икІэм нэсыху теубыдэныгъэ диІэу» ди къалэныр дгъэзэщІэну мурад быдэ диІэщ (Мт. 24:13).